Luka 22
22
Yuɖasɛ Adɛmɛ Akpɛ Yesu Ahwɛ
1Ɔtsɔnɛ Bunamayeke Gbɛ̃gbɛvu kiwuiŋɛŋa gɛ be klu asɛ Tefɛflawui, kɛtsobunɔ, 2klɛ kpayaɔzakɔanɔ anɛ̀ eshãdɔkasɛ ba pɛɛ kidzo tili sɛ tɛ be yi Yesu alasɛ be sifu nɛ̀ banɔ. 3Ɔkɛlɛ Satana ebe tsoku Yuɖasɛ mɛ, gɛ beklu asɛ Iskarɔtɛ gɛ enu kɛfɔntɛabha mayɛ teli. 4Klɛ Yuɖasɛ avɛ kpyaɔzakɔanɔ anɛ̀ busɔlɛvu bepupo banɔ gbɛgbla nɛ ɔkɔ klɛ ada nyɛna kana gɛ aba ga gɛ aba yɛkɔ Yesu akpɛ ahwɛ. 5Kɛkualɛ samɛ klɛ ba dɛmɛ sɛ ba bakɔ yɛ kɔba. 6Yuɖas adɛmɛ, klɛ edi kidzoenu tɛ ayɛkɔ Yesu akpɛ ahwɛ kɔ alɛ kibenɔ gɛ banɔɛza ma.
Ɔwlago Kɛdɔŋɛŋa Gugɔɛ
7Gɛ kiwui nɛ na kɔ Gbɛ̃gbɛvu Mayeke wui nɛ na gɛ kɛlɛabha ba ba yɛkɔ Tɛfɛflawi obhoshieyi nɛ egu bugu nɛ nɔ. 8Yesu akpɛ Petro anɛ Yohanɛsɛ, aɖɔ sɛ, “Nɔ vɛ tɛ nɔ dɔ bala kɔ lɔ tɛ bu ŋa Tɛfɛflɛwi.”
9Bebisi asɛ, “Fakɔ wɔ pɛɛ sɛ tɛ bubala kɔɛ lɛ?”
10Ebuilɛnu asɛ, “Onugɛ nɔ tsoku ɔmagbɛgbla nɛ mɛ, anyɛ teli etuku ketsukpu nɛ buni aba tsyanɛ nɔ. Nɔ za yɛede ɔvɛ bupa nɔ nɛ mɛ gɛ etsoku, 11klɛ nɔ tsre bupaka nɛ asɛ, ‘Adɔkasɛ nɛ ebisi asɛ: Fakɔ efu ɔyakɔvu nɛ lɛ, gɛ ɛba ŋa Tɛfɛflawi nɛ̀ mɛ badɔkpasɛ?’ 12Aba kasɛ nɔ kabhavu gbɛgbla tuli mɛ gɛ be ŋuse lu. Nɔ bhɛtɛ tɛ bɛbala nɛ ɔkɛlɛ.”
13Ba vɛ ba da mɔ kɛdɔ anasɛ gɛ Yesu etsre alɛ. So ba da bala kɔ Tɛfɛflawi tɛŋɛŋa.
14Gɛ ɔɖɔ nɛ mɛ ɔna, Yesu nɛ yɛ bakpɛkpɛ ba da za kɛwɔɛ̃ nɛ kɛ dɔ nɛ ɔŋakɔ. 15Klɛ etsre ale se, “Ɛtrɔ gɛganɛ sɛ tɛ ɛŋa Kiwui nɛ nɔ flogo tɛ eba mɔ butɔ. 16Alasɛ itsre nɔ sɛ ɛtɛa ŋa lɛ ɔdɔnanɛ kibɛ lɛlɛ nɛ gɛ kɛ bana nɛ́ Kpaya bukusiɔŋakɔ.”
17Kɛlɛe de Yesu ayɛkɔ kantse, ehuahwɛ, klɛ aɖɔ sɛ, “Nɔ yɛkɛ yanɛ klɛ tɛ nɔ ya kpɛ aglɔ mɛ. 18Alasɛ itsre nɔ sɛ ɛtɛa wɔɛ̃ vãyɛ̃ eyuyu buni nɛ di ɔdɔtɔnɔ kibe lɛlɛ nɛ gɛ Kpaya kusiɔŋakɔ nɛ ɔbɔ ba.”
19Klɛ ayɛkɔ gbɛgbɛvu, ehuahwɛ, klɛ ayɛ yɛmɛ klɛ aɖɔ sɛ, “ Kɛɛ nɛ klɛ nu mɛ shuidzya gɛ ba kɔ nɔ, nɔ bhɛtɛ kana tɛ nɔ yɛkɔ zɔ baka mɛ bui.”
20Nɛ kidzoe lɛlɛ nɛabha ke, nɛ ɔwlago kɛdɔŋɛŋa nɛe de, ayɛkɔ kantse, klɛ aɖɔsɛ, “Kantsea nɛɛ kalɛ enu mɛ onugbu nyɛnya vuvɔ nɛ mɛ dzyosu mɛ, gɛ ba balɛ elu kɔ nɔ. 21Pɔ ɔhwɛ gɛ lɔbɔ yɛ kɔ mɛ akpahwɛ, lɔ lɛ plɛnɔ mɔyɛ nɛ kɛdɔɛnɛ ɔŋa kɔ. 22Anɔdzyrame Yi aba shɛ̃ anasɛ gɛ ba kpɛ elu, pɔ butɔ kɔ anɔ nɛ gɛ aba yɛ kɔ yɛ akpɛahwɛ.” 23Betenɔ ɔhaglɔ bisi sɛ balɛ mayɛ ɖueɖu ebedzi gɛ abhɛtɛ ebuia nɛ.
24Kibui wũwlãkɛ tsyɛ baku balɛ shi sɛ, ane yɛ be dzi agbɛgbladɛ. 25Yesu etsre alɛsɛ, “Bagɛ edi nu Yuɖanɛ anɛ bekusi balɛ trɔ ebui nɛ ba lɛabha, klɛ bagɛ baŋa lɛabha be klu balɛshu asɛ balɛnu Bapɛplɛnɔ. 26Pɔ ama kɔ nɔ sɛ tɛ nɔ za ana. Kɛlɛmaza, agbɛgbladɛ nɛ wunɔ mɛ edzi anasɛ anuvɔ bhlidɛ, klɛ tɛ agɛ aŋɛabha aza anasɛ agɛ adɛ axwɛ. 27So ane gɛ enu agbɛgbladɛ, agɛ alɛ kɛdɔnɔŋakɔ pɛnɔ agɛ adɛ axwɛ? Anɛ agɛ alɛ kɛdɔ nɛ ɔŋakɔ? Pɔ ɛlɛ wunɔɛshi anasɛ agɛ adɛ axwɛ. 28Wunɔ nu banɔ nɛ gɛ nɔ lɛ mɛ shu nɛ mɛ tɛfifekedi mɛ. 29Klɛ eshɛnahwɛ bukisiɔŋakɔ kɔ nɔ anasɛ gɛ mɛ Aka tsyɛ ashɛ̃nahwɛ tuli shu atrɔ mɛabha, 30sɛ tɛ nɔ bɔ ŋaɛdɔ tɛ nɔ wɔɛ̃dɔ nɛ mɛ dɔŋakɔ nɛ mɛ bukisiɔŋakɔ klɛ tɛ nɔ za bugbu abha, nɔ zɔ klubhui nɛ Izraɛl anɛ apatsu lɔfɔnɛtabha.
31“Simɔn, Simɔn, Satana ebisi asɛ tɛ apɛ nɔ anasɛ amɔ. 32Pɔ iklukpaya nɛ wunɔɛ tɔkpu, Simɔn, sɛ tɛ wɔ tɛyɛyɛkɛŋa tɛ wɔlɛ. Klɛ kibenɔ gɛ otsodzi otsyina ɔtɔ mɛ, kpɛ wɔ adzyalɛ nɛ kemi.”
33Ebuilɛnu asɛ, “Apalete, ɛbala sɛ buvu anɛ̀ butsi mɛ ɛba vɛ plɛnɛ wɔ.”
34Yesu ebuilɛnu sɛ, “Itsre wɔ, Petro, flogo gɛ ɔkukɔ lɔ bɔbɔ obonɛ, ɔbɔ daɛda ada tata sɛ onyi mɛ.”
35Klɛ Yesu ebisi alɛ asɛ, “Kibelɛlɛ gɛ ɛkpɛ́ nɔ gɛ ɔkpɛtɛ, kakputɔ nɛ̀ ɔtsrɛklɔ dɛ zɛlɛm, kizi dɔ tili nɛ wunɔ shu?”
Be builɛnu sɛ “Kidi zi kɛdɔnyɛdɔ.”
36Yesu aɖɔ etsre alɛ sɛ, “Pɔ ɔtsɔ̃ nɛ onugɛ ɔkpɛtɛ lɛ̀ wunɔ ahwɛ, yɛkɔ lɛ, klɛ kakputɔ tsyɛ, klɛ onugɛ kɛpamɛ ma wunɔ ahwɛ, dɔ dɛ wɔ awuidzidze tɛ ɔdɔ dzi tili. 37Baɖɔ lu asɛ, ‘Klɛ ba kla yɛ akpɛ bagɛ ba bhɛtɛ ebui zizi nɛ shi’ klɛ itsre nɔ sɛ, kɛnɛ kɛlɛsɛ tɛ kɛbɛlɛmɛ nɛ mɛ shu. Ee, kɛbui nɛ gɛ ba ŋlɔmɛ nɛ mɛ shu, kɛlɛ tɛbɛba na.”
38Badɔkpasɛ nɛ aɖɔ sɛ, “Di, Apalete, bupamɛ tubha na nɛ.”
Yesu aɖɔ sɛ, “Kɛ lɛ tsyɛ bɔ.”
Yesu Ede Klukpaya Nɛ Olivɛ Butu Nɛabha
39Yesu anasɛ gɛ abhɛtɛ Kibenyɛbe ekoeyi avɛ Olivɛ Butu nɛabha, klɛ yɛ badɔkpasɛ batɔnɛ yɛ. 40Ɔkɛlɛ nɛ tɛkuku ko, etsre alɛsɛ, “Nɔ klukpaya sɛ tɛ nɔ tɛ bɔ wɔlɛ ku tɛfifekedi mɛ.” 41Etsodzi avɛ kede kɛklãgbu tɛtɛta tirikpo kpɛ balɛ otugba, akpla ekuisiesi klɛ eklukpaya, 42“ Aka, onugɛ wɔ ɔpɛɛ, tsɛ kantsea nɛ mɛa bha; anɛ mɛ tɛpɛpɛɛ, pɔ wɔɛ yɛ abha bu ba bhɛtɛ trɔ.” 43Axwɛdɛ teli ede owũsise ebushu akasɛ yɛ klɛ akpɛ bugɛganɛ nɛ́ yɛ shui mɛ. 44Klɛ butɔ za yɛ abha gɛganɛ, eklukpaya gɛganɛdɛ ana, klɛ yɛ buhihe nɛ za anasɛ dzyosu gɛ awɔlɛ lu kesukpa.
45Gɛ alɔ de kpayakuklu nɛabha, klɛ etsodzi avɛ badɔkpasɛ nɛ ɔbha, pɔ amɔ sɛ ba vɛnɔ tra, butɔ gɛ bu tsri alɛ abha so. 46Ebisi alɛ sɛ, “Kideso gɛ nɔ dɔtra?” Nɔ lɔ klɛ tɛ nɔ klukpaya sɛ tɛ nɔ tɛ bɔ wɔlɛ oku tɛfifekedi mɛ.”
Bevu Yesu
47Kɛbelɛlɛ nɛ gɛ aza ɖɔaɖɔ banɔɛza ba be xogo, klɛ anɔ nɛ gɛ bɛ́ klu asɛ, Yuɖasɛ, Kɛfɔnɛtɛabha nɛ teli, yɛ putɔ nɔ nɛ alɛ. Etsobunɔ Yesu tɛ amukɔ yɛ onugbu. 48pɔ Yesu ebisi yɛ asɛ, “Yuɖasɛ, ɔyɛkɔ onugbu mumukɔ ɔkpɛ Anɔdzyrame Yi nɛ ahwɛ.”
49Gɛ Yesu baxwɛdɛ nɛ amɔ kɛgɛ tɛ ba, ba ɖɔ sɛ, “Apalete, bu tẽ alɛ nɛ̀ bulɔ bupa mɛ?” 50Klɛ balɛmayɛ teli afatɛ anɔ gbɛgbla teli yɛ axwɛdɛ kɛŋa batɔ nɛ atɛ̃.
51Pɔ Yesu ebuilɛnu asɛ, “Oo kɛnɛ nɛdi ta ba!” Klɛ Yesu ehunɔ anyɛ nɛ batɔ klɛ ebele yɛ butɔ. 52Ɔkɛlɛ Yesu aɖɔ tsre kpayaɔzakɔ, busɔlɛvu bepupo banɔ gbɛgbla anɛ̀ beshishe, gɛ ba ba sɛ tɛ bevu yɛ, “Ɛgbanɔ banɔ sɛ tɛ ɛyɛ nɔ bukusi, kɛlɛso gɛ nɔ ba nɛ bupamɛ, anɛ̀ busukpogunu? 53Kiwuinyɛwui Mɛ ɛlɛ wunɔ bha nɛ́ kpayavu nɛ mɛ, klɛ nɔ dɛ trɔ ahwɛ nɛ mɛa bha sɛ nɔ vu mɛ. Pɔ wunɔe be nɛɛ—gɛ otumu ɔŋa abha.”
Petro Atɛkenyi Yesu
54Be vu Yesu, ba gbanɛ yɛ ashɛ̃nɔ klɛ bayɛkɔ yɛ avɛnɔ kpayaɔzakɔanɔ ɖɛɖama nɛ bupa mɛ. Petro atɔnɔ alɛ nɛ odzroɖokɔ. 55Pɔ gɛ ba kpɛ fu nɛ buka nɛ kɛshitɛbha klɛ ba zaesi nɛ aglɔbha, Petro aza balɛ ɔbha. 56Adzɛ axwɛdɛ teli amɔ yɛ nɛ́ kɛfu nɛ shu. Etsobunɔ yɛ edi yɛ klɛ aɖɔ sɛ, “Anɔ anɛ aza Yesu ɔbha.”
57Pɔ adɛ lɛ. Aɖɔ sɛ “Adzɛ, ɛtɛ nyi yɛ.”
58Kibe bhliede, anɔ teli tsyɛ amɔ yɛ klɛ aɖɔ sɛ, “Wɔ tsyɛ onu balɛ mayɛ̃ teli.”
Petro ebushunu asɛ “Anyɛ, Anɛ mɛ!”
59Anasɛ ɔɖa tɛta torikpo ede abhlatɔ aɖɔ tɛtɛtrɔ gɛganɛ sɛ, “Kɛgbɛagba anɔ anɛ aza Yesu ede, alasɛ enu Galilea yi.”
60Petro ebuilɛnu sɛ, “Anyɛ, ɛtɛ nyi kibuinyɛbui denɔ kibui nɛ gɛ ɔɖɔ nɛ shu!” Kibelɛlɛ gɛ aɖɔ kibui nɛ, ɔkukɔ nɔ bɔ. 61Apalete etsyina klɛ edi Petro amɛ. Ɔkɛlɛ Petro abaka kɛbui nɛ gɛ Apalete nɛ aɖɔ tsre yɛ: “Flogo gɛ ɔkukɔ nɔ bɔ bɔ obonɛ, ɔbɔ dɛada ada tata nɛ mɛ shu.” 62Klɛ Petro ekoeyi avɛ ɔtɔ klɛ ede biyo gɛganɛ.
Bepupo Nakpɛ Yesu Butsɔ
63Banɔ nɛ gɛ bɛ̀po Yesu betenɔ yɛ butsɔ kpɛ klɛ bɛ tu yɛ. 64Ba nya yɛ amɛ klɛ be bisi denɔ yɛ ɔkɔ sɛ, “Ɖɔdi! Ane yɛ hu wɔɛdɔ?” 65Klɛ ba ɖɔ aklatu ebui gelee bhlatɔ kɔ yɛ.
Bagbanɔ Yesu Avɛnɔ Pilato Anɛ Heroɖesɛ Ɔkɔ
66Nɛ kelizɛzamɛ, bamani, beditabha kpayazakɔanɔ ekusi nɛ̀, Eshã adɔkasɛ, bexogo klɛ bagbanɔ Yesu amɛna balɛ amɛ. 67Baɖɔ sɛ, “Onugɛ wɔ nu Kristo, Tsre lɔ.”
Yesu ebuilɛnu, “Onugɛ itsre nɔ tsyɛ, nɔ tɛ bɔyɛkɛ mɛ abhaŋa, 68klɛ onugɛ ebisi nɔ, nɔ tɛ bɔ bushunu. 69Pɔ denɔ ɔtsɔ ɔvɛnɔ, Anɔdzyrame Yi aba za Kpaya gbɛgbla nɛ kɛŋa nɛ mɛ.”
70Balɛ petee be bisi asɛ, “Kpaya ye Yi wɔ nu?”
Ebuilɛnu asɛ, “Kɛgbɛagba nɔ ɖɔ sɛ Mɛ nu yɛ.”
71Ɔklɛ baɖɔ sɛ, “Kideso gɛ buka pɛɛ ebuimɔɖɔ? Bu nuilɛ denɔ yɛ nahwɛ onugbui mɛ.”
© Ghana Institute of Linguistics, Literacy and Bible Translation
