Matteyo 11
11
Eyak Sayyo Hunyia Ifak Yoane Etifuotoni Batisimo
1Ninyia atuhok Yesu eramana ettiyenita hunia jio lejifak honyi hula 'tomon harrihai, ette inyi idiaharu amaji nyia, ette leten ittiyenio buo fe ittittoyo iborejin gala hunnomuk hutto Yudea.
2Ninyia itaniŋu Yoane Etifuotini Batisimo to babus erre hunyia ihanio Kristo, ette inyi ifahina omuk lejifak honyi, 3ifiyere inyi jiojio, “Eramak hohoi, iyye soho alia linyia ojio Yoane jio olo adi ittuna, kuyya etila 'tadi hohoi obo atulo hama?”
4Itarraŋ nyia Yesu jihosi, “Acahatti, ifuatta iramana Yoane erre hunne itaniŋuna itai buo fe igonyuna: 5amijie aŋodok, adahai aŋurak, italibori aati hullo owoni 'to iko aŋuai belelio, itaniŋie attuhok, itubuhuni ayaak, buo fe ittiyenie Asayyo Ayijok jio alociaŋak. 6Hotomunohi hia hullo obeŋi 'to okuayai eram hoŋ.”
7Ninyia acaharai lejifak Yoane, ette Yesu ikiana jio eluluŋ waati te eram Yoane jio: “To ninyia ifuatti itai jio Yoane ihidiofo, iwahata nyia itai igonyuna anyio? Afarawati onno ohucio oyyami? 8Ifuatta nyia itai imijio anyio? Atulo elle ihum 'to iŋata? Aati hulla aŋatai 'to ihuo nyia, itoŋoi ihaŋitek hobuok! 9Eramana ani, ifuatta nyia itai imijio anyio? Ekianani Hollum? Aafe hode, ati igonyuna itai atulo alla agalik 'to ekianani Hollum. 10#Luk 16:16Yoane ollo ojio abuk Hollum jiojio, ‘Ojio Hollum, efak adi ni eyani sayyo hoŋ to osiere hoi, oŋida ihuhumak ekoi hoi.’ 11Hode, eramak ni itai jio, jio aati hutta fau 'daŋ, hobeŋ obo odetuno alla agalik Yoane etifuotoni Batisimo. Ati Ilobie ettedou, inyiak atulo asai igalihina Yoane. 12Itterio jio oŋitek hunyia ittittoyere Yoane etifuotoni Batisimo many iko ahana, ittigemie Olobie ettedou onno orroho, buo aŋerejak awahi ihoruna inyi ta agolon. 13Many to oŋitek huno Yoane, ikianai nyia ekianak Hollum iko efahita Mose 'daŋ te eram ono Nolobie. 14Buo elle iruhoto itai eram ania, ara Yoane luŋa Elija inyia ojiori ottu adi. 15Itayiriete, ollo owoni ayyaha jihatai!
16“Etarrijohi adi ni aati hula ahana iko anyio? Arai isi ihuo aduri hulla abalai 'to isuk buo illilloŋoi ahuattek hosi jiojio, 17‘Ehutak hohoi aatar jihatai, ati ibiaŋata itai ihiati. Edol hohoi afureta tuari buo itai ibiaŋata iyyooti!’ 18Ottu nyia Yoane ollo oferutta buo fe obeŋ amata afino, buo isi ojiori, ‘Owon inyi iko aminiaŋati!’ 19Ninyia attu Lonyi Tulo ollo oŋiyo buo fe amata, buo fe isi 'daŋ ojiori, ‘Ike imijata atulo alia, ara alaŋaru buo fe aharumani, amotte hèddudduhak musuru iko eyyak!’ Ati omijani aati jio obisi ofioro Hollum te erre hunne ihanie to ofioro honyi.”
Aborejin Gala Hunno Obeŋi 'to Iruhi.
(Luk 10:13-15)
20Attati Yesu ikiana onno ogol jio aati hutto borejin gala hunyia ihaniere inyi eduariti honyi arriai, nyio obeŋi nyia isi idehini eyyata hosi, ette iŋerejianio jihosi ette jiaran, 21“Orroho adi bebe jihoye Korasin! Orroho adi bebe jihoye Besseyida, nyio hara nyia ihanie eduariti, hunyia ihanie jihatai, iborejin gala Taya iko Sidon, ŋa nyia isi idehini eyyata hosi berien, ette iyyafana asuwali buo fe opuri ahuattek te enuara itahutaniere jio eha isi eyyata hosi! 22Ati, eramak ni itai jio, to Oloŋ ono Aŋocio Hiram, obolo adi amehino Hollum jio Taya iko Sidon agalik amehino honyi jihatai. 23Buo jihoye Kapernaum! Iwak iyye ikaf ahuan hoi many idou? Ati ibirori adi iyye many Imaji Hayak! Hara nyia ihanie eduariti hunyia ihanie jihoi, ibore gala Sodom, ŋaduo inyi hodulo many iko ahana. 24#Mat 10:15; Luk 10:12Ati eramak ni itai jio, Iholoŋ ono Aŋocio Hiram, obolo adi amehino Hollum jio Sodom agalik amehino honyi jihoi!”
Ifuanna Oyiriata Jihoŋ
(Luk 10:21-22)
25Teya, ette Yesu jiaran, “Monye, Lamonye olo edou iko olo afau! Ajio ni jihoi humo te edimana hoi erre hunia jio alofiorojok iko jio hulle iheni 'to, buo iyye itte itahutana jio aati asai. 26Aafe, Monye, ara inyi ihuo iwak nyia iyye.
27 #
Yoa 3:35; Yoa 1:18; 10:15 “Isiarak Monyoŋ erre 'daŋ jihoŋ. Obeŋ obo omijak ŋai Lonyi, arari fe Monye hama, buo fe obo obeŋ omijak ŋai Monye arari fe Lonyi hama, iko hia hullo onyimu Lonyi itahutaniere ŋai Monye.
28“Ifuanna jihoŋ, itai 'daŋ hulle ifutoti 'to iko egemita hunno oddiŋi 'to, esio adi ni itai ayiri. 29Atarana eyeni hoŋ, ittiyenuna jihoŋ; nyio anyalam ni buo fe atua hoŋ obi. Tania, inyurana adi itai ayiri. 30Nyio, ofiaha eyeni enne esio ni jihatai, buo fe egemita hunne esio adi ni jihatai itawahai.”
נבחרו כעת:
Matteyo 11: EA2003
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© The Bible Society in South Sudan 2003
