Lukas 22
22
Boko pomimpitn urakng Yahudi bohoupm pakai' mombunuh Yesus
(22:1-2)
(Mat. 26:1-5; Mrk. 14:1-2; Yoh. 11:45-53)
1Urakng Yahudi morayaan ari rayo Roti Co Boragi, inyo disobut jam ari rayo Paskah. Ari rayo nantai udah dampikam.#22:1: Koluaran 12:6-18. Ari Rayo Roti Co Boragi dirayoan pakai' moingant caro Allah monulukng urakng Israel koluar doi' Mesir socaro copat (co dapat monantian adonan roti mongombakng obai ragi). Ari Rayo Paskah dirayoan pakai' moingant caro Allah monyolamant'an Israel kinyo kona' hukupan ana' jula' mati samaꞌan urakng Mesir. Pado joman komai, duo poraya'an ni'in topisah (Imamat 23:5-6). Apo obai dirayoan socaro boturut-turut, pado joman Yesus udah monjadi sobuti' poraya'an. Urakng Yahudi wajib datakng ko kota Yerusalem pakai' morayaan ari rayo ni'in. Jadi ado banyaꞌ boko urakng. 2Boko imam kopala' huatan boko guru agama Yahudi tongahan bogoyap caro pakai' mombunuh Yesus socaro bototapu'. Sia' gola' tajahan tojadi sosuatu hal aman ado banyaꞌ urakng watu sia' monangkap Sio.
Rasul Yudas mohianati Yesus
(22:3-6)
(Mat. 26:14-16; Mrk. 14:10-11)
3Lopas nian Rajo Sitatn momansu'i hati Yudas inyo disobut Iskariot, ia'an siku' urakng doi' koduo bolas rasul Yesus. 4Obai nantai, Yudas botula' ongko bohoupm agatn boko imam kopala' huatan boko kopala' ponjago Rumah Allah mongonaꞌi samaꞌan apo io ulih monyorahan Yesus ko sia'. 5Sia' sonang bondar ongko bojanji pakai' moonji'i duit ko io. 6Yudas pan sotuju. Io pan mula'i bogoyap kosompatan pakai' monyorahan Yesus ko sia' watu co gaho banya' urakng.
Rasul Petrus huatan rasul Yohanes momposiapan poraya'an Paskah
(22:7-13)
(Mat. 26:17-25; Mrk. 14:12-21; Yoh. 13:21-30)
7Sampaiam watunyo pakai' mula'i morayaan Ari Rayo Roti Co Boragi. Ari nantai, sotiap koluarga gola' monyombolih ana' domba pakai' pogai Paskah. 8Jadi, Yesus monyiuh Petrus ongko Yohanes. Kato-Nyo, “Botula'cam momposiapan Poraya'an Paskah oca' kito makatn sosamo.”
9Sia' duo botakutn, “Di mono Duatn honda' koi momposiapannyo?”
10Yesus monimbas, “Mansu'am ko kota Yerusalem. Di santai, kaitn tajahan botomu siku' urakng lolaki mombaba' roga' bisi ara'i.#22:10: Biasonyo bayo botina' mombaba' roga' bisi ara'i. Jadi, kinyo uyuh monomuan urakng ni'in. Bodapan io ko rumah inyo dimansu'inyo. 11Pandiran ko urakng umputn rumah nantai: ‘Guru botakutn di mono ruakan inyo ulih Sio gunoan pakai' makatn Paskah bonsamoan agatn boko murid-Nyo?’ 12Lalu, urakng umputn rumah nantai tajahan monunju'an ko kaitn duo sobuah ruakan inyo bosar di lantai pucu'. Somuo inyo kito pontikan pakai' morayaan Paskah ado di su'utn. Siap'ancam somuonyo di su'utn.” 13Lalu, Petrus ongko Yohanes botula'am. Somuo hal tojadi topat samaꞌan inyo udah dipandiran Yesus ko sia' duo. Lalu, sia' momposiapan poraya'an Paskah.
Yesus monotap'an acara makatn pakai' monggonang Sio
(22:14-23)
(Mat. 26:26-30; Mrk. 14:22-26; 1Kor. 11:23-25)
14Timpu udah watunyo acara makatn malapm morayaan Paskah nantai, Yesus dudu' bosamo boko rasul-Nyo di meja makatn. 15Lalu Sio bopandir ko sia', “Aku honda' bondar makatn morayaan Paskah ni'in sosamo agatn kaitn sobolupm Aku ajab sonsaro. 16Dinga'anbo! Sobondarnyo, Aku co tajahan bopua' pomakatn Paskah ni'in agi' sampai Koraja'an Allah monguaso'i somuo hal. Watu nantai, roti doi' Paskah ni'in tajahan monjadi nyata.”#22:16: Roti doi' poraya'an Paskah nantai tigo tahap: 1) Pado joman komai, urakng Israel morayaan Paskah pakai' moingant caro Allah monyolamant'an sia' doi' hukupan mati di Mesir. 2) Dalapm ayat 17-20, Yesus tambahi roti ko poraya'an Paskah. Urakng inyo pocayo agatn Sio moingant caro Sio monyolamant'an kito doi' hukupan mati obai dosa. 3) Watu Yesus bobali', roti poraya'an Paskah nantai paca'an monjadi ponuh. Somuo kuaso jahat paca'an dikalahan ongko dihukupm. Apo, urakng inyo pocayo agatn Yesus paca'an disolamant'an doi' hukupan mati inyo somanah-manahnyo.
17Lopas nantai Yesus monguti' socangkir anggur, lalu bodoa bosukur ko Allah. Lopas nian Sio bopandir, “Kuti'cam ni'in, lalu pombagi-bagiancam. 18Poniant'an ni'in: Aku co tajahan minum anggur agi' sampai Koraja'an Allah monguaso'i somuo hal.”
19Lopas nantai Yesus monguti' roti. Lopas jadi bodoa sukur agi', Sio momingkai'-mingkai' roti nantai agatn jari-Nyo lalu moonju'nyo ko sia'. Kato-Nyo, “Ni'innam bukakng-tubuh-Ku inyo paca'an Ku sorahan pakai' kaitn. Pulahcam ni'in torus-monorus pakai' monggonang Aku.”
20Lopas sia' jadi makatn, lalu, agatn caro inyo samo agatn roti nantai, Yesus moonju' socangkir anggur agi' ko sia' kapikng bopandir, “Socangkir anggur ni'in mowakili darah-Ku inyo tajahan ditumpahan pakai' kaitn watu Aku mati. Darah ni'in moresmian Porjanjian Boharu inyo Allah pulah agatn monsio. #22:20: Pado joman komai, urakng Israel disunant sobagai tando sia' umant Allah. Sia' jam momposombahan bonatakng oca' dosa diamputi. Apo sokarakng, sopo aja' inyo pocayo agatn Yesus, hidup sosuai kohonda'-Nyo, urakng nantai diamputi ongko monjadi umant-Nyo. 21Apo, tiat! Urakng inyo tajahan monyorahan Aku ko musuh Ku, io tongahan dudu' di meja ni'in sosamo agatn Aku. 22Ana' Monsio memang tajahan mati sosuai agatn caro inyo udah ditontuan Allah. Apo Allah tajahan mohukupm urakng inyo monyorahan-Nyo!”#22:22: Mazmur 41:9 mongatoan Rajo Inyo Dijanjian Allah paca'an dihianati ulih kawal-Nyo. (Nantai memang Rasul Yudas, apo boko rasul bukai bolupm tohu nantai.) Mazmur 22, 118:22 ongko Yesaya 53 mongatoan Sio paca'an sonsaro ongko mati.
23Mondingaꞌ nantai, boko rasul-Nyo bokisahannyo sopo inyo mungkitn di antaro sia' inyo paca'an bulah samaꞌan nian.
Yesus mongajar boko rasul-Nyo gola' hala molayati agatn rondah hati
(22:24-30)
24Lalu, boko rasul-Nyo botikakng antaro siku'-monyiku'. Sia' bokisahan sopo di antaro sia' inyo kotakng pontikng. 25Obai nantai, Yesus bopandir ko sia'. Kato-Nyo, “Boko rajo banso inyo kinyo mongonal Allah disobut ‘Ponulukng Rayat’. Padohal, sia' sonang momoso rayat oca' tundu' agatn kuaso sia'. 26Apo, kaitn co ulih ubo nian! Sobali'nyo, urakng inyo palikng pontikng di antaro kaitn gola' bosipat rondah hati, bolaku samaꞌan urakng inyo kotakng kinyo pontikng. Siku' urakng pomimpitn gola' bolaku samaꞌan siku' urakng hulutn. 27Cubo pikiran sopo inyo lobih pontikng; urakng inyo dudu' makatn damo inyo molayatinyo. Pasti urakng inyo dudu' inyo lobih pontikng. Apo somanah Aku bosamo agatn kaitn, Aku pan molayati kaitn. 28Kaitn totap sotia agatn Aku dalapm somuo kosusahan inyo Aku alapi. 29Jadi, Aku paca'an moonju' kuaso ko kaitn pakai' momorintah dalapm Koraja'an Allah, samo samaꞌan Bopai-Ku moonju' kuaso ko aku pakai' monjadi Rajo inyo momorintah somuo Korajaan-Nyo. 30Jadi, dalapm Koraja'an-Ku nantai, kaitn tajahan mooso rindakng huatan tohormat obai ulih makatn-minum sotanggaian sosamo agatn Aku.#22:30: Acara makatn-minum samaꞌan ni'in opat dipakai pakai' monggambaran Koraja'an Allah nononyo, watu Rajo Yesus mongalahan somuo kuaso Rajo Sitatn ongko Yesus momorintah somuo hal (Lukas 13:28-29, 14:15-24, 16:22, 22:16; Wahyu 19:9). Kaitn siku'-monyiku' tajahan dudu' di tahta pakai' momorintah koduo bolas suku banso Israel.”#22:30: Mungkitn koduo bolas suku Israel monunju'an somuo umant Allah (samaꞌan di Galatia 6:16). Tiat Lukas 13:29 ongko Galatia 3:26-29.
Yesus momandiran obai Rasul Simon Petrus#22:31: Yesus moonji'i damo Petrus ko Simon (Lukas 6:14). tajahan monyangkal Sio
(22:31-34)
(Mat. 26:31-35; Mrk. 14:27-31; Yoh. 13:36-38)
31Lopas nian Yesus bopandir ko Simon Petrus, “Simon, Simon! Dinga'anbo! Rajo Sitatn udah monuntut ko Allah oca' molalu'i kosusahan io ulih monyongkayoan rasul inyo sotia doi' inyo kinyo sotia, samo samaꞌan potani monyongkayoan gandupm doi' kopunyo.#22:31: Ado duo tapsiran pakai' poumpamoan ‘momisahan gandupm doi' kopu.’ 1) Rotinyo samo dalapm Lukas 3:17, ‘momisahan urakng inyo pocayo/sotia doi' urakng inyo cado.’ DAMO 2) Rotinyo Rajo Sitatn honda' ‘momisahan boko rasul doi' Yesus’. Allah udah moijitan Rajo Sitatn molabuhan hal nantai. #22:31: Tiat Ayub 1-2. Pado joman komai Allah moonji'i ijitn ko Rajo Sitatn pakai' mouji kosotiaan Ayub jam. Tujuan Rajo Sitatn oca' kito bodosa, apo ponsuahannyo Ayub ongko Petrus totap sotia. (Lukas 22:54-62 ongko Yohanes 21:15-19). Sia' ulih dibandikan agatn Rasul Yudas inyo kinyo sotia. Tiat Lukas 22:3-6. 32Apo Aku udah bodoa pakai' kolai, Simon, oca' kolai totap pocayo ko Aku. Watu kolai bobali' sotia agatn Aku, kolai gola' monguat'an iman boko somadikan kolai, ia'an boko murid-Ku.”
33Petrus monimbas, “Tuhatn, aku udah siap tamo ponjara sosamo agatn Duatn! Biar pan sampai aku mati sosamo agatn Duatn, aku udah siap!”
34Apo Yesus bopandir, “Dinga'anbo, Petrus! Watu malapm ni'in jam kolai tajahan monyangkal Aku sampai tigo kali sobolupm manu' bokuku'.”
Boko rasul Yesus gola' siap mohadapi tantakan
(22:35-38)
35Ongko Yesus bopandir ko somuo rasul-Nyo, “Ingant'icam watu Aku moutus kaitn komai pakai' momboritoan mongonaꞌi Koraja'an Allah. Kaitn culih mombaba' dompet, bokal, sandal ponggonti. Timpu nantai, ado cado kokurakan kaitn?”#22:35: Lukas 9:1-6 ongko 10:1-12.
Sia' monimbas, “Conyiant!”
36“Apo ni'in udah bukainyo,” kato-Nyo. “Urakng inyo bisi dompet, bisi bokal, gola' mombaba'nyo. Urakng inyo kinyo bisi podakng, gola' monjual jubah pakai' mombolinyo. 37Obai la'apo inyo udah ditulis dalapm Buku Suci mongonaꞌi Aku gola' tojadi: ‘Io paca'an dianggap samo agatn ponjahat.’#22:37: Yesaya 53:12. Biar pan Yesus kinyo bodosa, co molanggar hukupm, Sio dibunuh di kayu salib sobagai urakng ponjahat. Sio jam bokawal agatn urakng ponjahat (‘urakng bodosa’) ongko mohadapi tantakan boko pomimpitn urakng Yahudi. Hal nantai tongahannyo labuham ni'in!”
38Sia' bopandir, “Tuhatn, di si'itn ado duo bilah podakng.”
Yesus bopandir, “Jadiam!”#22:38: Yesus monongga'an pomandiran nantai obai boko rasul-Nyo bolupm mongoroti. Sio bomasud sia' paca'an mohadapi tantakan, apo sia' bopikir gola' molawatn agatn podakng. Nononyo Yesus mongomboi'i pikiran sia' inyo salah nantai. Tiat Lukas 22:49-51.
Yesus bodoa di bukit Jaitun
(22:39-46)
(Mat. 26:36-46; Mrk. 14:32-42)
39 Lopas acara makatn Paskah, Yesus botula' koluar kota samaꞌan biasonyo ko bukit Jaitun. Boko murid-Nyo tuyut jam. 40Timpu sia' datakng ko tompat nantai, Yesus bopandir ko sia', “Bodoacam oca' kaitn co jatu' ko dalapm poncoba'an”.
41Lopas nian Sio botula' kojouh sodikit doi' sia', kiro-kiro soponikapan batu. Sio tundu' monyungkapan lalu bodoa. 42Kato-Nyo, “Bopai, aman ulih, bebasan Aku doi' ajab sonsaro inyo gola' Kualapi ni'in. Apo jangan monurut kohonda'-Ku, kohonda' Duatn ja'am Bopai.” 43Siku' molekat datakng ko Sio, monguat'an-Nyo. 44Yesus maho salu'. Jadi, Sio mongkitn somombondarnyo bodoa. Rada'-Nyo ubo darah tatap ko tanah.
45Lopas jadi bodoa, Yesus bodiritn ongko bobali' agi' ko boko murid-Nyo. Sio monomu'i sia' tongahan tidu' obai kotakng salu' molola'an sia'. 46Sio monggagaian ongko bopandir ko sia', “Kaitn jangan tidu'! Bodoacam oca' kaitn co jatu' ko dalapm poncoba'an.”
Yesus Ditangkap
(22:47-53)
(Mat. 26:47-56; Mrk. 14:43-50; Yoh. 18:3-11)
47Tongahan Yesus ija' bopandir, sorombokan urakng datakng. Sia' dipimpitn Yudas, salah siku' urakng doi' koduo bolas murid Yesus.#22:47: Monurut Yohanes 13:30, Yudas moninggalan Yesus huatan boko rasul bukai watu sia' ija' di ruakan di lantai pucu' morayaan Paskah. Apo Yudas udah tohu sia' biasonyo ko bukit Jaitun. Tiat Lukas 22:39 ongko Yohanes 18:2. Yudas mohampiki Yesus pakai' monyalapi Sio kapikng monciupm. 48Apo Yesus bopandir, “Yudas, kolai honda' monyorahan Ana' Monsio agatn ciupan?”
49Timpu boko murid-Nyo udah tohu la'apo inyo paca'an tojadi, sia' botakutn ko Yesus, “Tuhatn, ulihmo koi monyorakng sia' pakai' podakng?”
50Sobolupm Yesus monimbas, salah siku' murid-Nyo moncabut podakng, lansukng monyorakng siku' urakng hulutn Imam Agukng. Io momopat kolindakan kanan hulutn nantai sampai putus.
51Apo Yesus bopandir, “tongga'an!” Lalu Sio moncama' kolindakan urakng nantai, ongko nyamanam.
52Lopas nian Yesus bopandir ko boko imam kopala' huatan boko powira pongawal Rumah Allah, ongko boko pomimpitn Yahudi inyo datakng ko santai pakai' monangkap Sio. Kato Sio, “Aku ni'in bukainyo ponjahat, jadi kaitn padohan mombaba' podakng ongko boko pompangkukng pakai' monangkap Aku. 53Sotiap ari Aku hala ada'an agatn kaitn di tongahlamanan Rumah Allah, apo timpu nantai kaitn co monangkap Aku. Apo ninam watunyo kaitn labuh, watu Rajo Sitatn bulah pokoroja'annyo inyo jahat.”
Rasul Petrus monyangkal agatn mongatoan io co konal agatn Yesus
(22:54-62)
(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)
54Sia' monangkap Yesus ongko mombaba'-Nyo ko rumah Imam Agukng. Petrus mombodapan doi' jouh. 55Apo kali udah sampai di rumah nantai, Petrus dudu' di antaro sia' inyo tongahan mongoliliki api inyo udah bonyalo di tongahlamanan rumah nantai. 56Obai Petrus dudu' dampikng api inyo bonyalo nantai, ado siku' urakng hulutn botina' mongilikng muhonyo. Botina' nantai moncorona'i ongko bopandir, “Urakng ni'in pan tontai tuyut sosamo agatn Urakng inyo ditangkap nantai!”
57Apo Petrus monyangkal. Kato io, “Bukai! Aku co konal agatn Sio!”
58Co manah lopas nantai, ado urakng bukai moniant Petrus ongko bopandir ko io, “Kolai ni'in pan salah siku' doi' boko murid-Nyo!”
Apo Petrus bopandir, “Cado! Aku bukai murid-Nyo!”
59Kiro-kiro sojapm lopas nantai, siku' urakng bukai agi' bopandir agatn togas, “Kona'am urakng ni'in tuyut bonsamo agatn Urakng inyo ditangkap nantai, obai io urakng doi' doerah Galilea jam!”#22:59: Petrus kotohuan doi' doerah Galilea obai pakai logat sodikit kinyo samo doi' urakng di kota Yerusalem (Matius 26:73). Yesus ongko somuo rasul-Nyo di doerah Galilea, kocuali Yudas Iskariot.
60Apo Petrus bopandir agi', “Bukai! Pomandiran kolai nantai kinyo bondar!” Timpu Petrus bopandir nantai, watu nian jam manu' bokuku'. 61Lalu Tuhatn Yesus mongilikng ko arah Petrus. Watu nian jam Petrus ingant pomandiran-Nyo tontai: ‘Watu ni'in jam kolai tajahan monyangkal Aku sampai tigo kali sobolupm manu' bokuku'.’ 62Ongko Petrus koluar doi' tongahlamanan rumah nantai, huatan monangis obai kotakng monyosal.
Yesus dipoulu'an huatan dipantu'
(22:63-65)
(Mat. 26:67-68; Mrk. 14:65)
63Boko urakng inyo tongahan monahan Yesus, mohayam Sio, momantu Sio. 64Sia' monutup mato Sio ongko bopandir ko Sio, “Aman Duatn bondar-bondar nabi, butiancam! Pandiranbo, sopo inyo momantu Duatn?” 65Sia' hala boulu'an Sio agatn boko pomandiran.
Koputusan Pakai' Mohukupm Yesus Mati#22:66: Matius, Markus, Lukas ongko Yohanes monulis mongonaꞌi pongadilan Yesus agatn caro bobeda. Dalapm Lukas, ado ompat tahap. Yesus diadili ulih: 22:66-71 kolompok pomimpitn urakng Yahudi inyo palikng pontikng mourus masrakat huatan agama sia', 23:1-7 Gubernur Pilatus, 23:8-12 Gubernur Herodes, ongko 23:13-25 Gubernur Pilatus agi' (huatan masrakat).
(22:66–23:25)
Yesus diadili kolompok pomimpitn urakng Yahudi
(Mat. 26:59-66; Mrk. 14:55-64; Yoh. 18:19-24)
66Pas sunsukng, ado potomuan kolompok pomimpitn agama Yahudi inyo kotakng pontikng. Boko imam kopala' huatan boko guru agama Yahudi ado di santai. Lalu Yesus dibaba' ko hadapan sia'.
67Sia' botakutn ko Sio, “Padahan ko koi, Duatn ninam kironyo Rajo Inyo Dijanjian Allah, rajo inyo kito sobut ‘Mesias’?”
Yesus monimbas, “Aman Aku momadahan ko kaitn, kaitn pan co tajahan pocayo. 68Ongko aman Aku botakutn ko kaitn, kaitn pan co paca'an monimbasi. 69Co manah agi', Ana' Monsio, tajahan dudu' di tompat inyo tohormat sopia' kanan Allah Inyo Kotakng Bokuaso.”#22:69: Boko pomimpitn ni'in bopikir sia' bokuaso pakai' moadili Yesus, apo Yesus bopandir Sio inyo bokuaso pakai' moadili sia' nononyo! Mazmur 110:1
70Sia' somuo monimbas, “Aman ubo nian, Duatn ni'in ana' Allah?”
Timbas Yesus, “Ubo pandir kaitn nam.”
71Jadi sia' bopandir, “Padohan bogoyap sasi agi' pakai' mongotohu'i kosalahan-Nyo! Kito udah mondingaꞌ doi' pandir-Nyo siku'.”
