Pomulanya 30
30
1Wali i Lea opo ananya pei i Rahel ia apa, taa riana. Wali tempo ia mangkita tukakanya mandudu moana etu ia mawali kaloo, see naka ia manganto’oka pa’a nu ananya, i Yakub, to’onya, “Maka pei kita dua taa riana? Ane komi dua i Lea, komi dua riana. Wali waika seja aku ana, apa ane aku taa riana to tao-tao aku ojo mate yau!” Etu semo to nato’oka i Rahel i Yakub.
2Wali ojo pangandonge i Yakub gombo i Rahel etu, ia maja’a rayanya resi ia. Ia manganto’o, “Gete, maka pei korom mampakasala aku? Si’a saba aku naka pei korom mawali apa. I Pue Allah semo to nangika palaong to etu.”
3Wali i Rahel manganto’o wo’u, to’onya, “Ewa si’i daraika. Oko to papolaongingku, etu semo i Bilha, damawali seja indo nu anamu panewa poturu siwaka pei ia see ia damangkayu’uka ana. Yako etu, ane ratamo temponya ia moana, aku semo to damampoanika ananya etu damawali aku puenya.” Etu semo songka i Rahel. 4Wali ia mangawaika i Bilha, to papolaonginya etu, damawali seja indo nu ana i Yakub mangalulu ewa wimba ada nsira. Wali i Yakub maturu siwaka pei i Bilha, 5panewa i Bilha mawali mayu’u panewa rata temponya ia mampoanaka ana to langkai, ana i Yakub semo. Ojo kare’e nu ana etu i Bilha mangawaika yau resi tau puenya, i Rahel, damawali ana to si ia. 6Wali i Rahel mangoko ana etu pei mangansangaka ia i Dan, batuanginya “Ia mangabotus”, apa ia manganto’o, “Ana si’i mawali tondong to mampakanasa i Pue Yawe roomo mangabotus aku pei manganto’o masipato aku riana. Ia re’e mangandonge pokai-kaingku pei mangawaika aku ana si’i.” Etu semo to nato’oka i Rahel tempo ngkare’e i Dan.
7Wali yako etu i Bilha, to papolaong i Rahel etu, ia mayu’u wo’u kadua ngkaninya. Panewa rata temponya ia mampoanaka wo’u ana to langkai, ana i Yakub semo, panewa mangawaika seja resi i Rahel. 8Wali i Rahel mangansangaka ananya to kadua etu i Naptali, batuanginya “Aku mangewa”, apa ia manganto’o, “Aku maroso kojo mangewa tukakangku pei aku semo to manganangi ia.”
9Wali roo see, i Lea mampobuuka, “Aku bara tamo damangkayu’uka wo’u ana.” Wali see naka ia mangawaika to papolaong to si ia, etu semo i Silpa, resi i Yakub damawali seja indo nu ananya. Ewa wetu inikanya see damangarata wo’u ana yako resi i Silpa etu. 10Wali i Silpa, to papolaong i Lea etu, ia mawali mayu’u panewa rata temponya ia mampoanaka ana langkai, ana i Yakub semo. Ojo kare’e nu ana etu i Silpa mangawaika yau resi tau puenya, i Lea, damawali ana to si ia. 11Wali i Lea mangoko ana etu pei mangansangaka ia i Gad, batuanginya “Dale”, apa ia manganto’o, “Aku re’e dale!”
12Yako etu i Silpa mawali mayu’u wo’u panewa rata temponya ia mampoanaka wo’u ana to langkai, ana i Yakub. Ana to etu iwaikanya yau seja resi i Lea. 13Wali i Lea mangansangaka ananya etu i Asyer, batuanginya “Masanang”, apa ia manganto’o, “Masanang kojo rayangku! Samparia yunungku to we’a sira damanganto’o, ‘I Lea masanang kojo si’i-si’i apa re’e wo’u ananya!’” Etu semo to nato’o i Lea.
14Wali masae sangkodi yako etu, ratamo temponya rapangampota pae. Wali tempo etu ana i Lea to tu’anginya, i Ruben semo, ia yau njo’u nawu. Rata nja’u ria ia mangarata kaya to mawua ri lipu nsira etu. Kaya etu rato’oka kaya dudaim pei biasa napake ntau we’a ewa pakuli ane rani riana. Wali i Ruben mangoko kaya dudaim etu pei mangkenika indonya. Tempo ia mangawaika indonya kaya etu, i Rahel mangkita, wali ia mamporapi resi i Lea, ia manganto’o, “Tilaka aku kaya dudaim to nakeni nu anamu etu, see aku maya seja mangampake.”
15Pei i Lea masusa rayanya, see naka ia manganto’o, “Gete, korom roomo mangoko yau pa’a nu anangku! Wimba, korom mangepe bara tawa gana maka tiroowa rani mangoko yau seja kaya dudaim to narata nu anangku si’i? Bo’ongku mangawaika korom!”
Wali i Rahel manganto’o, “Anu kita masibolos. Ane korom mangawaika aku kaya dudaim etu, ane ewa see, aku damampokauka i Yakub yau damaturu siwaka pei korom nene si’i.” Wali ojo pangandonge i Lea gombo i Rahel etu panewa ia singkonong mangantilaka sangkodi kaya dudaim etu.”
16Wali yako etu, ojo karedenya eo, ma’i i Yakub mawolili muni yako ri nawu. Pei tempo ia tawa rata ri tendanya, i Lea yau mangantomu ia ri jaya. Ia manganto’oka pa’a nu ananya etu, to’onya, “Nene si’i komi dayore ri tendangku apa aku roomo mangabayarika komi kaya dudaim to narata nu anangku. Kaya dudaim etu iwaikangku resi i Rahel see komi maya yore siwaka pei aku nene si’i.” Etu semo to nato’oka i Lea resi i Yakub, see naka wuri etu i Yakub yau ri tenda i Lea pei yore siwaka pei ia. 17Wali i Lea re’e makai-kai resi i Pue Allah mamporapika wo’u ana. Tempo ia makai-kai etu, i Pue Allah mangandonge pei mangawaika ia anu to naporapi etu. Wali i Lea mawali mayu’u panewa rata temponya, ia mampoanaka wo’u ana to kalima, ana i Yakub semo. Ana etu langkai seja. 18Wali i Lea mangansangaka ananya etu i Isakhar, batuanginya “saro”, apa ia manganto’o, to’onya, “Ana to owo kupoanaka si’i mawali saro to nawaika i mPue Allah resi aku. I Pue Allah Ia masanang resi aku apa ane seore aku mangawaika to papolaongingku, i Silpa, rapasiwaka seja pei pa’a nu anangku. Wali see naka i Pue mangawaika aku ana si’i.”
19Wali yako etu i Lea mayu’u wo’u kaono ngkaninya. Panewa rata temponya ia mampoanaka wo’u samba’a ana to langkai, ana i Yakub. 20Wali ia mangansangaka ananya etu i Sebulon, batuanginya “Manga’angga”, apa ia manganto’o, “I Pue Allah roomo mangawaika wo’u aku ana to ewa sora to magaya kojo. Apa yako tempo si’i matantu pa’a nu anangku etu damanga’angga wo’u aku apa ono mba’amo ana to langkai to iwaikangku ia.”
21Wali yako etu i Lea mangkayu’uka wo’u ana to kapitu, pei ana etu ana to we’a. Wali ia mangansangaka ana to etu i Dina.
22Wali i Pue Allah Ia taa mangkalingan i Rahel. Ia mangandonge i Rahel mandudu makai-kai resi Ia marapi ana ngkoronya. See naka Ia mangansono pokai-kainya etu pei mangansawang ia see ia maya riana. 23Wali i Rahel mawali mayu’u panewa rata temponya ia mampoanaka ana langkai. Panewa ia manganto’o, “I Pue Allah roomo mangansawang aku naka ne’e tau damampokore wo’u aku manganto’o aku ojo tau apa. 24Wali tuwu-tuwuja i Pue Yawe tiroo damangawaika wo’u aku ana langkai ri tempo to darata.” Ewa wetu to nato’oka i Rahel, wali see naka ia mangansangaka ananya etu i Yusup, batuanginya “Waika wo’u”.
Sarita Tempo i Yakub Tidugang Wo’u Kasuginya
25Wali masae sangkodi i Yakub maroo pei mapalaong resi temanuanya panewa i Rahel re’e ana to rato’oka i Yusup etu. Yako etu i Yakub manganto’oka temanuanya, to’onya, “Aku rani masimang ruyu dayau muni ri lipungku. 26Wali biaka aku mangkeni indo nu anangku opo mba’a sindara-dara pei ngana-nganangku dayau njo’u lipungku etu. Waika kami yau, apa aku roomo mangabanang parajanji to inikangku resi komi seore. Etu semo aku roomo mampakagana pitu nto’u mapalaong see darapasiwaka pei i Lea, panewa ewa see seja inikangku mangoko i Rahel. Manasa resi komi aku madota kojo mapalaong, wali si’i-si’i masipato komi mangawaika kami yau.” Etu semo to nato’oka i Yakub temanuanya, i Laban.
27Wali i Laban manganto’o, “Gete, ne’ewa yau! Padongeka ruyu gombongku si’i. Apa aku mangansani saba yako palaong ngkomi semo naka pei i Pue Yawe mampakasanang katuwungku. Wali karoo-roo ruyu rire. 28Apa ane komi maroo-roo rire, nempo bara kesaa saro to nuporapika ngkomi resi aku, aku buya rayangku mangabayar!”
29Wali i Yakub mangansono, ia manganto’o, “Monso pu’u to nuto’o ngkomi etu, Pa’a. Manasa resi komi aku madota kojo mapalaong, pasi manasa seja resi komi tempo aku mangangkampang binatang ngkomi, kanjo’u njo’u tiduga-dugang kaborosinya binatang etu. 30Tempo aku tawa rata rire seore, taa boros kojo binatang ngkomi pasi taa bae kasugimu. Pei si’i-si’i komi sugi kojo, wali monso pu’u i Pue Yawe re’e mampakasanang katuwumu apa saba palaongingku. Wali tempo si’i masipato aku rawaika yau muni ri lipungku panewa rata nja’u ria aku maya mapalaong see mampakasanang ngana-nganangku pasi indo nsira pasi tau to yusa to maroo ri banuangku.” Etu semo sono i Yakub.
31Pei i Laban taa kojo rani sira yau, see naka ia mangamomis i Yakub, ia manganto’o, “Sawei saro to dakuwaika korom see tamo rani yau?”
Wali i Yakub manganto’o, “Si’a saro kuporani. Aku masanang damaroo rire pei damangangkampang binatang ngkomi ane komi singkonong mangalulu songkangku. 32Wali ewa si’i songkangku etu. Ojo binatang to kuporani. Wali see naka aku damangampilis domba pasi bembe yako ri oyonya binatang-binatang ngkomi. Ane bembe, aku damangampilis samparianya to mawurinti pasi to mabantula. Pasi ane domba, aku damangampilis samparia ana nu domba to meta. Wali binatang-binatang to etu damawali tilangku. Ojo etu semo saro to danuwaika ngkomi aku. 33Wali yako ri tempo si’i taa masuli komi damangansani ane aku mangantipu komi. Apa tempo komi ma’i mangalo’a sarongku si’i, ane nukita ngkomi domba to taa meta bara bembe to taa mawurinti bara mabantula, ane ewa see batuanginya aku re’e mangantipu komi, re’e mampolima yau binatang ngkomi etu.” Etu semo songka to nato’oka i Yakub i Laban.
34Wali i Laban ia singkonong pei songka i Yakub etu. Ia manganto’o, “Matao. Ika ewa panto’o ngkorom etu.”
35-36Wali yako etu i Laban ia yau njo’u binatang-binatang to si ia panewa ia semo mangaga’a yau binatang to damawali i Yakub puenya. Si’a i Yakub to mangika palaong etu. Wali ane bembe to pongka ia mangaga’a samparia to masai pasi to mabantula. Panewa bembe to tina ia mangaga’a samparia to mawurinti pasi to mabantula. Pasi ia mangaga’a seja samparia bembe to tina to re’e sangkodi wuyunya to buya. Kasimbalinya yako etu ia seja mangaga’a samparia ana nu domba to meta. Wali samparia binatang to etu i Laban mampasiromunaka darawaika i Yakub. Ojo karoonya ia mampasiromunaka binatang to etu, ia pasi ngananya to langkai mangkeni yau yako ri lipunya. Togo eo palinja nsira mangangkeni yau bembe pasi domba i Yakub etu. Rata nja’u ria, i Laban manganto’oka ngananya mangkampang.
Pei i Yakub taa yau. Ia ojo maroo-roo ri lipu i Laban mangangkampang binatang-binatang to toronya to taa rakeni yau. 37Wali ri rayanya ia mangkampang binatang etu, ia mangika malagi toko yako togo ngaya kaju to buya nja’ rayanya. Kaju-kaju etu rato’oka kaju hawar, kaju badam pasi kaju berangan. Roo see ia mangalepa sangkodi kulinya see miyala rayanya to buya etu, see naka toko-toko etu mawali masai. 38Wali toko-toko etu ia mamposaka ri tangonya tampa nue to napago binatang-binatang i Laban. Naka pei ia mamposaka toko-toko masai etu nja’u ria apa nja’u ria semo tampa to napobija binatang-binatang tempo ma’i mangampago manginu. Wali ane ewa pampobuuka to si ia, ane binatang etu mangalo’a-lo’aka toko masai tempo mabija, ane ewa see, ananya damawali seja masai.
39Wali yako etu ma’i bembe-bembe i Laban mangampago manginu ri tampa nue to nja’u toko-toko masai to naposaka i Yakub etu. Tempo nja’uwa nja’u ria, bembe etu mabija ri tangonya toko-toko etu. Wali see naka ane ratamo temponya moana bembe etu, ananya samparia paka masai bara mawurinti bara mabantula.
40Yako etu re’e seore i Yakub mampasiromunaka yau domba-domba i Laban pei mangkeni njo’u tampa to yusa see tamo sigalo pei bembenya. Roo see, ane mabija domba-domba etu, ia mangkeni sira njo’u tango nu bembe-bembe to masai, bara mabantula. Ia rani domba etu mangalo’aka bembe-bembe etu tempo mabija see ananya damawali seja ewa wetu ta’anya, apa samparia to ewa wetu ta’anya paka ia puenya. Wali ewa wetu naika i Yakub mampakaboros binatang to si ia. Pei binatang-binatang to si ia etu ia mangkeni njo’u longko sangkodi. Ia taa mampasintolo pei binatang i Laban.
41Pasi re’e wo’u to inikanya mampakaroso binatang-binatang to si ia. Etu semo, ponto ngkani binatang to si i Laban mabija, ane maroso binatang etu, i Yakub mamposaka toko-toko masai ri tangonya tampa nue see binatang etu damangalo’aka tempo mabija. 42Pei ane binatang to taa maroso kojo, ia taa mamposaka toko-toko etu apa ia taa rani ana nu binatang to taa maroso etu. Wali samparia ana nu binatang to taa maroso kojo etu paka buya ta’anya, see naka i Laban puenya. Pei samparia to maroso paka meta bara masai bara mabantula, see naka i Yakub puenya. 43Wali ewa wetu naika i Yakub mawali sugi kojo. Apa kanjo’u-njo’u kaboro-boros to re’e resi ia. Etu semo boros kojo bembe, pasi domba, pasi keledai, pasi binatang to bose to rato’oka unta. Pasi i Yakub boros seja to papolaonginya to we’a pasi to langkai. Samparia kasugi to etu re’e resi ia.
נבחרו כעת:
Pomulanya 30: WNT
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2018 New Tribes Mission, Sanford, FL 32771-1487, USA.
Printed in the United States of America