Lũka 20
20
Ehamũlĩ ya Yesu
(Mt 21.23-27; Mk 11.27-33)
1Neryo kiro kiguma, omugulu Yesu abya omo Hekalũ akakangĩrĩrya abandu, nʼerĩtũla Engulu Yowene, abahererĩ bakulu nʼabakangĩrĩrya bʼEmigambo, nʼabakulu, mobamũhĩkako, 2ibakamubwira bati, Utubwire ngʼukakola emyatsi eyĩ nʼehamũlĩ yahi, kandi nindi yo wakuha ehamũlĩ eyĩ kwehĩ? 3Yesu mwasũbĩryabo ati, Nage ngandĩbabũlya omwatsi nenyũ ĩmwanyĩsũbĩrya, 4Erĩbatĩsya lya Yoane lyalũa elubula kutse lyalũa oko bandu kwehĩ? 5Nabo mobakanĩrya haguma bati, Twamabũga tuti, Lyalũa elubula, akandĩbũga ati, Busana nakĩ sĩmwetĩkĩrĩrya Yoane kwehĩ? 6Nĩkwa twamabũga tuti, Lyalũa oko bandu, abandu bosĩ ĩbakandĩtwĩta omo mabwe, kusangwa babiriganza bati Yoane abya mũmĩnyererĩ. 7Neryo mobasũbĩrya bati, Sĩtwasĩ eyo lyalũa. 8Neryo Yesu mwabwirabo ati, Nage sindiendibabwira nga nĩ hamũlĩ yahi ikaleka inakola emyatsi eyĩ.
Omũsyo wʼabalĩmĩ babi
(Mt 21.33-46; Mk 12.1-12)
9Neryo Yesu mwatwĩra abandu bʼomũsyo oyũ ati, Omundu mwahera eririma lyʼebĩnyũ, neryo mwahĩramo abalĩmĩ, neryo mwaya oko lugendo omo kindi kihugo. 10Neryo omugulu wʼeriera lyʼebĩnyũ mwatuma omugombe oko balĩmĩ abo, atoke eribana oko bĩgũma byʼeririma lyʼebĩnyũ; nĩkwa abalĩmĩ abo mobamũswĩrya nʼerĩmũsũbũlya byala bisa. 11Neryo mwatuma ogundi mugombe; nĩkwa abalĩmĩ abo mobamũswĩrya nibya nʼerimuhemula, mobamuhiga, naye mwasubula byala bisa. 12Kandi mwatuma omugombe wʼakasatu. Neryo abalĩmĩ mobamũhũtangalya, mobamuhiga. 13Neryo Omwenye eririma lyʼebĩnyũ mwabũga ati, Nasyakolakĩ kwehĩ? Nasyatuma mugala wage mwanze; mbino yo basyakenga. 14Nĩkwa omugulu abalĩmĩ bamulangira mobakanĩranĩa bati, Oyũ ni mugala wʼomwenye eririma. Tũmwĩte, neryo eririma lyasyabya lyetu. 15Neryo mobamukurira eyĩhya wʼeririma lyʼebĩnyũ, mobamwĩta. Neryo Omwenye eririma lyʼebĩnyũ eryo asyayirabo ati kwehĩ? 16Asyasa, asyaherya abalĩmĩ abo, asyaha eririma lyʼebĩnyũ eryo oko bandi balĩmĩ. Neryo abandu babere bowa ebĩnywa ebĩ, mobabũga bati, Iyihi, nʼahake. 17Neryo Yesu mwasamalirabo ati,
Nĩkwa ekyasakawa ekĩ nĩkĩ kwehĩ? kiti,
Erĩbwe eryo abahĩmbĩ bagana,
Lyo lyabere erĩbwe ryʼesondo.
18Nʼoyo wasyatererwako nʼerĩbwe erĩ, asyabũnangĩka mo bitswe-bitswe; nĩkwa erĩbwe eryo lyamatogera oko mundu, lyasyamũbũnzũngũla mo lũtũtũ.
Omwatsi wʼerisola
19Neryo abakangĩrĩrya bʼEmigambo nʼabahererĩ bakulu mobasonda-sonda erihamba Yesu oko ndambĩ eyo, kusangwa mobaminya kwʼatwa omũsyo oyo busana nabo; nĩkwa mobubaha abandu. 20Neryo mobamũteya. Kandi mobatuma abalĩngĩ abayĩhambũlaya bati ni bandu batunganene, ibatoka erimutega omo bĩnywa biwe nʼerimuhotera oko hamũlĩ nʼobũtokĩ bwʼomũtabalĩ. 21Abalĩngĩ aba mobabwira Yesu bati, Mũkangĩrĩrya, tũnasĩ ũkabũga nʼerĩkangĩrĩrya ekyʼekwenene. Kandi sulisombola ebitaga nʼebite bitaga nĩkwa ũkakangĩrĩraya enzira ya Nyamuhanga omo kwenene. 22Emigambo ĩkatũlĩgĩra erisolera Kaĩsarĩ kutse iyihi kwehĩ? 23Nĩkwa Yesu mwaminya amatebo wabo, neryo mwabwirabo ati, 24Mũnyĩkangaye edĩnarĩ. Ekĩsosekanĩo nʼamasako aya ni byandi kwehĩ? Nabo mobabũga bati, Ni bya Kaĩsarĩ. 25Neryo Yesu mwabwirabo ati, Mulihe Kaĩsarĩ ebindu bya Kaĩsarĩ, kandi mulihe Nyamuhanga ebindu bya Nyamuhanga. 26Nabo mobataluka erimutega omo mwatsi embere syʼabandu. Nĩkwa mobabya bũkũtũ ibakaswekera erĩsũbĩrya liwe.
Omwatsi wʼerĩlũbũka oko baholĩ
(Mt 22.23-31; Mk 12.18-27)
27Neryo abandi bʼoko Basadũkayo mobahĩka uku Yesu. Aba ni bandu bakabũga bati sihali erĩlũbũka oko baholĩ. 28Mobamũbũlya bati, Mũkangĩrĩrya, Musa mwatusakira ati, Omugala wabo mundu amahola akasĩganĩa omũkalĩ wuwe, atawite mwana; mugala wabo mundu oyo asyĩmya omũkalĩ oyo iniabutira mugala wabo yʼabana. 29Nĩkwa habya bagala babo balinda; owʼerĩmbere mwahĩkya, neryo mwahola isialitabuta mwana. 30Neryo owʼakabiri mwĩmya omũkalĩ oyo. 31Neryo owʼakasatu mwakola atya; neryo abagala babo bosĩ balinda mobahola batya isibetabuta mwana. 32Neryo enyũma wʼabosĩ omũkalĩ oyo naye mwahola. 33Neryo oko kiro kyʼerĩlũbũka, omũkalĩ oyo asyabya wandi kwehĩ? Kusangwa abalinda bosĩ babya ĩbabĩrĩmwĩmya.
34Neryo Yesu mwabwirabo ati, Abalume nʼabakalĩ bʼomugulu ono bakaherũkanaya. 35Nĩkwa abalume nʼabakalĩ abakaganzawa nga batolere erĩhĩka oko mugulu oyo, nʼerĩlũbũka oko baholĩ, sĩbeherũkanaya. 36Kusangwa sibetoka eriswahola, kandi balingene nʼabamalaĩka. Ni bagala ba Nyamuhanga kusangwa babĩrĩlũbũkĩbwa oko baholĩ. 37Nĩkwa Musa mwakanganĩa kwʼabaholĩ bakalũbũkĩbawa. Omo masako awakahula ekisaka ekyaka, akahula Omukama, mo Nyamuhanga wa Abrahamũ, na Nyamuhanga wa Ĩsaka, na Nyamuhanga wa Yakobo. 38Neryo iye si Nyamuhanga wʼabaholĩ, nĩkwa ni Nyamuhanga wʼabaliho busana naye. 39Neryo abandi bʼoko Bafarĩsayo mobamũsũbĩrya bati, Mũkangĩrĩrya, wamasĩngana! Neryo abandi bakangĩrĩrya bʼEmigambo mobasũbĩrya bati, Mũkangĩrĩrya, wabĩrĩbũga ndeke. 40Neryo mohataswabya mundu oyo wangalenga erĩswabũlya Yesu eyindi myatsi.
Erĩbũlya omwatsi wa Kristo
(Mt 22.41-46; Mk 12.35-37)
41Neryo Yesu mwabũga nabo ati, Bakabũga batĩkĩ, bati, Kristo ni mugala wa Dawĩdĩ kwehĩ? 42Kusangwa Dawĩdĩ akabũga omo kitabu kyʼesyonyimbo ati,
Omukama akabwira Omukama wage ati,
Wĩkale oko byala byage byʼamali,
43Erĩhĩka aho nasyahĩrĩra esyonzĩgũ syawe
Omwisi wʼebisando byawe.
44Dawĩdĩ mwamwahula mo Mukama, neryo Kristo angatoka eribya mugala wa Dawĩdĩ ati kwehĩ?
Yesu akakunga busana nʼabakangĩrĩrya bʼEmigambo
(Mt 23.1-36; Mk 12.38-40)
45Neryo omugulu endeko yosĩ yabya ikahulikirira uku Yesu, Yesu mwabũga nʼabiga buwe ati, 46Mũyĩtegaye busana nʼabakangĩrĩrya bʼEmigambo abanzĩre erirendera ibanambite esyokanzu syabo nyiri-nyiri, ĩbanzĩre erĩkerĩbwa omo hitale, ibakayisoga ebĩtũmbĩ byʼembere omo manyũmba wʼerĩhĩndanamo, nʼahʼerĩsĩkĩbwa omwʼirya ĩnene. 47Kandi bakanũbaya abakwakalĩ nʼerinyega amanyũmba wabo, neryo busana nʼerilolwako bakasaba erisaba liri-liri! Aba basyasuyirwa kutsibu kwʼaho.
Bible in Kinandi © Bible Society of the Democratic Republic of Congo, and Bible Society of Uganda, 1980.
