လံာ်ယိၤဟၣ် 19
19
1မၤသးဒ်န့ၣ်ဒီး, စီၤပံၤလးဟ့ၣ်လီၤကွံာ်ယ့ၣ်ၡူးလၢ တၢ်ကတီၢ်အီၤဖျ့အီၤအဂီၢ်န့ၣ်လီၤ. 2ပှၤသုးဖိတဖၣ်မၤထီၣ်ခိၣ်သလုးတဖျၢၣ်လၢတၤဆှုၣ်အဒ့ တဖၣ်ဒီးကုာ်ထီၣ်ဝဲလၢယ့ၣ်ၡူးအခိၣ်လိၤ, ဝံၤဒီးဒုးကၤထီၣ်အီၤဆ့ကၤလုးတကုာ်တဘ့ၣ်, 3ဒီးဟဲဆူအအိၣ်ဒီးစံးဝဲ, “ပှၤယူဒၤဖိတဖၣ်အစီၤပၤဧၢ, မ်နအိၣ်ကၢအိၣ်ခိးတက့ၢ်” ဒီးအဝဲသ့ၣ်ဒဲအမဲာ်လီၤ.
4စီၤပံၤလးဟးထီၣ်ကဒီးတဘျီဆူတၢ်ချၢဒီးစံးဘၣ်ပှၤဂီၢ်မုၢ်န့ၣ်, “ကွၢ်တက့ၢ်. ယကကိးထီၣ်ယ့ၣ်ၡူးဆူသုအိၣ်ဒ်သိး သုကထံၣ်သ့ၣ်ညါဘၣ်လၢယတထံၣ်န့ၢ်တၢ်ဂ့ၢ်လၢတၢ်ကစံၣ်ညီၣ် အီၤအဂီၢ်နီတမံၤဘၣ်န့ၣ်လီၤ.” 5အန့ၣ်ဒီး, ယ့ၣ်ၡူးဟဲထီၣ်ဆူတၢ်ချၢ, ကၢၢ်ဝဲခိၣ်သလုး တၤဆှုၣ်ဒီးကၤဝဲဆ့ကၤလုးတကုာ်တဘ့ၣ်န့ၣ်လီၤ. စီၤပံၤလးစံးဘၣ် အဝဲသ့ၣ်, “ကွၢ်တက့ၢ်. မ့ၢ်ပှၤအဝဲအံၤလီၤ.”
6တုၤပှၤလုၢ်တၢ်အခိၣ်အဒိၣ်တဖၣ်ဒီးတၢ်လုၢ်ဟံၣ်အပှၤပၢၤတၢ် တဖၣ်ထံၣ်ယ့ၣ်ၡူးဒီး, အဝဲသ့ၣ်ကိးပသူထီၣ်ဒီးစံးဝဲဒၣ်, “ပျၤထီအီၤလၢထူၣ်စုညါအလိၤ, ပျၤထီအီၤလၢထူၣ်စုညါ အလိၤတက့ၢ်.”
စီၤပံၤလးစံးဘၣ်အဝဲသ့ၣ်, “မ့မ့ၢ်ဒ်န့ၣ်ဒီး, ဟဲဟံးန့ၢ်အီၤ ဒီးပျၤထီကွံာ်အီၤလၢထူၣ်စုညါအလိၤလၢသုကစၢ်ဒၣ်သုဝဲ တက့ၢ်. ယဲယတထံၣ်န့ၢ်တၢ်အဂ့ၢ်အခၢးလၢယကစံၣ်ညီၣ်အီၤ အဂီၢ်နီတမံၤဘၣ်.”
7အန့ၣ်ဒီး, ပှၤယူဒၤဖိတဖၣ်စံးဆၢတၢ်ဒီးစံးဝဲ, “မ့ၢ်လၢအဝဲစံးလီၤ အသးလၢအမ့ၢ်ကစၢ်ယွၤအဖိခွါအဃိဒီး, ဒ်ပတၢ်သိၣ်တၢ်သီတထံၣ်အိၣ်ဝဲအသိး, အဝဲကြၢးသံဝဲဒၣ်န့ၣ်လီၤ.”
8တုၤစီၤပံၤလးနၢ်ဟူတၢ်အံၤဒီး, အဝဲပျံၤတၢ်ဒိၣ်န့ၢ်အလီၢ်တက့ၢ်လီၤ. 9အဝဲက့ၤနုာ်ကဒါက့ၤဆူနီပူၤဝံၤသံကွၢ်ယ့ၣ်ၡူး “မ့ၢ်နဟဲလၢလဲၣ်.”
ဘၣ်ဆၣ်ယ့ၣ်ၡူးတစံးဆၢအီၤဘၣ်. 10အန့ၣ်ဒီးစီၤပံၤလးစံးဘၣ်အီၤ, “နတကတိၤတၢ်ဒီးယၤဘၣ်ဧါ. မ့ၢ်နတသ့ၣ်ညါလၢ, ယအိၣ်ဒီးတၢ်စိတၢ်ကမီၤလၢယကမၤထူၣ်ဖျဲးနၤ ဒီးတၢ်စိတၢ်ကမီၤလၢယကပျၤထီနၤလၢထူၣ်စုညါအလိၤ စ့ၢ်ကီးန့ၣ်ဘၣ်ဧါ.”
11ယ့ၣ်ၡူးစံးဆၢတၢ်ဒီးစံးဝဲ, “နအိၣ်ဒီးတၢ်စိတၢ်ကမီၤလၢ ယဖီခိၣ်မ့ၢ်ဒၣ်လၢကစၢ်ယွၤဟ့ၣ်လီၤနၤတၢ်စိတၢ်ကမီၤအံၤ အဃိန့ၣ်လီၤ. လၢတၢ်န့ၣ်အဃိ, ပှၤလၢအဟ့ၣ်လီၤယၤဆူ နစုပူၤအံၤန့ၣ်, အတၢ်ဒဲးဘးဒိၣ်ဒၣ်တၢ်တက့ၢ်န့ၣ်လီၤ.”
12တုၤစီၤပံၤလးနၢ်ဟူတၢ်အံၤဒီး, အဝဲဃုဝဲကျဲလၢကမၤထူၣ်ဖျဲးယ့ၣ်ၡူးအဂီၢ်န့ၣ်လီၤ. ဘၣ်ဆၣ်ဒီးပှၤယူဒၤဖိတဖၣ်ကိးပသူထီၣ်ဒီးစံးဝဲ, “နမ့ၢ်ပျၢ်ဖျဲးကွံာ်အီၤဒီး, အခီပညီနတမ့ၢ်ရိမ့ၤအစီၤပၤဖးဒိၣ် အတံၤသကိးဘၣ်. ပှၤတဂၤဂ့ၤတဂၤဂ့ၤလၢအစံးလီၤအသး လၢအမ့ၢ်စီၤပၤတဂၤန့ၣ်, မ့ၢ်ပှၤလၢအပူထီၣ်တၢ်ထီဒါရိမ့ၤအစီၤပၤဖးဒိၣ်န့ၣ်လီၤ.”
13တုၤစီၤပံၤလးနၢ်ဟူတၢ်ကတိၤတဖၣ်အံၤဒီး, အဝဲဆှၢထီၣ် ယ့ၣ်ၡူးဆူတၢ်ချၢဒီးဆ့ၣ်နီၤဝဲလၢပှၤစံၣ်ညီၣ်ကွီၢ်အလီၢ် ဆ့ၣ်နီၤအလိၤ, ဖဲတၢ်လီၢ်တတီၤလၢတၢ်ကိးအီၤလၢ, “လၢၢ်ဘ့ၣ်ဘၣ်လၢအဒါလီၤအသး” န့ၣ်လီၤ. (လၢဧ့ၤဘြံၤအကျိာ် တခီတၢ်ကိးအီၤလၢ “ကၤဘၤသါ” လီၤ.) 14အကတီၢ်ဝဲန့ၣ်ကဘၣ်ဖဲမုၢ်ထူၣ်ဃၣ်ဃၣ်, တချုးလၢဘူၣ်လဲၤကပာ်တုၤဃီၤဝဲတနံၤ န့ၣ်လီၤ. စီၤပံၤလးစံးဘၣ်ပှၤယူဒၤဖိတဖၣ်, “အအံၤမ့ၢ်သုစီၤပၤလီၤ.”
15အဝဲသ့ၣ်ကိးပသူထီၣ်ကဒါက့ၤ, “မၤသံအီၤ, မၤသံအီၤ, ပျၤထီအီၤလၢထူၣ်စုညါအလိၤတက့ၢ်.”
စီၤပံၤလးသံကွၢ်အဝဲသ့ၣ်, “မ့ၢ်သုအဲၣ်ဒိးလၢယကပျၤထီ သုစီၤပၤလၢထူၣ်စုညါအလိၤန့ၣ်ဧါ.”
ပှၤလုၢ်တၢ်အခိၣ်အဒိၣ်တဖၣ်စံးဆၢတၢ်ဒီးစံးဝဲ, “ပစီၤပၤအိၣ်ထဲတဂၤဧိၤလၢအမ့ၢ်ရိမ့ၤအစီၤပၤဖးဒိၣ်န့ၣ်လီၤ.”
16အန့ၣ်တစု, စီၤပံၤလးဟ့ၣ်လီၤယ့ၣ်ၡူးဆူအဝဲသ့ၣ်အစုပူၤ လၢတၢ်ကပျၤထီအီၤလၢထူၣ်စုညါအလိၤအဂီၢ်န့ၣ်လီၤ.
တၢ်ပျၤထီယ့ၣ်ၡူးလၢထူၣ်စုညါအလိၤ
(မး. ၂၇:၃၂-၄၄; မၢ်. ၁၅:၂၁-၃၂; လူၤ. ၂၃:၂၆-၄၃)
မၤသးဒ်န့ၣ်ဒီး, အဝဲသ့ၣ်ဟံးန့ၢ်ယ့ၣ်ၡူးန့ၣ်လီၤ. 17ယ့ၣ်ၡူးယိးအထူၣ်စုညါဒီးဟးထီၣ်ကွံာ်ဝဲဖဲန့ၣ် ဒီးလဲၤတုၤဝဲလၢတၢ်လီၢ်တတီၤလၢတၢ်ကိးအီၤ, “တၢ်ခိၣ်ဃံအလီၢ်,” (လၢဧ့ၤဘြံၤအကျိာ်တၢ်ကိးအီၤလၢ “ကီၤလၤကီၤသါ”) န့ၣ်လီၤ. 18ဒီးဖဲန့ၣ်, အဝဲသ့ၣ်ပျၤထီယ့ၣ်ၡူးလၢထူၣ်စုညါအလိၤ, ဒီးပျၤထီစ့ၢ်ကီးပှၤအဂၤခံဂၤလၢထူၣ်စုညါအလိၤဖဲယ့ၣ်ၡူး အကပၤတခီတဂၤ, ဒီးယ့ၣ်ၡူးအိၣ်ဝဲလၢပှၤခံဂၤန့ၣ်အဘၢၣ် စၢၤလီၤ. 19စီၤပံၤလးကွဲးလံာ်ဘိးဘၣ်သ့ၣ်ညါလၢအစံးဝဲ, “ပှၤနစၤရ့းဖိ ယ့ၣ်ၡူး, ပှၤယူဒၤဖိတဖၣ်အစီၤပၤ,” ဒီးမၢပှၤပာ်ထီၣ်အီၤလၢထူၣ်စုညါအလိၤန့ၣ်လီၤ. 20ဒီးပှၤယူဒၤဖိအါဂၤဖးဘၣ်တၢ်အံၤ, မ့ၢ်လၢတၢ်လီၢ်ဖဲ ယ့ၣ်ၡူးဘၣ်တၢ်ပျၤထီအီၤလၢထူၣ်စုညါအလိၤန့ၣ်, တယံၤကဲၣ်ဆိးဒီးဝ့ၢ်ဘၣ်အဃိန့ၣ်လီၤ. လံာ်ဘိးဘၣ်သ့ၣ်ညါအံၤဘၣ်တၢ်ကွဲးဃာ်အီၤလၢဧ့ၤဘြံၤ အကျိာ်, လးတ့ၣ်အကျိာ်ဒီးကြံးခ်အကျိာ်န့ၣ်လီၤ. 21ပှၤယူဒၤဖိအပှၤလုၢ်တၢ်အခိၣ်အဒိၣ်တဖၣ်စံးဘၣ်စီၤပံၤလး, “တဘၣ်ကွဲးလီၤ ‘ပှၤယူဒၤဖိတဖၣ်အစီၤပၤ’ န့ၣ်တဂ့ၤ. မ့မ့ၢ်ကွဲးလီၤ, ‘ပှၤတဂၤအံၤစံးဝဲ, ယမ့ၢ်ပှၤယူဒၤဖိတဖၣ်အစီၤပၤ’ န့ၣ်တက့ၢ်.”
22စီၤပံၤလးစံးဆၢတၢ်ဒီးစံးဝဲ, “တၢ်လၢယကွဲးလီၤအီၤ ဝံၤလံန့ၣ်, ကအိၣ်ဒၣ်ဝဲဒ်ယကွဲးလီၤအီၤအသိးန့ၣ်တက့ၢ်.”
23ဖဲပှၤသုးဖိတဖၣ်ပျၤထီယ့ၣ်ၡူးလၢထူၣ်စုညါအလိၤဝံၤဒီး, အဝဲသ့ၣ်ဟံးန့ၢ်အကူအသိးတဖၣ်ဒီးနီၤဖးဝဲလွံၢ်ပူ, တပူလၢသုးဖိတဂၤစုာ်စုာ်အဂီၢ်န့ၣ်လီၤ. အဝဲသ့ၣ်ဟံးန့ၢ်စ့ၢ်ကီး အဆ့ကၤလၢတၢ်ထါဖးထီဃာ်အီၤဒီဘ့ၣ်ညါလၢအတိၤ တအိၣ်ဘၣ်တဘ့ၣ်န့ၣ်လီၤ. 24သုးဖိတဖၣ်စံးလိာ်အသးတဂၤဒီးတဂၤ, မ်ပသုတမၤယာ်အီၤ တဂ့ၤ. မ်ပကဖီၣ်တၢ်ဖးဒ်သိးပကသ့ၣ်ညါဘၣ်မတၤကန့ၢ် ဘၣ်ဆ့ကၤအဝဲအံၤလဲၣ်အဂီၢ်န့ၣ်တက့ၢ်.” တၢ်အံၤမၤအသးမ့ၢ်ဒ်သိးတၢ်ကွဲးအသး, ကလၢထီၣ် ပှဲၤထီၣ်ဝဲအဂီၢ်လၢအစံးဝဲ,
“အဝဲသ့ၣ်နီၤဖးယတၢ်ကူတၢ်သိးတဖၣ်လၢ
အဝဲသ့ၣ်အကျါကဒဲကဒဲ,
ဒီးဖီၣ်တၢ်ဖးလၢကန့ၢ်ဘၣ်ယဆ့ကၤအဂီၢ်လီၤ”
(စံး. ၂၂:၁၈).
တၢ်အံၤမ့ၢ်တၢ်လၢပှၤသုးဖိတဖၣ်မၤဝဲန့ၣ်လီၤ.
25ပှၤလၢအအိၣ်ဆၢထၢၣ်ဘူးဒီးယ့ၣ်ၡူးအထူၣ်စုညါန့ၣ်, မ့ၢ်ဝဲယ့ၣ်ၡူးအမိၢ်, အမိၢ်အဒီပုၢ်ဝဲၢ်မုၣ်, စီၤကျ့းအီၤပၤအမါနီၢ်မၤရံ, ဒီးပှၤမၤကဒါလၣ်မုၣ်နီၢ်မၤရံန့ၣ်လီၤ. 26ယ့ၣ်ၡူးထံၣ်ဘၣ်အမိၢ်ဒီးအပျဲၢ်အဘီၣ်လၢအအဲၣ်ဝဲတဂၤဆၢထၢၣ် ဖဲန့ၣ်, သတးဒီးအဝဲစံးဘၣ်အမိၢ် “ပိာ်မုၣ်ဧၢ, အဝဲမ့ၢ်နဖိခွါလီၤ.”
27ဝံၤဒီးစံးဘၣ်အပျဲၢ်အဘီၣ်အဝဲန့ၣ်, “အဝဲမ့ၢ်နမိၢ်လီၤ.” ဒီးစးထီၣ်ဖဲန့ၣ်ဒီးဆူညါအပျဲၢ်အဘီၣ် တဂၤအံၤတူၢ်လိာ်ကွၢ်ထွဲက့ၤယ့ၣ်ၡူးအမိၢ်လၢအဟံၣ်ဒၣ်ဝဲ န့ၣ်လီၤ.
ယ့ၣ်ၡူးအတၢ်သံ
(မး. ၂၇:၄၅-၅၆; မၢ်. ၁၅:၃၃-၄၁; လူၤ. ၂၃:၄၄-၄၉)
28ယ့ၣ်ၡူးသ့ၣ်ညါဝဲလၢတၢ်ခဲလၢာ်လၢအဝဲကဘၣ် မၤန့ၣ်မၤဝဲဝံၤလံသတးဒီး, ဒ်သိးတၢ်ကွဲးအသးကလၢ ထီၣ်ပှဲၤထီၣ်ဝဲအဂီၢ်န့ၣ်အဝဲစံးဝဲဒၣ်, “တၢ်သူယသး လၢထံလီၤ.”
29ဒီးဖဲန့ၣ်, ကတံၤအိၣ်ဝဲတဖျၢၣ်လၢအပှဲၤဒီးစပံးထံအဆံၣ် သတးဒီးပှၤစုၣ်လီၤဝဲကုၤပီၣ်လဲၣ်တလိၣ်လၢစပံးထံအံၤ အပူၤ, ဝံၤစဲထီၣ်ဝဲလၢသ့ၣ်အ့စိးအဒ့တဒ့အလိၤ ဒီးယူာ်ထီၣ်ဝဲဆူယ့ၣ်ၡူးအကိာ်ပူၤန့ၣ်လီၤ. 30ယ့ၣ်ၡူးဒိးန့ၢ်စပံးထံအဆံၣ်န့ၣ်ဝံၤဒီးစံးဝဲဒၣ်, “တၢ်လၢ ထီၣ်ပှဲၤထီၣ်လံ.”
ဒီးအဝဲဆုးလီၤအခိၣ်ဒီးဟ့ၣ်လီၤကွံာ်အသးလီၤ.
ယ့ၣ်ၡူးအကပၤဘၣ်တၢ်ဆဲးထူၣ်ဖျိအီၤ
31အန့ၣ်ဝံၤဒီး, ပှၤယူဒၤဖိအခိၣ်အနၢ်တဖၣ်ဃ့စီၤပံၤလး အခွဲးလၢကပျဲအဝဲသ့ၣ်တီၢ်ကၢ်ကွံာ်ပှၤလၢတၢ်မၤသံအီၤလၢ ထူၣ်စုညါအလိၤတဖၣ်အခီၣ်, ဒီးကစိာ်လီၤကွံာ်အစိၣ်လၢထူၣ်စုညါတဖၣ်အလိၤအဂီၢ် န့ၣ်လီၤ. အဝဲသ့ၣ်ဃ့တၢ်အံၤမ့ၢ်လၢမုၢ်နံၤတခီမ့ၢ်မုၢ်ယဲၢ် နံၤ, ဒီးအဝဲသ့ၣ်တသးအိၣ်လၢပှၤအစိၣ်တဖၣ်အံၤ ကအိၣ်စဲထီအသးလၢထူၣ်စုညါအလိၤတုၤလၢပှၤ ယူဒၤဖိအမုၢ်အိၣ်ဘှံးနံၤန့ၣ်ဘၣ်. အဂ့ၢ်ဒ်အံၤ, အဝဲသ့ၣ်အမုၢ်အိၣ်ဘှံးနံၤလၢအကဟဲအံၤမ့ၢ်နံၤလၢ အစီဆှံလီၤဆီဝဲအဃိန့ၣ်လီၤ. 32လၢတၢ်န့ၣ်အဃိ, သုးဖိတဖၣ်လဲၤဆူပှၤခံဂၤလၢအဘၣ် တၢ်ပျၤထီအီၤလၢထူၣ်စုညါအလိၤဃုာ်ဒီးယ့ၣ်ၡူးအအိၣ်, ဒီးတီၢ်ကၢ်ကွံာ်ဝဲအခီၣ်တဂၤဝံၤတဂၤလီၤ. 33ဘၣ်ဆၣ်ဖဲအဝဲသ့ၣ်ဟဲတုၤလၢယ့ၣ်ၡူးအအိၣ်န့ၣ်, ထံၣ်ဘၣ်ဝဲလၢအသံတ့ၢ်လံသတးဒီးတတီၢ်ကၢ်အခီၣ် လၢၤဘၣ်န့ၣ်လီၤ. 34ဘၣ်ဆၣ်ဒီး, ပှၤသုးဖိအကျါတဂၤဆဲးဖျိယ့ၣ်ၡူးအကပၤ လၢဘီ, ဒီးတၢ်သွံၣ်ဒီးထံဟဲယွၤလီၤဝဲတဘျီဃီန့ၣ်လီၤ. 35(ပှၤလၢအထံၣ်တၢ်မၤအသးအံၤတဂၤစံးကတိၤတၢ်ဘၣ်ဃး တၢ်ဂ့ၢ်အံၤ, ဒ်သိးသုဝဲစ့ၢ်ကီးသုကနာ်တၢ်အဂီၢ်န့ၣ်လီၤ. တၢ်လၢအဝဲစံးကတိၤန့ၣ်မ့ၢ်တၢ်မ့ၢ်တၢ်တီ, ဒီးအကစၢ်ဒၣ်ဝဲသ့ၣ်ညါလၢအစံးကတိၤတၢ်မ့ၢ်တၢ်တီန့ၣ်လီၤ.) 36တၢ်အံၤမၤအသးမ့ၢ်ဒ်သိးတၢ်ကွဲးအသးလၢအစံးဝဲ, “အဃံတဘၣ်တၢ်မၤကၢ်ကွံာ်အီၤနီတဘိဘၣ်” (ဟးထီၣ် ၁၂:၄၆). ကလၢထီၣ်ပှဲၤထီၣ်ဝဲအဂီၢ်န့ၣ်လီၤ. 37ဒီးတၢ်ကွဲးအသးအဂၤတတီၤစံးဝဲ, “ပှၤကကွၢ်ပှၤလၢအဝဲသ့ၣ်ဆဲးထူၣ်ဖျိဝဲတဂၤန့ၣ်လီၤ” (ကၤ ၁၂:၁၀).
တၢ်ခူၣ်လီၤယ့ၣ်ၡူး
(မး. ၂၇:၅၇-၆၁; မၢ်. ၁၅:၄၂-၄၇; လူၤ. ၂၃:၅၀-၅၆)
38တၢ်တဖၣ်အံၤအလီၢ်ခံ, စီၤယိၤသးလၢဝ့ၢ်အရံၤမၤသဲဃ့စီၤပံၤလးလၢ ကက့ၤစိာ်ယ့ၣ်ၡူးအစိၣ်အဂီၢ်န့ၣ်လီၤ. (စီၤယိၤသးအံၤမ့ၢ်ပှၤပိာ်ယ့ၣ်ၡူးအခံလၢတၢ်ခူသူၣ်အပူၤတဂၤ, မ့ၢ်လၢအဝဲပျံၤပှၤယူဒၤဖိအခိၣ်အနၢ်တဖၣ်အဃိန့ၣ်လီၤ.) စီၤပံၤလးဟ့ၣ်အီၤအခွဲးအဃိ, အဝဲဟံးန့ၢ်ယ့ၣ်ၡူးအစိၣ်ဒီး က့ၤစိာ်ဝဲန့ၣ်လီၤ. 39စီၤနံၤကဒ့မူး, ပှၤလၢအဃုထံၣ်တ့ၢ်ယ့ၣ်ၡူးလၢမုၢ်နၤခီတဘျီ တဂၤန့ၣ်, ဟဲစ့ၢ်ကီးဒီးစီၤယိၤသး, ဒီးဟဲစိာ်ဃုာ်ဝဲတၢ်နၢမူကိး ဝဲလၢမူရၣ်လၢအဃါဃုာ်အသးဒီးအကၠီၣ်, သၢဆံလံတြၤ ဃၣ်ဃၣ်န့ၣ်လီၤ. 40ပှၤခံဂၤအံၤဟံးန့ၢ်ယ့ၣ်ၡူးအစိၣ်ဒီးဘိၣ်ဘံထီၣ်ဝဲလၢတၢ်ကံးယာ်ဖှီဝါ ကဆှၣ်ဃုာ်ဒီးတၢ်နၢမူ, ဒ်ပှၤယူဒၤဖိအလုၢ်အလၢ်လၢတၢ်ကတဲာ် ကတီၤပှၤအစိၣ်လၢတၢ်ကခူၣ်လီၤကွံာ်အဂီၢ်အိၣ်ဝဲအသိး န့ၣ်လီၤ. 41ဖဲတၢ်လီၢ်လၢယ့ၣ်ၡူးဘၣ်တၢ်ပျၤထီအီၤလၢထူၣ်စုညါ အလိၤန့ၣ်, တၤသၣ်အလီၢ်အိၣ်ဝဲ, ဒီးတၤသၣ်အလီၢ်အံၤ အပူၤတၢ်သွၣ်ခိၣ်အသီအိၣ်ဝဲတပူၤလၢပှၤတခူၣ်လီၤဒံးပှၤနီ တဂၤဘၣ်န့ၣ်လီၤ. 42မ့ၢ်အဘၣ်ဝဲလၢပှၤယူဒၤဖိတဖၣ်အမုၢ်ကတဲာ်ကတီၤ တၢ်အနံၤ, ဒီးမ့ၢ်စ့ၢ်ကီးလၢတၢ်သွၣ်ခိၣ်အိၣ်ဘူးဝဲ အဃိ, အဝဲသ့ၣ်ပာ်လီၤယ့ၣ်ၡူးအစိၣ်ဖဲန့ၣ်လီၤ.
נבחרו כעת:
လံာ်ယိၤဟၣ် 19: KSWC
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Sgaw Karen Common Bible © Bible Society of Myanmar, 1992.
