Lũka 23
23
Yesu embere sya Pilato
(Mt 27.1-2,11-14; Mk 15.1-5; Yn 18.28-38)
1Neryo endeko yosĩ eyo moyahangana mobatwala Yesu embere sya Pilato. 2Neryo mobatsũka erĩhandĩkĩrĩrya Yesu bati, Motweya omundu oyũ ĩnĩakatalaya ekihanda kyetu, nʼeritukaga erisolera Kaĩsarĩ. Kandi akabũga ati iye ni Kristo yo mwami. 3Pilato mwamũbũlya ati, Uli mwami wʼAbayũda kwehĩ? Yesu mwamũsũbĩrya ati, Wamabũgakyo. 4Neryo Pilato mwabwira abahererĩ bakulu nʼesyondeko ati, Sinditabana oko mundu oyũ ko musango. 5Nĩkwa mobahatikana kutsibu bati, Akakola-kolaya bandu, ĩnĩakakangĩrĩraya eYũdea hosĩ, erĩtsũka eGalĩlaya erĩhĩka nʼeno.
Yesu embere sya Herode
6Nĩkwa Pilato abere owa ekĩ, mwabũlya Yesu nga ni Munya Galĩlaya. 7Neryo abere abiminya ko Yesu abya wʼehamũlĩ ya Herode, mwamutuma uku Herode, kusangwa Herode abya eYerũsalema omo biro ebyo. 8Neryo Herode mwatsema kutsibu abere alangira Yesu; kusangwa erĩtsũka kera abya akasonda erimulolako, kandi kusangwa abya akowa engulu yiwe, kandi ĩnĩabĩrĩhĩra amaha wʼerilola oko kitiko-tiko ekyo akakola. 9Neryo Herode mwabũlya Yesu emyatsi mingi, nĩkwa Yesu mwatamũsũbĩryakĩ. 10Nʼabahererĩ bakulu nʼabakangĩrĩrya bʼEmigambo babya bimeneho bakahandĩkĩrĩrya Yesu yo kutsibu. 11Neryo Herode nʼabasĩrĩkanĩ buwe, mobasekererya Yesu nʼerimupona. Neryo mobambalya Yesu olukimba lũkangabasenĩe, mobamũsũbya eyiri Pilato. 12Oko kiro ekyo Herode na Pilato mobaswabya bwĩra oko bwĩra, kusangwa embere wʼaho ibali nʼobũyĩgũ omo katĩkatĩ kabo.
Pilato akalĩga ati Yesu ahole
(Mt 27.15-26; Mk 15.6-15; Yn 18.39—19.16)
13Neryo Pilato mwabirikirira haguma abahererĩ bakulu, nʼabatabalĩ bʼabandu, 14mwabwirabo ati, Mwamandetera omundu oyũ muti, akatalaya abandu. Nabĩrĩmũtondesya embere syenyũ, sinditamubana ko musango omo myatsi eyo mukamũhandĩkĩrĩraya. 15Kandi Herode mwatamubana ko musango, kusangwa amamũsũbya ũkwʼĩtwe, neryo, lebaya, sialitakola mwatsi owatolere erĩĩtwa. 16Neryo ngandimusuyira nʼerimubohola. [ 17Oko buli Biro Bikulu byʼErikiruka kyabya kitolere akabohola busana nabo omundu muguma wʼomũlĩkĩ.] 18Nĩkwa endeko yosĩ moyabirikira haguma bati, Omundu oyo akwe, utoboholere Baraba! 19Baraba abya oyo wagusawa omo mũlĩkĩ busana nʼobwanĩse omo mũyĩ na busana nʼerĩĩta abandu. 20Pilato abya anzĩre eribohola Yesu, neryo mwaswabũlya endeko eyo. 21Nĩkwa mobabirikira kutsibu bati, Umubambe oko musalaba! Umubambe oko musalaba! 22Neryo Pilato mwabũga nabo engendo yʼakasatu ati, Omundu oyũ abirikola kibi kyahi kwehĩ? Sinditabana omwatsi owangaleka ĩnĩakwa. Ngandimusuyira nʼerimubohola. 23Nĩkwa endeko moyahatikana nʼemirenge minene bati ĩtawe oko musalaba! Neryo emirenge yabo moyasĩnga. 24Neryo Pilato mwatwa omwatsi ati, ekyo bakabũlaya kikolawe. 25Neryo mwabohola omundu oyo basonda, oyo wagusawa omo mũlĩkĩ busana nʼobwanĩse nʼerĩĩta abandu, nĩkwa mwahererya Yesu yo kubo ati bakole ngoko banzĩre.
Bakabamba Yesu yʼoko musalaba
(Mt 27.32-44; Mk 15.21-32; Yn 19.17-27)
26Neryo babere bakatwala Yesu, mobahamba Sĩmonĩ wʼeKũrene oyo wabya akalũa omolĩ, neryo mobamũhekya omusalaba bati ahekego enyũma wa Yesu.
27Nʼendeko nene yʼabandu moyakwama Yesu, nʼabakalĩ abamulirirako nʼerĩmũsũsũmanira. 28Nĩkwa Yesu mwakeberabo ati, Ĩnywe bakalĩ bʼeYerũsalema! Simulire busana nage, nĩkwa mulire busana nenyũ nʼabana benyũ. 29Kusangwa ebiro byasyasa omugulu basyabũga bati, Obutseme buli oko bagumba, nʼesyonda esitalitaheka makule na kera, nʼamabere awatalibawako na kera! 30Neryo abandu basyatsũka erĩbũga nʼebitwa bati, Mututerereko! nʼoko hitwa, Mũtũbĩse! 31Kusangwa emyatsi ngʼeyĩ yamakolwa oko muti mubisi, yasyabya yiti oko muti ogũmĩre kwehĩ?
32Kandi mobahamba abandi babiri, abakola-nabi, erĩĩtabo haguma na Yesu. 33Neryo babere bahĩka aho ahakahulawa mo Aherĩhanga, mobabamba Yesu yʼoko musalaba nʼabakola-nabi abo, omuguma oko luhande lwʼamali, nʼogundi oko luhande lwʼamalembe. 34Nĩkwa Yesu mwabũga ati, Tata ubuyirebo kusangwa sĩbasĩ ekyo bakakola! Kandi mobakanga obukanga, erigaba esyongimba siwe omo katĩkatĩ kabo. 35Abandu nabo mobahanganaho bakasamalira. Nʼabatabalĩ nabo mobasekererya Yesu bati, Mwalamya abandi; naye ayĩlamaye amabya ini Kristo oyo wayisogawa na Nyamuhanga. 36Nʼabasĩrĩkanĩ mobamũsekererya, ĩbakamũhĩkako nʼerimuha epada, 37bati, Wamabya uli Mwami wʼAbayũda, ũyĩlamaye! 38Neryo endata oko musalaba habya hasakĩrwe amasako aya ati, OYO NI MWAMI WʼABAYŨDA.
39Kandi omuguma gʼoko bakola-nabi abahanikawaho mwatsuma Yesu ati, Suli Kristo kwehĩ? Ũyĩlamaye iwe netu! 40Nĩkwa ogundi mukola-nabi mwamũsũbĩrya, mwamukunga ati, Suliubaha Nyamuhanga kwehĩ? Kusangwa nawe uli kʼomusango owali ngʼoyũ. 41Omusango wetu atunganene, kusangwa ĩtwe tukabana oluhembo olutolere emĩbĩrĩ yetu; nĩkwa omundu oyũ sialitakola ekibi. 42Neryo mwabwira Yesu ati, Yesu unyibuke omugulu ukasa omo bwami bwawe! 43Neryo Yesu mwamubwira ati, Kwenene ngabũga nawe; mũnabwĩre Ukandibya haguma nage omo Paradĩso.
Oluholo lwa Yesu
(Mt 27.45-56; Mk 15.33-41; Yn 19.28-30)
44Neryo yabya nga saa ndatu, nʼomwĩrĩmya mwabya omo kihugo kyosĩ erĩhĩka oko saa mwenda. 45Neryo ekyakakala kyʼeryuba mokyabula; nʼolukimba olũkasũkũlĩraya olʼomo Hekalũ molwasatĩbwa mo bihande bibiri. 46Neryo Yesu mwabirikira nʼomulenge munene ati, Tata, ngahĩra ekĩrĩmũ kyage omo byala byawe! Neryo abere abĩbũga ebĩ, mwalekula. 47Nĩkwa omugulu omukulu wʼabasĩrĩkanĩ alangira emyatsi eyĩ, mwapipa Nyamuhanga ati, Kwenene omundu oyũ alwe mundu utunganene. 48Nʼesyondeko syosĩ esyahĩndana busana nʼerilangira ekitsibu ekĩ, babere babilangira emyatsi eyĩ mobasuba ewabo, ibanemuhumanga oko bĩkũba byabo. 49Nʼabosĩ ababya basĩ Yesu, nʼabakalĩ abamukwama bakalũa eGalĩlaya, mobahangana hali hake; bakalangira emyatsi eyĩ.
Eritabwa lya Yesu
(Mt 27.57-61; Mk 15.42-47; Yn 19.38-42)
50Nĩkwa habya omundu oyukahulawa mo Yosefũ wʼeArĩmatea, omũyĩ wʼAbayũda. Yosefũ abya mundu mubuya, nʼoyutunganene ini mundu wʼomwʼĩbũgĩro. 51Iye mwatalĩga embĩta yabo nʼerikola lyabo. Kandi abya akalinda obwami bwa Nyamuhanga. 52Yosefũ oyũ mwaya uku Pilato, mwamusaba omubiri wa Yesu. 53Neryo mwakĩmya omubiri wa Yesu, mwamũlĩngĩrako olukimba lwʼekĩtanĩ, neryo mwamũhĩra omwʼisinda eyabatsawa omwʼĩbwe, eyite yatatabwamo mundu. 54Ekyo kyabya kiro yʼErĩkokotya, nʼeSabato yabya ikasonda erikya.
55Nĩkwa abakalĩ abasa na Yesu bakalũa eGalĩlaya mobakwama Yosefũ, mobalangira eyisinda, kandi mobalangira ngoko mubiri wa Yesu ahĩrawamo. 56Neryo abakalĩ abo mobasuba eka mobakokotya amanũkato nʼamagũta awakakumba ndeke busana nʼomubiri wuwe. Nʼoko Sabato mobaluhuka ngʼEmigambo ko yikahana.
Bible in Kinandi © Bible Society of the Democratic Republic of Congo, and Bible Society of Uganda, 1980.
