Yohana 8
8
Dhako m'omak munyo timo cot
1[To Yesu okidho wi got ma Oliv ayin. 2Yawere mere odikin, aka go ogik i Ot pa Were. Lwak ji gibe ocokere othoko go, to go bedo piny to cako fonjo jo. 3Gikenyo jondiko kodi Jofarisayo jokelo dhako m'omak munyo timo cot, to joketho go wocungi ruwaŋ ji je. 4Aka jowaco ri Yesu ni, “Jafonji, dhako me owok nwaŋo munyo timo cot won. 5#Jolevi 20:10; Cik 22:22-24Kole i Cik mawan Musa owodho or ni dhako ma pameno ripo wogoyi gi telin wotho. Onyo pama, iwaco aŋo?” 6Jowaco ama ma ciko go, ŋey jowokethi kwoŋe banja. To Yesu luŋere piny to ndiko i lowo gi lwete. 7Munyo jocungo kenyo aka oyido fodi jomedere gi penji pajo, Yesu oay malo to waco rijo ni, “Ere nyatoro moro je kwoŋ win ma fodi k'otimo gimarac ama wopen bolo tele kwoŋe.” 8Gikenyo go oluŋere piny kendo to ndiko i lowo. 9Munyo jowinjo gino joje jocako kwalok, acel acele, cako kwoŋ jomadongo. Joweyo Yesu kenyo kende, gi dhako no munyo ocungo kenyo. 10Go otiŋo waŋe malo to waco ri dheno ni, “Dhakodwoŋ, nikune jo? Ongoye ŋata thumo rin banja be?” 11Go odwoko ni, “Ongoye, jadwoŋ.” Yesu odwoko ni, “Onyo abende ak'othum rin banja. Onyo kadhi rin, to ikiri doko itimi reco.”]
Yesu a lero ma piny
12 #
Mat 5:14; Yoh 9:5 Yesu odoko oluwo gi jo ni, “Abedo lero ma piny; ŋata luwan bino bedo gi lero ma kelo kwo aka k'owothi i mudho.” 13Jofarisayo jowaco rigo ni, “Kole onyo eno iluwo yuthenge perin iwon; kere gim'iwaco onyo k'obedo adieri.” 14Yesu odwoko ni, “Be, kad'awon aluwi yuthenge paran je fodi gim'awaco otire, rupiri aŋeyo kam'awok'iye kodi kam'akidh'iye. 15Withumo ri ji banja gi rieko ma nyadhano; to an akithum ri nyatoro banja. 16To kada bedi athum banja ri nyatoro, je di thumo paran obedo mar'adieri, rupiri akinitie kendan i gime; Baba m'ooran nitie kodan. 17#Cik 19:15Ondiki i Cik mewin ni ka jokony ario joyere i wac moro, gima jowaco bedo adieri. 18Aridho adieri ma mako kwoŋan won, aka Baba m'ooran bende ridho adieri ma mako kwoŋan.” 19Jopenjo go ni, “Benin nikune?” Yesu odwoko ni, “Wikuya an kosa Baba. Bedi wiŋeyan di wiŋeyo kiri Baba bende.”
20Yesu owaco gime je munyo fonjo i Ot pa Were, dho tielo kam'ikan'iye lim. Aka ongoye ŋat'omako go rupiri ndir pere oyido fodi k'otundo.
Wikinyal kidho kam'akidh'iye
21Yesu owaco rijo kendo ni, “Abino kadho ran; aka wibino rangan, to wilatho i reco mewin. Kam'akidh'iye wikinyal tundo.” 22To Joyuda jowaco ni, “Ka go waco ni wakinyali kidho kama go kidh'iye, dwoŋ mere nike go ladere wotho?” 23Yesu odwoko ni, “Win wicakere i piny, to an awok malo. Win ji ma piny ka, to an a ki dhano ma piny ka. 24Am'omiyo awaco riwin nike wibino tho i reco mewin. Aka wibino tho i reco mewin rupiri wikiyey nike, ‘An ago ma atuco riwin.’ ” 25Gikenyo jopenjo ni, “In a ŋa?” Ana Yesu ni, “Gim'atieko waco riwin wok con. 26Gigipiny dit m'aripo waco riwin odoko wac thoth m'aripo kelo kwoŋ win. To ŋat'ooran, obedo jar'adieri, aka awaco ri piny gim'awinjo wok bonge.”
27Jok'onyalo niaŋ nike go oyido luwo rijo kwoŋ Bamere. 28Gikenyo Yesu owaco rijo ni, “Ka witieko ŋawo malo Wod Dhano nyaka wibino ŋeyo ni, ‘An ago.’ Wibino ŋeyo nike akitim gimoro gi wi tungan, t'awaco gima Baba ama ofonjan. 29Aka ŋat'ooran nikodan, k'oweyan kendan, rupiri ndir je atimo gima sangala go.” 30Jomathoth ma jowinjo Yesu munyo waco gigipiny me joyeyo go.
Joma ni siem kodi jom'obedo ŋecin
31Gikenyo Yesu owaco ri Joyuda ma joyeyo go ni, “Ka wiwinjo fonji paran to wicwir'iye meno wijofonjirok paran adieri; 32wibino ŋeyo adieri, aka adieri no bino miyo wibedo i siem.” 33Jodwoko ni, “Kole wabedo nyikway Abraham, kendo fodi wakibedo ŋecin pa nyatoro, odoko iwaco nedi n'ibino loko wan joma ni siem?” 34Yesu owaco rijo ni, “Adieri awaco riwin, moro je ma timo gimarac meno ŋeca pa gimarac. 35Ndiri je ŋeca kibedi japeco; to nyathi anywola ama ndir je bedo japeco. 36Ka Wod Were omiyo win siem, wibino bedo joma ni siem adieri. 37Aŋeyo nike wibedo nyikway Abraham. To kad'ameno je fodi wirango nekan, rupiri wikiyey jolo fonji paran. 38Aluwo kwoŋ gima Baba onyuthan, to win witimo gima bawin owaco riwin.”
39Gikenyo jodwoko go ni, “Bawan obedo Abraham.” Yesu odwoko ni, “Bedi adieri winyithindho pa Abraham, di witimo gima cango go otimo. 40To an ma awaco riwin adieri ma awinjo bongi Were, ama je fodi wimito nekan. Kole Abraham k'otimo gima cale ameno! 41Adieri witimo gima bawin otimo.” Jodwoko ni, “Wakibedo nyithindho madudi. Wanitie gi Bawan acel kende, Were won gipi.” 42Yesu owaco rijo ni, “Bedi Were a Bawin adieri, di wimaran, rupiri awok bongi Were aka onyo an ka. Akibino gi wi tungan, to go ama ooran. 43To raŋo ma wikiniaŋ gim'awaco? Obedo rupiri wikimiti winjo fonji paran. 44Wibedo nyithindho pa bawin, jwogi, aka wimito timo gima bawin no yenyo. Wok con go oyido janek, fodi go k'obedo yuthenge mar'adieri, rupiri adieri ongoye i go. Ka go twodo meno go timo gikula pere won, rupiri go jatwodo aka go a ba jotwodo je. 45To rupiri awaco riwin gir'adieri am'omiyo wikiyeyan. 46Ŋa kwoŋ win manyalo nyutho ni atimo gimarac? To k'inen awaco gir'adieri raŋo ma wikiyeyan? 47Ŋata wok bongi Were winjo wac pa Were. Gim'omiyo wikiyey winjo wac paran, obedo rupiri wikibedo apa Were.”
Yesu kodi Abraham
48Joyuda jopenjo Yesu ni, “Kere wakitire munyo wawaco nike in i Jasamaria aka jwogi ni kwoŋin?” 49Yesu odwoko ni, “Angoye gi jwogi moro je, aworo Baba, to win wikiworan. 50Akirangi dwoŋ paran awon, to nitie Ŋata rango aka ama bino bedo jathum banja. 51Adieri awaco riwin, ni ŋata winjo fonji paran kilatho.” 52Joyuda jowaco rigo ni, “Pama onyo nyaka waŋeyo odoco nike initie gi jwogi. Abraham kodi jotuci wac Were jotho, aka odoko iwaco ni, ŋata winjo fonji perin kilatho. 53Onyo iwaco nike idwoŋ loyo Abraham Bawan m'otieko tho. Aka jotuci wac Were bende jotho. Iparo nike in iŋa?” 54Yesu odwoko ni, “Bedi awon amiyere dwoŋ, dwoŋ paran dinyo ongoye gimoro. Ŋata miyan dwoŋ manago Baba, ma wilwoŋo ni Were mewin. 55Kole fodi wikiŋeyo kiri go, to an aŋeyo go aka awinjo wac pere. Bedi awaci ni akuya go, d'abedo jatwodo paka win. T'aŋeyo go aka awinjo wac pere. 56Bawin Abraham osangala nike oyido laneno ndelo paran; oneno aka osangala.” 57Joyuda jowaco rigo ni, “K'inen fodi ikirom kada oro piero abic, am'iwaco ni itieko neno Abraham?” 58Yesu odwoko ni, “Adieri awaco riwin, mafodi k'onywol Abraham oyido anitie.” 59Ro meno jodimo telin ma goyo gine go to go opondo to eye i Ot pa Were.
נבחרו כעת:
Yohana 8: DHOPE
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Dhopadhola DC Bible © Bible Society of Uganda, 2018.
