Màtéwò 17
17
Ìwànwà-Yèésù kpàrɔ̀ nódzú-ɔmatsɛ́‐ɛ̀ ŋa
(Mákò 9:2-13; Lúkà 9:28-36)
1Ɔdzɔ́ mɛ́ɛfà náànyì-bɛ́ɛ̀, Yèésù gbɛ̃́ Òkúta òŋu Yàkúbù má nára-Yòhánà† ɔmànà-Yàkúbù, tsí à lɔ ńǹtá-òkè gíga-kã̀. Àŋa mɛ́ɛrɛ̃#ɛ́ gé ní káà wà bɛ̀ si#ɛ́. 2Tsí ìwànwà‐ɛ̀ kpàrɔ̀ nódzú-ŋa gbòkã́. Àtɛ̀dzú‐ɛ̀ wà kɔ nyɛ̀nyɛ̀nyɛ̀ kíbí odzúùrɔ̃̀ bɛ́, tsí èbò-ara‐ɛ̀ ŋa gbo wà fṹ pémpém kíbí àlà bɛ́. 3Gbòkã́#á, Èlíyà† òŋu Mɔ̀ɔ́sè† bɔ́, tsí ɔmatsɛ́ ŋa#á rí ŋa, tsí à wà wíìnyɛ̀ bá Yèésù.
4Tsí Òkúta tsí arũ, tsí wà fɔ̀ fú Yèésù ní: Ɔ̀gá! Ó sã̀ héŋú ní àwa gbo, àa wà ńbíbɛ́ si. Ó ɖi, bí ó wò, òŋu nákó kɔ́ awúrɛ́ mɛ́ɛta si bí. Ɔ̀kã̀ nákó dzɛ́ tɛ̀ɛ̀, tsí ɔ̀kã̀ gbo nákó dzɛ́ ti Mɔ̀ɔ́sè†, tsí ɛ̀kɛ́ɛta‐ɛ̀ nákó dzɛ́ ti Èlíyà.
5Oŋù-Òkúta kò dzilɛ̀ wòná tã́ná, tsí irì mímá-kã̀ ɖí, tsí bò ŋá málɛ̀ kpó. Tsí oŋù-kã̀ ɖɔ̃́ ti ńnɔ́-irì#ɛ́, tsí wà fɔ̀ fú ŋa ní: Ɛnɛ yèé bɛ́#ɛ́, Ɔma bíbí-mi ni, tsí ó dzɛ́ àrínódzú-mi gbo. Iŋɛ́‐ɛ̀ dzɔdzú-mi tó bɛ́ɛ̀, è rɛ̃tígbè‐ɛ̀.
6Tsí kíbí ɔmatsɛ́-Yèésù† ŋa#á gbɔ́ oŋù#ɛ́, dzidzi mú ŋa tó bɛ́ɛ̀, tsí à sũ̀, tsí módzú ɖélɛ̀.
7Tsí Yèésù tìmá ŋa, tsí mɔ́wɔ́ kã̀ ŋá, tsí fɔ̀ fú ŋa ní: Ká máa sá, ká ǹɖe ɖóro!
8Tsí à tsíìkpárè, tsí à kò rí ɔ̀nyà-kã̀ kpókpó ró náànyì-Yèésù òŋu níìkã̀ntso.
9Tsí à ǹɖe, tsí tì nóòkè#ɛ́ bàa, tsí Yèésù kɔ̀ fú ŋa ní: Iŋɛ́ yèé à rí#ɛ́, ká máa kpɛ̀rɔ́‐ɛ̀ fú ɔ̀nyà-kã̀ kpókpó títí káà fú ɔdzɔ́ yèé òŋu, Ɛnɛ yèé ɔ̀nyà bí#ɛ́†, òŋu nákó sɛ̃̀ dzí ti náàŋírĩ-òkú ŋa wá náyé#ɛ́.
10Tsí ɔmatsɛ́‐ɛ̀ ŋa bèrèé ní: Kí tse tsí akɔ́nɛ nɛ́kpa-Ɔ̀ɖáyé† ŋa náa fɔ̀ ní ó wà ní Èlíyà kó sɛ̃̀ wá tã́ná Ɔ̀ɖáyé kó bɛ Kírísítò Agbanɛlà wá ná?
11Tsí ó wà dzɔ́ŋù fú ŋa ní: Ìɖéǹɖè ni. Ó wà ní Èlíyà kó wá, tsí kó wáa tɔ́tse iŋɛ́ ŋa kpó si tã́ná Kírísítò#ɛ́ kó wá. 12Ó ɖi, òŋu wà wí fú ŋa ní fee, Èlíyà ti wá ná, tsí ɔ̀nyà ŋa kò ríi mà. Tsí à tse báa kíbí ó wù ŋá gbà#á. Tsí bɛ́ɛ̀ ké ní à nákó wáa mú òŋu, Ɛnɛ yèé ɔ̀nyà bí#ɛ́ gbo réré#ɛ́ ńnɛ̀ɛ́.
13Tsí ɔmatsɛ́‐ɛ̀ ŋa gbɔ́ òkpì‐ɛ̀ ńǹkɛ̀ɛ́ ní afɔ̀-Yòhánà Awɛ̀fúnɛ ní ó wà fɔ̀ fú àŋa#á.
Yèésù lé edzò-kã̀ sɛ̃̀ náànyì-maɖé-kã̀
(Mákò 9:14-29; Lúkà 9:37-43)
14Yèésù òŋu ɔmatsɛ́‐ɛ̀ ŋa wáa tó ńbí ɔ̀nyà ŋa kpérí si#ɛ́, tsí ɔnɔkɛ̃̀ɛ̃-kã̀ tìmá Yèésù, tsí kálɛ̀ nábɛ́‐ɛ̀, 15tsí fɔ̀ fúu ní: Ɔ̀gá! Kó rí ànyínɔ́ fú ɔma-òŋu ɔnɔkɛ̃̀ɛ̃ ɖé! Ó wà rĩrɔ̃̀-tsubútsubú, tsí ó wà réré kpíkpɔ̀, tsí náa wà tsubú sɔ ńná nàmí nómi kpeékpeé gé ni. 16Tsí òŋu gbɛ̃́ɛ̃ lɔ fú ɔmatsɛ́‐ɛ̀ ŋa. Ó ɖi, à kò nyáa bɔɔ́.
17Tsí Yèésù tsí arũ, tsí ní: Ɛ̀ŋɛ, ɔma-ìsɛ̃̀ɛ̃́ ŋa, ɔ̀nyà-íbàɖí ŋa yèé è dzɛ́ si#ɛ́, è kè nɛ́ àkaralé nɛ́! Ìwèrè mɛ́ɛló màa tse bá ŋɛ́ ná? Gbà mɛ́ɛló màa módzú gbó, tsí wà gba iŋɛ́ yèé è wà tse ŋa#á?
Tsí ó nyí, tsí ní: Ká gbɛ̃́ ɔma#á wá fú òŋu bí.
Tsí à gbɛ̃́ɛ̃ wá fúu. 18Tsí ó gbãdzú fefe bá edzò† yèé wà ɖɔ́kpɔ fúu#ɛ́, tsí edzò#ɛ́ sɛ̃̀ náànyì‐ɛ̀, tsí ti náàsòkò nyɛ̀ŋɛ̀ ké ní àrɔ̃̀#ɛ́ gbo tã́ fú ɔma#á.
19Ńǹwèrè yèé ɔmatsɛ́‐ɛ̀ ŋa sɔ̃́ŋú wà ńɖɔ̀-ɛ̀ si#ɛ́, à tìmá‐ɛ̀, tsí bèrèé ní: Kí tse tsí àŋa òŋu, àŋa kò nyáa lé edzò#ɛ́ sɛ̃̀ náànyì-maɖé#ɛ́ ná?
20Tsí ó fɔ̀ fú ŋa ní: Iŋɛ́ yèé tse#ɛ́, àkaralé-ŋa kò gbó ni. Ó ɖi, òŋu wà wí òtítɔ́ fú ŋa ní fee, à má nɛ́ àkaralé, tsí kó tó kíbí ɔma-dzídzɛ yèé à náa kpè ní mùtáɖì#ɛ́ gìɖì bɛ́ gé, à má nyáa fɔ̀ fú òkè yèé bɛ́ ní: Kó sɔ́ ǹɖe bí, tsí kó lɔ káà gbé ńbɛ̀. Tsí ó má si tsɛ bɛ́ɛ̀ nóŋù yèé à fɔ̀ɔ́#ɛ́. À kàkó tse iŋɛ́-kã̀ kpókpó kũ̀. [ 21Ó ɖi, tã́ná ká nyáa lé edzò-ìrɔ́ nyɛ̀ŋɛ̀ sɛ̃̀ náànyì-nɛ#ɛ́, ó bere ìre wúwú òŋu arũ ɖíɖì.]
Yèésù wà fɔ̀ ró ní òŋu nákó kú, tsí sɛ̃̀ dzí ti náàŋírĩ-òkú ŋa wá náyé
(Mákò 9:30-32; Lúkà 9:43-45)
22Ó ɖi nɔ́dzɔ́-kã̀, tsí Yèésù òŋu ɔmatsɛ́‐ɛ̀ ŋa kpérí si ńGàlìlé, tsí ó fɔ̀ fú ŋa ní: À nákó mú òŋu, Ɛnɛ yèé ɔ̀nyà bí#ɛ́†, tsí à nákó mú òŋu bɔwɔ́-ɔ̀nyà ŋa, 23tsí à nákó kpa òŋu nóòkú, tsí nɔ́dzɔ́-ɛ̀kɛ́ɛta‐ɛ̀, òŋu nákó sɛ̃̀ dzí ti náàŋírĩ-òkú ŋa wá náyé.
Afɔ̀ yèé Yèésù fɔ̀#ɛ́ kò tì mú ara kú ɔmatsɛ́‐ɛ̀ ŋa bɔ̀.
Yèésù òŋu Òkúta sã owó-lómbà ti ilé-Ɔ̀ɖáyé
24Yèésù òŋu ɔmatsɛ́‐ɛ̀ ŋa lɔ káà tó ńǹlú-Kàfànàwú. Tsí ó ɖi nɔ́dzɔ́-kã̀, tsí agbalómbà ti ilé-Ɔ̀ɖáyé† ŋa tìmá Òkúta ńǹɖì-kã̀, tsí wà bèrèé ní: Akɔ́nɛ-ŋɛ́ náa sã owó-lómbà-ilé-Ɔ̀ɖáyé nɔ̀?
25Tsí Òkúta dzɔ́ŋù ní: Ɛ̃ɛ̃! Náa sãã́.
Tsí ó ǹɖe bɛ̀, tsí lɔ ńlé ńbí Yèésù wà#á.
Tsí Yèésù tsɛ̃̀tsɛ̃̀ tsóŋù, tsí wà bèrèé ní: Sìmɔ́nì, náàŋírĩ-ɔma-olí-ìlú òŋu àledzò fe, nɛ̀ɛ́ má sã owó-lómbà fú ólú-ìtalɛ̀ bí ŋa? Sérèé káyí.
26Tsí Òkúta dzɔ́ŋù ní: Àledzò ni.
Tsí Yèésù fɔ̀ fúu ní: Bí ó dzɛ́ bɛ́ɛ̀ ná, kò kpã́dzú ní tiŋà ŋa kó sãã́ ńnɛ̀ɛ́ nɔ̀? 27Ó ɖi, àŋa kó máa tse, tsí kó ɖɔ́kpɔ fú ɛnɛ yèé náa gba owó-lómbà ti ilé-Ɔ̀ɖáyé ŋa#á. Ńbɛ̀ɛ́, kó lɔ nóɖò, tsí kó sɔ ìwɔ̀. Tsí ɛdzã-àtsɛ̃̀tsɛ̃̀ yèé nákó fà fùɖá#á, kó tsí arũ‐ɛ̀, nákó rí owó-ɛyɔ ńnɛ̀, tsí kó kɛ́ɛ lɔ káà fú agbalómbà ŋa#á. Ó ɖi, tòŋu‐ɛ̀ méèdzì ńnɛ̀ɛ́.
© (Active), Wycliffe Bible Translators, Inc. All rights reserved.
