Lk 23
23
Yesũ Aitwawa kwa Vilato
(Mat 27.1-2,11-14; Mk 15.1-5; Yoa 18.28-38)
1Nzama ĩsu yonthe nĩyoombũũkie na yamũtwaa Yesũ kwa Vilato. 2Vau nĩmamũsikatie masya atĩĩ, “Tweethĩa mũndũ ũũ aitiĩthya andũ maitũ nzĩa, na kũmea maikambĩle kũĩva mũsumbĩ wa Loma koti, na ayasya kana nĩwe Klĩsto, mũsumbĩ.”
3Vilato nĩwamũkũlilye atĩĩ, “We nue mũsumbĩ wa Ayuti?”
Yesũ amũsũngĩa amwĩa, “We nĩwaneena.”
4Nĩvo ĩndĩ Vilato weeie athembi anene na ĩkomano ya andũ yĩla yaĩ vau atĩĩ, “Nyie ndikwona ĩvĩtyo mũndũ ũũ wĩkĩte.”
5Ĩndĩ mathing'ĩĩsya mũno mayasya atĩĩ, “Nũthokoanĩtye andũ onthe ma Yutia na momanyĩsyo make, ambĩĩe Kalilii kũka kũvika o na vaa.”
Yesũ Aitwawa Kwa Elote
6Yĩla Vilato weewie ũu nĩwakũlilye atĩĩ, “Mũndũ ũũ aumĩte Kalilii?” 7Amina kũmanya kana Yesũ aumĩte kĩsionĩ kĩla Elote wasumbĩkĩte, nĩwaisye atwawe kwa Elote, ũla waĩ Yelũsalemu ĩvindanĩ yĩu. 8Yĩla Elote wamwonie Yesũ, nĩwatanie mũno nũndũ nĩwekalĩte ĩvinda ĩasa ayenda kũmwona, nũndũ nĩweew'ĩte ũvoo wake na nĩwendaa mũno kwona ayĩka syama. 9Nĩwamũkũlilye makũlyo maingĩ, ĩndĩ Yesũ ndaasũngĩa o na yĩmwe. 10Athembi anene na amanyĩsya ma Mĩao maũngamĩte vau maendee na kũmũsikatĩĩa Yesũ na kĩthing'ĩĩsyo. 11Elote vamwe na asikalĩ make nĩmamũthekeeie Yesũ na mamũvũthĩĩsya mũno. Nĩvo ĩndĩ mamwĩkĩie ngũa mbanake ya kĩ-ũsumbĩ na mamũtũnga kwa Vilato. 12Kuma mũthenya ũsu, Elote na Vilato, o na kau matwĩe me ũthũ, nĩmatumie ndũũ.
Yesũ Aitw'ĩĩwa Kũawa
(Mat 27.15-26; Mk 15.6-15; Yoa 18.39—19.16)
13Vilato nĩweetie athembi anene, atongoi, na andũ ala angĩ onthe 14amea atĩĩ, “Mũndeteie mũndũ ũũ na mwambĩa kana etiĩthya andũ nzĩa. Ĩndĩ ĩtina wa kũmũkũlya makũlyo mwĩ vo, ndinona avĩtĩtye ũndũnĩ o na ũmwe katĩ wa ala mwĩĩmũsikatĩe. 15Elote o nake ndanamwona e na mavĩtyo, na nĩkyo kĩtumi wamũtũnga kũla tũĩ. Kwa w'o, vai ũndũ wĩkĩte ũtuma atw'ĩĩwa kũawa. 16Kwoou nĩĩka kwasya akũnwe ivoko na ngĩmũlekya athi.”
17[Kĩla ĩvindanĩ ya Mboka ya Vasaka, Vilato aĩ athaĩsye andũ mwovwa ũmwe.]#23.17 Maandĩko amwe ma tene ma Ndeto ya Ngai nĩmatiĩte mũsoa ũũ
18Andũ onthe nĩmaneenie na wasya mũnene mayasya atĩĩ, “Ũaa mũndũ ũsu na ũitũthaĩsya Valava!” 19(Valava oovetwe yela nũndũ wa ithokoo syookĩlĩte Yelũsalemu vakoawa andũ.)
20Vilato nĩwaneenie na ĩkomano ĩngĩ nũndũ nĩwendaa athasye Yesũ. 21Ĩndĩ malonzany'a na wasya mũnene mayasya atĩĩ, “Mwambe! Mwambe!”
22Vilato nĩwamakũlilye ĩvinda ya katatũ, “Nĩkĩ? Ekĩte ĩvĩtyo yaũ? Nyie ndikwona ĩvĩtyo wĩkĩte yĩtuma atw'ĩĩwa kũawa. Kwoou nĩĩka kwasya nĩakũnwe ivoko na ngĩmũlekya athi.”
23Ĩndĩ maendeea na kũlonzanĩĩlya na wasya mũnene mũno, mayasya kana Yesũ no nginya ambwe. 24Kwoou Vilato amũtw'ĩĩa Yesũ kwĩanana na wendi woo. 25Nĩwamathaĩisye mũndũ ũla meetĩtye, ũla woovetwe yela nũndũ wa ithokoo syaĩ kw'o, na nũndũ wa kũaa andũ, na anengane Yesũ kwoo mekane nake ũndũ mekwenda.
Yesũ Ayambwa Ngelany'onĩ
(Mat 27.32-44; Mk 15.21-32; Yoa 19.17-27)
26Asikalĩ mamumaalĩtye Yesũ, nĩmakwatie mũndũ ũmwe weetawa Simioni kuma Kũlene, aendete mũsyĩnĩ wa Yelũsalemu, na mamwilĩĩla ngelany'o amĩkue aumĩte Yesũ ĩtina.
27Andũ aingĩ nĩmamũatĩĩie Yesũ, na katĩ woo vaĩ aka mamũĩĩaa mauĩte mbu. 28Yesũ nĩwamavĩndũkĩie amea atĩĩ, “Aka ma Yelũsalemu! Ekai kũndĩĩa; ĩyĩĩei inyw'ĩ ene na syana syenyu. 29Ĩvinda nĩyũkĩte yĩla andũ makasya, ‘Nĩ aathime aka ala ngũngũ, ala mataasyaa na mataaongya.’ 30#Osea 10.8; Ũvu 6.16 Nĩvo ĩndĩ makambĩĩa kwĩa iĩma, ‘Tũvalũkĩlei,’ na mayĩa tũlĩma, ‘Tũvw'ĩkei!’ 31Nũndũ ethĩwa nĩmekwĩka maũndũ aa mũtĩnĩ mwĩũ, mũtĩ mũmũ makawĩka ata?”
32O ta ũu vaĩ andũ elĩ ing'endilĩ matwaĩtwe makoawe vamwe na Yesũ. 33Yĩla mavikie vala vandũ vetawa Kĩng'ala nĩmamwambie Yesũ ngelany'onĩ, na o ta ũu mamba ila ing'endilĩ ilĩ; kĩmwe ngalĩko ya kw'oko kwake kwa aume, na kĩla kĩngĩ ngalĩko ya kw'oko kwake kwa aka. 34#Sav 22.18 Yesũ nĩwaneenie asya atĩĩ, “Asa, ekea andũ aa nũndũ mayĩsĩ ũndũ mekwĩka.”#23.34 Yesũ nĩwaneenie asya atĩĩ, “Asa, ekea andũ aa nũndũ mayĩsĩ ũndũ mekwĩka”: Maandĩko amwe ma tene ma Ndeto ya Ngai nĩmatiĩte ndeto ii
Nĩmaanie ngũa syake kwa kũkũna kula, nĩ kana mamanye ngũa ĩla mũndũ ũkwosa.
35 #
Sav 22.7
Andũ nĩmaũngamie vau masyaĩĩsye, namo atongoi ma Ayuti nĩmamũthekeeie Yesũ mayasya atĩĩ, “Nĩwatangĩĩie andũ aingĩ; ndetangĩĩe yu ethĩwa nĩwe Klĩsto, Ũla Ũnyuvĩtwe nĩ Ngai.”
36 #
Sav 69.21
Asikalĩ o namo nĩmamũthekeeie Yesũ. Nĩmathengeeie vala ũĩ na mamũnenga ndivai ngaatu, 37na mamwĩa atĩĩ, “Ethĩwa nue mũsumbĩ wa Ayuti ĩtangĩĩe!”
38Vau ngelany'onĩ ĩũlũ wa mũtwe vaĩ maandĩko#23.38 maandĩko: Maandĩko amwe ma tene ma Ndeto ya Ngai nĩmongelete Ma Kĩkiliki, ma Kĩlatinĩ na ma Kĩevelania maasya, “ŨŨ NĨWE MŨSUMBĨ WA AYUTI.”
39Kĩng'endilĩ kĩmwe kya isu syambĩtwe vamwe na Yesũ nĩkyamũumangie kĩimwĩa atĩĩ, “We noue Klĩsto? Ndwĩtangĩĩe na ũitũtangĩĩa!”
40Ĩndĩ kĩng'endilĩ kĩla kĩngĩ kyakĩkany'a kĩyasya atĩĩ, “We no wĩ na kĩkĩo kya Ngai na ũtw'ĩĩwe ũndũ ũmwe na mũndũ ũũ? 41Nyie nĩ naku twatw'ĩĩwa kĩla kĩtwaĩlĩte, nũndũ tũendee na ũkwata ũĩvĩthyo ũla wa w'o wa mavĩtyo maitũ, ĩndĩ mũndũ ũũ nde ũndũ mũthũku wĩkĩte.” 42Nĩvo ĩndĩ kĩng'endilĩ kĩu kyamwĩie Yesũ atĩĩ, “Wĩndilikana walika ũsumbĩnĩ waku!”
43Nake Yesũ amwĩa atĩĩ, “Nĩkũtavya kana ũmũnthĩ nũkwĩthĩwa nakwa ũtanunĩ.”
Kĩkw'ũ kya Yesũ
(Mat 27.45-56; Mk 15.33-41; Yoa 19.28-30)
44Kuma ta saa sita sya mũthenya kũvika saa kenda, nthĩ ĩsu yonthe nĩyausũie kĩvindu, 45#Kuma 26.31-33 nĩkwĩthĩwa syũa nĩyaekie kumya kyeni. Kĩtambaa kĩla kyatilanĩtye Ĩkalũ nĩkyatembũkanĩle katĩ. 46#Sav 31.5 Nĩvo ĩndĩ Yesũ wakayie na wasya mũnene asya atĩĩ, “Asa, thayũ wakwa nĩngũwia mokonĩ maku!” Na amina kũneena ũu akw'a.
47Yĩla mũnene wa asikalĩ ĩana woonie ũndũ kweekĩka, nĩwamũkathie Ngai na asya atĩĩ, “Kwa w'o, mũndũ ũũ ndeĩ na ĩvĩtyo!”
48Andũ onthe ala mookĩte kũsyaĩĩsya, moona ũndũ kweekĩka, nĩmenũkie na kĩĩo kingĩ. 49#Lk 8.2-3 Anyanyae ma Yesũ onthe na aka ala mookanĩtye nake kuma Kalilii, nĩmaũngyĩ kũasa masyaĩĩsye maũndũ asu.
Kũthikwa Kwa Yesũ
(Mat 27.57-61; Mk 15.42-47; Yoa 19.38-42)
50-51Vaĩ mũndũ ũmwe weetawa Yosevu kuma Alimathea, nayo nĩ ndũa yĩ Yutia. Aĩ mũndũ mũseo na mũlũngalu na weeteelete kũka kwa ũsumbĩ wa Ngai. O na kau aĩ ũmwe wa atumĩa ma nzama ya Ayuti, ndaaĩtĩkĩlana na ũtw'ĩo woo na ũndũ ũsu meekie. 52Nĩwaendie vala ve Vilato na amũkũlya amwĩtĩkĩlye kũthi kũveta mwĩĩ wa Yesũ. 53Nĩvo ĩndĩ watheeisye mwĩĩ ũsu kuma ngelany'onĩ, aũlinga na kĩtambaa kĩnene na aũthika mbũanĩ yenzĩtwe ĩvianĩ na ĩtaĩ yaathikwa mũndũ. 54Mũthenya ũsu kwaĩ Wakatano, na mũthenya wa Savato waĩ vakuvĩ kwambĩĩa.
55Ala aka mookanĩtye na Yesũ kuma Kalilii nĩmaumie Yosevu ĩtina, na moona mbũa ĩsu na ũndũ mwĩĩ wa Yesũ wathikwa vo. 56#Kuma 20.10; Kũt 5.14 Nĩmasyokie mũsyĩ na maseũvya mĩtĩ ĩnyungaa nesa, na mauta me mũuke mũseo.
Mũthenyanĩ wa Savato nĩmathũmũie kwĩanana na ũndũ Mĩao yaĩtye.
BIBLE SOCIETY OF KENYA © 2011
