Lũka 19
19
Yesu na Zakayo
1Neryo Yesu mwingira eYerĩko, nĩkwa mwalũa iniatwangana. 2Neryo habya omũsolesya mukulu eyo, oyo wahulawa mo Zakayo, kandi abya wʼebindu bingi. 3Naye abya akasonda-sonda erilola uku Yesu nga nindi, nĩkwa mwatatoka busana nʼendeko kusangwa abya mũkũhĩ. 4Neryo mwatibita embere mwasambira omo muti wʼomukuyu atoke erilangira Yesu, kusangwa abya iniakalaba omo nzira eyo. 5Neryo Yesu abere ahĩkaho, mwalalamira endata mwabwira Zakayo ati, Zakayo, Wanguhe, ũkĩme, kusangwa ngandĩkala omwawe mũnabwĩre. 6Neryo Zakayo mwanguha, mwakĩma nʼerĩmũkokya nʼobutseme. 7Nʼabandu bosĩ abamulolako mobatsũka eriyikuna bati, Amabya mũgenĩ wʼomundu mukola-nabi. 8Neryo Zakayo mwahangana mwabwira Omukama ati, Lebaya, Mukama, ngaha ekihande kyʼebindu byage oko bera; kandi namabya naliteba mundu kwʼekindu kiwe ngandĩsũbũlyakyo ngendo ĩnĩ. 9Neryo Yesu mwamubwira ati, Mũnabwĩre erilama lyamahĩka omo nyũmba eyĩ, kusangwa naye ni mwana wa Abrahamũ. 10Kusangwa Omugala wʼOmundu mwasa erisonda-sonda nʼerĩlamya ababya batere.
Omũsyo wʼebibande byʼesyamagetsi
(Mt 25.14-30)
11Omugulu babya bakahulikirira emyatsi eyĩ, Yesu mwatsũka erĩtwa omũsyo. Neryo kusangwa abya hakũhĩ nʼeYerũsalema, kandi abandu mobaganĩrya ambu Obwami bwa Nyamuhanga bũkahĩka neryo-neryo. 12Neryo Yesu mwabũga ati, Omukulu muguma wʼobwami mwaya omo kihugo kyʼehali eriyasingirayo obwami, nʼeriswasubula. 13Neryo mwabirikira ĩkũmĩ oko bagombe buwe, mwahabo ebibande ĩkũmĩ byʼesyamagetsi, mwabwirabo ati, Mũtũndaye ũmwʼebĩ erĩhĩka aho nasyaswasira. 14Nĩkwa abandu buwe mobamũkwa obusu, mobamutumira abakwenda bati, Sĩtwanzĩre omundu oyukatutabalako.
15Neryo omukulu oyo abere abisinga mwasubula, neryo mwategeka abagombe abo asĩgĩra ebibande ebyo ati babirikirawe atoke eriminya nga bamatunda byahi. 16Omugombe wʼerĩmbere mwahuluka ati, Mukama, ekibande kyawe kyʼesyamagetsi kyamatunda ebindi bibande byʼesyamagetsi ĩkũmĩ. 17Neryo omukulu oyo mwamubwira ati, Wamakola ndeke uwe mugombe mubuya kusangwa wabiribya butalegula oko kindu kike, ubye nʼehamũlĩ oko mĩyĩ ĩkũmĩ. 18Neryo omugombe wʼakabiri mwasa ati, Mukama, ekibande kyawe kyʼesyamagetsi kyamatunda ebindi bibande byʼesyamagetsi bitanu. 19Neryo mwamubwira ati, Nawe utabale oko mĩyi ĩtanu. 20Nʼogundi mugombe mwasa ati, Mukama, lebaya ekibande kyawe kyʼesyamagetsi kyekĩ: ekyo nabika omo lukimba. 21Kandi monakubaha, kusangwa uli mundu oyũkalĩre. Ukaheka ebite byagu, kandi ukagesa ebyo utabiba. 22Omukulu oyo mwamubwira ati, Uwe mugombe mubi! Ngandikutswera omo bĩnywa byawe. Wabya wasĩ ko ndi mundu oyũkalĩre, ngĩmaya ebite byage, nʼerigesa ebyo ndabiba kwehĩ? 23Neryo busana nakĩ mũtahĩra ekibande kyage kyʼesyamagetsi omo bankĩ, neryo nangabere nahĩka, inahekakyo haguma nʼendũndĩ yakyo kwehĩ? 24Neryo mwabwira ababya bimeneho ati, Mumusagule ekibande kyʼesyamagetsi ekyo, muhekyo oko yuwite ebibande byʼesyamagetsi ĩkũmĩ. 25Nabo mobamubwira bati, Mukama, awite ebibande byʼesyamagetsi ĩkũmĩ! 26Nĩkwa ngababwira nyiti, Oyuwite asyahabwa ebindi, nĩkwa oyutawite, asyalũsĩbwako nʼekyo awite. 27Nĩkwa, esyonzĩgũ syage esyo, abatabya banzĩre ngatabala kubo, muletebo hano, mwĩtĩrebo hano omo meso wage.
Yesu akingira eYerũsalema nʼeripipwa
(Mt 21.1-11; Mk 11.1-11; Yn 12.12-19)
28Neryo Yesu abere abĩbũga emyatsi eyĩ, mwahetukira eYerũsalema embere syʼabandi. 29Neryo abere ahĩka hakũhĩ nʼeBetefage nʼeBetanĩa, hakũhĩ nʼekitwa ekikahulawa mo Mĩzeĩtũnĩ, mwatuma abiga buwe babiri, 30ati, Mugende oko kayĩ akali embere syenyũ; neryo mukandibya mwabĩhĩkako mukandĩeya ekyana kyʼepunda ĩkĩnahangĩre ekitekyataheka mundu. Muhangulekyo, mundeterekyo hano. 31Omundu amababũlya ati, Mukahangulakyo busana nakĩ, imwamubwira muti, Omukama ali nʼobwaga bwakyo. 32Neryo abatuma wa mobagenda mobeyakyo ngoko Yesu anabwirabo. 33Neryo babere bakahangula ekyana kyʼepunda ekyo, abenyekyo mobabũlyabo bati, Busana nakĩ mukahangula ekyana kyʼepunda kwehĩ? 34Neryo mobabwirabo bati, Omukama ali nʼobwaga bwakyo. 35Neryo mobatwala ekyana kyʼepunda ekyo uku Yesu. Kandi mobĩkĩrya kukyo kwʼesyongimba syabo, mobahĩra Yesu yo kukyo. 36Neryo abere akagenda kukyo mobasanza esyongimba syabo syʼomo nzira. 37Neryo Yesu abere ahĩka hakũhĩ nʼobwandagala bwʼekitwa kyʼeMĩzeĩtũnĩ, endeko yosĩ yʼabiga mobatsũka eripipa Nyamuhanga ibakatsema nʼeripipa Nyamuhanga nʼomulenge munene busana nʼebitiko-tiko byosĩ ebyo balolako, 38bati,
Nyamuhanga atsumule omwami, oyukasa omo lĩna lyʼomukama!
Obuholo omo lubula nʼolukengerwa lubye uku Nyamuhanga!
39Neryo abandi bʼoko Bafarĩsayo mobabwira Yesu bati, Mũkangĩrĩrya, Ukunge abiga bawe. 40Yesu mwasũbĩryabo ati, Ngababwira nyiti, aba bamahuna, amabwe nago asyabirikira nʼomulenge munene.
Yesu akalirira eYerũsalema
41Neryo abere ahĩka hakũhĩ nʼomũyĩ, mwalangirago nʼeriririra kugo, 42ati, Kumbe mũnabwĩre nawe ũlwe wasĩ emyatsi eyikaleta Obuholo! Nĩkwa lino ĩbĩsamĩre oko meso wawe. 43Kusangwa ebiro byasyasa kwĩnywe, oko mugulu oyo esyonzĩgũ syawe syasyahanganĩa olũhĩmbo embere syenyũ nʼerĩbatĩmbako, nʼerĩbakakĩrya oko mbande syosĩ. 44Basyabagusa ahisi haguma nʼabandu abali omwisi wawe; isibendĩsyasĩga erĩbwe nʼeriguma endata oko lindi, kusangwa Sulitaminya omugulu Nyamuhanga ahĩka erĩkũlamya.
Yesu akaya omo Hekalũ
(Mt 21.12-27; Mk 11.15-19; Yn 2.13-22)
45Neryo Yesu mwingira omo Hekalũ, mwatsũka erihigira abakagũlaya bʼeyĩhya. 46Iniakabwirabo ati, Kĩsakĩre kiti, Enyũmba yage yasyabya enyũmba yʼerisabiramo. Nĩkwa ĩnywe mwabiriyirayo mo bwĩkalo bwʼabanyeyĩ.
47Kandi Yesu mwabya akakangĩrĩrya omo Hekalũ ebiro byosĩ. Neryo abahererĩ bakulu nʼabakangĩrĩrya bʼEmigambo nʼabandu bakulu omo katĩkatĩ kʼabandu mobalenga erĩmwĩta. 48Nĩkwa mobatabana ekyo bangakola, kusangwa abandu bosĩ babya bakahĩra amatwĩ wabo oko bĩnywa biwe.
Bible in Kinandi © Bible Society of the Democratic Republic of Congo, and Bible Society of Uganda, 1980.
