Malakus 13
13
Yeso dza zey nghee ghə i saʼa maʼanə Ndaw Kəzə̀ ə ghə̂ a Təjuu
(Mat 24.1-2; Luk 21.5-6)
1Nghee tə̀ Yeso nuulə shiə ndòwnə n ndaw Kəzə̀ i nii zə n Yerosalem, ngəd ə wi u loʼ wə n dza tə̀ wi nə̀, “Wù dii wə, koʼo kə dzɔbə dzɔbə tə atay tey, nsə ndaw tə dzuŋu tən sey!”
2Yeso n dza ndòw tə̀ wi nə̀, “Wə koʼonu ndaw tə nii tən ə? Itay imɔʼ zə i doʼo way n kow waazə nə̀ i ka beeli.”
Yeso dza zey nə̀ chɔd u nya kuʼlə bənu
(Mat 24.3-14; Luk 21.7-19)
3Nghee tə̀ Yeso doʼnə n kaʼ u Oliv, laalə daŋa ndow ndaw Kəzə̀ i nii zə n Yerosalem n nguŋ i loʼ zey, Pita, Jems, Jɔn, ghi Andria n bə tsɔŋ bəb bə tə̀ wi nə̀, 4“Dza bə tə̀ ghey, a loʼ zeeli ndzoʼo ghəə ghən ghə i shiənə. A loʼ tsəə tə ghaa tə, tə i diinə nə̀ nəŋə zə n kpii tə̀ ghəə ghən adzəm ni ney kəbənə ə?”
5Yeso n dza tə̀ ghə nə̀, “Ghə̂mə na, i kə̂ ghaa nə laʼanə n baa wù loʼ. 6Boʼnə, abə nəŋə i tii zə î kpii bənə, ndəmə tə aghə̂ tə i bə n zəd zuŋ, ghə i dza bə nə̀, ‘À loʼ mə wù wən tə â khə ni bə!’ Sey ghə i sìi laʼ ndəmə aghə̂. 7Abə ghaa i zownə tsam tə, nkee nyəŋŋə i tətsam, i kə̂ ghaa nə tsəŋənə, bòʼ nə̀ ghəə a tii a teeli khə ni bə ney kəbənə. I zən zə i kam dii dzə way nə̀ mbi dza i may. 8Naʼa tə i zuulə baalə ghi naʼa tə tətûm tə, fɔɔ tə i zuulə baalə ghi fɔɔ tə, ghəlitsə kə i noʼlə n ndəmə təluʼu, dzəŋ i nə loʼ. Ghəə ghən a maŋ loʼ nzeyyə n ghəə a bəbə ghə tə̀ weyzən nə kaʼa tsuunə ni sòʼ waa.
9Ghaa khə ni tɔʼ ghə̂mə n wû i ghaa, n təŋkey, ghə i kwɔ ghaa, ghə ney ndòw ghaa n tay i saʼ. Ghə bwɔd ghaa n ndaw tə udzəŋi tə ghə, ghaa i ndòw n sə kə udəŋ nsə ghə̂ a nii ghə bòʼ mə. A nə wən loʼ kəbuʼ tə̀ ghaa ni naʼa tûm i dzuŋu zə tə̀ ghə. 10Tə mbi ni bə may, ghaa khə ni teeli dii tsu dzə ghɔɔmə i Kəzə̀ nə tənaʼa tədzəm. 11Abə ghə i kwu ney ndòwnə ghaa n ndaw tsə, kə̂ ghaa nə̂ fəmənə wû i ghaa zə n ghəə ghey ghaa i dzanə, boʼnə abə nəŋə i tii zə i kpiinə, Zay kə Zow kə i fuu bə ghaa n ghəə zey ghaa khənə ni dza. 12Ghə̂ ghə i fìi fuu waazə a ghə nə̀ ghə wey ghə, ghə bày a waa ghə i fìi fuu waa a ghə ghə̀. Waa ghə i kɔʼ təmi kɔʼ n tow u ghə bày, ghə fuu nuu ndòw ghə bày a ghə nə̀ ghə wey ghə. 13Ghə̂ adzəm ghə i bàa ghaa bòʼ mə. A kee loʼ nə̀, wù wey tə i təmi taw tsunə, zow ngoʼ ndòw kùm i ndòw, tə i keeli ibəghəshi.
Faalə tə aghəə tə i shiənə
(Mat 24.15-28; Luk 21.20-24)
14Abə nəŋə zey ghaa i koʼnə faalə tə aghəə tə dzəə tə, tə shiənə nə̀ tə mə khə way ni shi. (Wɔ wey wə tɔŋŋənə, zowkeeli tsu ghəə zey ghəə ghən diinə.) Abə ghaa i koʼnə ghəə ghən, ghə̂ ghey ghə loʼnə n Judeya, ghə i tyi nuu ndòw nə təkaʼa. 15N nəŋə zey ghəə ghən i neynə bənə kə, nə̀ wù loʼ n tow kə ndaw, kə̂ tə nə nyiə tsuu dzəŋŋənə n ndaw nə̀ tə dza i ney kəfə. 16Abə wù wey tə loʼnə nə usum, kə̂ tə nə dzəŋŋənə ni bə ney maʼlə kə wi. 17N tsuʼ fə tii fə, à i loʼ ngoʼ tə̀ gheyzən ghey ghə loʼnə nəghə u waa wə nsə a ghey ghə nyɔŋŋənə waa ghə. 18Gɔŋŋə na nə̀ kə̂ ghəə ghən nə shiənə n nəŋə zey fəb u ngii loʼnə tii. 19Boʼnə ghə̂ a nə̂ koʼo ngoʼ fa n mbi nə ghə ka kam koʼ koʼ tə̀ Zə̀ kə â nə bɔmnə mbi zən. Ngoʼ i loʼ i nə kəm doʼo koʼ way tə a loʼ i zən. 20À kee loʼ nə̀, Mûkəbii n tsuulə taŋ a tsuʼu n tii mə, abə a mə way sey tə wù sɔŋtsuʼ umɔʼ i way ni nɔb shi. Tə tsuulə taŋa tsuʼu n tii mə bòʼ ghə̂ ghey tə sày naŋanə nə̀ a loʼ ghə̂ a wi.
21N tsuʼu n tii mə, abə wù loʼ i dzanə tə̀ ghaa nə̀, ‘Koʼo, wù wey Zə̀ kə â dza naŋa nə̀ i tûm bənu, tə wənə!’ Nkee ‘Koʼo tə wey fey!’ Kə̂ ghaa nə bəghəm fuunə tə̀ wi. 22N təŋkey ghə̂ a tsɔŋɔ ghə i bəghənu n zəd i wù wey Zə̀ kə â dza naŋa nə̀ i tûm bənu nsə tûm tə Kəzə̀ tə tsɔŋɔ tə, ghə nə dii tsəə tə tsɔŋɔ tə nsə faalə n tsɔŋɔ mə ni sìi laʼ aghə̂ nsə ni buʼ sìi laʼ daŋŋə soʼo ghə̂ ghey Zə̀ kə sày naŋanə abə ghə khənə jìi tii. 23Tɔʼɔ ghə̂mə na! N təŋkey mə n dza zey ghəə ghey a nə shiənə tə̀ ghaa.”
Bə i Waa Wù sɔŋtsuʼ
(Mat 24.29-31; Luk 21.25-28)
24Yeso n ndow n sə kə dza tə̀ ghə nə̀, “Abə tsuʼu n ngoʼ mən mə i tsəghə tsunə, ‘Tsə̀ i nəmə nyi ndow, ndzɔŋ i way ni kəm bàŋ, 25səghəbələ mey n bikighow i bwù shi tsu bə, daʼa wey u loʼnə n bikighow wə i noʼlə.’ 26Ghə̂ ghə i daŋŋə koʼ Waa Wù sɔŋtsuʼ tə bəghənə nə təmbaʼ n daʼa kə nsə ghaʼ zə. 27Tə i tûm shi ndòw tsətəndəghə tə Kəzə̀, nə̀ ghə zuŋŋə kaabə bə ghə̂ wi ghey tə sày naŋanə adzəm n bow tə mbi tən təkaykə idəŋ nsə aghəd.
Ghəə zey wù loʼ ni zoʼlə ney n wɔ Kaʼ fə Fig fə
(Mat 24.33-35; Luk 21.29-33)
28Zoʼlə tsu na tɔb wə n kaʼ fə Fik, abə kpìi tə wi tə zey tsu ni fuu fəbə tə fəghə tə, i sey dii nə̀ ghow i nya dza i tsu fən. 29A loʼ ighələ, abə ghaa i koʼnə ghəə ghən a shiənə, keeli tsu na nə̀ nəŋə i wi i bəghə zə n shɔd. 30N kùm dza bə tə̀ ghaa nə̀, ghəə ghən n dzanə fa, ghə̂ a num tən nə kpu may way nə̀ ghəə ghən a ka ney bənə kə. 31Mbi nə bə maynu, ghɔɔmə zuŋ i nə kee may koʼ way.
Wù loʼ khə way nəŋə zey tə i bəghənə tii
(Mat 24.34-44)
32A kee loʼ nə̀, wù loʼ khə way tsuʼ fey nkee nəŋə zey ghəə ghən ghə i shiənə tii, wû u ngəd tə Kəzə̀ idəŋ nsə waa Kəzə̀, ghə khə daŋŋə way nəŋə zey ghəə ghən ghə i shiənə tii, a may kə Kəzə̀ n nəŋə wi tə khənə. 33Sey, təmi kɔʼ na nə ifuu nə igɔŋŋə, ghaa i ghə̂mə tənə, boʼnə ghaa khə way nəŋə zey ghəə ghən i neynə bənə kə. 34Nəŋə i tii zə î bəghə tə a loʼ wù loʼ tə a shi bwey ndòwnə, fuu tsu kədaʼa tə̀ ghə̂ a kəfwaʼ a wi ghə nə̀ ghə i keyyə ndaw wi. Tə n dzawwə naŋa tsu kay wù n fwaʼ kə wi kə. Dza naŋa tsu tə̀ wù wey tə keyyənə n fuʼ u mbàa nə̀ tə i tɔʼɔ nyaŋŋə luʼu tə. 35Sey, tɔʼɔ təmi kɔʼ na nə ifuu, n təŋkey, ghaa khə way nəŋə zey mûkəbii î bəghənə. A loʼ ni loʼ n nəŋə i fənə tə, tə loʼ ni bə n fə̀ŋ ə tsuʼu tə, tə loʼ ni bə n nəŋə zey mwaʼ u tɔŋɔnə tii nkee n sə̀ kə tsə. 36I kə̂ ghaa nə̂ bəghəmnə nə̀ tə gbəllə bə kwɔɔlə ghaa nə̀ ghaa bweelinu. 37Ghəə ghən n dza bənə tə̀ ghaa, n dza soʼo tə̀ ghə̂ ghə adzəm. Sey, ghaa tɔʼ təmi taw tsu ghaa i ləmmə wi.”
נבחרו כעת:
Malakus 13: WEH
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2022 CABTAL
