Luka 23
23
1Ɔkɛlɛ banɔ petee bexogo klɛ ba gbanɔ Yesu ekoeyi avɛnɔ Pilato ɔkɔ. 2Klɛ be tenɔ kibui yɛkɔ nɛ yɛ shu aɖɔ sɛ, “Bu mɔ anyɛ anɛ gɛ alɔɛ titi nɛ bulɔ ɔma nɛ shu. Alɔɛ titi nɛ kadzɔ kukɔ kɔ Kaizaro klɛ abhɛtɛ yɛ shu sɛ yɛ enu Kristo ekusi.”
3Pilato ebisi Yesu asɛ, “Wɔ nu Yuɖa nɛ ekusi?”
Yesu ebushunu sɛ, “Ee, kɛlɛ anasɛ gɛ ɔɖɔ.”
4Ɔkɛlɛ Pilato etsre kpayazakɛanɔ bekusi nɛ̀ banɔɛza asɛ, “Ɛdɛ mɔ kizizi gɛ ɛba yɛkɔ nɛ yɛ shu.”
5Pɔ ba za lɛabha sɛ, “ Akpɛ ebla nɛ banɔ petee gɛ balɛ Yuɖea shi ganɔ yɛ kɛdɔkɛkasɛ mɛ. Akpɛesi nɛ Galelia klɛ atɔnɛ dzo aba ɔkɛ̃ nɛ.”
6Gɛ Pilato enu kibui nɛ, ebisi asɛ, Anyɛ anɛ Galelia eyi enu. 7Gɛ amɔ sɛ, Yesu ede ɔma nɛ gɛ lɔza Heroɖesɛ kabhaŋɛŋa esi, ayɛkɔ yɛ asɛsɛ Heroɖesɛ, gɛ yɛ tsyɛ aza Yerusalɛm nɛ kibe lɛlɛ. 8Gɛ Heroɖesɛ amɔ Yesu, same ku yɛ alasɛ kibe dzidze nɛ gɛ apɛɛ yɛ asɛ tɛ amɔ. Denɔ ebui gɛ enu nɛ yɛ shu, edi kɛdzoenu sɛ tɛ amɔ yɛ abhɛtɛ ebuiyinɔanɔ teli. 9Ebisi yɛ ebui gelee, pɔ Yesu ede bu alɛ nu. 10Kpayazakɔanɔ bekusi anɛ ɛshã badɔkasɛ ba za ɔkɛlɛ, gɛ bebhui yɛ nu gɛganɛganɛ. 11Ɔkɛlɛ Heroɖesɛ nɛ̀ yɛ keyutugbani bakpɛ yɛ tsɔ klɛ ba kpɛ yɛ wɔɛ̃. Ba yɛkɔ kedziŋɛŋa awui dzidze akpɛ kɔ yɛ, klɛ betsidzinɛ yɛ avɛnɔ Pilato ɔkɔ. 12Denɔ kiwui lɛlɛ nɛabha Heroɖesɛ nɛ Pilato be dzi ɔbhɛa—flogo kibui lɛ nɛ ba badɛ pɛɛ ɔhaglɔ bui.
13Pilato eklu exogo, kpayaɔzakɔanɔ ekusi, bamani nɛ̀ banɔ, 14klɛ aɖɔ tsre alɛ sɛ, “Nɔ mɛna mɛ anyɛ anɛ anasɛ agɛ akpɛ banɔ sɛ tɛ balɔ kititi nɛ ɔma nɛ shu. Ɛnyɔ yɛ shu nɛ wunɔ amɛ klɛ ɛdɛmɔ kɛ gɛ lɛ so gɛ nɔyɛkɔɛbui nɛ yɛ shu. 15Heroɖesɛ tsyɛ adɛ mɔ, alasɛ etsodzi yɛ asɛsɛ lɔ; anasɛ gɛ wunɔ nɔ mɔ, adɛ bhɛtɛ kibuinyɛbui gɛ kɛbakɔ sɛ aba mɔ butsi. 16Klɛso ɛba tɛta yɛ klɛ kɛlɛede ɛba shɛnahwɛ yɛ shu.” 17(Alasɛ tɛ Pilato ashɛnahwɛ anɔ terikpo shu ɔkɔ alɛ nɛ Kiwui ŋɛŋa nɛabha).
18Balɛ petee bakpɛ ogugu gɛganɛ kɛtsu asɛ, Nɔ shɛnɔ anyɛanɛ! Shɛnahwɛ Barabasɛ shu kɔ lɔ!” 19(Barabas enu anɔ gɛ be vu akpɛ buvu sɛ akpɛ ogugu nɛ ɔma nɛ tɔkpu klɛ eyi anɔ.)
20Pilato apɛɛ asɛ tɛ ahɛnahwɛ Yesu shu, so eze bisi denɔ balɛ ahwɛmɛ bubhla. 21Pɔ ba ka kpɛ lɛ ogugu asɛ, “Kplayɛɔsɔ! Kplayɛɔsɔ!”
22Bu tramɛ aɖɔaɖɔ etsre alɛ: “Kideso? Kibuikpã ɖuweɖu anɔa nɛ abhɛtɛ? Ɛdɛ mɔ kɛ gɛ kɛlɛ shu le be bu yɛ butsi pɔ. Kɛlɛso ɛba kɔ la tɛta yɛa tɔ klɛ ɛba shɛnahwɛ yɛ shu.”
23Pɔ nɛ balɛ ogugu nɛ za kɛlɛa bha gɛganɛ klɛ lɛ ba ŋa. 24So Pilato aba dɛmɛ kibui nɛabha akɔ alɛ. 25Ashɛnahwɛ anɔ nɛ gɛ bevu akpɛ buvu gɛ alɔɛtiti nɛ bekusi nɛ shu pɛ̀ eyianɔ nɛ shu, klɛ ayɛkɔ Yesu akɔ alɛ nɛ balɛ tɛpɛpɛɛ nɛ nu.
Yesu Tɛkpɛkplasɔ
26Gɛ ba gbanɛ yɛ ashɛ̃nɔ, be vu Simɔn gɛ ede Sirene, gɛ ede kɔxɔemɛ avɛ ɔma nɛ mɛ, klɛ ba yekɔ butsiosi nɛ atrɔ yɛ klɛ ba kɔ yɛ etuku ɔlɛ gɛ aza Yesu kede. 27Banɔ gelee aza yɛede, gɛ badzɛ aza balɛ mɛ gɛ be biyo nɛ igugu gɛganɛ kɔ yɛ. 28Yesu etsyina klɛ aɖɔ tsre alɛ sɛ, “Yerusalɛm Badzɛ, nɔ tɔ biyo kɔ mɛ; nɔ biyo kɔ wunɔshu nɛ̀ wunɔ yialɛ shu. 29Alasɛ kibe ba ba gɛ nɔ bɔ ɖɔ sɛ, ‘Tɛyuyula lɛ kɔ badzɛ gɛ ba dɛmɔ eyi, ɛmumɔhwui gɛ lɛ kamɔ di nɛ amɔ gɛ la kanyɔnɔ beyi edi!’ 30Ɔkɛlɛ
“ ‘Ba baɖɔ ɛtsre betu nɛ sɛ, “Kpa trɔ blɔabha!”
klɛ kɔ ɛtukpɛ, “Kumu lɔ!” ’
31Kɛlɛ onugɛ banɔ babhɛtɛ ebui anɛ nɛ osi wuwɔ shu, kɛlɛ lɛ ba za kɔ ɔkpɛkpã?”
32Banɔ tɛabha bhlatɔ be di tabha bɛ nu buzizi abhɛbhɛtɛ, balɛ tsyɛ ba gbanɛ akɛ aplɛnɔ yɛ sɛ tɛ ba de yi. 33Gɛ beku ɔzakɔ gɛ beklu asɛ Kɛtɔkpuxwa, ɔkɛlɛ be yi Yesu, nɛ banɔ tɛabha—terikpo alɛ ye kɛŋa nɛ mɛ, abhla na lɛ yɛ kebhɛtɛkpɛ mɛ. 34Yesu aɖɔ sɛ, “Aka, yɛkɔtsye alɛ, alasɛ be tinyi kɛdɔ nɛgɛ ba bhɛtɛ.” Klɛ ba yɛkɔ yɛ dɔkpɛkpɛ akɔ ɔhaglɔ nɛ kebisi nɛ nu.
35Banɔ lɔkititi edi yɛ, klɛ ba gɛ baŋa abha ba bu onugbu mɛ nɛ yɛ shu. Ba ɖɔ sɛ, “Ebhui ba bhlatɔ ayɛkɛ, nɔ kɔ yɛ ebhui shu ayɛkɛ onugɛ enu Kristo Kpaya Ekuklu.”
36Betugbani tsyɛ ba ba klɛ ba ba kpɛ yɛ butsyɔ. Ba bakɔ yɛ bulu gɛganɛ, 37klɛ ba ɖɔ sɛ, “Onugɛ wɔ nu Yuɖanɛ nɛ ekusi, bu shu.”
38Ba ŋlɔmɛ dɔ atrɔ yɛ ada nɛ mɛ gɛ kɛ ɖɔ sɛ, Ye Nu Yuɖanɛ Ekusi.
39Bezizi nɛ mayɛ teli gɛ banya yɛ asɔ nɛ ɔkɛlɛ, aɖɔ kɛbui akula Yesu asɛ: “Anɛ wɔ nu Kristo? Bu shu klɛ tɛ obu lɔ!”
40Pɔ anɔ akpã abhla akpa yɛ asɛ, “Oto si Kpaya fu, aɖɔ sɛ, nɛɛ lɛ mɛ otinyi sɛ ɔlɛ kɛpɔ bubui lɛlɛ nɛ mɛ? 41Ba tɛta lɔ batɔ nɛ kidzo dzyɔgo abha, alasɛ bu yɛkɛ kɛgɛ bulɔ ebui bhɛbhɛtɛ nɛ ebisi. Pɔ anyɛa nɛ adɛ bhɛtɛ kibui zizi.”
42Klɛ aɖɔ sɛ, “Yesu, baka mɛ bui kibenɔ nɛ gɛ odoku wɔ bukusiɔŋakɔ.”
43Yesu etsre yɛ asɛ, “Itsre wɔ kɛgbɛagba sɛ obonɛ ɔbɔ za mɛ ɔbha nɛ paraɖiso nɛ mɛ.”
Yesu Yɛ Butsii
44Ɔtsɔ̃ nɛ aba za anasɛ ɔɖatɛta ohlomi klɛ otumu ɔdɔ nɛ kesukpa petee abha ɔdɔtɔnɔ ɔɖɔtɛta ozhita nɛ abha, 45alasɛ kiwui nɛ zɛkɔlɔ tã. Klɛ kɛpɔtɛ nɛ gɛ kɛ bhui kpayavu nɛ mɛ kɛ tsyɔɛ̃ kpɛ ɛkɔtɛbha. 46Yesu akpɛ ogugu nɛ olimɛ gɛganɛ sɛ, “Aka, wɔ ahwɛmɛ Ɛyɛkɔ mɛ ɔfufɔɛ nɛ kpɛ.” Gɛ aɖɔ kibuinɛ beke afɔɛ yɛ ɔfufɔɛ gugɔɛ.
47Keyutugbani anɔ gbɛgbla, gɛ amɔ ebui gɛ la ba ba, akpɛ Kpaya kɛtɔkpu nɛabha klɛ aɖɔ sɛ, “Kɛgbɛagba anɔ dzyɔgo yɛ edzi.” 48Gɛ banɔ petee gɛ ba be xogo sɛ tɛ ba bedi ɔzakɔ anɛ ba mɔ kɛ gɛ ba bɛ lɛmɛ, bayɛkɔ ɛhwɛ atrɔ ete mɛ klɛ ba shɛ̃. 49Pɔ banɔ petee gɛ bɛ nyi yɛ, ɔyɛkɔ plɛnɔ badzɛ nɛ gɛ ba za yɛ dɛ denɔ Galelia, baza odzidzekɔ, edi ebui.
Yesu Tɛvuvubɔ
50Ɔtsɔ̃ nɛ anyɛ teli gɛ be klu sɛ Yosɛfu, enu Bamani teli, adzyɔgo klɛ yɛ shu bhui, 51agɛ adaa dɛmɛ atrɔ balɛ ebui ɖɛɖɔ anɛ̀ tɛ bhɛbhɛtɛ nɛabha. Ede Yuɖea ɔma toli gɛ be klu asɛ Arimatia klɛ epo Kpaya bukusiɔŋakɔ. 52Avɛ Pilato ɔkɔ klɛ ede bisi asɛ ba yɛkɔ Yesu tsitsi nɛ akɔ yɛ. 53Ede bu yɛ nɛ butsiosi nɛ shu amɛna kesi, anya yɛ akpɛ kɛpɔtɛ frɛrɛ mɛ klɛ ada vubɔɛ yɛ nɛ odzre gɛ be bu nɛ kɛklãngbu mɛ, ɔlɛmɛ gɛ baka vubɔ anɔ nɛ ɔkɛlɛ di. 54Kɛnu Tɛbɛbala Kiwui, klɛ Kimuenewi nɛ ba kpɛe si.
55Badzɛ nɛ gɛ ba za Yesu ede denɔ Galelia ba tɔnɔ Yosɛfu klɛ ba da mɔ odzre nɛ̀ kɛvubɔ nɛ gɛ ba vubɔɛ yɛ. 56Badzɛ nɛ ba shɛ̃ avɛ bupa mɛ klɛ ba da bhɛtɛ bawa gɛ ba lɔ̃ huhuhu. Pɔ be moene nɛ Kimuenewi nɛabha tɛ ba yɛkɔ ata ɔshã nɛ atɔ.
© Ghana Institute of Linguistics, Literacy and Bible Translation
