Yohana 7
7
Yesu kodi wutmin
1Rumacen, Yesu owotho yu Galili; ato k'omito kidho Yuda, rupiri Joyuda oyido jomito neko go. 2#Jolevi 23:34; Cik 16:13Ndelo ma kalima pa Joyuda m'ilwoŋo ni ma Wema pa Were onwaŋo orikere cegin. 3Riameno wutmin Yesu jowaco rigo ni, “Eye ka ikidhi Yuda, aka nyaka jofonjirok perin jobino neno tic m'itimo. 4Ongoye ŋata pano tic ma go timo ka mito nike woŋeyere maber. Paka itimo gigipiny me, onyo weyi piny gipi woŋey.” 5(Kada wutmin go bende oyido jok'oyeyo go). 6Yesu odwoko jo ni, “Ndiri paran m'otire fodi k'otundo. To riwin hongo je ripo. 7Ji ma piny kinyal dak win, to jodakan, rupiri amena waco rijo nike tim pa joreco. 8Wiwegi kidhi win i kalima no, akibino kidh'iye, rupiri hongo paran m'otire fodi k'otundo.” 9Owaco rijo ameno to bedo i Galili.
Yesu i Kalima ma Kayindi
10Munyo wutmin jotieko kadho i kalima, Yesu bende okidho nyaliŋliŋ. 11Joyuda onwaŋo jorango go i kalima no. Jopenjo ni, “Nikune jalago?” 12Mwoŋo madit obedo kwoŋ go i dier lwak ji. Jomegi jowaco ni, “Kole go dhano maber.” Joman ni, “Be, go komo wiy ji.” 13To ongoye ŋat'oluwo kwoŋe kamaler rupiri oyido jolworo Joyuda.
14Kalima oyido ni diere kama pek to Yesu kidho i Ot pa Were to cako fonjo. 15Joyuda jobedo gi dhier madwoŋ, ka jowaco ni, “Ŋatin oŋeyo gigipiny kweth ama nedi ma to go k'ofonjere kada?” 16Yesu odwoko ni, “Gim'afonjo k'obedo aparan won, to wok bongi Ŋat'ooran. 17Ŋata yeyo timo gima Were yenyo bino ŋeyo k'agima afonjo wok bongi Were kosa ka aluwo gi meni paran won. 18Kole ŋata luwo gi meni pere won temo miyirok dwoŋ. To ŋata mito dwoŋ ri ŋat'ooro go meno otire, aka ongoye gi twodo i go. 19Musa omiyo win Cik, k'ameno? To kole ongoye kada ŋat'acel kwoŋ win ma mako Cik no. Raŋo ma wiyenyo nekan?” 20To ji jodwoko ni, “In gi jwogi kwoŋin! Ŋata yenyo nekin ŋa?” 21Yesu odwoko ni, “Atimo gimoro nyaka acel won to wijoje widhier. 22#Jolevi 12:3; Cak 17:10Musa ooro win thumirok (k'obedo Musa to kwarere pajo ama jocako), to kole withumo dhano kiri i Sabato. 23#Yoh 5:9Onyo ka nyathi majayac ithumo i Sabato ma kitur Cik pa Musa, raŋo ma wimako nge kodan ni rupiri abotho dhano to bedo maber i Sabato? 24Wikiri witer wac moro cungo kwoŋ nyaka gima nenere gi woko, to kutho wiripo niaŋ tiendi wac m'otire.”
Yesu a Kristo?
25Wok i hongo no ji moro ma Yerusalem jowaco ni, “Me k'aŋata jor'adhum joyenyo neko? 26Neni! Kole go ee luwo i dier ji, aka ongoye kiri ŋata luwo kwoŋe. Kosa jotel joŋeyo nike go a Kristo? 27Kole waŋeyo kama jame wok'iye, ma to ka Kristo obin, ongoye ŋata laŋeyo kama go wok'iye.”
28Munyo Yesu fodi medere fonjo i Ot pa Were, owaco gi dwonde ma malo ni, “Wiparo ni wiŋeyan, aka wiŋeyo kiri kama awok'iye? To kole akibino ka gi meni paran won. Aka ŋat'ooran obedo jar'adieri. Wikuya go, 29to an aŋeyo go, rupiri awok bonge aka go ama ooran.” 30Gikenyo jotemo mako go, to ongoye ŋat'oketho cinge kwoŋe, rupiri ndir pere oyido fodi k'otundo. 31To kad'ameno ji mathoth i dier kitipa no joyeyo go, aka jopenjere ni, “Ka Kristo obin, otim tic madongo loyo ma jalin otieko timo?”
I oro jolweny mako Yesu
32Munyo Jofarisayo jowinjo ji madit jomwoŋo gigipiny me kwoŋe, jo kodi jotel pa jocway ri Were i wi migam jooro jolweny ma Ot pa Were mako Yesu. 33Yesu owaco ni, “Abino bedo gi win hongo macek, to agik bongi ŋat'ooran. 34Wibino rangan to wik'onwaŋan; aka kam'akidh'iye wikinyal tundo.” 35Joyuda jopenjere wegi kendi gin ni, “Jame cegin kidho kune kama wakinyali nwaŋ'iye go? Kosa go lakidho yu tindin ma piny pa Jogris kama ji mawan man jonitie i iye? 36Go waco ni wibino rangan to wikibino nwaŋan, kendo ni, ‘Wikinyal tundo kam'akidh'iye.’ Gime dwoŋ mere aŋo?”
Pi ma mol ma kelo kwo
37 #
Jolevi 23:36
Ndelo macowe ma kalima am'obedo ndelo m'oloyo dwoŋ. I ndelo no, Yesu ocungo to luwo gi dwonde ma malo ni, “Ka nitie moro je ma riyo neko wobin bongan womadhi pi, 38#Eze 47:1; Zek 14:8paka ondiki ni, ‘Moro je ma yeyan, pi ma mol ma kelo kwo makirum bino mol wok i cunye.’ ” ( 39Yesu owaco ama kwoŋ Cuny Maleŋ ma joma joyeyo go oyido jolalimo rumacen. I hongo no Cuny Maleŋ oyido fodi k'omiy ji, rupiri Yesu oyido fodi k'otiŋ malo i dwoŋ.)
Tiakirok i dier ji
40Ji megi kwoŋ jono jowinjo go munyo waco gime aka jowaco ni, “Ŋati me obedo jatuci wac Were adieri!” 41Joman jowaco ni, “Jame won a Kristo.” To joman jowaco ni, “Kristo nyalo wok nedi i Galili. 42#2 Sam 7:12; Mika 5:1K'ondiki ni Kristo bino bedo nyakwar Daudi, aka ibino nywolo go i Bethelehem, tindi pa Daudi?” 43Gikenyo tiakirok obedo i dier jo kwoŋ wac ma ŋeyo go. 44Joman oyido jomito mako go, to ongoye ŋat'oketho cinge kwoŋe.
Jotel pa Joyuda jokwero yeyo Yesu
45Jolweny jogik bongi jotel pa jocway ri Were i wi migam kodi Jofarisayo, ma jopenjo jo ni, “Raŋo ma wikikelo go?” 46Jolweny jowaco ni, “Ongoye ŋata fodi oluwo paka jame luwo!” 47Jofarisayo jopenjo ni, “Nyutho ni go onyo otieko miŋo win bende, k'ameno be? 48Nitie megi kwoŋ jotel mawan kosa Jafarisayo moro ma bende jotieko yeyo go? 49To lwak ji me, paka jokuya Cik pa Musa onyo kole Were okwoŋo jo!” 50#Yoh 3:1-2Acel kwoŋ Jofarisayo no m'obedo Nikodemo m'oyido otieko kidho neno Yesu con, openjo jowote ni, 51“Kere ti Cik mawan yeyo wan thumo banja loyo dhano mafodi wakiwinjo wac pere to waniaŋ gima go otimo?” 52Jodwoko ni, “Kere ibende iwok yu Galili? Fonjere ye Ndiko Maleŋ, aka inoniaŋ ni jatuci wac Were ongoye ma wok Galili!”
53Gikenyo dhano je odok peco pere.
נבחרו כעת:
Yohana 7: DHOPE
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Dhopadhola DC Bible © Bible Society of Uganda, 2018.
