JOHAN 4
4
Bawipa Jesuh La Samaritan Hnumi
1 Bawipa Jesuh naw Johan ah peit ah da pi khai ah yum ci gui-am tuihnim nak a peit gui cu, pharise gui naw ng’yak ci gui. 2(Akcang ah Bawipa Jesuh amät naw tuihnim nak kä pek ci, ang düihpüi gui bäng naw pek ci gui.) 3Pharise gui naw ami ng’yak cu Bawipa Jesuh naw hmat netah Judea kho ah kaa Kalile kho ah htie ba ci. 4Cun ah lam cu Samaria kho sun pah ne hteh ah kyak ci.
5Ngami cu Samria kho Jakob naw a hta Josef-am a peit ah lo pei ah, Saika pigawnu ah gawk lawk ci gui. 6A cun ung Jakob ah tui shawk om ci. Bawipa Jesuh cu lam a hteh nak bawngbai netah, tui shawk pei ah ngok ci. Cun yah cu hnüüp lunglai ah kyak ci.
7Samaritan hnumi cu tui than khai ah law khätah Bawipa Jesuh naw, “Tui na tu toä” cik ci. 8(Cun yah ung ang düihpüi gui cu pigaw ah ei vai khleih yah ci gui.)
9Cun ah hnumi naw, ‘Nang cu Jew chang ah na kyak ci, kei cu Samaritan chang ah ka kyak ci, a i vai tui na na ng’yoih ang?” cik ci. (Jew chang gui cu Samaritan chang gui ah ei awk nak ung, kä ei aw tu man ci gui ah kyasei, cun ah a pyein ah kyak ci.) 10Bawipa Jesuh naw, “Nang naw Khanpughi ah m’gein nak la, tuhbäi tui ning ng’yoi cicu na hmat vai sü ung, ani ah ghin tui gei cu nang yoi khai sü te, ani naw phi cun ah tui cu ning pek khai süte” cik ci.
11Cun ah hnumi naw, “Bawipa, nang ung tui than nak vai phi kä om ci, tui shawk phi thuuk ci, a i chaa ah ghin nak tui gei cu na gah khai ang? 12Shin cu kami pughi Jakob ah tui shawk ah kyasei a hta ng’shon ung, asei akchang avan naw a awk ah kyak ci nei, ani ah mä nang na ng’vai pi ciah kya ne ma?” cik ci.
13 Bawipa Jesuh naw, “Shin ah tui awk cicu tui gha ba khai; 14cun ung phi kei ah pei tah tui awk cicu a ngawi ah phi tui kä gha ba khai. Cun ah tui cu ani ah m’lung kyong ung ghin nak tui gei ah khawng ne long ne, ani-am angtäi ghin nak cu pek khai” cik ci.
15Cun ah hnumi naw, “Bawipa, cun ah tui cu, na peä, cun ung tui phi kä ka gha ba khai, tui phi kä ka than ba khai” ci ne ng’yoi ci.
16 Bawipa Jesuh naw, “Hteit ne na cei va khü baä” cik ci. 17Cun ah hnumi naw, “Kei kä ka ceimah ci” cine pyein ci. 18Bawipa Jesuh naw, “Kä ka ceimah ci, na cicu na cang ci, cun ung phi na cei chang sing hma om pyi ci, tuhbä na ni om ci cu, akcang ah na cei ah kä kyak ci. Tuhbäi nang naw akcang na pyein ci” cine pyen nak ci.
19Cun ah hnumi naw, “Bawipa, nang cu profet ah na kyak ci. 20Keimi Samaritan chang gui naw, shin ah m’htung ung Khanpughi kami khawihnah ci, nangmi Jew chang gui naw, Jerusalem ah Khanpughi nami khawihnah ci” cine pyen nak ci.
21 Bawipa Jesuh naw, “Hnumi awi, ka pyein cu ngai ä; shin ah m’htung ah phi bäi, Jerusalem ah phi bäi, Khanpughi kä khawihnah nak ba vai ah akhin gawk lawk khai nei. 22Nangmi Samaritan chang gui naw, a u nami khawihnah kä nami hmat ci, keimi Jew chang gui naw a u kami khawihnah cu kami hmat ci; a i ah kyasei ci ung hun phiawn nak cu Jew chang gui ung kaa, gawk lawk ciah kyak ci. 23Cun ung phi Khanpughi khawihnah ci naw mümcha thamah nak awn akhawihnah vai ah akhin cu gawk law pyi ci, cun cu Khanpughi ah ng’yak hlü ah kyak ci.
24Khanpughi cu Mumcha ah kyasei, khawihnah ci naw, mümcha la bekhüt nak awn a khawihnah vai” cik ci.
25Cun ah hnumi naw, “Messiah Bawipa a gawk law vai cu, ka hmat ci, ani a gawk law ung a päng avan nam thein gui khai” cine pyein ci.
26 Bawipa Jesuh naw, “Cun ah Messiah Bawipa cu, tuhbäi nang ning thu püi ciah, kei ah kyak ci nei” cine pyen nak ci.
27Cun yah ung, Bawipa Jesuh ah ang düihpüi gui gawk law ba u ne, cun ah hnumi awn ani ng’thu cu hmu u netah, ang htei ah cäcat ci gui. Cun ung phi, nang hnumi a i nang ya hlük ci ang? Nang Bawipa a i vai shin ah hnumi nang thu püi ang? cine a u naw phi kä pyein ci gui.
28Cun ah hnumi cu a tui than nak nawng shüt-en ne, pigaw vah dawng ba netah chang gui ah ma ah, 29“Kei ah ka om ih phung avan pyein hning ciah chang lawk ci nei, law ne teng law tu vä, ani cu Messiah ah kyak khai nei,” cik ne m’thein gui ci. 30Acun vai-am pigaw ah chang gui cu Bawipa Jesuh ah om nak ah lawk ci gui.
31Acun yah ung angdüihpüi gui naw, “Sayapa, ei ei toä” cik ci gui.
32 Bawipa Jesuh naw, “Nangmi ah kä hmat ah ei ka ei pyi ci nei” ci ne pyen na gui ci.
33Cun ci khätah ang düihpüi gui cu, “A u naw bawh ei vai thak law pyi sei ang? cine ami mät ng’thu ci gui.
34 Bawipa Jesuh naw, ngami-am,” Kei ah ei awk cu, na tüi lawk ciah ang yak hlü ah om vai la abi pyi ne bi vai ah kyak ci. 35Nangmi naw, chaa-phli a om ba ung, geit khäm khin gawk lawk khai nami cik ci, cun ung phi geit ko gui cu, khäm ge vai ah hmin pyi ci gui nei, 36geit khäm ci cu, ng’cheng gah ne, angtäi ghin nak ah geit cu khäm ba ci, cun ah kyasei, geit ci la khäm ci cu angtäi ah yei kiai khai goi nei.” 37Tumat naw geit sei tumat naw khäm ba ci” ciah ng’thu cu akcang ah küm ci nei. 38Kä nami geitko nak te ah lo ung, nami khäm tawng ba khai ah ka ning tüi gui ci, a hei gui ah bi nak ung kaa, nangmi ung akpawih lawk khai nei” cik ci.
39Samaritan hnumi naw, Bawipa Jesuh naw a päng avan a hmat ah mawng cu m’thein tu gui sei, Samaritan chang akda naw Bawipa Jesuh cu yum ci gui. 40Cun ah kyasei Samaritan chang gui law u ne, Bawipa Jesuh cu a om tu cang vai ah chou u sei, hnüüp goi om tuk ci.
41 Bawipa Jesuh ah ang thu ng’yak netah chang akda naw yum lawk ci gui. 42Ngami naw cun ah hnumi-am, “Keimi naw kami yum law cu nang ah nam thein gui ah hmawk ah kä kyak ci, kami mät naw ang thu cu ng’ya u ne kami yum ci. Khomdek khan ah Hunbawi akcang ah kyak ciah kami hmat ci” cik ci gui.
Bawipa Jesuh naw, Zungbawi ah Hta Gai Sak ci
43Cun ah pigaw ah hnüüp goi om tu netah Bawipa Jesuh cu Kalile kho ah hteit ba ci. 44“Profet cu a mät ah kho ah chang naw akchang m’sui nak kä om ci” cine amät naw pyein ci. 45Kalile kho ah a gawk law ba ung Bawipa Jesuh cu chang akda naw a na dou ci gui. A i ah kyasei ci ung Jerusalem ah pasakha pawi ung Bawipa Jesuh ah bilawh gui cu avan hmu tu pyi te ci gui ah kia ne, kyak ci.
46Cun kawn ah Bawipa Jesuh cu tui, sapyit tui ah a pyan nak, Kalile kho kana pigawnu ah gawk law ba ci. Cun ung asoyah yung bawi tumat om tuk ci. Ani ah hta cu Kapernaum gawnu ah gaw ne om ci. 47Ani naw Bawipa Jesuh cu Judea kho ah kaa, Kalile kho ah a law ba hmat netah, Kapernaum gawnu ah law ne, si lawge vai ne gaw ciah a hta cu am gai ba vai ah khü lawk ci. 48Bawipa Jesuh naw, “Nangmi cu cäi aih gui vai la cäicat gui vai, kä nami hmuh ung kä nami yum ci” cine pyen na gui ci.
49Zungbawi naw, “Bawipa, ka hta kä a sih pha ung na gawk law vai ah lawä” cik ci.
50 Bawipa Jesuh naw, “hteit baä, na hta ghing gai ba khai nei” cik ci. 51Bawipa Jesuh ah ng’thu cu yum ne hteit ba khätah lam ah akchang shäm ana law ne, “na hta gai ba pyi ci nei” cik ci.
52Ani naw a hta a i ah khin ung tüi ne agai law ba ah ng’shi gui sei, ngami naw, “yanta hnüüp keeing nayi khat yah ung gai law ba ci” cik ci gui.
53 Bawipa Jesuh naw, “Na hta ghing ba khai nei” a ci nak cu a cun ah akhin ah kyak ciah apa naw shüm ba netah, ani la akyong ungka ami van naw Bawipa Jesuh cu yum ci gui.
54Cun cu Judea kho ah kaa naw Kalile kho ah alaw ba kawn ah Bawipa Jesuh naw cäi aih vai abi nak akhnih vei nak ah kyak ci.
Cho Bible Common Language © Bible Society of Myanmar, 2016.
