Pomulanya 29
29
Sarita Tempo i Yakub Rata ri Lipu nu Mamanya
1-2Wali ojo karoonya i Yakub mangika nia etu ia mangampolasaka wo’u palinjanya yau mangampago tana ntau to tondo mata nu eo yako ri tana Kana’an. Wali rata nja’u ria kodi majoli ia mangkita sumur nja’u raya mpada. Sumur etu napake nto pangkampang domba mangampoinu dombanya. Wali tempo i Yakub mangkita sumur etu, ia mangkita seja togo ntolo domba pasi bembe to roomo nakeni nto pangkampanginya yako ri pada rata njo’u sumur etu. Domba pasi bembe etu ojo maturu-turu mangampeas darapoinu. Pei sumur etu rabombongika yau watu to bae pei watu etu tawa rawewoka yau. 3To pangkampang domba pasi bembe etu mangampeas samparia yununya mangkeni seja domba to si sira panewa sira damangawewoka yau watu pei mampoinu samparia binatang etu. Roo see sira damangabombongika muni watu sumur etu.
4Wali rata nja’u ria, i Yakub mampotanaka resi to pangkampang domba etu, ia manganto’o, “Yako imbare komi?”
Sono nsira, “Yako nja’u kota Haran.”
5Panewa i Yakub mampotanaka, “Wimba bara nunsani ngkomi i Laban, makumpu i Nahor?
Wali sira mangansono, “Iya kami kunsani ia.”
6Roo see i Yakub mampotanaka wo’u, “Wimba kareba yako resi ia, bara matao?”
Wali sira manganto’o, “Matao karebanya. Lo’aja! Ananya to we’a, i Rahel, mai mangkeni dombanya.
7Wali yako etu i Yakub manganto’oka to pangkampang domba etu, ia manganto’o, “Gete, owo ntongo eo si’i! Wali maka pei domba pasi bembe ngkomi ojo maturu-turu mampeas darapoinu? Tawa temponya domba pasi bembe etu darakeni muni njo’u tondokinya. Wali to tao-tao komi mansaka mampoinu domba pasi bembe si’i panewa mangkeni muni njo’u pada see tiroo re’e temponya mangkoni wo’u naka bosu ri katawanya yau muni ri tondok. ” Etu semo to nato’oka i Yakub to pangkampang domba etu.
8Pei sira manganto’o, “Si’a ewa wetu ada mami. Kami mangampeas samparia domba pasi bembe ntau rapasiromunaka ruyu. Roo see panewa kami mangawewoka yau watu bombong sumur etu pei sindara-ndara mampoinu binatang mami. Ewa wetu ada mami.”
9-10Wali ri rayanya i Yakub magombo-gombo resi to pangkampang domba etu, ratamo i Rahel, ana i Laban to tukaka nu indo i Yakub etu. Ia rata mangangkeni domba mpa’anya, apa ia semo to pangkampang domba etu. Wali tempo i Yakub mangkita i Rahel pasi domba nu mamanya, i Laban etu, ia yau ri sumur pei mangawewoka yau watu bombonginya. Roo see ia mampoinu domba nu mamanya etu.
11Wali ojo karoonya ia mangika palaong to etu ia manganengu i Rahel pasi maroso loonya tumangi apa mawongko rayanya simparata pei potunya etu. 12Ia manganto’oka i Rahel, “Aku si’i pinuana mpa’amu, ana ntua’inya, i Ribka.” Wali tempo i Rahel mangandonge gombo i Yakub etu, ia maripo mangampago pa’anya. Panewa rata resi pa’anya etu, ia mangansaritaka ia mangkonong i Yakub.
13Wali ojo pangandonge i Laban kareba mangkonong i Yakub, ana ntua’inya etu, ia maripo yau mangampago. Rata resi i Yakub, i Laban mangansokowaka pinuananya etu pei manganengu ia, panewa mangkeni njo’u banuanya. Wali rata ri banuanya etu, i Yakub mangansaritaka resi i Laban mangkonong samparia to nawali resi ia. 14Roo see i Laban manganto’oka ia, “Monso pu’u kita dua maja’i.” Wali yako etu i Yakub maroo-roo resi i Laban sambuya kasaenya.
Sarita Tempo i Yakub Rapasiwaka Pei i Lea Sira Dua i Rahel
15Wali ojo kagananya sambuya i Yakub maroo ri banuanya, i Laban manganto’oka ia, to’onya, “Nempo maja’i kita dua, pei taa masipato ane korom mapalaong mangansawang aku pei taa rabayar. To’oka aku bara sawei saro to dakubayarika korom?”
16Wali i Laban etu ia dua mba’a ananya paka ngana we’a. To tu’anginya sanganya i Lea pasi tua’inya sanganya i Rahel. 17Wali i Lea etu maroro#Ayat 17 Ane basa Ibrani gombo to rato’oka “maroro” si’i, maya seja batuanginya “mayu’u”, wali taa manasa kojo bara magaya mata i Lea, bara mayu’u matanya.. matanya, pei i Rahel maroro kojo lionya pasi kabae ngkoronya seja maroro.
18Wali i Yakub mamporayang kojo i Rahel, see naka tempo i Laban mampotanaka ia mangkonong saronya etu, ia manganto’oka i Laban, “Ewa si’i, Mamangku. Monso pu’u re’e to kuporani, etu semo anamu, i Rahel. Wali ane komi mangawaika ia damawali indo nu anangku, ane ewa see aku damaroo rire pei mapalaong resi komi pitu nto’u kasaenya.”
19Wali i Laban manganto’o, “Gete, singkonong pei aku! To sana-sanang aku mangawaika ia resi korom sakonya rawaika resi tau to yusa. Wali karoo ruyu rire pei mapalaong resi aku.” Ewa wetu nato’oka i Laban resi i Yakub.
20Wali yako etu i Yakub pitu nto’u kasaenya mapalaong resi i Laban see darawaika i Rahel. Pei ia mangepe taa masae kojo, ia mangepe ewa bara sawei eoja apa saba pamporayanginya resi i Rahel etu.
21Wali ojo kagananya pitu nto’u i Yakub mapalaong etu, ia manganto’oka i Laban, to’onya, “Waika aku anamu damawali indo nu anangku ewa roomo nuparajanjika ngkomi aku seore, apa ganamo temponya si’i-si’i.”
22Wali i Laban mampasigena roa damampasiwaka ananya, roo see ia mangadinsi samparia tau ri lipu etu. Wali sira ma’i mangkoni ri roa pangampasiwaka ana nu Laban etu.
23Pei yako etu, ojo kawurinya rao, i Laban mangantipu i Yakub. Apa si’a i Rahel to ia mangawaika resi i Yakub. Kasimbalinya yako etu, i Rahel rabolosika yau ana to tu’anginya, etu semo i Lea. Roo see ia mangkeni i Lea njo’u songi i Yakub. Wali i Lea semo to maturu siwaka pei i Yakub ri tempo to etu.
25Wali yako etu, ojo kaeonya rao, i Yakub ipu kojo rayanya mangkita i Lea semo to turu siwaka pei ia, si’a i Rahel! Wali ia yau mampotango i Laban pei mampoja’a ia, to’onya, “Gete! Maka pei komi mangakal aku? Aku pitu nto’umo mapalaong see damangarata i Rahel. Maka pei komi mangawaika aku i Lea? Komi ojo mangantipu aku!”
26Pei i Laban mangansono, ia manganto’o, “Si’a ewa see! Apa ane ewa ada mami rire taa masipato tua’inya pei rapasiwaka ruyu panewa tukakanya. 27Wali ewa si’i daraika. Peas pitu mbengi damampakaroo ruyu roa pangampasiwaka ngkomi dua i Lea. Roo see aku damangawaika seja korom i Rahel damawali seja indo nu anamu. Pei ane ewa see, korom taa maya taa mangadugang wo’u pitu nto’u mapalaong resi aku.” Etu semo to nato’o i Laban.
28Wali i Yakub singkonong. Ia maroo samba’a minggu siwaka pei i Lea, panewa i Laban mangawaika wo’u ia i Rahel damawali seja indo nu ananya. 30Wali roo rapasiwaka, i Yakub maturu siwaka pei i Rahel. Wali ane tau dua sintua’i to naoko i Yakub etu, i Rahel semo to naporayang kojo. Wali yako etu i Yakub pitu nto’u wo’u mapalaong resi i Laban see mangabanang parajanjinya resi ia.
24,29Wali tempo i Laban mangawaika ananya to dua mba’a etu resi i Yakub, tempo etu ia mangawaika sira dua to papolaong samba’a pei samba’a. Ane resi i Lea ia mangawai tau we’a sanganya i Silpa damawali to papolaonginya. Pasi ane i Rahel, ia mangawai tau we’a sanganya i Bilha damawali to papolaong to si ia.
Sarita Mangkonong Pangampoanaka Ngana i Yakub
31Wali i Pue Yawe mangkita i Lea ia taa naporayang kojo i Yakub, see naka Ia mangansawang i Lea see ia nakoto riana. Pei i Rahel ia apa, taa riana. 32Wali i Lea mawali mayu’u panewa ia mampoanaka samba’a ana langkai. Ananya etu isangakanya i Ruben, batuanginya “Lo’aka, ana to langkai si’i.” Pasi ia manganto’o, “Naka pei aku mangansangaka ia ewa wetu apa aku kunsani i Pue Yawe re’e mangalo’aka kasusangku pei mamporayang aku see naka Ia mangawaika aku ana langkai. Wali yako tempo si’i matantu aku danaporayang mpa’a nu anangku apa aku roomo mangawaika ia ana to langkai si’i.” Etu semo to nato’o i Lea.
33Panewa yako etu ia mayu’u wo’u, panewa mampoanaka wo’u samba’a ana langkai. Wali ia mangansangaka ana etu i Simeon, batuanginya “Mangandonge”, apa ia manganto’o, “I Pue Yawe re’e mangandonge aku taa naporayang kojo mpa’a nu anangku, wali see naka Ia mangawaika wo’u aku ana si’i.”
34Roo see ia mayu’u wo’u katogo ngkaninya, panewa mampoanaka wo’u ana langkai. Wali ana etu isangakanya i Lewi, batuanginya “rapasimba’a”, apa ia manganto’o, “Yako ana to si’i pa’a nu anangku damangepe samba’a raya pei aku, apa aku roomo mangawaika ia togo mba’a ana langkai.”
35Wali yako etu i Lea mayu’u wo’u kaopo ngkaninya, panewa mampoanaka wo’u ana langkai. Ia mangansangaka ananya etu i Yehuda, batuanginya “Barong”, apa ia manganto’o, “Tempo si’i aku damangabarong i Pue Yawe.” Wali yako etu i Lea mandoo ruyu moana.
נבחרו כעת:
Pomulanya 29: WNT
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2018 New Tribes Mission, Sanford, FL 32771-1487, USA.
Printed in the United States of America