Emĩbĩrĩ 1
1
Uwe Tahi Teofilo
1Omo kitabu kyage kyʼerĩmbere monakusakira emyatsi yosĩ eyo Yesu akola nʼerĩkangĩrĩrya, erĩtsũka ekiro ahasa omũbĩrĩ, 2nʼerĩhĩka oko kiro atwalawa endata elubula. Nĩkwa embere wʼeritwalwa liwe endata, mwahana abakwenda abo ayisoga eribya buwe, omo bũtokĩ bwʼOmũlĩmũ Abũyĩrĩre. 3Omo biro makũmĩ ani enyũma wʼobuligo buwe, Yesu mwayĩkangya kubo esyongendo nyingi kwʼaneho, omo bĩmĩnyĩsyo bingi byʼekwenene. Kandi mwabutukira kubo, iniakabwirabo emyatsi yʼobwami bwa Nyamuhanga. 4Neryo abakwenda babere babĩhĩndana, Yesu mwahanabo ati, Sĩmũlũe eYerũsalema, nĩkwa mulinde oyo Tata wage alaga, yo nʼoyo nabagambulira. 5Kusangwa Yoane mwabatĩsya omo magetsi, nĩkwa ĩnywe mwasyabatĩsĩbwa omo Mũlĩmũ Abũyĩrĩre hate hakya biro bingi.
Yesu akatwalawa endata elubula
6Neryo abakwenda babere bahĩndana haguma, mobabũlya Yesu bati, Mukama, ũkandĩsũbya obwami uku Ĩsraelĩ mangahano kwehĩ? 7Yesu mwabwirabo ati, Tata abiritegeka emigulu nʼebirimo omo hamũlĩ yiwe ĩyowene. Kandi si mwatsi wenyũ eriminyabyo. 8Nĩkwa mwasyabana obũtokĩ omugulu Omũlĩmũ Abũyĩrĩre asyabahĩkako. Kandi mwasyabya batũlĩ bʼomwatsi wage eYerũsalema nʼomo Yũdea yosĩ, nʼeSamarĩa, nʼerĩhĩka oko ndũlĩ-ndũlĩ syʼekihugo. 9Neryo abere abĩbũga emyatsi eyĩ, Yesu mwasumbirwa endata ibanatungerere, nʼekĩtũ mokyamwĩmya erĩlũa oko meso wabo.
10Nĩkwa babere banemulalamira omo kyanya akagenda, neryo lebaya, abandu babiri abʼesyongimba nyeru-nyeru, mobahangana hakũhĩ nabo, 11bati, Ĩnywe balume bʼeGalĩlaya, busana nakĩ mukahangana aho mukasamalira omo kyanya kwehĩ? Yesu oyukabitwalwa elubula akalũa ũkwʼĩnywe, asyaswasa atya ngoko mukabimusamalira akaya elubula.
Oyukasuba omo mwanya wa Yũda
12Neryo mobasuba eYerũsalema bakalũa oko kitwa ekikahulawa mo Zeĩtũnĩ, ekiri hakũhĩ nʼeYerũsalema ngʼekilometre kiguma. 13Neryo babere bahĩka eYerũsalema, mobahetukira endata omo kyumba kyʼenyũmba aho babya bĩkere. Nabo babya Petero, na Yoane, na Yakobo, na Anderea, Fĩlĩpo na Toma, Bartolomayo, na Matayo, Yakobo mugala wa Alfayo, na Sĩmonĩ-Zelote, na Yũda mugala wa Yakobo. 14Abosĩ abo mobahĩndana okwʼisaba emigulu yosĩ, haguma nʼabakalĩ, na Marĩa nyĩnya wa Yesu, nʼabagala babo Yesu.
15Oko mugulu oyo, Petero mwahangana omwʼĩhĩndana lyʼabalĩkyetu, abandu ngʼerĩgana liguma nʼamakũmĩ abiri. Neryo mwabũga ati, 16Balĩkyetu, Amasako abya atolere eribererera ago Mũlĩmũ Abũyĩrĩre aminyerera omo buno bwa Dawĩdĩ busana na Yũda, oyo wabya mũsondolĩ wʼabatsimba Yesu. 17Yũda oyũ aganzawa haguma netu, kandi mwasangira netu omo mũbĩrĩ oyo.
18(Nĩkwa Yũda oyo, mwagula ekitaka omo bũgũlĩ bwʼebibi biwe; nʼaho mwatoga nʼomutwe wuwe mwatsũka ahisi, kandi mwatulika omo katĩkatĩ nʼebila biwe mobyasandukala. 19Kandi abandu bosĩ ababya bĩkere eYerũsalema mobaminya omwatsi oyo; kyaleka ekitaka ekyo ikyahulwa omo mũbũge wabo mo Hakeldama, kiti, Ekitaka kyʼomusasi.)
20Kusangwa kĩsakĩre omo kitabu kyʼesyonyimbo kiti,
Enyũmba yiwe ibye kĩhũma,
Sĩyĩsyesyĩkala mo mundu;
kandi,
Nʼomwanya wʼomũbĩrĩ wuwe, ogundi mundu ĩmayego.
21-22Neryo hatolere omundu muguma oyo wabya netu, busana nʼerĩtũla omwatsi wʼerĩlũbũka lyʼomukama Yesu. Atolere iniabya mundu oyo wabirisiba haguma netu emigulu yosĩ eyo Mukama Yesu alendera haguma netu, erĩtsũka okwʼĩbatĩsya lya Yoane nʼerĩhĩka oko kiro Yesu atwalawa endata akalũa ũkwʼĩtwe. 23Neryo mobahĩra embere syabo abandu babiri, ye Yosefũ oyukahulawa mo Barĩsaba, oyo wahulawa mo Yũsto, na Matĩa. 24Neryo mobasaba bati, Uwe, Mukama, ũnasĩ emitima yʼabandu bosĩ. Neryo Mukama, Ũkanganaye oko babiri aba, oyo wamayisoga, 25erĩĩmya omwanya wʼomũbĩrĩ nʼowʼobukwenda ogo Yũda asĩga akakitira ehandi eriya aho wuwe. 26Neryo mobakola obukanga busana nabo, nʼekura moyatogera uku Matĩa; neryo Matĩa mwaganzirwa oko bakwenda erĩkũmĩ nʼomuguma.
נבחרו כעת:
Emĩbĩrĩ 1: KB80
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Bible in Kinandi © Bible Society of the Democratic Republic of Congo, and Bible Society of Uganda, 1980.