လံာ်ယိၤဟၣ် 18
18
တၢ်ဖီၣ်ယ့ၣ်ၡူး
(မး. ၂၆:၄၇-၅၆; မၢ်. ၁၄:၄၃-၅၀; လူၤ. ၂၂:၄၇-၅၃)
1ယ့ၣ်ၡူးဃ့ဘါထုကဖၣ်တၢ်တဖၣ်အံၤဝံၤဒီး, အဝဲဟးထီၣ်ဒီးအပျဲၢ်အဘီၣ်တဖၣ်ဒီးလဲၤခီဂာ် ဆူကံဒြိၣ်ထံကျိၤအဝၢ်ဘးခီန့ၣ်လီၤ. ဒီးဖဲန့ၣ် တၤသၣ်လီၢ်အိၣ်ဝဲတလီၢ်ဒီးယ့ၣ်ၡူးဒီးအပျဲၢ် အဘီၣ်တဖၣ်လဲၤနုာ်ဝဲဒၣ်ဖဲန့ၣ်လီၤ. 2စီၤယူဒၤလၢအကဟ့ၣ်လီၤကွံာ်ယ့ၣ်ၡူးတဂၤန့ၣ်သ့ၣ်ညါတၢ်လီၢ် အဝဲအံၤ, မ့ၢ်လၢအါစုအါဘျီန့ၣ်ယ့ၣ်ၡူးထံၣ်လိာ်အသးဒီး အပျဲၢ်အဘီၣ်တဖၣ်ဖဲန့ၣ်အဃိလီၤ. 3စီၤယူဒၤလဲၤဆူတၤသၣ်လီၢ်အံၤဒီးလဲၤကိးဃုာ်ပှၤရိမ့ၤသုးဖိ တဖုဒီးပှၤပၢၤတၢ်လုၢ်ဟံၣ်ဖိတနီၤလၢပှၤလုၢ်တၢ်အခိၣ်အဒိၣ် တဖၣ်ဒီးပှၤဖၤရံၤၡဲတဖၣ်မၢလီၤအီၤန့ၣ်လီၤ. အဝဲသ့ၣ်အိၣ်ဒီး စုကဝဲၤဒီးစိာ်ဃုာ်မ့ၣ်အူဒၢဒီးဆှိတဖၣ်န့ၣ်လီၤ. 4ယ့ၣ်ၡူးသ့ၣ်ညါတၢ်ခဲလၢာ်လၢအကဟဲဘၣ်အီၤအဃိ, အဝဲလဲၤထီၣ်ဆူအဝဲသ့ၣ်အအိၣ်ဒီးသံကွၢ်ဝဲ, “သုဃု မတၤတဂၤန့ၣ်လဲၣ်.”
5အဝဲသ့ၣ်စံးဆၢဝဲ, “ပှၤနစၤရ့းဖိယ့ၣ်ၡူးန့ၣ်လီၤ.”
ဒီးယ့ၣ်ၡူးစံးဘၣ်အီၤ, “ယမ့ၢ်ပှၤအဝဲန့ၣ်လီၤ.”
စီၤယူဒၤလၢအကဟ့ၣ်လီၤကွံာ်အီၤန့ၣ်, အိၣ်ဆၢထၢၣ်ဖဲန့ၣ်ဃုာ်ဒီးပှၤတဖၣ်န့ၣ်လီၤ. 6ဖဲန့ၣ်ယ့ၣ်ၡူးစံးဘၣ်အဝဲသ့ၣ်လၢ, “ယမ့ၢ်ပှၤအဝဲန့ၣ်လီၤ” န့ၣ်, အဝဲသ့ၣ်ဂုၤက့ၤဆူအလီၢ်ခံဒီးလီၤဃံၤဝဲလၢဟီၣ်ခိၣ် အလိၤန့ၣ်လီၤ. 7ယ့ၣ်ၡူးသံကွၢ်ကဒီးအဝဲသ့ၣ်, “သုဃုမတၤတဂၤန့ၣ်လဲၣ်.”
ဒီးအဝဲသ့ၣ်စံးဝဲ, “ပှၤနစၤရ့းဖိယ့ၣ်ၡူးန့ၣ်လီၤ.”
8ယ့ၣ်ၡူးစံးဘၣ်အဝဲသ့ၣ်, “ယစံးဘၣ်တဲဘၣ်တ့ၢ်သုလၢ ယမ့ၢ်ပှၤအဝဲန့ၣ်လံ. သုမ့ၢ်ဃုယၤဒီး, ပျဲက့ၤပှၤအဂၤတဖၣ် အံၤန့ၣ်တက့ၢ်.” 9(ယ့ၣ်ၡူးစံးတၢ်ဒ်အံၤမ့ၢ်ဒ်သိးတၢ်လၢအဝဲစံးတ့ၢ်ဝဲကလၢထီၣ် ပှဲၤထီၣ်အဂီၢ်လီၤ. “ပၢ်ဧၢ, ပှၤလၢနဟ့ၣ်တ့ၢ်ယၤတဖၣ်န့ၣ်, ထဲတဂၤဒၣ်လဲာ်တလီၤမၢ်ကွံာ်န့ၢ်ယၤဘၣ်.”)
10စီၤၡံမိၣ်ပ့းတရူးလၢအအိၣ်ဒီးနးတဘ့ၣ်န့ၣ်, ထုးထီၣ်အနးဒီးကျီပှၤလုၢ်တၢ်အခိၣ်အဒိၣ်ကတၢၢ်အခ့အပှၤ တဂၤဒီးအနၢ်လၢအထွဲတခီတဲာ်ကွံာ်ဝဲန့ၣ်လီၤ. တၢ်ခ့တၢ်ပှၤတဂၤအံၤအမံၤမ့ၢ်ဝဲစီၤမါလဃူးန့ၣ်လီၤ. 11ယ့ၣ်ၡူးစံးဘၣ်စီၤပ့းတရူး, “ဖျီၣ်နုာ်က့ၤနနးဆူအတြိးပူၤန့ၣ် တက့ၢ်. မ့ၢ်ယတဘၣ်အီတၢ်နးတၢ်ဖှီၣ်အလီခီလၢယပၢ်ဟ့ၣ်လီၤ ယၤန့ၣ်ဘၣ်ဧါ.”
ယ့ၣ်ၡူးလၢစီၤအၣ်နၣ်အမဲာ်ညါ
12မၤသးဒ်န့ၣ်ဒီး, ပှၤရိမ့ၤသုးဖိတဖၣ်ဃုာ်ဒီးအသုးခိၣ်ဒီး ယူဒၤအပှၤပၢၤတၢ်လုၢ်ဟံၣ်တဖၣ်, ဖီၣ်ယ့ၣ်ၡူးဒီးစၢဃာ်အီၤ, 13ဒီးလဲၤဆှၢအီၤအဆိကတၢၢ်ဆူစီၤအၣ်နၣ်အအိၣ်လီၤ. အဝဲမ့ၢ်စီၤကၤယါဖၤလၢအမ့ၢ်နံၣ်အဝဲန့ၣ်အဂီၢ်ပှၤလုၢ်တၢ် အခိၣ်အဒိၣ်ကတၢၢ်တဂၤအမံၤပှၢ်ပိာ်ခွါလီၤ. 14စီၤကၤယါဖၤမ့ၢ်ပှၤတဂၤလၢအဟ့ၣ်ကူၣ်ပှၤယူဒၤဖိအခိၣ်အနၢ် တဖၣ်လၢ, ဂ့ၤတက့ၢ်ပှၤတဂၤသံဝဲလၢပှၤခဲလၢာ်အဂီၢ်န့ၣ်လီၤ.
စီၤပ့းတရူးသမၢယ့ၣ်ၡူး
(မး. ၂၆:၆၉-၇၀; မၢ်. ၁၄:၆၆-၆၈; လူၤ. ၂၂:၅၅-၅၇)
15စီၤၡံမိၣ်ပ့းတရူးဒီးအပျဲၢ်အဘီၣ်အဂၤတဂၤပိာ်ထီၣ်ယ့ၣ်ၡူး အခံလီၤ. အပျဲၢ်အဘီၣ်အဂၤတဂၤအံၤပှၤလုၢ်တၢ်အခိၣ်အဒိၣ် ကတၢၢ်သ့ၣ်ညါအီၤဂ့ၤဒိၣ်မးအဃိ, အဝဲလဲၤနုာ်ဝဲဒီးယ့ၣ်ၡူးဆူပှၤလုၢ်တၢ်အခိၣ်အဒိၣ်ကတၢၢ် အဟံၣ်ကရၢၢ်ပူၤန့ၣ်လီၤ. 16ဖဲန့ၣ်အခါ, စီၤပ့းတရူးအိၣ်လၢတၢ်ချၢလၢကျဲစၢၤအဃၢၤ န့ၣ်လီၤ. အန့ၣ်ဝံၤဒီး, အပျဲၢ်အဘီၣ်လၢပှၤလုၢ်တၢ်အခိၣ်အဒိၣ် ကတၢၢ်သ့ၣ်ညါအီၤဂ့ၤဒိၣ်မးတဂၤန့ၣ်, က့ၤဟးထီၣ်က့ၤဝဲ, ကတိၤတၢ်ဒီးပိာ်မုၣ်လၢအပၢၤကျဲစၢၤတဂၤဝံၤဒီး, ဟဲက့ၤကိးနုာ်စီၤပ့းတရူးဆူကရၢၢ်ပူၤန့ၣ်လီၤ. 17ပိာ်မုၣ်လၢအပၢၤကျဲစၢၤတဂၤအံၤစံးဘၣ်စီၤပ့းတရူး, “နမ့ၢ်စ့ၢ်ကီးပှၤအဝဲန့ၣ်အပျဲၢ်အဘီၣ်တဂၤတမ့ၢ်ဘၣ်ဧါ.” စီၤပ့းတရူးစံးဆၢတၢ်ဒီးစံးဝဲ, “တမ့ၢ်ဘၣ်.”
18တၢ်ဂိၢ်ဒိၣ်မးအဃိ, ပှၤလုၢ်တၢ်အခိၣ်အဒိၣ်ကတၢၢ် အခ့အပှၤတဖၣ်ဒီးပှၤပၢၤတၢ်လုၢ်ဟံၣ်တဖၣ်မၤကဲၤထီၣ် မ့ၣ်အူလၢသွဲၣ်လး, အိၣ်ဆၢထၢၣ်ဝးတရံးဒီးဆူးမ့ၣ်အူဖဲ န့ၣ်လီၤ. စီၤပ့းတရူးစ့ၢ်ကီးအိၣ်ဆၢထၢၣ်ဆူးမ့ၣ်အူလၢ အဝဲသ့ၣ်အကျါန့ၣ်လီၤ.
ပှၤလုၢ်တၢ်အခိၣ်အဒိၣ်ကတၢၢ် သမံသမိးယ့ၣ်ၡူး
(မး. ၂၆:၅၉-၆၆; မၢ်. ၁၄:၅၅-၆၄; လူၤ. ၂၂:၆၆-၇၁)
19ပှၤလုၢ်တၢ်အခိၣ်အဒိၣ်ကတၢၢ်သံကွၢ်ယ့ၣ်ၡူးဘၣ်ဃးဒီး အပျဲၢ်အဘီၣ်တဖၣ်အဂ့ၢ်ဒီးအတၢ်သိၣ်လိသီလိအဂ့ၢ်န့ၣ်လီၤ. 20ယ့ၣ်ၡူးစံးဆၢတၢ်ဒီးစံးဝဲ, “ယကတိၤတၢ်ထီဘိလၢပှၤအါဂၤ အမဲာ်ညါဒီးလၢပှၤကိးဂၤဒဲးန့ၣ်လီၤ. ယတၢ်သိၣ်လိသီလိခဲလၢာ်ဘၣ်တၢ်မၤအီၤလၢဘူၣ်ဘျီၣ် လၢအမ့ၢ်တၢ်ဘါအလီၢ်အပူၤဒီးတၢ်လုၢ်ဟံၣ်အပူၤ, ဖဲပှၤယူဒၤဖိခဲလၢာ်ဟဲပာ်ဖှိၣ်အသးန့ၣ်လီၤ. ယတစံးကတိၤတၢ်လၢတၢ်ခူသူၣ်အပူၤနီတဘျီဘၣ်. 21မ့မ့ၢ်ဒ်န့ၣ်ဒီး, ဘၣ်မနုၤနသံကွၢ်ယၤလဲၣ်. သံကွၢ်ပှၤတဖၣ်လၢအနၢ်ဟူတ့ၢ်ယတၢ်စံးတၢ်ကတိၤတက့ၢ်. သံကွၢ်အဝဲသ့ၣ်တၢ်လၢယစံးတ့ၢ်အဝဲသ့ၣ်န့ၣ်တက့ၢ်. အဝဲသ့ၣ်, သ့ၣ်ညါတၢ်လၢယစံးဘၣ်တဲဘၣ်တ့ၢ်အီၤန့ၣ်လီၤ.”
22တုၤယ့ၣ်ၡူးစံးတၢ်ဒ်အံၤဒီး, ပှၤပၢၤတၢ်လုၢ်ဟံၣ်အကျါတဂၤဒဲယ့ၣ်ၡူးအမဲာ်ဒီးစံးဝဲ, “ဘၣ်မနုၤအဃိနကတိၤဆၢပှၤလုၢ်တၢ်အခိၣ်အဒိၣ် ကတၢၢ်ဒ်အံၤန့ၣ်လဲၣ်.”
23ယ့ၣ်ၡူးစံးဆၢတၢ်ဒီးစံးဘၣ်အီၤ, “ယမ့ၢ်ကတိၤကမၣ်ဘၣ် တၢ်တမံၤမံၤဒီး, တဲဖျါထီၣ်အီၤလၢပှၤခဲလၢာ်အမဲာ်ညါ ဖဲအံၤလၢယတၢ်ကမၣ်မ့ၢ်တၢ်မနုၤလဲၣ်န့ၣ်တက့ၢ်. ဘၣ်ဆၣ်တၢ်လၢယကတိၤတ့ၢ်န့ၣ်, မ့မ့ၢ်တၢ်အဘၣ်ဒီးဘၣ်မနုၤအဃိနဒဲယမဲာ်န့ၣ်လဲၣ်.”
24မၤသးဒ်န့ၣ်ဒီးစီၤအၣ်နၣ်ဆှၢယ့ၣ်ၡူးဒ်အအိၣ်စၢဃာ်ပာ်စၢၤ အသးအသိး, ဆူစီၤကၤယါဖၤလၢအမ့ၢ်ပှၤလုၢ်တၢ်အခိၣ် အဒိၣ်ကတၢၢ်အအိၣ်န့ၣ်လီၤ.
စီၤပ့းတရူးသမၢကဒီးယ့ၣ်ၡူး
(မး. ၂၆:၇၁-၇၅; မၢ်. ၁၄:၆၉-၇၂; လူၤ. ၂၂:၅၈-၆၂)
25စီၤပ့းတရူးအိၣ်ဆၢထၢၣ်ဒံးဖဲန့ၣ်ဒီးဆူးမ့ၣ်အူန့ၣ်လီၤ. အဃိ, ပှၤအဂၤတဖၣ်သံကွၢ်အီၤ, “နမ့ၢ်စ့ၢ်ကီးပှၤအဝဲန့ၣ် အပျဲၢ်အဘီၣ်တဂၤတမ့ၢ်ဘၣ်ဧါ.” ဘၣ်ဆၣ် စီၤပ့းတရူးသမၢတၢ်ဒီးစံးဝဲဒၣ်, “တမ့ၢ်ဘၣ်.”
26ပှၤလုၢ်တၢ်အခိၣ်အဒိၣ်ကတၢၢ်အခ့အပှၤတဖၣ်အကျါ တဂၤ, လၢအဒီဘူးဒီတံၢ်ဒီးပှၤတဂၤလၢစီၤပ့းတရူး ကျီတဲာ်ကွံာ်အနၢ်န့ၣ်, ကတိၤထီၣ်တၢ်ဒီးစံးဝဲ, “ပှၤလၢယထံၣ်တ့ၢ်လၢတၤသၣ်လီၢ်ဒီးယ့ၣ်ၡူးန့ၣ်, မ့ၢ်နၤလီၤတမ့ၢ်ဘၣ်ဧါ.”
27စီၤပ့းတရူးစံးကဒီးဝဲ, “တမ့ၢ်ဘၣ်.” ဒီးတဘျီဃီဆီဖါကီၢ်အိၣ်အိထီၣ်ဝဲဒၣ်န့ၣ်လီၤ.
ယ့ၣ်ၡူးလၢစီၤပံၤလးအမဲာ်ညါ
(မး. ၂၇:၁-၂,၁၁-၁၄; မၢ်. ၁၅:၁-၅; လူၤ. ၂၃:၁-၅)
28ဖဲမုၢ်ဆ့ၣ်ထီၣ်ဂီၤဂီၤအဆၢကတီၢ်န့ၣ်, ယ့ၣ်ၡူးဘၣ်တၢ်ကိးထီၣ်အီၤလၢစီၤကၤယါဖၤ အဟံၣ်ဒီးဘၣ်တၢ်ဆှၢအီၤဆူရိမ့ၤအပဒိၣ်ဖးဒိၣ် အနီပူၤန့ၣ်လီၤ. ပှၤယူဒၤဖိအခိၣ်အနၢ်တဖၣ် တလဲၤနုာ်ဆူနီအပူၤဘၣ်. မ့ၢ်လၢအဝဲသ့ၣ်အဲၣ်ဒိးအိၣ် ကဆှီအသးဒ်အလုၢ်အလၢ်အိၣ်ဝဲအသိး, ဒ်သိးအီၣ်ဘူၣ်လဲၤကပာ်ကသ့ဝဲအဂီၢ်န့ၣ်လီၤ. 29လၢတၢ်န့ၣ်အဃိ, စီၤပံၤလးဟးထီၣ်ဆူတၢ်ချၢဆူအဝဲသ့ၣ် အအိၣ်ဒီးသံကွၢ်အီၤ, “သုပာ်တၢ်ကမၣ်မနုၤတမံၤလၢပှၤ တဂၤအံၤအလိၤလဲၣ်.”
30အဝဲသ့ၣ်စံးဆၢတၢ်ဒီးစံးဝဲ, “အဝဲမ့ၢ်တမၤကမၣ်ထံကီၢ်တၢ်သိၣ်တၢ်သီ တမံၤမံၤဘၣ်ဒီး, တမ့ၢ်လၢပကဟဲဆှၢအီၤဆူနအိၣ်န့ၣ်ဘၣ်.”
31စီၤပံၤလးစံးဘၣ်အဝဲသ့ၣ်, “မ့မ့ၢ်ဒ်န့ၣ်ဒီး, သုဝဲသ့ၣ်သုကစၢ် ဒၣ်ဝဲက့ၤကိးအီၤ, ဒီးစံၣ်ညီၣ်အီၤဒ်သုတၢ်ဘူၣ်တၢ်ဘါအတၢ်သိၣ်တၢ်သီအိၣ်ဝဲ အသိးန့ၣ်တက့ၢ်.”
အဝဲသ့ၣ်စံးဆၢတၢ်ဒီးစံးဝဲ, “တၢ်တဟ့ၣ်ပှၤအခွဲးလၢ ပကမၤသံပှၤတဂၤဂ့ၤတဂၤဂ့ၤန့ၣ်ဘၣ်.” 32(တၢ်အဝဲအံၤမၤအသးမ့ၢ်ဒ်သိးတၢ်လၢယ့ၣ်ၡူးစံးတ့ၢ်ဝဲဘၣ်ထွဲဒီး အဝဲကဘၣ်သံလၢတၢ်သံဒ်လဲၣ်န့ၣ်, ကလၢထီၣ်ပှဲၤထီၣ်ဝဲအဂီၢ် န့ၣ်လီၤ.) 33အန့ၣ်ဒီး, စီၤပံၤလးက့ၤနုာ်က့ၤဆူနီပူၤဒီးကိးယ့ၣ်ၡူးဒီးသံကွၢ်အီၤ, “နမ့ၢ်ပှၤယူဒၤဖိတဖၣ်အစီၤပၤန့ၣ်ဧါ.”
34ယ့ၣ်ၡူးစံးဆၢတၢ်ဒီးစံးဝဲ, “တၢ်သံကွၢ်အဝဲအံၤမ့ၢ်နတၢ် သံကွၢ်ဒၣ်နဲဧါ. မ့တမ့ၢ်ဘၣ်ဒီး, မ့ၢ်ပှၤဂၤတဖၣ်စံးဘၣ်တဲဘၣ်နၤလၢယဂ့ၢ်အဃိန့ၣ်ဧါ.”
35စီၤပံၤလးစံးဆၢတၢ်ဒီးစံးဝဲ, “နဆိကမိၣ်လၢယမ့ၢ်ပှၤယူဒၤ ဖိတဂၤဧါ. ပှၤလၢအဟ့ၣ်လီၤနၤဆူယစုပူၤန့ၣ်, မ့ၢ်ဒၣ်နပှၤ ကလုာ်ဒၣ်နဲဒီးပှၤလုၢ်တၢ်အခိၣ်အဒိၣ်သ့ၣ်တဖၣ်န့ၣ်လီၤ. မ့ၢ်နမၤတ့ၢ်မနုၤတမံၤလဲၣ်.”
36ယ့ၣ်ၡူးစံးဆၢတၢ်ဒီးစံးဝဲ, “ယဘီယမုၢ်တဘၣ်ဃးဒီးဟီၣ်ခိၣ် အံၤဘၣ်. ယဘီယမုၢ်မ့ၢ်ဘၣ်ဃးဒီးဟီၣ်ခိၣ်အံၤဒီး, ပှၤလၢအပိာ်ယခံတဖၣ်ကဒုးတၢ်ဒ်သိးတၢ်သုတဟ့ၣ်လီၤ ကွံာ်ယၤဆူပှၤယူဒၤဖိအခိၣ်အနၢ်တဖၣ်အစုပူၤတဂ့ၤအဂီၢ် န့ၣ်လီၤ. ယဘီယမုၢ်တမ့ၢ်တၢ်ဒ်သိးဒီးဟီၣ်ခိၣ်အဘီအမုၢ် န့ၣ်ဘၣ်.”
37လၢတၢ်န့ၣ်အဃိ, စီၤပံၤလးသံကွၢ်အီၤ, “မ့မ့ၢ်ဒ်န့ၣ်ဒီး, နမ့ၢ်စီၤပၤတဂၤဧါ.”
ယ့ၣ်ၡူးစံးဆၢတၢ်ဒီးစံးဝဲ, “နစံးလၢယမ့ၢ်စီၤပၤတဂၤလီၤ. ယအိၣ်ဖျဲၣ်ထီၣ်ဒီးဟဲဆူဟီၣ်ခိၣ်ချၢအံၤလၢတၢ်တိာ်ထဲတမံၤဧိၤ အဂီၢ်လၢအမ့ၢ်တၢ်ကတိၤတၢ်မ့ၢ်တၢ်တီန့ၣ်လီၤ. ပှၤတဂၤလၢ်လၢ်လၢအဘၣ်ဃးဒီးတၢ်မ့ၢ်တၢ်တီန့ၣ်, ဒိကနၣ်ယကလုၢ်လီၤ.”
38စီၤပံၤလးသံကွၢ်တၢ်ဒီးစံးဝဲ, “တၢ်မ့ၢ်တၢ်တီမ့ၢ်တၢ်မနုၤ လဲၣ်.”
တၢ်စံၣ်ညီၣ်သံကွံာ်ယ့ၣ်ၡူး
(မး. ၂၇:၁၅-၃၁; မၢ်. ၁၅:၆-၂၀; လူၤ. ၂၃:၁၃-၂၅)
တုၤနုၤတစုစီၤပံၤလးဟးထီၣ်ကဒီးဆူတၢ်ချၢဆူပှၤယူဒၤဖိ တဖၣ်အအိၣ်ဒီးစံးဘၣ်အဝဲသ့ၣ်, “ယတထံၣ်န့ၢ်တၢ်ဂ့ၢ်လၢတၢ်ကစံၣ်ညီၣ်အီၤအဂီၢ်နီတမံၤဘၣ်. 39ဘၣ်ဆၣ်ဒီး, ဒ်သုလုၢ်သုလၢ်အိၣ်ဝဲအသိး, ယကဘၣ်ပျၢ်ဖျဲးန့ၢ်သု ပှၤဃိာ်ဖိတဂၤဖဲဘူၣ်လဲၤကပာ်အဆၢကတီၢ်န့ၣ်လီၤ. လၢတၢ်န့ၣ် အဃိ, မ့ၢ်သုအဲၣ်ဒိးလၢယကပျၢ်ဖျဲးန့ၢ်သုပှၤယူဒၤဖိတဖၣ် အစီၤပၤအံၤန့ၣ်ဧါ.”
40အဝဲသ့ၣ်ကိးပသူထီၣ်ဒီးစံးဝဲ, “တမ့ၢ်ဘၣ်. တမ့ၢ် အဝဲဘၣ်. ပသးလီစီၤဘၤရးဘါန့ၣ်လီၤ.” (စီၤဘၤရးဘါမ့ၢ် တမျာ်တဂၤန့ၣ်လီၤ.)
נבחרו כעת:
လံာ်ယိၤဟၣ် 18: KSWC
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Sgaw Karen Common Bible © Bible Society of Myanmar, 1992.
