Malakus 5
5
Yeso baŋŋə wù tə khə zay kə bəbə kə
1Yeso ghi ngəd tə wi tə n nuu daŋ shi ndòw n nguŋ inyi i loʼ zey, tɔŋŋə n mboʼo Gerasa. 2Nghee tə̀ tə daŋŋə shi tsunə nə kəfən, wù loʼ n təmi bə n səə wi, tə nuu bənə n dzuu a təsay n zay kə bwu kə n kow wi. 3Tə â muu tən kə n dzuu a təsay, wù loʼ n way tə khə daʼa kə ni kwu kûm naŋa tsu wi, kasə̀ nə tətsaʼ. 4Ndəmə tənəŋə, ghə mâ wi kûm nə tətsaʼ nə ifuu nsə nə awɔɔ, tə n tiilə maʼa tsu tədzəm. Wù loʼ n tsəm way tə khənə daʼa kə ni kwu naŋa tsu wi. 5Tə â bəghə tə n bwey kaabə n dzuu a təsay, kɔʼɔ tsuu nə ukaʼ, buʼlə nbɔŋ n tsuʼu tə nsə n tsə tə, kaalə kaabə wû u wi nə atay.
6Nghee tə̀ tə koʼ ndòwnə Yeso n ghab kə, tə n nyəŋ ndòw təm ndow tənguʼ n tənə wi. 7Tə n buʼ shi kɔʼ kəbɔŋ idəŋ dza nə̀, “Yeso, Waa Zaamə mbi, wə dza i ji ngee ghi mə ə? N buʼu kəwɔɔ tə̀ wɔ n zəd i Kəzə̀, kə wə nə chɔdlɔnə mə.” 8Tə â dza sey n təŋkey Yeso mâ dza tə̀ zay kə bwu key nə̀, “Zay kə bwu kə, shi nuu bə n kow wù wən!”
9Sey Yeso n bəb ndòw tə̀ wi nə̀, “Zəd zə i loʼ nə̀ a loʼ ndee?” Wù tii n beeli kɔʼ nə̀, “Zəd zuŋ i loʼ nə̀ a loʼ ‘Kənɔɔ.’ Zəd zuŋ i loʼ nə̀ a loʼ kənɔɔ n təŋkey, ghey loʼ n ndəm.” 10Zay kə bwù key n buʼu kuulə kə kəwɔɔ tə̀ Yeso nə̀ kə̂ tə nə dzùm nuu shiənə ghə nə̀ ghə nuu n mboʼ i tii zə.
11N nəŋə i tii zə nɔɔ kə ufeelibu kə â loʼ fu kə zəə tsuu ndòwnə n bad kə ukaʼ. 12Zay u bwu wey n buʼ Yeso n wɔɔ kə dza nə̀, “Tûm nyi ndòw ghey n feelibu wey tə̀ ghey nyi ndow n kow ghə.” 13Yeso n bəghəm kɔʼ nə̀ ghə nyi ndow n kow feelibu wey. Sey zay u bəbə u tii wə n nuu shi tsu n kow wù wey, nyi ndòw n kow feelibu wey. Feelibu wey udzəm n tyi tsuu ndòw n kaʼ wey, ndòw bəŋŋə bwù nyi ndòw n dzuu, kuŋ nuu i ndòw. Taŋ a feelibu u tii wə â loʼ tə̀ a loʼ ufeelibu təkam təbəghə.
14Ghə̂ ghey ghə â keyyənə feelibu wey n koʼ tsu sey, nyəŋ nuu ndòw inaʼ, ndòw naʼa ndòw ghəə zey i shinə tə̀ ghə̂ ghə inaʼ ghə nsə n kɔli tey tə kuʼlə loʼnə fu. Ghə̂ ghə n shi bə ni bə koʼ ghəə zey i shinə. 15Ambə ghə bə koʼ bənə Yeso ghi wù wey nɔɔ kə zay u bwu wey â loʼnə n kow wi, tə n doʼ fu nə̀ tə n dzəŋə keeli ndzə tə dzuŋu tə, loʼ soʼo n tɔb u wi, ghə n kaʼ ni tsəŋ. 16Ghə̂ ghey ghə â koʼnə ghə zey i shinə, n tiilə dza ndòw ghə zey i mə shinə ghi wù wey zay u bwu wə â loʼnə n kow wi nsə n feelibu wey.
17Sey ghə n kaʼ ni buʼ Yeso n wɔɔ kə nə̀ tə zəghə mboʼo ghə.
18Nghee tə̀ Yeso nyiə ndòwnə nə kəfən, wù wey zay u bwu wə â loʼnə n kow wi n buʼ wi n wɔɔ kə nə̀ tə mə dzûmə wi.
19Yeso n ka bəghəm. Tə n fəd dza ndòw tə̀ wi nə̀, “Ndòw dzəŋŋə n səə ghə̂ ghə ghə̀, wə̀ dza ndòw ghəə a nii ghey Mûkəbii ghəŋənə tə̀ wɔ, nghee tə̀ tə kwɔɔlənə sî zə n kow wɔ.”
20Wù tii n nuu tsu, ndòw kaʼ ndòw ni naʼa kaabə n mboʼo Dekapolis#5.20 Dekapolis dii nə̀ à loʼ mboʼ zey zə â khənə naʼa tə ighəm. idzəm, ghəə ghey Yeso ghəŋənə n kow wi. Dzuu zə n ngii zum ghə̂ ghey ghə a zownə ghəə a tii ghə.
Yeso baŋŋə weyzən u loʼ wə, zhəm dzəŋŋə bə waa Jairus nə ivə
(Mat 9.18-26; Luk 8.40-56)
21Ambə Yeso nyi kɔʼnə nə kəfən, daŋ dzəŋŋə ndòw n nguŋə inyi i loʼ zey, nɔɔ kə aghə̂ kə nii kə n dzəŋi bə n səə wi. 22Wù loʼ ghə â tɔŋŋənə nə̀ a loʼ Jairus, tə â loʼnə ngəd n ndaw kədzəŋi ə ghə̂ a Təjuu n ndòw bə. Nghee tə̀ tə koʼ tsunə Yeso, tə n bwù ndòw n fuu i wi. 23Tə n buʼ Yeso n wɔɔ kə dza nə̀, “Waa fuŋ fə zən fə dzaŋanu, loʼ n ghəə a kpuu ghə, n buʼ kəwɔɔ, bə gaʼ bə wɔɔ kə kə̀ n kow wi tə̀ tə taw doʼo bə, tə muu dzəŋŋə bə utaw.”
24Yeso n daŋŋə nuu ndòw ghi wù wey. Ndəmə aghə̂ ghə â ndow dzəŋi ghi Yeso, sey ghə n zoʼlə nyiə bə wi badla tədzəm.
25Weyzən u loʼ wə n loʼ fu, nə̀ kaŋ tə n shi n wû u wi nə tənum ighəm nsə num tə təbəghə nə̀ tə buu doʼo way. 26Tə mâ ndòw n səə ndəmə ghə̂ a təngaŋ, ghə n way ni gaamə wi. Tə n saŋŋə may tsu khəə u wi udzəm, buulə zə n nam way. Dzaŋ i tii zə n nam ndow kə n sə kə. 27Ambə tə zow tsunə zɔŋ u Yeso wə, tə n tsìilə bə n baa wi n fəŋŋə kə aghə̂, bə mɔm tsu ndzə tə wi, 28n təŋkey, tə a khə n fə̀ŋ ə wi nə̀, “Abə tə labi mɔm tsu kənə ndzə tə wi tə, tə î tawnu.”
29Nghee tə̀ tə mɔm tsunə ndzə tə Yeso tə, kaŋ tey tə â shiənə n kow wi n daŋŋə buu doʼo tsu ni kəm shi, tə n zow tsu n wû u wi nə̀ dzaŋ i tii zə n wi zəghə. 30Yeso n daŋŋə keeli tsu nə̀ daʼa kə wi kə n fwaʼa fwaʼ kə, sey tə n khə̀mmə laalə ndòw nɔɔ kə aghə̂ key, bəb tə̀ ghə nə̀, “À ndzə tuŋ tə mɔm ndee?”
31Ngəd tə wi tə n dza ndòw tə̀ wi nə̀, “Ghə̂ a tənnə nyiə bə iwû n kow wɔ, wə̀ loʼ ngee ni bəb nə̀, ‘A mɔm ndee mə ə?’”
32Yeso n ndòw kə n sə kə, laalə kaabə tsəghə ndòw ni koʼ wù wey tə mə mɔmnə wi. 33Nghee tə̀ weyzən wey koʼ tsunə ghə zey i shinə ghi wi, tə n shi bə n tsəŋ zə, kaʼ, kaʼ, kaʼ, tə tsəŋŋənə, bə təm bə tənguʼ n tənə Yeso, dza may ndòw isəŋə tə̀ wi. 34Yeso n dza ndòw tə̀ wi nə̀, “N waa, bəghəm i fə̀ŋ zə zə̀ n ghəŋə wɔ nə̀ wə taw. Ndòw kədzuŋ, dzaŋ zə i may.”
35Nghee tə̀ Yeso nam ghɔɔmənə, ghə̂ a loʼ ghə n təmi bə, ghə nuu bənə n ndaw Jairus wən tə â loʼnə ngəd n ndaw kədzəŋi ə ghə̂ a Təjuu. Ghə n dza tə̀ Jairus nə̀, “Kə̂ wə nə̀ kəm fəmmənə wù dii wə, n təŋkey, waa wə wey n kpu.”
36Yeso n ka naŋa dzə isə̂ n ghəə zey ghə dzanə, fəd dza ndòw tə̀ ngəd ə ndaw kədzəŋi wey nə̀, “Kə̂ wə nə̀ tsəŋənə, keeli tsu kə bəghəm i fə̀ŋ zə.” 37Yeso n ka bəghəm nə̀ wù loʼ kəm dzûmə wi, bəghəm kɔʼ kə Pita, Jems ghi waazə wi Jɔn. 38Ambə ghə ndòw nyi ndòwnə n ndaw ngəd ə ndaw kədzəŋi wey, tə n koʼ aghə̂ ghə deyyənə, saʼlə iwû. 39Tə n nyi ndòw fu, dza ndòw tə̀ ghə nə̀, “Ghaa deyyə, saʼlə kaabə tsə wû i kee zə ə? Waa tii ka kpu dzə, tə bweelinu.”
40Ghə n tsoʼ maʼa wi. Tə n dzùm shi ndòw ghə adzəm bii, ney kɔʼ kə bày waa tii ghi nay wi nsə ngəd tə wi tey tətəghə, nyi ndòw n dzuu i ndaw zey waa wey â nyəŋnə tii. 41Yeso n kwu tsu wɔɔ kə waa tii, dza tə̀ wi nə̀, “Talitha kuum”, I diinə nə̀, “Zən fə, nuu kɔʼ!”
42Waa tii n daŋŋə nuu kɔʼ, kaʼ ndòw ni bwey kaabə. Dzuu zə n ngii zum ghə̂ ghey fu (Waa tii â loʼ tənum ighəm n num tə təbəghə). 43Yeso n fəd kii naŋa tsu ghə nə̀ kə̂ ghə nə dzanə ghə i loʼ zə tə̀ wù, dza tə̀ ghə nə̀, “Kəŋ fu na wi n fə kə zəə kə.”
© 2022 CABTAL
