Emĩbĩrĩ 2
2
Erĩhĩka lyʼOmũlĩmũ Abũyĩrĩre
1Neryo ekiro kyʼePentekote kyabere kyahĩka, abosĩ mobabya hagumaguma. 2Neryo-neryo omulenge mwalũa elubula eribuhirira ngʼerihunga erĩkalĩre, molyũsũlya enyũmba yosĩ yʼaho babya bĩkere. 3Neryo mobahulukirwako ebirimi ngʼebyʼomuliro, ebikagabanawa oko buli mundu, mobyĩkala kubo. 4Nʼabosĩ mobũsũlĩbwa nʼOmũlĩmũ Abũyĩrĩre, neryo mobatsũka erĩbũga omo yindi mĩbũge, ngʼOmũlĩmũ kwʼahabo erĩbũga.
5Nĩkwa habya Bayũda abĩkere eYerũsalema, babya bandu bʼekisomo abalũa omo buli kihanda muna-kihugo. 6Neryo omugulu bowa omulenge oyũ, endeko moyahĩndana. Neryo mobahanga-hangya emitima kusangwa obuli mundu mowabo bakabũga omo mũbũge wuwe. 7Neryo mobatsũka erisweka nʼerĩsĩsĩra bati, Kwʼabosĩ abakabũga si Banya Galĩlaya kwehĩ? 8Kandi netu tũkowabo bakabũga omo mũbũge wetu ogo twabutawamo tuti kwehĩ? 9Ĩtwe tuli bʼePartĩ, nʼabʼeMedĩ, nʼabʼeElamũ, nʼabandu bʼeMesopotamia, nʼeYũdea, nʼeKapodokĩa; nʼePonto, nʼeAsĩa, 10nʼeFũrũgĩa, nʼePamfĩlĩa, nʼeMĩsĩrĩ, nʼebihugo byʼeLĩbĩa hakũhĩ nʼeKũrene, nʼababunga bʼeRoma, Abayũda, nʼabʼebihanda ababiribinduka eribya Bayũda, 11Abakrete nʼAbaarabu. Nĩkwa tũkowabo bakabũga omo mĩbũge yetu emĩbĩrĩ yʼamaka ya Nyamuhanga! 12Neryo mobabya bakahanga-hangya emitima, bakasweka, bakabũlanĩa bati, Kwe ni kyahi kwehĩ? 13Nĩkwa abandi mobasekererya bati, babĩrĩkũnda omo bĩnyũ bihya-bihya.
Erĩtũlago lya Petero
14Nĩkwa Petero mwahangana nʼabandi bakwenda erĩkũmĩ nʼomuguma, neryo mwatsũka erĩbũga nʼendeko omo mulenge munene ati, Ĩnywe bandu bʼeYũdea, nenyũ ĩnywe bosĩ abĩkere eYerũsalema, mowe ebĩnywa byage, muminye ekĩ. 15Abandu aba sĩbakũndĩre, ngoko mũkaganĩraya, kusangwa ni saa ĩsatu yʼengyakya. 16Kusangwa ebĩ byo byabũgawa nʼomũmĩnyererĩ Yoelĩ ati,
17Nyamuhanga ati, Ekĩ kyasyabya oko biro byʼenyũma-nyũma,
Nasyũtũlĩra Omũlĩmũ wage oko bandu bosĩ;
Abagala benyũ nʼabali benyũ basyaminyerera,
Nʼabalwana benyũ basyalola oko syonzolĩ,
Nʼabasyakulu benyũ basyalota esyonzolĩ.
18Nage nasyũtũlĩra Omũlĩmũ wage oko biro ebyo,
Oko bagombe bage bʼobulume nʼabʼobũkalĩ,
Nabo basyaminyerera.
19Nasyakanganĩa ebyʼeriswekera omo kyanya endata,
Nʼebĩmĩnyĩsyo muna-kihugo eyĩkwa:
Omusasi, nʼomuliro, nʼerĩtũmba lyʼomũkĩ.
20Eryuba lyasyabindulwa mo mwĩrĩmya,
Nʼomukera iniabya ngula ngʼomusasi,
Embere wʼerĩhĩka lyʼeKiro kikulu kyʼolukengerwa lʼOmukama.
21Neryo, obuli mundu oyukalakira oko lĩna lyʼOmwami Mukulu asyalamĩbwa.
22Ĩnywe, balume bʼeĨsraelĩ! muhulikirire ebĩnywa ebĩ! Yesu wʼeNazaretĩ, abya mundu oyo Nyamuhanga asĩma embere syenyũ omo bitiko-tiko, nʼebyʼeriswekera, nʼebĩmĩnyĩsyo ebyo Nyamuhanga akola omo byala bya Yesu omo katĩkatĩ kenyũ, ngoko mũnasĩ. 23Nyamuhanga abya asĩ, kandi mwategekanĩa ati, Yesu ahĩrawe omo byala byenyũ, kandi ĩnywe momwamwĩta, imukaleka abandu babi ibamukongomerera oko musalaba. 24Nĩkwa Nyamuhanga mwamũlũbũkya, ĩnĩamabĩlũsya amagalĩ wʼoluholo, kusangwa oluholo silwangatoka erimuboha omo maka walo. 25Kusangwa Dawĩdĩ mwabũga busana na Yesu ati,
Monalangira Omukama embere syage emigulu yosĩ;
Kusangwa ali oko byala byage byʼamali, ĩsĩnangatũndwa.
26Neryo omutima wage mwatsema,
Nʼebĩnywa byage bĩkayĩsyandira,
Kandi omubiri wage asyabana amaha,
27Kusangwa sĩwendĩsyasĩga ekĩrĩmũ kyage omo Kũlĩmũ,
Kutse siwendisyaleka Omũbũyĩrĩre wawe erilola okwʼihonda.
28Wabĩrĩnyĩmĩnyĩsya esyonzira syʼengebe,
Kandi embere syawe Wasyanyĩgũlya nʼobutseme.
29Balĩkyetu, nanga babwira ndekendeke busana na tata-kulu Dawĩdĩ. Iye mwahola kandi mwatabwa, nʼamahero wuwe akine haguma netu hano mũnabwĩre. 30Abya mũmĩnyererĩ, kandi abya asĩ ko Nyamuhanga amulaga endagane. Nyamuhanga mwamũlahĩrya ati akasyahĩra omundu muguma gʼoko bana buwe mo mwami. 31Dawĩdĩ mwalangira ekyo Nyamuhanga akandisyakola, neryo mwahula erĩlũbũka lya Kristo ati, Sĩendĩsyasĩga ekĩrĩmũ kiwe kyʼomo Kũlĩmũ, Kutse omubiri wuwe siendisyalola okwʼihonda. 32Nyamuhanga abĩrĩlũbũkya Yesu oyo oko baholĩ, netu ĩtwe bosĩ tuli balangĩrĩ bʼomwatsi oyo. 33Yesu abĩrĩhamĩbwa oko byala byʼamali bya Nyamuhanga, kandi abiribana uku Tata erilaga lyʼOmũlĩmũ Abũyĩrĩre, nʼebyo mukalangira lino nʼerĩowa nĩ lũsũnzo luwe abĩrĩtũtũlĩra. 34Kusangwa Dawĩdĩ mwatahetukira elubula, nĩkwa mwabũga ati,
Omwami Mukulu mwabwira Omukama wage ati,
Wĩkale oko byala byage byʼamali,
35Erĩhĩka aho nasyahĩrĩra esyonzĩgũ syawe,
Mo kĩtũmbĩ kyʼebisando byawe.
36Neryo abandu bosĩ ba Ĩsraelĩ baminye ndeke ngoko Nyamuhanga abiriyira Yesu oyo mwabamba oko musalaba, mo Mukama na Kristo.
37Neryo omugulu abandu bowa ebĩ, mobabya nʼobũlĩge bunene, mobabwira Petero nʼabandi bakwenda bati, Balĩkyetu, tuyire tuti kwehĩ? 38Petero mwabwirabo ati, Mubindule emitima yenyũ, muleke ebibi, kandi obuli mundu abatĩsĩbawe omo lĩna lya Yesu Kristo busana nʼeribuyirwa lyʼebibi byenyũ, neryo mwasyabana olũsũnzo lwa Nyamuhanga yo Mũlĩmũ Abũyĩrĩre. 39Kusangwa endagane ya Nyamuhanga ni busana nenyũ nʼabana benyũ na busana nʼabosĩ abali ehali, abosĩ abo Mukama Nyamuhanga wetu asyabirikira.
40Neryo Petero mwatũlago omo bindi bĩnywa bingi, kandi mwahatikanabo ati, Mũyĩlamaye oko lulengo lubi olũ! 41Neryo abo, abĩkĩrĩraya ekĩnywa kiwe mobabatĩsĩbwa. Neryo oko kiro ekyo, abandu nga elfu ĩsatu (3,000), mobatomekerwa oko ndeko yabo. 42Neryo mobasiba bakiga erĩkangĩrĩrya lyʼabakwenda nʼeribya buguma nabo. Kandi babya bakahĩka oko mesa yʼomukama nʼokwʼisaba.
Emigendere yʼabĩkĩrĩrye
43Neryo abakwenda mobakola ebyʼeriswekera nʼebitiko-tiko bingi, nĩkwa obuli mundu mwabya nʼobuba. 44Neryo abĩkĩrĩraya bosĩ mobabya haguma, mobasangira ebindu byosĩ byo haguma. 45Kandi mobagũlya esyombibi syabo nʼebindu byabo, ibakasangira ebindu byosĩ ebyo nʼabandi bosĩ, ngʼobwaga bʼobuli mundu. 46Kandi obuli kiro mobasiba bakahĩndana omo Hekalũ nʼomutima muguma. Neryo mobahĩka oko mesa yʼomukama omo buli nyũmba, ibakalira ebyalya byabo haguma-guma, nʼobutseme nʼomutima wʼerĩyĩkehya. 47Babya bakapipa Nyamuhanga nʼerĩsĩmwa nʼabandu bosĩ. Kandi Omukama mwatomekera eko ndeko yabo obuli kiro abalamĩbawa.
נבחרו כעת:
Emĩbĩrĩ 2: KB80
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Bible in Kinandi © Bible Society of the Democratic Republic of Congo, and Bible Society of Uganda, 1980.