Malakus 4
4
Ghɔɔmə i fənkəfən kuum wù usum
(Mat 13.1-9; Luk 8.4-8)
1Yeso n kaʼ kpiʼi ndòw ni dii aghəə n nguŋ ə nyi i Galili. Nɔɔ kə aghə̂ key kə â dzəŋi bənə n səə wi, kə â ngii downu, sey, tə n baa nyi doʼo kɔʼ nə kəfən n dzuu ə Galili. Nɔɔ kə aghə̂ key n loʼ n nguŋ ə inyi. 2Tə n dii ghə n ndəmə tə aghəə tə n ghɔɔmə i fənkəfən, imɔʼ n loʼ nə̀, 3“Ghaa tɔʼ zəllə! Wù loʼ â soʼ ndownu ni ndòw təm ufə. 4Nghee tə təmə ndownə, ndzoʼ tə loʼ tə n tsɔʼlə bə n jìi. Nnən mə n bə kumi fə nuu kɔʼ. 5Tə loʼ tə n tsɔʼlə bə n luʼu kə atay, nə̀ zub tə basə way fu. Tə n luumə fòw i kɔʼ n təŋkey zub tə â basə way fu. 6Ambə tsə shi bənə, zə n fɔbi maʼa kɔʼ ndzoʼ tə tii tə, tə n zum kɔʼ, n təŋkey, tə â khə way ghaŋ tə. 7Tə loʼ tə n tsɔʼlə bə n luʼu key dzɔŋɔmgbay u loʼnə tii. Ambə tə shi kɔʼ bənə, nyiəmə, kaakaa wə n nyiəmə soʼo, nyim tsami maʼa kɔʼ ndzoʼ tə tii tə, sey ndzoʼ tə tii tə n ka bɔŋ. 8Ndzoʼ tə loʼ tə n tsɔʼlə ndòw n zub tə dzuŋu tə. Tə n nyim dzɔb kɔʼ, bɔŋ i kɔʼ, keeli tsu ndəmə asə̂ n jìi zey tə loʼ â fuu bənə sə̂ ghə nghəm ntəghə, tə loʼ tə n fuu bə nghəm ntuubə, tə loʼ tə n loʼ asə̂ fəbɔm.” 9Sey Yeso n dza tə̀ ghə nə̀, “wù wey tə khənə tuŋu wə, tə zow.”
Zuŋ kə ghɔɔmə tə fənkəfən tən
(Mat 13.10-17; Luk 8.9, 10)
10Ambə nɔɔ key nuu tsunə, ghə̂ ghey ghə â doʼo səənə ghi wi nsə ngəd tə wi tey ighəm n ghii ghə abəghə, n dza tə̀ wi nə̀ tə tiilə bə ghəə zey ghɔɔmə i fənkəfən zey diinə. 11Yeso n beeli ndòw ghə nə̀, “Zə̀ kə n ghəŋə nə̀ ghaa keeli sad i fɔɔ u Kəzə̀, a sə bə ghə̂ a loʼ ghey ghə way n fɔɔ u tii wə, n dii kə ghə n ghəə ghə n ghɔɔmə i fənkəfən. I loʼ sey n təŋkey i tɔ̀ɔ doʼo n maʼlə kə tûm Kəzə̀ Ayzaya nə̀,
12‘Ghə i mgbaŋa laalə kə sa,
Ghə i koʼo keeli way,
Ghə i zəllə ghəə ghə,
Zowkeeli way.
Sey nə̀, kə ghə nə kweyyənə fə̀ŋ tə ghə tə,
Tə̀ Zə̀ kə neyzəə ghəə a ghə a bəbə ghə.’”
Yeso tiilə dza ghɔɔmə i fənkəfən i wù usum
(Mat 13.18-23; Luk 8.11-15)
13Yeso n bəb ndòw tə̀ ghə nə̀, “ghaa zowkeeli way ghɔɔmə i fənkəfən zən ə? Abə ghaa ka zowkeeli ghɔɔmə i fənkəfən zən, ghaa i sə̀ zowkeeli ngee tə loʼ tə ə? 14À wən loʼ ghəə zey ghɔɔmə i fənkəfən zən diinə, wù usum wey təmə ndòw ghɔɔmə i Kəzə̀. 15Ghə̂ a loʼ a loʼ tə̀ a loʼ ndzoʼ tey tə â tsɔʼlə bənə n jìi, abə ghə zow tsunə ghɔɔmə i Kəzə̀ zə, Satan n daŋŋə bə ney nuu kɔʼ ghɔɔmə i tii zə. 16Ghə̂ a loʼ ghə a loʼ tə̀ a loʼ ndzoʼ tey tə â tsɔʼlə bənə n luʼu kə atay. Abə ghə zow tsunə ghɔɔmə i Kəzə̀ zə, ghə n daŋŋə bəghəm kɔʼ n fəŋ i dzuŋu zə. 17Ghɔɔmə i tii zə n ka kee təmi taw dzə n fə̀ŋ tə ghə, n təŋkey i khə way ghaŋ tə. Ambə chɔd u bənə tii bòʼ ghɔɔmə i Kəzə̀, ghə n daŋŋə bwùlə doʼo i ndòw. 18Ghə̂ a loʼ ghə a loʼ tə̀ a loʼ ndzoʼ tey tə â tsɔʼlə bənə nə udzɔŋɔmgbay. À wən loʼ ghə̂ ghey ghə zow tsunə ghɔɔmə i Kəzə̀ zə, 19chɔd u mbi, ləghə zə ikum, nsə ləghə i fə u mbi wə n kee bə tsami maʼa kɔʼ ghɔɔmə i Kəzə̀ zey, ghɔɔmə i tii zə n way ni nyimmə n kow ghə. 20Ghə̂ a loʼ ghə a kee loʼ tə̀ a loʼ ndzoʼ tey tə â tsɔʼlə bənə n zub tə dzuŋu tə̀. À wən loʼ ghə̂ ghey ghə zow tsunə ghɔɔmə i Kəzə̀ zə, ghə n bəghəm kɔʼ n fə̀ŋ ə ghə idzəm, mə̂ bə utam. À loʼ ghə nghəm ntəghə, a loʼ ghə n nghəm ntuubə, a loʼ ghə n mə̂ bə utam fəbɔm.”
Kədaa nə kənyələ
21Yeso n ndòw n sə kə, dza tə̀ ghə nə̀, “wù ney way daa kə tə n naŋa ndòw n tənə kəkhəə nkee n tənə ukay. Tə khəə naŋŋə kɔʼɔ nə kənyələ n sə̂ a zow ghə. 22Boʼnə ghə i loʼ i way i nyi doʼonə, zə i bə shi way n mgbaŋ. Nkee, i tsəd doʼonə, zə i bə doʼo way təghə. 23Wù wey tə khə tuŋŋə wə tə zow.”
24Yeso n kəm dza ndòw tə̀ ghə nə̀, “Ney na ghə̂mə zə n ndzoʼo ghəə ghey ghaa zownə. N təŋkey ndzoʼo jìi zey wə neynə ni saʼ ghə̂ a loʼ ghə tii, a loʼ soʼo i ghi Zə̀ kə î neynə ni saʼwɔ. Tə i buʼu ney inəŋə ni saʼ wɔ tsəghəshi ghə̂ a loʼ ghey. 25Wù wey tə khənə fə wə ndəm, ghə i kuu kpiʼinu n fə u wi. Wù wey tə khə way fə kə, kasə̀ nyaŋi fey tə khənə ghə i ney nuu kɔʼ n wɔ wi.”
Ghɔɔmə i fənkəfən boʼ ndzoʼ i nyîmmənə
26Yeso n ndòw n sə kə dza nə̀, “Fɔɔ u Kəzə̀ u loʼ tə a loʼ ndzoʼ wù təmə ndòwnə nə təzub. 27Nghee tə təm tsunə, tə n fən bweeli doʼo tən bə i wi zə, ndzoʼ i tii zə n fòw kɔʼ, nyîmmə nə̀ tə buʼ khə way fə key kə ghəŋŋə nə̀ zə i nyîmmə. 28A loʼ ghəlikətsə, kə ghəŋŋə nə̀ ndzoʼ i tii i fòw, i nyim kɔʼ dzəə bə tə a loʼ fəkaʼ, i bɔŋ bə utam, tam u tii u bə beyyə tsu. 29Ambə fə u beyyə tsunə fu nə usum, wù tii n bə kɔy nuu fə u wi, n təŋkey nəŋə i kɔy zə n kpii.”
Ghɔɔmə i fənkəfən bòʼ sam i Mɔstad
(Mat 13.31-32, 34; Luk 13.18-19)
30Yeso n ndòw n sə kə dza tə̀ ghə nə̀, “A baa loʼ ni dza nə̀ fɔɔ u Kəzə̀ u loʼ tə a loʼ kee. A loʼ ni baa ney ghɔɔmə i fənkəfən i ghaa zə ni tiilə ə? 31Fɔɔ u Kəzə̀ u loʼ tə a loʼ sam i loʼ zə ghə tɔŋŋə nə̀ à loʼ Mɔstad. Sam i tii i təb tsəghə shi təsam tədzəm fa n mbi. 32Abə wə kee zəghə tsunə, fə n nyim zaamə tsəghə tsu ndəmə ufə fu nə usum, bə doʼo kɔʼ fəkaʼ, n jìi zey nnən mə idəŋ n loʼ ni bə bəghə doʼo n kpìi tə tii tə.”
33Yeso n dza ndòw ghə n ndəmə tə aghəə tə n ghɔɔmə i fənkəfən, sey nə̀ ghə teeli zowkeeli tsu ghɔɔmə i Kəzə̀ zən. 34Nəŋə i loʼ i way Yeso â diinə ghə̂ ghə, nə̀ tə ka dza n ghɔɔmə i fənkəfən. Ambə tə loʼ kənə ghi ngəd tə wi tə, tə n tiilə dza ndòw tə̀ ghə ghəə zey i diinə.
Yeso buu naŋa zəŋ i taw zə
(Mat 8.23-27; Luk 8.22-25)
35N tsuʼ fə tii fə kələ, n nəŋə i fənə zə, Yeso n dza ndòw tə̀ dzûmə tə wi tə nə̀, “bəghə na tə̀ sa daŋ ndòw n nguŋ i loʼ zey.” 36Ghə n zəghə tsu nɔɔ kə aghə̂ key. Ngəd tə wi tə n nyi kɔʼ n fən key tə â loʼnə tii, nuu ndòw ghi wi. Fən u loʼ wə n loʼ soʼo fu. 37Ambə ghə ndownə, taw kə zəŋ kə n kaʼ ni tsəghə, mmuu mə n kaʼ ni nyi nə kəfən, luu kɔʼɔ bə n fən kə tii kə, fən kə tii kə n kaʼ ni məllə nyi tsu. 38Yeso n loʼ kə n baa kəfən, bweeli i wi zə nə̀ tə n gaʼ naŋa tow kə nə kətəghə. Ngəd tə wi tə̀ n bə zhim kɔʼ wi, dza tə̀ wi nə̀, “Wù dii, wə koʼo way nə̀ saa nya sa kuŋunu ə?” 39Yeso n zhəm kɔʼ, kəm ndòw zəŋ zey nsə dzuu zey dza nə̀, “Doʼo mɔŋ.” Zəŋ zey n bɔɔmə fuŋ doʼo ndòw mɔŋ. Tuŋutuŋu wə inyi wey n buulə doʼo dzəŋŋə bə ibam, mɔŋ. 40Sey Yeso n dza ndòw tə̀ dzûmə tə wi tey nə̀, “Ghaa sey ngii khə itsəŋ n fə̀ŋ nə̀ a loʼ kee? Ghaa sa kam khə way bəghəm i fə̀ŋ zə?” 41Tsəŋ zə n kəm baa kwu tsu ghə, ghə n bəbə n wû i ghə nə̀, “Wù wən baa loʼ ndzoʼo wù ghaa wə ə, kasə̀ zəŋ nsə tuŋutuŋu tə dzuu tə n zow daŋŋə tə̀ wi.”
© 2022 CABTAL
