Lk 22
22
Atongoi ma Ayuti Maimũsamĩa Yesũ Mamũae
(Mat 26.1-5; Mk 14.1-2; Yoa 11.45-53)
1Ĩvinda nĩyathengeeie ya Mboka ya Mũkate ũte Mbota, ĩla yĩtawa Vasaka. 2Athembi anene na amanyĩsya ma Mĩao nĩmamanthaa nzĩa ya kũmũaa Yesũ mevithĩte, nũndũ nĩmakĩaa andũ.
Yutasi Ayĩtĩkĩla Kũmũthoosya Yesũ kwa Amaitha
(Mat 26.14-16; Mk 14.10-11)
3Nĩvo ĩndĩ Satani walikile nthĩnĩ wa Yutasi ũla wĩtawa Ĩsikalioti, nake aĩ ũmwe wa ala amanyĩw'a ĩkũmi na elĩ. 4Kwoou Yutasi nĩwaendie na aneena na athembi anene na andũ ala masungaa Ĩkalũ, ĩũlũ wa ũndũ ũtonya kũmũthoosya Yesũ kũla maĩ. 5Nĩmatanie mũno na mamwatha kũmũnenge mbesa. 6Yutasi nĩweetĩkĩlile na ambĩĩa kũmantha mwanya mũseo wa kũmũthoosya Yesũ kũla maĩ andũ matesĩ.
Kwĩyũmbanĩsya Mboka ya Vasaka
(Mat 26.17-25; Mk 14.12-21; Yoa 13.21-30)
7Nĩvo ĩndĩ mũthenya wa Mboka ya Mũkate ũte Mbota wavikie, yĩla kalondu ka Mboka ya Vasaka kathĩnzawa. 8Yesũ nĩwatũmie Vetelo na Yoana amea atĩĩ, “Endai mũkatũseũvĩsye Mboka ya Vasaka tũke kũya.”
9Namo mamũkũlya atĩĩ, “Wĩenda tũkamĩseũvĩsye va?”
10Nake amea, “Mwalika mũsyĩnĩ mũnene wa Yelũsalemu, nĩmũũkomana na mũndũ-ũme ũkuĩte kĩkuu kya kĩw'ũ. Mũatĩĩei, na nyũmba ĩla ũkũthi kũlika, 11mũyĩa mwene wayo atĩĩ, ‘Mũmanyĩsya aũkũlya: Ĩĩva nyũmba ĩla nyie na amanyĩw'a makwa tũkũĩĩa Mboka ya Vasaka?’ 12Nũkũmwony'a nyũmba nene yĩ ngolovanĩ yĩna kĩla kĩndũ; seũvĩsyai vau.”
13Amanyĩw'a asu nĩmaendie na meethĩa kĩla kĩndũ kĩilyĩ o ũndũ Yesũ wamatavĩtye, na maseũvya Mboka ya Vasaka.
Mboka ya Mwĩai
(Mat 26.26-30; Mk 14.22-26; 1Ako 11.23-25)
14Yĩla saa wavikie, Yesũ nĩwaendie e na atũmwa make mekala nthĩ maye. 15Nĩwameie atĩĩ, “Nĩtwĩe ngyenda mũno kũya mboka ĩno ya Vasaka vamwe nenyu ndanamba kũthĩnw'a, 16nũndũ nĩmũtavya w'o, ndikamĩya ĩngĩ kũvika ĩnengwe wĩanĩu wayo ũsumbĩnĩ wa Ngai.”
17Yesũ nĩwoosie kĩkombe kĩ ndivai, atũnga mũvea na amea atĩĩ, “Kwatai kĩĩ mũnyusanĩe inyw'onthe; 18nũndũ nĩmũtavya w'o, kuma yu ndikanyw'a ndivai ĩngĩ kũvika ũsumbĩ wa Ngai wũke.”
19Nĩvo ĩndĩ Yesũ woosie mũkate, atũnga mũvea kwa Ngai; nĩwaũtilangile na aũnenga amanyĩw'a make ayasya, “Ũũ nĩ mwĩĩ wakwa, ũla ũũnenganwe kwondũ wenyu. Ĩkaai ũu kwondũ wa kũndilikana.” 20Kwa nzĩa o ĩsu nĩwamanengie kĩkombe kĩ ndivai ĩtina wa lĩu wa wĩoo ayasya atĩĩ, “Kĩkombe kĩĩ nĩ ũtianĩo mweũ nthakamenĩ yakwa ĩla ĩkwĩtĩkw'a kwondũ wenyu.#22.20 ĩkwĩtĩkw'a kwondũ wenyu: Maandĩko amwe ma tene ma Ndeto ya Ngai mai na ndeto ii
21“Ĩndĩ manyai kana mũndũ ũla ũkũnthoosya kwa amaitha e o vaa aiya nakwa! 22Kwa w'o Mwana wa Mũndũ ekw'a o kwĩanana na ũtw'ĩo wa Ngai, ĩndĩ kyeva nĩ kwa mũndũ ũsu ũkũmũthoosya kwa amaitha.”
23Namo mambĩĩa kũkũlany'a nũũ katĩ woo ũtonya kwĩka ũndũ ũsu.
Amanyĩw'a Maikananĩa ĩũlũ wa ũla Mũnene katĩ Woo
24 #
Mat 18.1; Mk 9.34; Lk 9.46 Ngananĩo nĩyambĩĩe katĩ wa amanyĩw'a ma Yesũ, maikũlany'a ũla katĩ woo waĩlĩte kwoswa ta we mũnene. 25#Mat 20.25-27; Mk 10.42-44 Yesũ nĩwameie atĩĩ, “Asumbĩ ma Andũ-ma-mbaĩ-ingĩ masumbĩkaa andũ moo na kĩthũi, na kwendaa metwe atethya ma andũ. 26#Mat 23.11; Mk 9.35 Ĩndĩ ũu ti w'o kwaĩlĩte kwĩthĩwa kũilyĩ katĩ wenyu. Vandũ va ũu, ũla mũnene katĩ wenyu no nginya ethĩwe ta we mũnini, nake mũtongoi ayĩthĩwa ta mũthũkũmi. 27#Yoa 13.12-15 Nũndũ ũla mũnene nũũ: Nĩ ũla ũilyĩ nthĩ aetewe lĩu, kana nĩ ũla ũkũnengane lĩu? Kwa w'o, nĩ ũla ũilyĩ nthĩ aetewe lĩu. Ĩndĩ nyie nĩilyĩ ta mũthũkũmi katĩ wenyu.
28“Inyw'ĩ nĩmwaendeeie kwĩkala nakwa ĩvindanĩ yũmũ yĩla nĩnaĩ nayo. 29Kwoou o tondũ Ĩthe wakwa wanengie ũkũmũ wa kũsumbĩka, o nakwa nĩngũmũnenga ũkũmũ ũsu. 30#Mat 19.28 Mũkaya na kũnyw'a vamwe nakwa ũsumbĩnĩ wakwa, na mũkekalĩla ivĩla sya kĩ-ũsumbĩ mũsumbĩke mbaĩ ĩkũmi na ilĩ sya Ĩsilaeli.
Yesũ Aiweta kana Vetelo Nũkwĩsa Kũmũkaĩa
(Mat 26.31-35; Mk 14.27-31; Yoa 13.36-38)
31“Simioni, Simioni, ĩthukĩĩsye! Satani nũkũlilye mwanya amũthingithangye o tondũ mũndũ ũthingithangasya nganũ aiũlũkya. 32Ĩndĩ nĩngũvoyeie nĩ kana ndũkasye mũĩkĩĩo, na kwoou wanzyokea ĩngĩ, wĩlũlũmĩĩlya ana-a-au.”
33Nake Vetelo amwĩa atĩĩ, “Mwĩai, nyie nĩnĩyũmbanĩtye kũthi yela vamwe naku o na kũawa vamwe naku!”
34Yesũ amwĩa atĩĩ, “Vetelo eka ngũtavye, ũtukũ ũũ nzamba ĩtanamba kwasya, nũũkaĩa katatũ wasye ndũmbĩsĩ.”
35 #
Mat 10.9-10; Mk 6.8-9; Lk 9.3; 10.4 Nĩvo ĩndĩ wamakũlilye atĩĩ, “Yĩla namũtũmie mũthi mũtakuĩte ngusu ya mbesa, kana mũvuko, kana iatũ, ve kĩndũ kyaamwaĩa?” Namo mamũsũngĩa mamwĩa “Aiee, vai kĩndũ kyaatwaĩa.”
36Yesũ amea atĩĩ, “Ĩndĩ yu, ũla wĩ na ngusu ya mbesa na mũvuko wa kwĩkĩa syĩndũ nĩakue. Na ũla ũte na ũvyũ, nĩ kavaa athoosye ngũa yake ya ĩũlũ athooe. 37#Ĩsa 53.12 Nĩmũtavya kana Maandĩko Matheu ala maĩtye ‘Nĩwatalanĩlw'e vamwe na avĩtany'a,’ no nginya meanĩe kwakwa, nũndũ maũndũ ala maandĩkĩtwe ĩũlũ wakwa nĩmekwĩanĩa.”
38Namo mamwĩa atĩĩ, “Mwĩai, kwa sisya, vaa twĩ na mbyũ ilĩ.”
Nake amea, “Nũu ĩndĩ.”
Yesũ Aivoya e Kĩĩmanĩ kya Mĩthata
(Mat 26.36-46; Mk 14.32-42)
39Yesũ nĩwaumie Yelũsalemu na athi Kĩĩmanĩ kya Mĩthata, o tondũ wakothaa kwĩka, na amanyĩw'a maendany'a nake. 40Avika vo nĩweeie amanyĩw'a make atĩĩ, “Voyai mũikalike matatwanĩ.”
41Nĩvo ĩndĩ Yesũ waumie vala maĩ aendanga mbee vanini, atulya ndu na avoya ayasya, 42“Asa, ethĩwa nũkwenda, mbetangĩe kĩkombe kĩĩ kya mathĩna. Kũikethĩwe kwĩanana na kwenda kwakwa, ĩndĩ kwenda kwaku nĩkwĩkĩke.” [ 43Mũlaĩka kuma ĩtunĩ nĩwamumĩlĩĩle na amũlũlũmĩĩlya. 44Nake aĩ na mathĩna manene ngoonĩ na kwoou ongeleela kũvoya na kĩthing'ĩĩsyo, na aumwa nĩ yuutĩa yĩvw'ana nthakame ĩyĩtĩka nthĩ.]#22.44 Maandĩko amwe ma tene ma Ndeto ya Ngai nĩmatiĩte mĩsoa ĩno
45Yĩla wookĩlile kuma mboyanĩ, nĩwasyokie vala ve amanyĩw'a make na eethĩa makomie nĩ kĩmako. 46Nĩwamakũlilye atĩĩ, “Mũkomete nĩkĩ? Amũkai mũvoye mũikalike matatwanĩ.”
Kũkwatwa Kwa Yesũ
(Mat 26.47-56; Mk 14.43-50; Yoa 18.3-11)
47Yesũ o aendee na kũneena, nĩvookie nguthu ya andũ, na Yutasi ũmwe wa ala amanyĩw'a ĩkũmi na elĩ nĩwe wamatongoesye. Nĩwaendie vala ve Yesũ amũkethye na ngethi ya wendo. 48Yesũ nĩwamũkũlilye atĩĩ, “Yutasi, wĩthoosya Mwana wa Mũndũ kwa kũmũkethya na ngethi ya wendo?”
49Yĩla amanyĩw'a ala maĩ na Yesũ moonie kĩla kyaĩ vakuvĩ kwĩkĩka nĩmamũkũlilye atĩĩ, “Mwĩai, tũtũmĩe mbyũ sitũ yu?” 50Na ũmwe woo atema mũthũkũmi wa Mũthembi Mũnene amũtila kũtũ kwa ngalĩko ya kw'oko kwa aũme.
51Ĩndĩ Yesũ amea atĩĩ, “Ekanai na ũndũ ũsu!” Na akwata mũndũ ũsu kũtũ kũu akũvosya.
52Nĩvo ĩndĩ Yesũ wakũlilye andũ ala mookĩte kũmũkwata, ala nĩ athembi anene, andũ ala masungaa Ĩkalũ, na atumĩa atĩĩ, “Mwooka kũngwata mũkuĩte mbyũ na nzũma ko nĩ kĩng'endilĩ? 53#Lk 19.47; 21.37 Yĩla nĩneethĩawa nenyu Ĩkalũnĩ kĩla mũthenya mũyaaĩtĩkĩla kũngwata, ĩndĩ yĩĩ nĩyo ĩvinda yenyu yĩla kũsumbĩkĩtwe nĩ kĩvindu.”
Vetelo Ayasya kana Ndamwĩsĩ Yesũ
(Mat 26.57-58,69-75; Mk 14.53-54,66-72; Yoa 18.12-18,25-27)
54Andũ asu nĩmamũkwatie Yesũ mamũtwaa mũsyĩ kwa Mũthembi ũla Mũnene. Vetelo amaumĩte ĩtina ĩndĩ e vaasa. 55Vaĩ mwaki wavuvĩtwe katĩ kĩwanzanĩ kĩla kyaĩ nza kwa Mũthembi ũla Mũnene, na Vetelo athi ekala nthĩ vamwe na ala mailyĩ vo maiwota. 56Nĩvo ĩndĩ mwĩĩtu ũmwe mũthũkũmi wamwonie ailyĩ nthĩ kyeninĩ, amũketeea mũno na asya atĩĩ, “Mũndũ ũũ anaĩ vamwe na Yesũ.”
57Ĩndĩ Vetelo akaĩa asya, “We mwĩĩtu ũũ, nyie o na ndyĩsĩ mũndũ ũsu!”
58Ĩtina wa kavinda o kanini, mũndũ ũngĩ nĩwamwonie Vetelo na amwĩa atĩĩ, “We wĩ ũmwe wa andũ asu!”
Ĩndĩ Vetelo amũsũngĩa asya, “We mũndũ-ũme ũũ, nyie ndi ũmwe!”
59Ĩtina wa vandũ va ĩsaa yĩmwe, mũndũ ũngĩ o nake nĩwathing'ĩĩisye kwasya atĩĩ, “Kwa w'o mũndũ ũũ anaĩ vamwe na Yesũ, nũndũ o nake aumĩte Kalilii.”
60Ĩndĩ Vetelo asũngĩa asya atĩĩ, “Wee, nyie ndyĩsĩ kĩla ũũneena!” Saanĩ o ũsu aendee na kũneena nzamba nĩyaisye. 61Mwĩai nĩweethyũũie amũsisya Vetelo, na Vetelo alilikana kana Mwĩai eĩmwĩĩte, “Ũtukũ ũũ nzamba ĩtanasya, nũũkaĩa katatũ wasye ndũmbĩsĩ.” 62Vetelo nĩwaumaalile nza na aĩa mũno na woo mwingĩ.
Asikalĩ Maimũthekeea Yesũ na Kũmũvũa
(Mat 26.67-68; Mk 14.65)
63Andũ ala masungaa Yesũ nĩmamũthekeeie na mamũvũa. 64Nĩmamwovie metho na mamũkũlya atĩĩ, “Kwa tũtavye nũũ ũla waũkũna?” 65Nĩmamũneeneie syĩndũ mbingĩ makĩmũumanga.
Yesũ e Mbee wa Nzama
(Mat 26.59-66; Mk 14.55-64; Yoa 18.19-24)
66Kwatheatheana, atumĩa na athembi anene na amanyĩsya ma Mĩao nĩmoombanie, na Yesũ aetwe nzamanĩ ĩsu. Nĩmamwĩie atĩĩ, 67“Ethĩwa nue Klĩsto, tũtavye.”
Nake amea, “O na namũtavya mũiĩkĩĩa, 68na ngamũkũlya ĩkũlyo mũinzũngĩa. 69Ĩndĩ kuma yu Mwana wa Mũndũ akeethĩawa ailyĩ nthĩ ngalĩko ya kw'oko kwa aũme kwa Ngai Mwene Ũtonyi W'onthe.”
70Onthe nĩmamũkũlilye atĩĩ, “Nayu nue Mwana wa Ngai?”
Nake asũngĩa asya, “Inyw'ĩ nĩmwaneena.”
71Namo masya atĩĩ, “Twĩenda ũkũsĩ ũngĩ wakĩ? Ithyĩ nĩtweeyĩw'ĩa kĩla we mwene waneena!”
BIBLE SOCIETY OF KENYA © 2011
