Lũka 24
24
Erĩlũbũka lya Yesu
(Mt 28.1-10; Mk 16.1-8; Yn 20.1-10)
1Nĩkwa oko kiro kyʼerĩtsũka eyenga, omugulu kyatsũka erikya, abakalĩ mobahĩka oko yisinda, bakaleta amanũkato ago bakokotaya. 2Neryo mobeya erĩbwe ĩryabĩrĩkũmbagalĩbwa lĩkalũa okwʼisinda. 3Neryo mobingiramo, nĩkwa mobatabana mʼomubiri wʼomukama Yesu. 4Neryo omugulu batika-tika busana nʼomwatsi oyũ, lebuya, abandu babiri abambite esyongimba sĩkangabasenĩe mobabutukiraho hakũhĩ nabo. 5Abakalĩ abo mobubaha mobatũlama ahisi. Neryo abandu abo mobabũlyabo bati, Busana nakĩ mukasonda-sondera oyuliho omo katĩkatĩ kʼabaholĩre kwehĩ? 6Siali hano, abĩrĩlũbũka. Mwibuke ngoko ababwira iniakine eGalĩlaya, 7ati, Omugala, wʼOmundu atolere erihoterwa oko bandu bʼebibi, nʼeribambwa oko musalaba neryo enyũma wʼebiro bisatu ĩnĩalũbũka. 8Neryo abakalĩ abo mobibuka ebĩnywa biwe, 9mobasubula bakalũa okwʼisinda, mobabwira abiga ĩkũmĩ nʼomuguma nʼabandi bosĩ emyatsi yosĩ eyĩ. 10Abakalĩ abo babya Marĩa Magdalene, na Yoana, na Marĩa, nya Yakobo, nʼabandi bakalĩ haguma nabo, mobabwira abakwenda bʼemyatsi eyĩ. 11Nĩkwa abakwenda mobaganĩrya ebĩnywa ebyo abakalĩ batũla nga buyira, mobatĩkĩrĩryabo. 12Nĩkwa Petero mwahangana, mwatibita okwʼisinda; neryo Petero mũnama mwakengemereramo, mwalangira esyongimba syʼekĩtanĩ nyisa. Neryo mwasuba ewuwe akaswekera ebyabere.
Olugendo lwʼeEmaũ
(Mk 16.12-13)
13Neryo oko kiro ekyo ababiri ba kubo babya bakagenda oko kayĩ akakahulawa mo Emaũ, olugendo lwʼebilometre ĩkũmĩ na kiguma erĩlũa eYerũsalema. 14Nĩkwa babya bakakanĩa haguma emyatsi yosĩ eyabere. 15Neryo babere banemũkanĩa nʼerĩbũlanĩa Yesu ĩyowene mwasegera hakũhĩ nabo mwatsũka erĩgendanĩa haguma nabo. 16Nĩkwa ameso wabo mwabya omo bũlĩme mobataswamuminya. 17Yesu mwabũlyabo ati, Ko nĩ bĩnywa byahĩ ebyo mũkakanaya nʼerĩbũlanĩa omugulu mukagenda kwehĩ? Nabo mobimana ĩbanakwĩre engitsi. 18Omuguma wa kubo oyukahulawa mo Kleopa mwamũsũbĩrya ati, Kwe nina we wowene ukabungira eYerũsalema ũtasĩ ebyabere eno omo biro ebĩ kwehĩ? 19Neryo Yesu mwabũlyabo ati, Ni myatsi yahi kwehĩ? Nabo bati, Emyatsi ya Yesu Mũnazaretĩ oyo wabya mũmĩnyererĩ wʼamaka manene omo mĩbĩrĩ nʼomo bĩnywa omo meso wa Nyamuhanga nʼabandu bosĩ. 20Nĩkwa abahererĩ bakulu nʼabatabalĩ betu mobamuhotera bati atswerawe okwʼihola, neryo mobamũbambĩre oko musalaba. 21Nĩkwa ĩtwe twabya nʼamaha tuti yũkandĩtongolya Ĩsraelĩ. Kandi, hamatakya biro bisatu enyũma wʼemyatsi eyĩ. 22Kandi abakalĩ bʼomo ndeko yetu babĩrĩtũswekya. Mobakaya okwʼisinda omo ngyakyangyakya. 23Nĩkwa mobateteyamo omubiri wuwe. Neryo mobakasubula bati bamalola oko bamalaĩka omo bũlĩme abalyabwirabo bati aneho. 24Neryo abandi bʼendeko yetu mobakaya okwʼisinda mobakegaya iko bine ngoko abakalĩ balĩabũga, nĩkwa mobatetamulolako. 25Neryo Yesu mwabwirabo ati, Ĩnywe muli bakĩrũ, muli bolo omo mitima okwʼĩkĩrĩrya ebyosĩ abamĩnyererĩ babĩrĩbũga! 26Sikyabya kitolere Kristo iniagalwa omo myatsi eyĩ nʼeriingira omo lukengerwa luwe kwehi? 27Neryo Yesu mwakanĩryabo emyatsi yiwe eyiri omo Masako erĩtsũka omo bitabu bya Musa nʼamasako wʼabamĩnyererĩ bosĩ.
28Neryo mobahĩka hakũhĩ nʼakayĩ ako babya bakayako, neryo Yesu mwabya ngʼakalabira embere. 29Nĩkwa mobahatikana Yesu bati, Wĩkale netu kusangwa bukahumbera, nʼomwĩrĩmya ali hakũhĩ. Neryo Yesu mwingira erĩĩkala nabo. 30Neryo abere ĩkala oko mesa haguma nabo, mwĩmya obundu mwatsumulabo, mwatsũtsangabo, mwahabobo. 31Nʼameso wabo mwalĩbũkala neryo mobamuminya, neryo Yesu mwabulirana omo meso wabo. 32Nabo mobabwirana bati, Emitima yetu moyĩtetahũhana omwisi wetu akakanĩa netu omo nzira, nʼomugulu alyatũkanĩraya Amasako kwehĩ?
33Neryo mobahangana oko ndambĩ eyo mobasuba eYerũsalema, mobeya abiga erĩkũmĩ nʼomuguma ĩbama bĩhĩndana haguma nʼabandi ababya haguma nabo, 34bati, Omukama abĩrĩlũbũka kwenene, kandi abiribulukira Sĩmonĩ. 35Neryo ababiri abo mobakanĩryabo ebyabere omo nzira, kandi ngoko bamuminyerera akatsũtsanga obundu.
Yesu akabutukira abiga buwe
(Mt 28.16-20; Mk 16.14-18; Yn 20.18-23; Emĩb 1.6-8)
36Neryo omugulu babya bakabwirabo emyatsi eyĩ, Yesu ĩyowene mwahangana omo katĩkatĩ kabo, mwabwirabo ati, Obuholo bubye nenyũ! 37Nĩkwa mobasĩsĩra, mobubaha, mobaganĩrya bati bamalangira kĩrĩmũ. 38Nĩkwa mwabũlyabo ati, Busana nakĩ mũkahahũkaya emitima kwehĩ? Kandi busana nakĩ mukatika-tika omo mitima yenyũ kwehĩ? 39Mulangire ebyala byage nʼebisando byage, kwʼindi ĩnĩna ngye. Mũnyĩtũleko mulangire, kusangwa ekĩrĩmũ sikiwite omũnyokũ nʼamakũha ngoko mukalangira inyinawitebyo. 40Neryo abere abĩbũga ebĩ, mwakangyabo ebyala biwe nʼebisando biwe. 41Neryo omugulu babya bakine bũtĩkĩrĩrya busana nʼobutseme nʼerisweka, Yesu mwabũga nabo ati, Munawite ekyʼerirya hano kwehĩ? 42Nabo mobamuha ekitswe kyʼerĩhere ekĩhũkĩre. 43Yesu mwĩmyalyo, mwalyalyo embere syabo.
44Neryo Yesu mwabwirabo ati, Ebĩ bye bĩnywa nababwira nyikine haguma nenyũ; emyatsi yosĩ eyasakawa busana nage omo Migambo ya Musa nʼebitabu byʼabamĩnyererĩ nʼomo Syonyimbo, yabya itolere iyabererera. 45Neryo mwalĩbũla amalengekanĩa wabo eriminya Amasako. 46Kandi Yesu mwabwirabo ati, Kĩsakĩre kiti, Kristo atolere eriagalwa nʼerĩlũbũka enyũma wʼebiro bisatu. 47Kandi kiti, Omo lĩna liwe omwatsi wʼeribindula omutima nʼerireka ebibi, nʼeribuyira lyʼebibi litolere ĩbyatũlaganĩbwa oko bihanda byosĩ, erĩtsũka eYerũsalema. 48Ĩnywe muli abalangĩrĩ bʼemyatsi eyĩ. 49Neryo mũlebaye, ngabatumira erilaga lya Tata wage; nĩkwa mulinde omo mũyĩ erĩhĩka aho obũtokĩ bũkalũa endata, bwasyabandagalirako.
Yesu akatwalawa elubula
(Mk 16.19-20; Emĩb 1.9-11)
50Neryo mwasondolabo eyĩhya oko mũyĩ erĩhĩka eBetanĩa, neryo mwasumbira ebyala biwe byʼendata nʼeritsumulabo. 51Neryo abere akatsumulabo mwayigabula kubo mwatwalwa elubula. 52Neryo mobamũramya mobasuba eYerũsalema nʼobutseme bunene. 53Kandi mobasiba omugulu gosĩ omo Hekalũ nʼeripipa Nyamuhanga.
Bible in Kinandi © Bible Society of the Democratic Republic of Congo, and Bible Society of Uganda, 1980.
