Luglaa 7
7
A nii sui wia
1Denii Kɔraawiizi jaa ŋɔ Noowa be, “Í ni i diahina maa zuu a muugberzeŋ biini. N nawɔɔrɛ lugɔ ii bɛŋ wiarɛ deŋlee a hɛri naa maa biini. 2Lauri senanaa la n waa doŋŋe, a bala ni a niinazi anɛɛgaa bɔra aniidaanɛɛ, di kaa lauri anla maa n kawɛɛ anɛɛgaa, á ɛɛ a bala ni a niinazi. 3Lauri zumbizi ge maa ni a dizi anɛɛgaa, a ge ɛɛ a bala ni a niinazi bɔra aniidaanɛɛ di jaa. I daŋ ɛɛ guŋ, a maa ni a dee kaa wa wer wazi, di kaa su hɛri maa. 4Keŋ hɔpizaa aniidaanɛɛ, n daŋ gil dooŋ chi a saŋa di ba guŋŋ hamuŋzi ni hɔpizaazi tokkoanɛɛ. N daŋ dim kunnyinee maa miŋ tawɛɛ, hɛri naa biini.”
5Noowa faa kaa ɛɛ gunla maa Kɔraawiizi n bagluu la.
6Binni kalfaanumbɛllɛ Noowa faa di, ka Kɔraawiizi gil durnya maa su nii di chɔgi kummaa n du u ni. 7U ni u haaŋ ni u biibaala ani ba haana bɛnnɛ faa zuu a muugberzeŋ biini, a nii gilɛɛ waa di baa.
8Sel maa ni u dee, u bal ni u niina, anla n waa doŋŋe ni anla doŋŋe maa, ani zumbizi ni kuntuuzaa gba maa ni a irizi 9maa ba Noowa be, di wa zuu a muugberzeŋ biini, gunla Kɔraawiizi n bagluu la. 10Ba faa du a muugberzeŋ biinii yawa bir, ka a nii haa ba di wa su a hɛri maa.
11Noowa n wa di binni kalfaanumbɛl, a baagu anɛɛhiŋ hɔpizaa fidaaniidaanɛɛhiŋ hɔl, niiri maa n du hɛri zɛɛ pogzi. 12Donii ge bizi, di ba guŋŋ hamuŋzi ni hɔpizaazi tokkoanɛɛ.
13A hɔl hiŋ maanii Noowa, u haaŋ ani u biibaala Sɛm, Ham, ani Jafɛf ni ba haana zuu a muugberzeŋ biini. 14Pir sela, kundɛɛzaa, kuntuuzaa, zumbizi ani kunzaahra maa, 15kunnyinii maa dee, u bal ni u niina maanii faa du a muugberzeŋ biini, di jaa Noowa ni, 16gunla himmaa Kɔraawiizi n ŋɔwɛɛ la. Denii Kɔraawiizi faa tɔ a muugberzeŋ dominua.
17A dooŋ faa ballɔɔ guŋŋ hɔpizaa tokkoanɛɛ. Nii faa su hɛri maa, a muugberzeŋ zaali a nii nyuu. 18A nii faa kaa kuari su di du luŋ werge maa di jaa, a muugberzeŋ faa jaa zaali. 19U faa suwoore werge, di wer tɔ bizenaa la maa n la chiŋ zelele werge maa ni. 20Haali u faa su, bizenaa nyubaana niiri luŋzi faa ɛɛ lugɔ nogumzi fidaanue. 21Kunnyinee maa ni a dizi n du hɛri biini faa siuzi. Zumbizii, kundɛɛzaa, kunzaahrijigzi la maa ani newea maanii siuzɛɛ. 22Kunnyinee maanii faa dimme. 23Kunnyinee la maa n faa du hɛri maanii faa dimme, newea, sela, kuntuuzaa ani zumbizi maanii faa dimme lii hɛri. Noowa ni u diahina ni sela ni zumbizi la n faa du a muugberzeŋ biini la bɛnnɛ faa kawɛɛ, di dɔɔ miibɔɔ.
24A nii su werge maa hɛri maa guŋŋ hɔpizaa kalfa ni tokkoanɛɛ ni fi.
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.