APOSTELNYU THO 8
8
Saul Le Kehun Gü Kenshwen
1Lo Saul ko a-dushvu kela tsüle a-kendo. Lo tsünyü nyu mele Jerusalem nyu kebin kehun nshwen pe ketetsin thyü soryü la. Tsügenyu apostelnyu nti a-me kechanyu aphu tin nren nruo Judia lo Samaria lojvü ki gunla. 2Ai Kentsenyu dan me le Stefan pen gungü sunla lo a-chechü sa.
3Ai Saul we kehun gü tsü bokemhenla titseo anyugun ka aphu nyu yü gü pechenyu-e lo tenunyu-e tse nrhisü zen gungü doka nyu shüshü tse sola.
Samaria Nyu Jolokegwa Senkethyü
4Lo tin nrennru kechwi dan tsüle liki hiki gungü Sunggigü jo gü tsü zope me senthyü tinla. 5Tsüka Filip le Samaria rünyi nyu nshye gü Khrista gü rüla zo pe me hi. 6Lo tsünyu temi dan le Filip le thazansü thyükeshü sha lo hyu tseo kengüo nyunme thyüo a-jo kezo khwennyü. 7Tson-o anyugun rünyi nyu nshün kemvu kapu no thyünshvu zen kehünyu dan temi kechon ge nshün kemvu kapu tsü le nra sen-o chwila. Tsüntimvule terotho nyu lo a-ben peha zin kesinyu kechon ki thyü ngwashü. 8Tsügenyu rünyi tsünyu keyhun nyu le anyugun sherhün sala.
9Ai tsükatsü rünyi tsünyu azan le Simon tsekethyü temi nme nduka a-le a-npvü a-le kedanyu nme letseo a-temvu genyu Samarianyu no anyugun dunthyü sa hü. 10Lo temi keshe keda aphu a-jo zen-o, “Temi higü hile sunggigü kekvu kedagü letse kehü gü le,” tson hü. 11Tson-o a-le kethonki a-temvu tsü thyü pe anyugun no anyugun dunthyü sa hü. 12Ai Filip le Sunggigü keda lo Jisu zan rüla jolokegwa zope me senthyü keshü anyugun le tenyenlo ntsin anyugun pechenyu-e lo tenunyue baptaiz thyülo. 13Lo tsükatsü Simon tsüko tenyenlo la; lo a-le baptaiz thyülo ntsin Filip zen zin tinla; lo thazansü lo nduntho keda thyükelo shwipe a-dunthyüla.
14Lo Jerusalem nyu kebin apostelnyu dan le Samarianyu le Sunggigü jo hi zenlo la sele tse kethyü shalo ntsin anyugun le Pitor lo Johan au nipe tsüdan ka shüshü. 15Lo au le nshye ntsin tsüdan no Kenshün Kapu hyulo titseo tsüdan genyu hishü. 16Kechamvule Kenshün Kapu gü le tsüdan temi nme-e ge gunryü mvu bin zun; anyugun le Npugü Jisu zan nyu baptaiz thyükelo gwünzin zun kethyü genyu. 17Tsükatsü au le au ben shwen pe tsüdan ge shü. Tsüselo anyugun le Kenshün Kapu hyulo la.
18Lo apostelnyu dan le a-ben shwen pe me ge keshü ka mele Kenshün Kapu hyu kelo Simon le hyulo-o raka kechon khipe au tsüti tse so. 19Tson-o zo, “Ako no aben shwen pe mege shü yatselo meno Kenshün Kapu hyulo kehü higü hi pe atsü ta,” tson zo so.
20Ai Pitor le a-ka, “Nle seki raka pe Sunggigü jochü heikelo rüchün kethyü genyu nseki raka zen-o kenke nyu gunla nye. 21Nle hinyu hi nzan nmvue njün nme-e ndi; kechamvule Sunggigü mhundyü nyu nnyun njü bin kemvu genyu. 22Tsügenyu nkerüchün gwakemvu hi jü pe ntsülo nrün genyu nkerüchün gwakemvu hidan hi kelulo njüo Npugü ka hilo. 23Kechamvule nle nserikemvu lope nphin pvü lo gwakemvu dothyü bin kela ale hyu bin laso.”
24Tsüselo Simon le au ka, “Hai kezo dan tsü nme-e no age gunryü nyalo tsekethyü hagun agenyu Npugü ka hishülo,” tson zo so.
25Tsüselo au le me thukeyhun shü, lo Npugü rüla zoshüla njüo Jerusalem ki nigun ryü kezhü ka Samarianyu rünyi kechon ki ka-e jolokegwa pe me ka zoshü.
Filip Lo Ethiopianyu Gü
26Lo Npugü lokethyünyu nme le Filip nthon-o, “Nle so-o tesin kipon Jerusalem ka tse Gaza nyu kenshye tson gü nyu gunlo nye; lo tsü le tehen tson le,” tson. 27Tsüselo a-le so-o nshye ntsin, Ethiopianyu Iunok nme hyulo. Temi tsügütsü le Ethiopia nyu tenunyu raja Kandase hensin, a-raka aphu sen kehü keda ketsin nyu nme. 28A-le Jerusalem nyu Sunggigü rüshvu titse gun-o nigun zhü; lo a-le a-gari ge bin-o Isaya sidyükeshagü lesü swü hü. 29Tsükatsü Kapugü le Filip ka, “Nle a-gari gü nni gunlo chi,” tsonshü. 30Tsüselo Filip le a-kho ki gungü a-le Isaya sidyükeshagü lesü swü kehü shalo njüo a-ka, “Nle swü kehü tsü a-kon sha bin le mvula?” tson-o a-ketso shü.
31Tsüselo a-le, “Peha le zo pe azenshü mvu yatselo ale nyu tsethyü shalo tila?” tson-o a-le Filip no kü ryüo (gari ge) binlo lotse sola. 32Lo a-le ketsinlesü nyu swü kehü le hidan hi:
“Tanyü dushvu titse zen kegun hontse
a-zen gun;
lo tanyünyu gü le a-hü ketse gü
mhundyü matse bin kehü hontse,
tsühontse a-le a-mün kenushü
shwi mvu.
33Me le a-nshwen nyhün lo jo ketsin nyu
a-jün kerashü mvula.
Segü le a-tsipwen nyu dan swülo
bu tila,
kazü hinyu a-keyhun khisen tin
kela genyu.”
34Lo Ethiopianyu gü tsüle Filip ka, “Nle aka zoshüta, sidyükeshagü le jo higü hi kezo le, segü rüla zo hü nla?” 35Tsüselo Filip le ketsin lesü tsünyu bin zenlo njüo Jisu rüla zope a-hi gunla. 36Tson-o au gunkezhü ka gungü zü nme khoka gunlo; tsüselo Ethiopianyu gü le, “Hire, hika zü le bin nyo; lo ano baptaiz kethyü khin mvu ti ado?”
37Filip le a-ka, “Nle Nnyun aphu sen-o tenyen bin yatselo thyülo gwa.”
Tsontsin a-le, “Ale Jisu Khrista le Sunggigü Nyugü tsekethyü tenyen bin nyo,” tson.
38Tsügenyu a-gari no sunlo lotse zoshü; tson-o Filip-e lo Ethiopianyu güe tse au zü ka tsen gü Filip no a-baptaiz thyüshü. 39Tson-o au zü nyu chwiryülo ntsin Npugü Kapu le Filip zen tinla. Lo tsükatsü Ethiopianyu gü tsüle Filip hyu sin mvula. Ai a-le a-shekerhün thyü a-rünyi ki gunla. 40Ai Filip we gungü Azota ki meno a-hyulo; tsünyu rünyi aphu nyu gungü jolokegwa gü zope mehi tse zin gunryüo Kaisaria tilo.
נבחרו כעת:
APOSTELNYU THO 8: REGSBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.