Lukas 21
21
Posombahan siku' urakng botina' balu inyo jaro
(21:1-4)
(Mrk. 12:41-44)
1Yesus borotian boko urakng dampu monamoan duit posombahan ko dalapm tompat posombahan di tongahlamanan Rumah Allah. 2Sio moniant jam siku' urakng botina' balu inyo jaro monamoan duo pingkai' duit grenceng kotakan kocit nilainyo. 3Lalu, Yesus bopandir ko boko murid-Nyo, “Dinga'anbo! Sobondarnyo botina' balu inyo jaro ni'in moonji'i lobih doi' sotiap urakng bukainyo, 4obai sia' bayo moonju' sobagi'an kocit doi' banyaꞌnyo duit umputn sia'. Apo botina' balu ni'in moonji'i somuo duit umputnnyo doi' somuo kohidupannyo.”
Rumah Allah paca'an diruntuhan
(21:5-6)
(Mat. 24:1-2; Mrk. 13:1-2)
5Timpu nantai boboropo urakng bongkisahan mongonaꞌi kopoboi'an Rumah Allah. Sia' mongatoan bangunan nantai kotakng boi' obai dipulah agatn boko batu marmar inyo kotakng boi', ongko dihiasi agatn boko barakng inyo boi' diposombahan ko Allah.#21:5: Boko urakng dampu moonju' barakng dipulah doi' omas damo pira' pakai' mohiasi boko tembok huatan boko lawakng Rumah Allah. Apo mondingaꞌ nantai Yesus bopandir, 6“Pas nononyo, somuo inyo kaitn tiat ni'in paca'an dihancuran. Conyiant sobuti' batu pan inyo kinyo paca'an diruntuhan.”
Boko murid Yesus tajahan didorako'i
(21:7-19)
(Mat. 24:3-14; Mrk. 13:3-13)
7Sia' botakutn ko Yesus, “Guru, sombilo kiro boko hal nantai tajahan tojadi? La'apo boko tando inyo ado sobolupmnyo?”#21:7: Yesus monimbas pakai' monjolasan tigo hal: boko murid-Nyo paca'an didorako'i (ayat 12-19), Rumah Allah paca'an diruntuhan (ayat 20-24) huatan Yesus paca'an bobali' ko dunia (dunia paca'an boahir) (ayat 8-11, 25-28).
8Yesus bopandir, “Boboi'cam! Jangan sampai kaitn dikotumbuki mongonaꞌi watu Aku bobali'. Banyaꞌ urakng paca'an datakng inyo mongaku' ubonyo io nantai Aku. Sia' paca'an bopandir, ‘Aku ni'inam Rajo Inyo Dijanjian Allah! Watu ni'in udah ahir joman!’ Jangan sampai kaitn pocayo ongko monjadi pongikut sia'. 9Aman kaitn mondingaꞌ poparakan huatan pomborontakan, jangan gola' obai somuonyo nantai gola' tojadi sobolupm dunia tajahan boahir sosuai hajat Allah. Apo nantai kinyo boroti dunia paca'an boahir dalapm watu inyo dampikam.
10Nononyo banso paca'an boparakng molawatn banso bukainyo. Nogori molawatn nogori bukainyo. 11Di mono-mono tajahan ado gompa bumi inyo bosar, lapar-barau, poranggapan rayo. Lalupan paca'an ado boko hal inyo bogola'i. Boko urakng paca'an topogola' moniant boko tando di langit inyo monunju'an dunia ni'in paca'an boahir.#21:11: Boko tando nantai dijolasan agi' di ayat 25.
12Apo, sobolupm somuo nantai tojadi, kaitn paca'an ditangkap ongko didorako'i obai kaitn nantai murid-Ku. Kaitn paca'an diadili di boko rumah sombayakng ongko ditamoan ko dalapm ponjara. Kaitn tajahan dibaba' ko boko rajo huatan ko boko ponguaso pakai' diadili jam. 13Apo, nianam watunyo pakai' kaitn bosasi mongonaꞌi Koraja'an Allah. 14Jadi, sobolupm nantai, kuat cam di dalapm hati oca' co kuatir mongonaꞌi pomandiran inyo paca'an kaitn pandiran pakai' mombela diri. 15Obai Aku siku' tajahan moonji'i ko kaitn komampuan pakai' mongatoan pomandiran inyo topat, sampai boko musuh kaitn kinyo paca'an ulih monontakng ongko monikaki kaitn. 16-17Obai kaitn nantai murid-Ku, somuo urakng tajahan bonci'an kaitn.#21:16-17: Di Yohanes 9:22 ongko 15:18-25, dijolasan lobih jouh ma'apo boko urakng paca'an mombonci' boko murid Yesus. Boko pomimpitn banso Yahudi kinyo pocayo aman Yesus memang Rajo Inyo Dijanjian Allah. Jadi sia' udah sopakat aman somuo urakng inyo mongaku' Yesus nantai Rajo, sia' paca'an diadili ongko dihukupm. Boko rumah sombayakng monjadi tompat pongadilan sia'. Lalu pan kaitn tajahan dihianati ulih boko urakng tuho, boko somadikan dalapm nyao, suku-pomili, boko pokawalan. Ado jam boboropo urakng di antaro kaitn inyo tajahan dibunuh. 18-19Apo aman kaitn totap botahatn, sotia agatn Aku biar pan sampai dibunuh, boko jiwa kaitn co tajahan bonaso.#21:18-19: BASO. Yunani pakai porbaso ‘co solamba'i pan doi' rambut di kopala' paca'an hilakng’. Kaitn tajahan hidup kokal di sorugo.”
Yesus bopandir kota Yerusalem paca'an dihancuran
(21:20-24)
(Mat. 24:15-21; Mrk. 13:14-19)
20“Watu kaitn moniant tontara musuh mongopukng kota Yerusalem, kaitn tajahan tohu co manah agi' kota nantai paca'an dihancuran. 21Jadi timpu nantai, boko urakng inyo ado di kota soharusnyo koluar. Boko urakng inyo udah di luar kota soharusnyo jangan mansu' ko dalapm kota. Boko urakng disomuo doerah Yudea soharusnyo morarian diri ko boko bukit. 22Obai niannam watunyo Allah tajahan mohukupm. Somuo inyo ditulis ulih boko nabi mongonaꞌi ni'in paca'an bondar tojadi.#21:22: Dalapm sojarah urakng Israel, Allah mombiaran sia' dikalahan ulih boko musuh sia' obai co monaati-Nyo. Ulangan 32:35, 2 Tawarikh 7:19-22, 1 Raja-raja 9:6-9, Yeremia 18:11-17, 46:10; Daniel 9:26-27, Hosea 9:7, Mikha 3:12, Zakharia 11:4-9, 14:2; Maleakhi 4:1. Kota Yerusalem nantai pusat adat, budaya huatan agama urakng Israel. Jadi, ni'innam caronyo Allah mohukupm umant-Nyo obai co pocayo Yesus nantai Rajo Inyo Dijanjian Allah. 23Kosi'ai boko botina' inyo tongahan buntikan damo ija' monyusu'i boko bobia' kocit timpu nantai. Boko urakng di tanah Israel ni'in tajahan kotakng ajab sonsaro obai Allah paca'an mohukupm sia'. 24Ado inyo paca'an dibunuh agatn podakng. Ado jam inyo tajahan ditangkap ongko dibaba' ko boko nogori bukai, monjadi tahatan di su'utn. Boko banso inyo bukainyo Yahudi tajahan monguaso'i tanah kota Yerusalem sampai watunyo inyo udah ditontuan Allah.”#21:24: Pomandiran ni'in monjadi nyata watu pomorintahan Romawi mombonasoan Rumah Allah huatan soluruh kota Yerusalem pado tohutn 70 M.
Boko tando inyo monunju'an Yesus paca'an bobali' ko dunia ni'in
(21:25-33)
(Mat. 24:29-35; Mrk. 13:24-31)
25“Nononyo paca'an ado boko tando di matoari, bulatn, boko bintakng di langit inyo monunju'an dunia ni'in tajahan boahir. Di bumi boko urakng monjadi kotakng gola', monjadi putus asa obai loutnyo tajahan boguruh bogura', tajahan bogolumbakng bosar. 26Boko ponguaso di langit#21:26: Boko ponguaso di langit ulih bomasud matoari, bulatn, bintakng, planet (Yesaya 34:4; Ibrani 12:26-27, Wahyu 6:12-13). Apo ulih jam bomasud boko roh jahat di langit inyo molawatn Yesus huatan boko urakng inyo pocayo ko Sio (Efesus 2:2, 6:12, Roma 8:38, 1 Korintus 15:24-26, 1 Petrus 3:22). paca'an boguncakng, bulah urakng hampir mati topogola' moniant boko malopotako moninggakng dunia ni'in. 27Timpu nantai, urakng paca'an moniant Ana' Monsio paca'an datakng bobali' ko dunia ni'in, turutn doi' sorugo di pucu' awatn. Io paca'an bocohayo torakng. Io paca'an kotakan bokuaso.#21:27: Daniel 7:13-14. Yesus paca'an bobali' agatn kuaso pakai' mongalahan Rajo Sitatn huatan somuo boko roh jahat, pakai' mohukupm boko urakng inyo kinyo pocayo agatn Sio. 28Watu kaitn moniant somuonyo ni'in mula'i tojadi, jadi yakitn huatan pocayo cam. Boharap cam soponuhnyo, obai co manah agi' kaitn paca'an disolamant'an.”#21:28: 28 Pado watu nantai, urakng inyo pocayo agatn Yesus paca'an ‘dibebasan’ doi' kosusahan huatan poncoba'an di dunia ni'in obai kuaso jahat kinyo dapat monyorakng kito agi'.
29Lalu, Yesus monjolasan agatn contoh ni'in, “Porotian tontanaman ara damo tontanaman la'apo ja'. 30Aman kaitn moniant boko tontanaman botunas, kaitn paca'an tohu co manah agi' musipm tontanaman lantakng paca'an datakng. 31Ubo nian jam, aman kaitn moniant somuo boko tando di langit ongko di bumi, kaitn tajahan tohu co manah agi' Koraja'an Allah tajahan datakng.
32Dinga'anbo! Sobondarnyo co somuo urakng doi' joman ni'in tajahan mati sobolupm somuonyo ni'in mula'i tojadi.#21:32: Roti doi' ayat ni'in kurakng jolas. Apo, ija' ado urakng doi' joman Yesus inyo hidup pado watu Kota Yerusalem dihancuran. Apo boko urakng joman ni'in jam ulih boroti lopas jadi Yesus toangkat ko sorugo sampai Sio bobali' agi' ko dunia ni'in. 33Pocayocam pomandiran-Ku, obai biar pan langit ongko bumi paca'an boahir, pomandiran-Ku totap somanah-manahnyo.”
Gola' hala siap pakai' kodatakan Yesus
(21:34-38)
34-35“Jagocam diri kaitn. Jangan sampai ado boko hal di dunia ni'in inyo moncaci' pikiran kaitn, ubo mabu', porbuatan jahat inyo dilabuhan aman udah komabu'an, boko mosalah kohidupan ni'in. Aman pikiran kaitn samaꞌan nian, nononyo kaitn co siap timpu ari nantai datakng. Obai ari nantai tajahan datakng pakai' somuo urakng, conyiant inyo tohu, samo samaꞌan joyat ntobukan mongujut bonatakng. 36Jadi, kaitn gola' hala monjago diri. Bodoacam oca' kaitn totap pocayo ko Allah, watu kaitn mohadapi ajab sonsaro inyo co manah agi' tajahan tojadi. Lalu kaitn paca'an tenang watu Ana' Monsio bobali' ko dunia ni'in, moadili somuo urakng am.”
37Sotiap ari Yesus mongajar di tongahlamanan Rumah Allah. Sotiap malapm, Sio tidu' di bukit Jaitun di luar kota Yerusalem. 38Holapm sunsukngnyo, somuo urakng banyaꞌ datakng ko tongahlamanan Rumah Allah, honda' mondingaꞌan pongajaran-Nyo.
