Luka 5
5
Yesu lwoŋo jofonjirok marapena
(Mat 4:18-22; Mar 1:16-20)
1 #
Mat 13:1,2; Mar 3:9-10; 4:1 Yesu ocungo dho wakawaka ma Genesaret to lwak ji ma joyenyo winjo wac pa Were jodire kwoŋe. 2Yesu oneno ye moro ario dho thengi wakawaka; kareno jokitoga ma wegi mere onwaŋo jongoye kenyo oyido jokidho lwoko bwo pajo 3Gikenyo Yesu odonjo i ye acel, mapa Simon Petero, to kwayo go ni wodhire i pi gi ye no nyaka mathin wok kwoŋ geŋin. 4Aka munyo obedo i ye, ofonjo lwak ji no gi i ye. To munyo ocowo luwo, owaco ri Simon ni, “Cori ye i wakawaka milelo wiboli bwo mewin wimaki rec.” 5#Yoh 21:3To Simon odwoko go ni, “Jadwoŋ, kole watieko kifamba wor gipi m'ongoye gima wamako! To rupiri iwaco, akidho bolo bwo.” 6#Yoh 21:6Munyo jotieko timo ameno, jomako rec mathoth swa ma bwo onwaŋo cegin kiri gi yec woko. 7Aka jolwoŋo jowoti jo m'oyido jonitie i ye man gi cingi gin ni jobin jowokony jo. To jono jobino to jopoŋo ye ario je mapa jokidho munyirok i pi.
8Munyo Simon Petero oneno ameno, opodho ka tiendi Yesu munyo waco ni, “Eye bongan, Rwoth, rupiri ajareco.” 9Ato go kodi jowote je, oyido jobwok tektek ro kweth rec ma jomako. 10Yakobo kodi Yohana, wot Zebedayo, ma jobedo jowoti Simon, je bende jobwok. Aka Yesu owaco ri Simon ni, “Ikir'ibedi gi lworo! Wok gunyo ni, ibino kitoga ji.” 11Aka munyo jotieko cewo ye kiri dho geŋin, joywayo jowodho woko, to joweyo gimoro je to joluwo Yesu.
Yesu lonyo jadhowo
(Mat 8:1-4; Mar 1:40-45)
12Munyo Yesu oyido nitie i tindi moro, jadhowo moro ma kwoŋe gipi odhole obino. Munyo go oneno Yesu, opodho piny gi nyime to ywakere rigo ni, “Rwoth, k'iyenyo inyalo lonyan.” 13Yesu ocwayo cinge, ogeyo go munyo waco ni: “Ayenyo, riameno lony.” Gikenyo won, dhowo oware kwoŋe. 14#Jolevi 14:1-32Aka Yesu ociko go teltel ni, “Ikir'iwaci ri nyatoro; to kidhi inyuthere ri jacway ri Were i wi migam, aka iter mic paka Musa ooro, ma nyutho gine ji ni onyo ilony.” 15To wac omedo nyay ayino, aka lwak ji jocokere winjo fonji pere gi limo both kwoŋ two pajo. 16To Yesu okidho i thim kwayo paka oyido omaro timo.
Yesu botho dhano ma two nyaŋinya
(Mat 9:1-8; Mar 2:1-12)
17Ndelo moro munyo Yesu fonjo ji, Jofarisayo moro kodi Jondiko ma jowok iy'adec ma Galili kodi Yuda kodi Yerusalem bende jobino kenyo; aka go oyido opoŋ gi meni pa Rwoth ma cango two. 18Gikenyo cwo moro jokelo rigo nyatoro ma two nyaŋinya wi kitanda. Jono jodwaro yo ma kelo go bongi Yesu. 19To paka royo odhiero jo ma rwako go ro lwak ji, joidho wi ot aka jocwayo go bongi Yesu gi kitanda pere gi i hola ma jomwomo wi kisul ot. 20Munyo Yesu oneno yeyo pajo owaci ni, “Jal me, reco perin ocwaki rin.” 21To Jondiko kodi Jofarisayo jocako kigeŋisa munyo wegi jopenjere ni, “Ŋatin ŋa ma luwo gima k'otire kwoŋ Were ama? Ŋata bende nyalo cwako reco kwanyo woko Were won?” 22Munyo Yesu oniaŋ ni jogesa ameno, odwoko ni, “Raŋo ma widaŋin gi i cuny win? 23Aŋo mayot waco? Ni, ‘Reco perin ocwaki rin, kosa ni, ay malo iwothi?’ 24Ere me ma miyo win ŋeyo ni Wod Dhano nitie gi meni i piny ka ma cwako reco.” Go owaco ri ŋata two nyaŋinya ni, “Awaco rin, ay malo ikwany kitanda perin idok peco.” 25Piyo piyo no ŋato oay ruwaŋ jo, okwanyo kitanda m'oyido go onind'iye, to dok peco munyo miyo Were dwoŋ. 26Aka ji je jouro swa, to jopako Were gi lworo, munyo jowaco ni, “Konon waneno gigipiny ma yado fodi wakineno.”
Yesu lwoŋo Levi
(Mat 9:9-13; Mar 2:13-17)
27Gikenyo Yesu owok to neno jacoki misolo ma nyinge Levi, obedo piny dho cegin gi ot misolo; to waco rigo ni, “Luwan.” 28Levi oweyo gimoro je, oay, to luwo go. 29Levi oyiko rigo kalima madwoŋ peco pere; aka kweth pa jocoki misolo kodi joman jobedo gi Yesu dhower. 30#Luk 15:1-2To Jofarisayo kodi Jondiko, jogesa gi jofonjirok pa Yesu munyo jopenjo ni, “Raŋo ma wicemo aka wimedho gi jocoki misolo kodi joreco?” 31To Yesu odwoko jo ni, “Jom'olama ama jokiyeny jamilerwa, to joma two ayino ama joyenyo; 32kole akibino lwoŋo jomabeyo, to joreco ayino ni jowoŋuti reco pajo.”
Penji kwoŋ riyo kec
(Mat 9:14-17; Mar 2:18-22)
33Aka jowaco ri Yesu ni, “Jofonjirok pa Yohana kodi apa Jofarisayo joriyo kec adhik, to kole joperin jocemo aka jooro gir'amadha.” 34To Yesu owaco rijo ni, “Inyalo miyo jom'olwoŋ i kalima ma nywomirok riyo kec nedi ma to jamweha fodi nitie gi jo? 35Kole ndelo bino tundo m'ilakwany'iye woko jamweha bongi jo, aka nyaka jobino riyo kec.”
36Yesu oluwo rijo iy'ageca bende ni, “Ongoye ŋata yeco kiremo nanga manyen to kwoyo wi nanga m'oti; k'otimo ameno, go nyalo yeco woko nanga manyen no, odoko kiremo manyen bende kilaripo gi macon. 37Aka ongoye ŋata kako medho ma vini manyen i mugowa piendere m'oti rupiri medho no bino yeco woko piendere no to oy, gikenyo to piendere nyekere woko. 38Be! Medho ma vini manyen ripo kako i mugowa piendere mere manyen. 39Aka ongoye ŋat'otieko madho vini ma ndoto m'odoko mito manyen. Go waco ni ndoto amaber.”
Dhopadhola DC Bible © Bible Society of Uganda, 2018.
