APOSTELNYU THO 7
7
Stefan Senkethyü Jo
1Tsükatsü peshükeda dan le a-ka, “Jo tsüdan tsü ketsin mon?” tson-o a-ketsoshü.
2Tsüselo a-le, “Apvünyu dan, lo apepvünyu ju. nyülo ta. Npvü Abraham le gungü Haran nyu kebin mhundyü Mesopotamia nyu kehü ka zankechwi kethyü gü Sunggigü le a-ka gunryüo hon tse zo, 3‘Nle n kazü lo ntsipwen dan nrhi chwiryülo nye; tson-o ale kazü nme tsin pe nzenshü tile, tsünyu tsü gunlo chi!’ tsonshü. 4Tsontsin a-le Kaldianyu lojvü nyu tsü tinchwio gungü Haran nyu binlo; tsüselo tsünyu a-pvü le sila ntsin Sunggigü le a-nikela pe hagun le ntso ntsenyü bin kehü nyu hi shüla. 5Ai Sunggigü le kazü a-jün phachwin nme-e thothü pe a-tsü shü mvu; lo tsükatsü le a-le a-nyenyu-e ndie Sunggigü le kazü higü hi khipe a lo a-tsipwen nyu no gwen titse kethyü zo pe bin njü. 6Tson-o a-tsipwen nyu dan no gungü shakemvu lojvü ki yhun titse kethyü lo anyugun no chen tsizi me dothyüo meno anyugun nshwen titse kethyü Sunggigü le zoshü. 7Sunggigü le zo kethyü le, tson-e mele anyugun ten pe anyugun do kethyü a-le tsüdan nmu ti. Lo tsüsiki anyugun le nichwiryüo bin hinyu hi a-lothyü ti; tson-o zo njü nyo. 8Lo Sunggigü le gikerü jvü khi pe a-tsü, tsüselo Abraham le a-nyugü Isak hyulo, lo Jakob ge nbon nyu anyugun mi tseryü kenyhun che dan hi no yhun soryülo.
9“Lo nbon nyu tsüdan le Josef tsü shwi pe anyugun yhüthyü la njüo a-jwen pe Ijipt lojvü ki shüla, ai Sunggigü le a-zen hü. 10Tson-o kenjün kethyü aphu ka-e a-kenilo; tson-o Ijipt kazü nyu a-no a-keso pvülo, lo thakesha pe a-tsü; tsügenyu Faro le a-thyü pe a-no Ijipt kazü aphu, lo a-ka aphu soe Ahng gü thyü. 11Lo tsükatsü Ijipt lojvü lo Kanan lojvü aphu nyu chenda le ryüo, temi no kenjünthyü sa. Tsügenyu nbon nyu dan tsüle anyugun ketyüketsü hyulo mvula. 12Ai Ijipt lojvü ki shye jwen bin tsekethyü Jakob le shalo njüo a-le nbon nyu dan nipe Ijipt nyu shü terishü. 13Tsüselo Josef le a-tsagü sikezen nyu dan no a-shalo. Tsüntimvule Josef le Faro ko no a-shvu a-nye dan le kebin shalo. 14Tsüselo Josef le a-pvü Jakob lo a-shvu a-nye aphu mi hentsenyüo pvün dan tsü ko zen-o a-ki gunryüla. 15Tson-o Jakob le Ijiptnyu lojvü ki nshye-o a-ko lo nbon nyu dan-e tse tsünyu si küla. 16Lo meno anyugun mi pen-o Shekem nyu gungü Abraham le Shekem nyu Hamor nyenyu ju ka Pisa pe a-min thyüo hei pe bin kenjü sika gü nyu shüla.
17“Ai nduka Sunggigü le Abraham ka zoshwi pe bin kenjü tsügwünkho ti gunzhü ntsin, temi tsüdan le Ijipt lojvü nyu yhun pe chvü gwen gwen tse soryüla. 18Lo kekhin ki Josef shakemvu raja kecha nme le Ijipt kazü nyu soryü la. 19Raja tsügü le ngun bon nyu tsipwen dan nshwen-o nbon nyu dan no anyugun nyenyu yhunmvu nrün genyu anyugun no anyugun nyenyu nyuhonyu dan tsü pe shwenla lotse sola. 20Tsügwünkho katsü Mosa nnyukelo ka, a-le zegwa sa, lo a-pvü kanyu shyeshen a-leyi. 21Tson-o a-ko a-khipe shwenla ntsin Faro nyugi le a-khilo njüo tsü pe a npvü a-nyu thyü titseo a-leyi lo. 22Lo meno Ijipt nyu thakesha aphu pe Mosa senthyü; tson-o a-le a-joe lo a-thoe tse kvusa.
23“Lo a-le a-keyhun chen henzi mün ka a-le a-npvü gungü Israel nyu nyenyu dan a-pvünyu ju nri kethyü rüchün soryüla. 24Lo tsükatsü anyugun dan nyu temi nme meno a-senye swetsü lo a-nshwen kehü hyulo njüo a-le temi tsügü no pen gungü a-kenshwen gü Ijiptnyu gü dushvu lao a-pvü gü khün zolo. 25Sunggigü le a-genyu Israel nyu dan kenishü titse kebin a-pvünyu dan no shalo ti ado tsekethyü kerüchün genyu. Ai anyugun le tsüe rüchünlo mvula. 26Lo tsüsinyü ko mihvu le kega kebin ka a-le tsühvu ka gunryüo au no kengügwa kelo rüchün-o au ka, ‘Apvünyu hvu, hai le kengü tsagü sikezen gü le la, lo hai le nyuthyüo khinyu khinyu ge hai jvü gwakemvu thyü hü nla?’ tsonshü. 27Ai a-kazongü ge a-jvü gwakemvu gü tsüle Mosa khun kethünla njüo a-ka, ‘Segü le nno ai sokeda nmvue ayi jokekera gü thyülo tse shüla? 28Nle ndu Ijiptnyu gü dushvu kela hontse nle ako a dushvula nyü bin nle?’ tson sola. 29Jo hi shashünjüo Mosa le tin gungü Media lojvü ki yhun tinla; lo tsükitsü a-nyenyu mihvu yhunlo.
30“Tson hüo chen henzi gükela siki tsangge lokethyünyu nme le Sinai kazüthun khoka tehen chvü nyu sanhvu nme ge mah nnyü kebin nme nyu a-tesha shü. 31Lo Mosa le tsü shwi pe a-dunthyü la; tson-o a-le tsü shwishü titseo tsonchü-o a-kho nni npha. 32Lo a-le tsüka Npugü khwen nyülo, ‘Ale nbon nyu dan Sunggigü le nye,’ tsonkethyü khwen nme shalo. Tsüselo Mosa le a-ke nsükhokho tseo nri nshvula. 33Tsükatsü Npugü le a-ka, ‘Npha ge nphaje thola, kechamvule nle kebin kazü gü tsüle nshün kethyü genyu. 34Ale atemi Ijipt lojvü nyu kebin dan kenjün kethyü hyu tsentsü bin laso, lo anyugun le nrashwi kebin-e shalo bin laso; lo anyugun kenilo titseo ale nshyeryü bin nle. Tsügenyu nle ntsoka ngwün ndolo nye, ale nni pe Ijipt lojvü ki shüti,’ tsonshü.
35“Mosa tsügü tsü le mele a-nkhin-o, ‘Segü le nno keda nmvue jokekera nyu thyü lotse shü hü nla?’ tsonkela gü Sunggigü le tsügü tsü nishü njüo a-no senhvu ge a-tesha keshü tsangge lokethyünyue zen sin tseo meso keda lo me kenikelo nme-e thyü sin. 36Temi tsügü tsü le a-npvü Ijipt nyu lo kenhon zida nyu lo tehen nyu chen henzi ndun kethyü tho lo thazansü thyü tseo Israel nyu rhi zen gunryüo ti. 37Lo nduka a-le Israel nyu dan ka, ‘Sunggigü le hagun sikezen nyu dan nyu ahontse kethyü sidyükeshanyu nme no yhun soryü titse kethyü zo njü.’ 38Tsügü tsü le tehen nyu kehü kehun gü lo Sinai kazüthun gü ge a-nthon keshü tsangge lokethyü nyu gü lo npvü nbon nyu dan zen kehü gü tsü, a-khipe ntsü nrün genyu Sunggigü ka nyu kerhün jo hyukelo gwünzin.
39“Ai nduka npepvünyu dan le a-jo zennyü mvuo anyugun le a-kho kezelao anyugun nyun le Ijipt nyu kipon hü tinla. 40Tson-o anyugun le Aaron ka, ‘Nle teromen nme thyüshüo tsüno ngun mhundyü ka hülo chi; kechamvule Mosa, Ijipt lojvü nyu ngun zenchwi keryü gü le, a-le nyuthyüla seyo ngun le shamvu laso!’ tson sola. 41Tson-o tsükatsü anyugun le methu nyu nme thyülo-o tha sen gunryü thamen kezü tsügü rüshvuo anyugun npvü anyugun ben tho tsügenyu anyugun shekerhün thyü so. 42Ai Sunggigü le anyugun khelao anyugun khipe anyugun no tsangge kehü shyenyü dan tsü aphu rüshvu tinla. Tsüdan rüla le sidyükeshanyu lesü nyu:
‘Hire, Israel nyu tsipwen dan! Hagun le chen
henzi tehen nyu kehü tsü senru nyu dushvuo
rotho khipe atsüo arüshvu ole.
43Tsonkethyü gü mvule hagun le Molok
kerüshvu phika gü khilo,
lo Rafan terogü men-e sin, tse hagun le
tsü rüshvu titseo thyü pvü hü;
tsügenyu ale hagun hü pe Babilon
nken lati,’ tsonkethyü thu njü nyo.
44“Nduka npepvünyu dan le tehen chvü nyu jün kezo phika gü tsü sen; lo Sunggigü le Mosa nthon-o a-no a-kehyu gü hontse kethyü thyülo tse keshü gü a-ka kezo hontse thyülo. 45Nbon nyu ju le a-npvü a-pepvünyu kanyu phika tsügü tsü hyulo-o anyugun le Joshua zen gunryüo anyugun mhundyü hinyu yhun kehü temi aphu Sunggigü le tsüdan hülao anyugun no phika tsügü sen yü kelonyü gungü David phou keti tsünyu bin gunryü. 46Lo David le Sunggigü keso pvülo-o Sunggigü ka a-no Jakob Sunggigü genyu bin nme thyüshülo tse hiso. 47Ai Solomon no ka nme thyü pe a-tsü.
48“Tson-e aphu so ketetsotsin gü Sunggigü le ben no kethyü ka nyu tsü bin hü mvu; sidyükesha gü le kezo hontse,
49‘Tsangge tsüle A keda bin,
lo kazü tsüle apha bin, Npugü le zo-o.
Hagun le ka nyu tse kethyü nme thyü
pe atsü tila?
Nmvue ano nsenlo kegwa bin le diki la?
50Ale a npvü aben sen-o tha hi aphu thyü
mvu ole?’
51“Hire, kerünilo keho lo hagun nyun lo hagun nyetin nyu hagun girü kemvu dan, hagun le Kenshün Kapugü shwinyümvu zin bin hünyo. Hagun pepvünyu dan le nduka thyü keryü hontse hagun le ntsoka-e tsü thyü bin hünyo. 52Hagun pepvünyu dan le nduka sidyükeshanyu segü nshwen mvu soryü la? Anyugun le kentsen gü rüla nchwen nyu tsin pe anyugun hi keshü nyu dushvula. 53Hagun tsangge lokethyünyu ben nyu tejvü hyulo-o zen hü kemvu dan, hagun le ntsoka kentsen tsügü ten keshü dan lo a-dukeshvu nyu dan le!” tson zoshü.
Tso Lope Stefan Jonshvu Kela
54Anyugun le jo tsü shalo ntsin anyugun nyun ntarilo njüo a-ge anyugun hüketa sola. 55Ai a-le Kenshün Kapu no a-sü pvüo tsangge nri ton tinla; tsükatsü Sunggigü keben lo Jisu le a-njüzin kebin hyulo. 56Tson-o a-le, “Hire, ale tsang le ko keshü lo Temi Nyugü le Sunggigü ben njüzin kebin hyu bin laso!”
57Tsüselo anyugun le nrao anyugun yhenthyüo anyugun ben pe anyugun nyetin kü tseri khinlo njüo anyugun le kehü gungü a-gwün penlo. 58Tson-o anyugun le a-nrhisü zen-o chwida n gwen ki chwi-o tso pe a-jon sola. Lo tsüdan le anyugun phi yhün pe Saul tse kethyü ponyu nme pha nyu shüla. 59Ai anyugun le tso lope Stefan jon kethyü ka, Stefan le Npugü ka hio, “Npugü Jisu, nle akapu zenlo nye.” 60Tsüsika a-le khosenlo njüo nrao a-yhenthyüo, “Npugü, nle kemu higü hi lope anyugun ge shü nyalo.” Lo a-le jo tsü keti zoshü njüo sila.
נבחרו כעת:
APOSTELNYU THO 7: REGSBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.