JOHAN 5
5
Tuili Pei ah Akgaw Gai Ba sak ci
1Cun kawn ah Jew chang gui ah pawi om sei Bawipa Jesuh cu Jerusalem kho ah hteit ba ci. 2Jerusalem pigaw hto m’kawt pei ah ng’phoh hma ah ami ng’vong ah tuili tumat om ci. Cun cu Hebru ng’thu awn ‘Bethyatha’ ah pyein ci gui.
3Cun ah ng’vong pei ah amik m’dauh ni, akho hnget ni, a kut kho shum ci ni, ak gaw akda ng’yän ci gui. 4(Khanpughi ah khankho chang cu kyum law ne, tui ak hnawh law ung, tui ng’hnawk ung ng’hnim ma cicu gai ba man ci kya sei, tui hnawk cu ngäng ci gui.)
5Acun ung khokum thum-kip-lei-cheit ung gaw ci phi om tuk ci. 6Bawipa Jesuh naw, cun ah chang a hmuh vai-am aksho a gaw law cu hmat netah, “Na gai hlük ci ang?” cine ng’shik ci.
7Cun ah ak gaw naw, “Bawipa, tui ang hnawh law ung, tuili ung nang hnim tu sak khai phi a u kä om ci nei. Tui ung kang hnim tuk khai ka pawng tu yah ung a hei ng’hnim ma ci ci nei” ci ne pyein ci.
8 Bawipa Jesuh naw, “Ng’düi law ne, na yih phah kawt ne hteitä” ci ne pyen nak ci. 9Acun vai-am ak gaw cu gai ba ne, ayih phah kawt ne ng’düi law ne hteit ci. Cun ah Hnüüp cu Kyinnak Hnüüp ah kyak ci.
10Cun ah kyak sei Jew chang ng’vai gui naw, “A u naw a ning gai ba sak ang? thu ngawi cu kyinnak hnüüp ah kyak ci, na yih phah la ne na law ba cu thukhän nak kaan ciah kyak ci” cine kyak nak ci gui.
11Gai ba ciah chang naw, “Na gai sak ba ci naw, na yih phah la ne, ng’düi law ne hteit ä, cik ci nei” ci khätah;
12Ngami naw, “Cun ah nabi vai pyein cicu a u ang?” cine ng’shik ci gui.
13Cun ung phi cun yah ah chang akda om ci gui ah kya ne, Bawipa Jesuh abü ah hteit tei ba sei, ani gai ba sak cicu a u bä ah kä hmat ba ci.
14Cun kawn ah Bawipa Jesuh naw cun ah chang cu pum im ah hmu ba netah, “Tuhbäi na gai lawk ci, cun kawn ah hmakat nak kä na bi vai, hmakat nak na bi ba ung cun ah tä pi cicu na aut khai” ci ne kiak nak ci.
15Ani cu hteit ba netah, Jew chang ng’vai gui ah ma ah, “Na gai ba sak cicu Jesuh nei” cine m’thein ba gui ci. 16Cun ah kyin hnüüp ung akgaw a gai ba sak ung tün ne, Bawipa Jesuh cu Jew chang vai gui naw, gen lawk ci gui. 17Bawipa Jesuh naw, “Kapa cu angtäi ah bi bik ciah kyasei, kei phi ka bik khai” cik ci.
18Kyin hnüüp ng’thukhän kaan ne bi bik netah mä, Khanpughi am kapa a ci la amät Khanpughi awn täng ciah a pyein ah hmawk ah Jew chang ng’vai gui naw, Bawipa Jesuh cu ngawn vai ah ng’ge law pi ci gui.
A Htapa ah M’khüt Näng nak
19 Bawipa Jesuh naw, “Kei naw akcang ka pyein cu,’ A Htapa naw amät ah ngaih ah a i kä bi hning ci, Apa ah bi bi a hmuh ah mäih ah vah bi bik ci. Apa naw abi cu A hta naw phi acun ah bi ba ci. 20Apa naw A hta cu m’hni ne abi gui phung cu m’thein yawp ci. Shin ah a mawng gui ah hlüngtai pi cicu Apa naw m’theikaan khai kia sei, nangmi naw nami ngaih-tüh khit khai. 21Apa naw aksi m’ghin ba ne, ghin nak a peit ah mäih ah A Htapa naw phi ang yak hlü ah chang cu m’ghin ba khai. 22Apa naw a u phi kä m’khoi m’chak ci. Cun ung phi a Htapa-am düng sei m’khoichaa nak nüng cu pek ci. 23Cun ah kyak sei Apa kyih-aa ah mäih ah A Htapa phi chang van naw a kyih aa vai nei. A Htapa kä kyih aa ci cu, tüi lawk ciah Apa kä kyih-aa ciah kyak ci.
24Kei naw akcang ka pyein cu, “Kei ah ng’thu ngai ne, kei na tüi lawk ci, yum ciah chang cu, angtäi ghin nak gah ci. Ani ung m’khoichaa nak kä om ba khai. Ani cu sih nak näng ne ghim nak gah pyi ciah kyak ci. 25Kei naw akcang ka pyein cu, akhin gawk law pyi ci, chang si gui naw Khanpughi ah A Htapa ah k’o ng’ya u netah, ghin nak ami gah nak ba vai ah akhin cu, tuhbäi gawk law pyi ci nei. 26Apa cu ghin nak ah a phung ah a kyak ah mäih ah A Htapa cun phi, ghin nak ah a phung ah a kyak vai ah ap pyi ci nei. 27Ahtapa cu chang ah Htapa ah kyasei m’khoichaa nak nüng vai phi ap pyi ci nei. 28Cun ah phäh ah kä cäicat vä, aksi gui cu Khanpughi ah Ahtapa ah ak’o cu ng’ya u netah; 29ng’cim hmun ungka ami thawh ba nak vai ah a khin cu gawk khai nei; a om nik ci gui cu tho ba ne ghing ba khai gui, a om shek ci gui cu tho ba u ne phi shetkat nak gah khai gui nei.
Bawipa Jesuh ah Saksi Gui
30“Ka mät ah m’khüt näng nak awn a i kä ka bi hning ci, Khanpughi ah nam cäi ah mäih ah m’khoichaa nak ka bik ci. Ka mät ah ng’yak hlü ah ka bi vai ah kä ka tha nak ci, na tüi lawk ciah ang yak hlü bäng ah bi ka bik ci; cun ah kyasei kei ah m’khoichaa nak cu düng ci.
31Kei naw ka mät ah mawng pyein ne ka saksi ung kä nami ngaih gep khai. 32Cun ung phi kei ah mawng pyein ne saksi ci tumat om ci. Ani ah saksi cu düng ciah kei naw ka hmat ci. 33Nangmi naw Johan-am ng’shä nami tüih ci, ani cu düng nak awn saksi ci. 34Kei ah hmawk ah chang a saksi vai ah kä hlü te ci, cun ung phi nangmi naw hun nak nami gah vai ah ka pyein ah kyak ci. 35Johan cu ng’läh ne däi ciah mei-im awn täng sei, ani ah akdei ung ashäng yei ne nami om hlük ci. 36Cun ung phi Johan ah saksi ah däm pi ciah saksi nak kei ung om ci. Kapa naw na ap sei tuhbäi ka bilawh nak gui awn, kei cu Kapa naw ana tüih law ah mawng saksi cu dang ci nei. 37Na tüi lawk ciah Kapa Khanpughi amät naw phi, kei ah mawng cu saksi ci. Nangmi naw ani ah k’o kä nami ng’ya man khai, amüi phi kä nami hmu man khai; 38Ani ah tüih law kä nami yum ci kya ne, ani ah ng’thu cu nangmi ah m’lung kyong ung kä om ci. 39Cacim ung angtäi ghin nak om khai ah ngai ne cacim bäng nami teng ci. Acun ah cacim naw kei ah mawng cu saksi ci. 40Cun ung phi nangmi cu angtäi ghin nak gah vai ah kei ah kä nami law hlük ci.
41“Chang ah m’hlüngtai vai kei naw kä ka ng’ya hlük ci, 42Cun ung phi nangmi ah mawng cu ka hmat ci. Nangmi ah m’lung kyong ung Khanpughi yumhni nak kä om ci. 43Kei cu Kapa ah m’khüt näng nak awn ka lawk ci, cun ung phi nangmi naw kä nami na dou ci. Chang tumat cu amät ah m’khüt näng nak awn a law vai sü ung nami dou khai sü te nei. 44Nangmi nami mät tumat naw tumat am hlüngtai vai nami ng’ya hlük ci. Cun ung phi tumat bäng om ciah Khanpughi naw aning m’hlüngtai gui vai kä nami tha nak ci. Cun ah kya sei nangmi naw kei a hawk chaa ah nami na yum khai yaw? 45Cun ung phi kei naw Khanpughi ah ma ah cheishoh nak ka ning pe gui khai ah kä nami ngaih vai. Nami cheishoh nak ning m’dang pe gui khai cu nami ngaih u ah Moses ah kyak ci. 46Moses naw kei ah mawng cu ca ung gu pyi ci kyasei, ani akcang ah nami yum ung kei phi nami na yum khai. 47Cun ung phi nangmi naw Moses ah ca guk cu, kä nami yum ci kya ne, a i hawk chaa ah kei ah ng’thu cu nami yum khai ang?” cine kiak na gui ci.
Cho Bible Common Language © Bible Society of Myanmar, 2016.
