Luka 4
4
Sitan temo Yesu i thim
(Mat 4:1-11; Mar 1:12-13)
1Munyo Yesu otieko poŋ gi Cuny Maleŋ, oeye Yordan to Cuny Maleŋ telo go i thim cowo ndelo piero aŋwen, 2munyo jwogi temo go. I hongo no, go k'ocamo gimoro; aka rumacen nyaka owinjo kec. 3Gikenyo jwogi owaco rigo ni, “K'ibedo Wod Were, ere wodhi or ri tele me wolokere cemo.” 4#Cik 8:3To Yesu odwoko go ni, “Ondiki ni, ‘Dhano kikwo gi cemo kende.’ ”
5Gikenyo jwogi otero go wi got mabor to nyutho go ker je ma piny i hongo macek; owaco ri Yesu ni, 6“Abino miyin meni je gi dwoŋ je ma ker me, rupiri okethi i cingan aka anyalo miyo nyatoro je m'awon ayero. 7Am'omiyo k'inolaman, to gimoro je bedo aperin.” 8#Cik 6:13To Yesu dwoko go ni, “Ondiki ama.”
“Lam Rwoth Were perin,
aka itiy rigo won kende.”
9Gikenyo jwogi otero Yesu Yerusalem to oro go cungo wi kisul Ot pa Were. Aka owaco rigo ni, “Ka in i Wod Were, woki ka, ipor piny. 10#Zab 91:11-12Kole ndiko waco ni, ‘Were bino ketho jomalaika pere to jolin.’ 11Kendo ni, ‘Jobino bielin i cingi gin ŋey ikir'icadhi tiendin kwoŋ tele.’ ” 12#Cik 6:16To Yesu odwoko ni, “Otiek waco i ndiko ni, ‘Ikir'item Rwoth Were perin.’ ” 13Munyo jwogi ocowo temo Yesu i nger je, oweyo go kutho ma hongo manok.
Yesu cako tic pere i Galili
(Mat 4:12-17; Mar 1:14-15)
14Yesu, gi meni pa Cuny Maleŋ kwoŋe, ogik i Galili; aka wac ma mako kwoŋe olak iy'adec je ma piny no. 15Go ofonjo i kalamo ma Yuda m'omore aka dhano je omiyo go dwoŋ.
Ikwero jolo Yesu i Nazareth
(Mat 13:53-58; Mar 6:1-6)
16Yesu okidho Nazareth kama cango odong'iye, to kidho i kalamo pa Joyuda i ndelo ma Sabato paka yado omaro timo. Oay malo kisoma, 17to jocwayo rigo kitawo ma cango Isaya jatuci wac Were ondiko. Oyawo to soma kam'ondik'iye ni,
18 #
Isa 61:1-2
“Cuny pa Rwoth opoŋ kwoŋan,
rupiri owiran gi mo ma tito Wac Manyen Maber ri jocandi.
Ooran waco ri jom'otwey ni otiek gonyo jo,
kendo ri joma waŋ jo otho, ni otiek yawo waŋ jo,
aka ri jom'onwaŋo odiy jo ni onyo owey jo i siem.
19Odoko ooran tito ni me a oro pa Rwoth
ma nyutho ji both pere.”
20Gikenyo oumo kitawo no to dwoko ri ŋata kuro, to bedo piny, aka waŋ ji je ma kalamo ocomere kwoŋ go. 21Aka ocako luwo rijo ni, “Konon randik me ee otundo i kare paka wiwinjo no.” 22Ji je jofoyo go munyo jouro wac madongo mabeyo m'owok i dhoke ka jopenjo ni, “Me won ki wod pa Yozefu?” 23Odwoko ni, “Aŋeyo ni wibino waco ran ageca m'omar waco ni, ‘Jamilerwa, iwon bothere.’ Kendo ni, ‘Watieko winjo gimoro je m'otimere Kapernaum. Tim ameno bende loka perin ka.’ ” 24#Yoh 4:44Aka owaco ni, “Adieri awaco riwin, jatuci wac Were kijol maber i piny pere won. 25#1 Kerin 17:1Adieri awaco riwin, mon tho onwaŋo jomore i Isiraili i ndir pa Elia, munyo polo ocegere oro adek gi dwe aucel, aka kec obedo i piny gipi. 26#1 Kerin 17:8-16To k'oor Elia bongi kad'acel kwoŋ jono, to oor go bongi citho ma Zarefath, denge i tindi ma Sidon ayin. 27#2 Kerin 5:1-14Odoko i ndir pa Elisa jatuci wac Were, onwaŋo jodhowo jomore i Isiraili, to ongoye kad'acel kwoŋ jo m'obothi, kwanyo woko Naman Jasiria denge ayin kende.” 28Munyo jowinjo gime, dhano je keme omako i kalamo pa Joyuda. 29Joay jowodho go i tindi, to jotero go dho thengi tendere m'oger'iye tindi pajo munyo joyenyo dhiro go wofodere piny. 30To go oluwo gi dier jo to kadho rigin.
Nyatoro ma nigi cuny m'ocido
(Mar 1:21-28)
31Gikenyo Yesu okidho Kapernaum, tindi ma iy'adec ma Galili. Go ofonjo ji kenyo i ndelo ma Sabato; 32#Mat 7:28-29aka jouro fonji pere, rupiri wac pere oyido nigi meni. 33To i kalamo pa Joyuda no onwaŋo nitie nyatoro man gi cuny m'ocido mapa jwogi kwoŋe. Ŋato okoko gi derino madwoŋ ni, 34“Iyenyo timo aŋo gi wan, Yesu Janazareth? Ibino reyo wan woko? Aŋeyin, in Ŋataleŋ pa Were.” 35To Yesu oay kwoŋe ka waco ni, “Liŋi, aka woki woko kwoŋ go!” Aka munyo jwogi no otieko redho ŋato piny i dier ji, owok kwoŋe ma k'otimo rigo raco moro. 36Ji je jouro swa aka wegi jocako luwo kendi gin ni, “Me wac aŋo? Go riemo woko cuny m'ocido gi maker gi meni to jowok awoka!” 37Aka wac ma mako kwoŋ Yesu onyay kamoro je iy'adec no.
Yesu botho ji mathoth
(Mat 8:14-17; Mar 1:29-34)
38Yesu oeye i kalamo pa Joyuda no, to donjo i ot pa Simon. I hongo no or Simon madhako oyido two, kwoŋe oowere. To jokwayo Yesu ni wokonyi go. 39Yesu ocungo kabuti dhako no to kwero two no bedo kwoŋe, to two weyo go. Piyo piyo no won to dhako no ay malo to cako rweyo jo. 40I hongo no munyo waŋceŋ kidho podho, ji je m'oyido jonigi joma two kiti two m'opokere opokere, jokelo jo bonge to Yesu ketho cinge kwoŋ jo to joboth. 41Jwogi jowok kwoŋ ji mathoth ka joywak ni, “In, i Wod Were!” To go oay kwoŋ jo to cero jo luwo, rupiri oyido joŋeyo ni go Kristo.
Yesu fonjo i Yuda
42Munyo piny oyawere, Yesu oeye kenyo to kidho kama ji jongoy'iye. Ji jorango go to jobino bonge, kendo oyido jokimiti ni go wowey jo; 43to go owaco rijo ni, “Aripo fonjo Wac Manyen Maber ma Ker pa Were i tindi man bende; kole me a gim'okelan.” 44Aka ofonjo i kalamo ma Yuda i piny no parom.
Dhopadhola DC Bible © Bible Society of Uganda, 2018.
