Luglaa 6
6
Nii sui wia
1Newea n faa wa wazɛɛ su durnya, di ra lul biihaana, 2Kɔraawiizi biibaala na a biihaana, di ba wesso, ba lizi banla banna nyiŋŋi di ɛɛ ba haana. 3Denii Kɔraawiizi ŋɔ, “Màá gil n Duma du newee ni di hanna la. U ɛɛ kunsiuliirɛ. Di haŋ lii zinaa di ra la, nɛr maa wàá ka di binni bɛri binni kalfa ni tokko.”
4A saŋa ani saŋa bɛl n wa helle, Nɛfilim#6:4 Nɛfilim zɛɛrɛ Nɛkpabaazi. faa du durnyaa. A saŋaa Kɔraawiizi biibaala ni newea biihaana faa lul biizi, ba hel kpabaa. Baabuu faa ɛɛ kpeglega di dɔɔ fɔŋŋa nɛr maa zum ba wia, di lii a saŋa di wa hel zinaa.
5Kɔraawiizi binni di na, di nɛra wichɔgaa kannɔ ba ni werge, nfɛrchɔgaa ni biinikpola bɛnnɛ ba faa dɔɔ. 6U biini faa chɔg werge maa, dikuu uŋ ma baa, ba du a hɛri hiŋ wia. A ra wii u ni. 7Denii u ŋɔ, “N daŋ chɔgi a nɛra naa maa miŋ tawɛɛ naa, sela, zumbizi ani kuna la maa miŋ tawɛɛ, dikuubɛɛwiai, n biini bittɔɔ chɔgi dikuu miŋ ta a maa wia.” 8Ama, Noowa waa wia faa par Kɔraawiizii.
9Noowa de dui saŋa wiarɛ keŋ.
Noowa bɛnnɛ faa ɛɛ nɛr la wia n deŋlee Kɔraawiizi be, u de dui saŋa. U faa ra hiŋ Kɔraawiizii. 10U biibaala faa du bahoro, baabuu faa Sɛm, Ham ani Jafɛf.
11Di lii u har, nɛr maanii faa ɛɛ wichɔgɛɛri Kɔraawiizi be. A hɛri maa faa su ni naari ani wichɔgaa maa ni a dizi. 12Kɔraawiizi faa binni a durnya, di waa wer, dikuubɛɛwiai, nɛra la maa n faa du de a saŋa hiŋ, dɔɔ machɔgaa ni biinikpolaa werge maa. 13Denii Kɔraawiizi ŋɔ Noowa be, “N daŋ tuŋ newea ni ba dee maa. N daŋ chɔgi ba maa nyaamm, dikuu ba naari ni ba wichɔgaa werge maa wia. 14Awia, nyiŋŋi daananaa di kuari muugberzenzeŋ bɛl, í wer di ra zuu u biini lugɔ dia. Nyiŋŋi kotaal ham u biini ni u harbɔɔ maa nɛnnɛ. 15Kuaruu, u jaŋzi ɛɛ lugɔ nogumzi kalfaahoro, u wassi ɛɛ nogumzi tokkoanɛɛ ni fi, u chiŋ laŋaa ge ɛɛ tokko ni kpɔrgɔ. 16Di kuari kuŋ tɔ u nyuu lugɔ sal, di gil u yeŋ tinni chiŋ lugɔ nogume. Di kuari gbera di du u keŋkere. Kuaruu, ú ɛɛ diini ahoro di hɔŋzi dɔŋa ni. 17N daŋ gil nii wa su hɛri naa maa, kunnyinee maa siu. 18Ka mìŋ́ Kɔraawiizi daŋ gil nuukpaŋ la n nii n dɔɔwɛ la chi nɛnnɛ. Kpogli i haaŋ, i biibaala ani ba haana maa zuu a gbera biini. 19Lauri kunnyinee maa ni a dizi anɛɛgaa, u bal ni u niina, á du i be di gilɛɛ waa siuzi. 20Lauri zumbizi ni a dee maa, sela iri maa ani kuntuuzaa ge gba maa iri maa, á du i be, di gilɛɛ waa siuzi. 21Nyiŋŋi diwee maa iri du a gbera biini, á ɛɛ ii ni a sela maa diwee.”
22Noowa faa ɛɛ gunla maa Kɔraawiizi n bagluu la.#Hib 11:7
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.