Màtéwò 18
18
Nɛ̀ɛ́ dzɛ́ ɔ̀gá nóyè-Ɔ̀ɖáyé?
(Mákò 9:33-37; Lúkà 9:46-48)
1Náàsòkò nyɛ̀ŋɛ̀#ɛ́, ɔmatsɛ́-Yèésù† ŋa sɔ́ tìmá‐ɛ̀, tsí wà bèrèé ní: Náàŋírĩ-ɛnɛ yèé Ɔ̀ɖáyé wà dzoyè si ńǹtá-ŋa#á fe, nɛ̀ɛ́ nákó dzɛ́ ɔ̀gá?
2Ńbɛ̀ɛ́, Yèésù kpe maɖé tsígíɖí-kã̀ wáa ɖóro náàŋírĩ-ŋa. 3Tsí ó fɔ̀ fú ŋa ní: Òŋu wà wí fú ŋa ní fee, bí ɔ̀nyà-kã̀ kò nyíìlò kpaɖà, tsí sɔ ara‐ɛ̀ ɖi maɖé tsígíɖí, Ɔ̀ɖáyé kàkó gbàá si nóyè‐ɛ̀. 4Ó ɖi, ɛnɛ yèé nákó tɛ ara‐ɛ̀ bɔlɛ̀ kíbí maɖé tsígíɖí yèé bɛ́#ɛ́, ɛnɛ#ɛ́ nákó dzɛ́ ɔ̀gá nóyè-Ɔ̀ɖáyé†. 5Bí ìwɔ-kã̀, ò gba ɔma tsígíɖí-kã̀ bɛ́ náàtsùgbé-èmi, èmi ká-mi ní ò gbà#á.
Ká tsɔ́ éwo-ara-wa rere, tsí ká máa sɔ́nɛ si náàbi ró
(Mákò 9:42-50; Lúkà 17:1-2)
6Bí ɔ̀nyà-kã̀ ɖi òkúta-àkɔ̀sɛ̀ fú ɔ̀kã̀-maɖé tsígíɖí nyɛ̀ŋɛ̀ ŋa yèé gba òŋu gbɔ́#ɛ́, ká mú ɔlɔ lákṹ rìgìɖìì-kã̀, tsí ń so nɔ́ɔ̀gɔ̃̀rɔ̃̀-ɛnɛ nyɛ̀ŋɛ̀, tsí kɛ́ɛ sɔ lɔ náàbù-àhũ, nákó sã̀ fúu lárè. 7Tsí àtsùgbé-iŋɛ́ yèé wà tse tsí à kò wà gba òŋu gbɔ́ ró#ɛ́, ɔ̀nyà-ìtalɛ̀ bí ŋa kú ɛ̀rá. Ó sì wà ní iŋɛ́ nyɛ̀ŋɛ̀ kó wà. Ó ɖi, nɔ́wɔ́-ɛnɛ yèé nákó ti#ɛ́, ɛnɛ nyɛ̀ŋɛ̀ kú ɛ̀rá.
8Tsí bí ó dzɛ́ ní ɔwɔ́-ɛ̀ɛ-kã̀ nàmí ɛsɛ̀-ɛ̀ɛ-kã̀ ní wà múɛ dzàbi#ɛ́, kée ǹɖe, tsí kɛ́ɛ sɔ taánù lɔ sã́ŋú sã́ŋú. Bí ò ɖi olákpá kíké nàmí olɛ́sɛ̀ kíké, tsí ò rí ɔlà, ó sã̀ fɛ́ɛ lárè ní ɔwɔ́-ɛ̀ɛ méèdzì méèdzì ŋa#á nàmí ɛsɛ̀-ɛ̀ɛ méèdzì méèdzì ŋa#á kó wà si, tsí ká kɛ́ɛ sɔ lɔ ńná-àrìtã́. 9Bɛ́ɛ̀ ké ní bí odzú-ɛ̀ɛ-kã̀ wà múɛ dzàbi#ɛ́, nà nyàá ǹɖe, tsí kɛ́ɛ sɔ taánù lɔ sã́ŋú sã́ŋú. Ó ɖi, odzú-kã̀ kó wà fɛ́ɛ, tsí o rí ɔlà, ó sã̀ fɛ́ɛ lárè ní odzú-ɛ̀ɛ méèdzì méèdzì ŋa#á kó wà si, tsí ká kɛ́ɛ sɔ lɔ ńná-àrìtã́.
Yèésù mú àgùɖã̀-kã̀ yèé yagbo#ɛ́, tsí ń kpòwe fú ɔ̀nyà ŋa
(Lúkà 15:1-7)
10Yèésù ní: Ká tsɔ́ éwo-ara-ŋa rere, tsí ká máa nya odzú kã ɔ̀kã̀-maɖé yèé ŋa nyí. Ó ɖi, òŋu wà wí fú ŋa ní fee, adzítsɛ́-ɔ̀rɔ̃†-ŋà ŋa náa wà rí Ɔ̀ɖáyé Boba-òŋu nɔ́ɔ̀rɔ̃ fú ŋa làkóò làkóò gé ni. [ 11Ó ɖi, òŋu, Ɛnɛ yèé ɔ̀nyà bí#ɛ́† wá, tsí kó wáa gba ɛnɛ yèé nɔ̀ ŋa#á là ni.] 12Ká fɔ̀ ní ɔ̀nyà-kã̀ nɛ́ àgùɖã̀ ɔgɔ́ɔrú, tsí ɔ̀kã̀ yagbo náàŋírĩ-ŋa fe, kò ɖi kó kɔ ɔ̀kã̀ ɖí nɔ́gɔ́ɔrú yèé bɔ̀#ɛ́ dzɔ̀ɔ́ si ńǹtá-òkè, tsí lɔ ńǹwálɛ̀-ɔ̀kã̀ yèé yagbo#ɛ́ɛ̀? Ká tse ìsérè-afɔ̀ yèé káyí. 13Tsí òŋu wà wí fú ŋa ní fee, bí ó nyáa ríi ná, ɔ̀kã̀ nyɛ̀ŋɛ̀ nákó mú ayè tɛ́ɛ láre ɔ̀kã̀ ɖí nɔ́gɔ́ɔrú yèé kò yagbo ŋa#á. 14Bɛ́ɛ̀ ké ní Boba-ŋa nɔ́ɔ̀rɔ̃ gbo kà wò ní ɔ̀kã̀-maɖé yèé ŋa nyí kó yagbo#ɛ́ ńnɛ̀ɛ́.
Bí olí-Yèésù-kã̀ tse kò sã̀ nára-enìkéèdzì‐ɛ̀, bí ó wà ní enìkéèdzì‐ɛ̀#ɛ́ kó tse fáà?
15Yèésù fɔ̀ máa ní: Bí enìkéèdzì-ɛ̀ɛ tse kò sã̀ [nára-ɛ̀ɛ], nà lɔ káà ríi, tsí náàŋírĩ-ìwɔ‐ɛ̀ méèdzì gé, o fɔ iŋɛ́ yèé ó tse#ɛ́ fúu. Tsí bí ó rɛ̃tígbè-ɛ̀ɛ ná, ò gbàá nɔ́wɔ́-iŋɛ́ yèé ó tse#ɛ́ fú Ɔ̀ɖáyé ńnɛ̀ɛ́. 16Ó ɖi, bí ó kɔ̀ ní òŋu kàkó rɛ̃tígbè-ɛ̀ɛ ná, nà gbɛ̃́ ɔ̀nyà-kã̀ nàmí ɔ̀nyà méèdzì tɛ̀ náànyì, tsí e sɛ̃̀ lɔ ńɖɔ̀‐ɛ̀, àtsùgbée afɔ̀ kpó yèé è nákó fɔ̀#ɛ́ kó dzɛ́ ńǹtsodzú-ɔ̀nyà méèdzì nàmí mɛ́ɛta.#18:16 È káà kã Ìwé-Àkóro 19:15 (Deutéronome 19:15). 17Ó ɖi, bí ó kɔ̀ ró ní òŋu kàkó rɛ̃tígbè-àŋa gbo ná, nà kɛ́ afɔ̀#ɛ́ lɔ nɛ́gbɛ́. Tsí bí ó kɔ̀ gbo ró ní òŋu kàkó rɛ̃tígbè-ɛgbɛ́#ɛ́ gìɖì gbo ná, ɛnɛ#ɛ́ kó wà fɛ́ɛ kíbí ɛnɛ yèé kò ma Ɔ̀ɖáyé#ɛ́ nàmí agbalómbà-kã̀ bɛ́. 18Ó ɖi, òŋu wà wí fú ŋa ní fee, iŋɛ́ ɔ̀kã̀lɔ́ɔ̀kã̀ kpó yèé à nákó kɔ̀ ńǹtalɛ̀ bí#ɛ́, à nákó kɔ̀ɔ́ nɔ́ɔ̀rɔ̃ gbo. Tsí iŋɛ́ ɔ̀kã̀lɔ́ɔ̀kã̀ kpó yèé à nákó gbà si ńǹtá‐ɛ̀ ńǹtalɛ̀ bí#ɛ́, à nákó gbà si ńǹtá‐ɛ̀ nɔ́ɔ̀rɔ̃ gbo. 19Tsí òŋu wà wí fú ŋa ró ní fee, bí ɔ̀nyà méèdzì náàŋírĩ-ŋa mú arũ ɖé ńǹtalɛ̀ bí, tsí bere Boba-òŋu yèé wà nɔ́ɔ̀rɔ̃#ɛ́ ńŋɛ́-kã̀, nákó fú ŋa ńnɛ̀. 20Iŋɛ́ yèé tse#ɛ́, bí ɔ̀nyà méèdzì mɛ́ɛta tse àtsùgbé-òŋu, tsí kpìɖé, òŋu wà náàŋírĩ-ŋa.
Àtsìtsɛ́-kã̀ kɔ̀ ní òŋu kàkó ń tɔrɛ fúnɛ
21Òkúta tìmá Yèésù, tsí wà bèrèé ní: Ɔ̀gá! Bí ìnàbí-òŋu-kã̀ wà tse kò sã̀ nára-òŋu fee, gbà mɛ́ɛló ó wà ní òŋu kó ń tɔrɛ fúu ná? Òŋu kó wà ń tɔrɛ fúu títí fú gbà méedzeè?
22Tsí Yèésù dzɔ́ŋù fúu ní: Óòó! Òŋu kò fɔ̀ fúu ní kó ń tɔrɛ fúu títí fú gbà méedze gé. Ó ɖi, òŋu ní títí fú gbà maá lé nɔ́gɔ́ɔta ɔ̀nà méedze. 23Àtsùgbée bɛ́ɛ̀#ɛ́, ká rí kíbí Ɔ̀ɖáyé nákó dzoyè gbà#á gé! Ólú-kã̀ wò ní òŋu kó sére iŋɛ́-òŋu ŋa yèé wà ńɖi-àtsìtsɛ́-òŋu ŋa#á. 24Tsí kíbí ó kpée si ńnɛ̀#ɛ́, à gbɛ̃́ àtsìtsɛ́‐ɛ̀-kã̀ wá fúu. Àtsìtsɛ́#ɛ́ dzɛŋɛ̀ ɛ̀gbɛ̀lɛ́ɛ̀gbɛ̀-kã̀ nɔ́wɔ́‐ɛ̀. 25Tsí àtsìtsɛ́#ɛ́ kò nɛ́ iŋɛ́ yèé kó ń sã ɛŋɛ̀#ɛ́, tsí ɔ̀gá‐ɛ̀ fɔ̀ ní ká múu tà, tsí ta aya‐ɛ̀ òŋu ɔma‐ɛ̀ ŋa má nára-iŋɛ́ yèé ó nɛ́ ŋa#á gbo kpó, tsí ká ń sã ɛŋɛ̀#ɛ́. 26Tsí àtsìtsɛ́#ɛ́ kálɛ̀ nábɛ́-ɔ̀gá‐ɛ̀ gìrì, tsí mú erí kãlɛ̀ fúu, tsí wà fɔ̀ fúu ní: Kó gbódzú ɖé! Ó ɖi, òŋu nákó sãã́ fúu kpó. 27Tsí ɔ̀gá‐ɛ̀ rí ànyínɔ́ fúu, tsí mú ɛŋɛ̀#ɛ́ tɔrɛ fúu, tsí kɔ̀ɔ́ dzɔ̀ɔ́, tsí ó lɔ.
28Kíbí àtsìtsɛ́#ɛ́ gbo fùɖá bɛ̀#ɛ́, ó kpàɖé àtsìtsɛ́ enìkéèdzì‐ɛ̀-kã̀ yèé dzɛŋɛ̀ tsígíɖí-kã̀ nɔ́wɔ́-òŋu gbo#ɛ́. Tsí ó múu, tsí dzi ɔ̀gɔ̃̀rɔ̃̀‐ɛ̀, tsí ní: Kó sã ɛŋɛ̀-òŋu fú òŋu. 29Tsí enìkéèdzì‐ɛ̀#ɛ́ gbo kálɛ̀ nábɛ́‐ɛ̀ gìrì, tsí tsìkálɛ̀ fúu ní: Kó gbódzú ɖé! Ó ɖi, òŋu nákó sãã́ fúu. 30Tsí ó kɔ̀, tsí yèé yɔ#ɛ́, ó múu lɔ káà sé si títí fú ɔdzɔ́ yèé nákó sã ɛŋɛ̀‐ɛ̀ fúu#ɛ́. 31Àtsìtsɛ́-àtíbɔ̀ ŋa rí ìɖì-iŋɛ́ ŋa#á, tsí ó kpara fú ŋa tó bɛ́ɛ̀, tsí à lɔ káà tòó kpó fú ɔ̀gá-ŋa.
32Ńbɛ̀ɛ́, ɔ̀gá#á ní ká kpèé wá fú òŋu. Tsí kíbí à kpèé wá#á, ó wà wí fúu ní: Àtsìtsɛ́ yíyàábàɖí-kã̀ ní ó dzɛ́#ɛ́! Òŋu, òŋu mú ɛŋɛ̀ ɛ̀gbɛ̀lɛ́ɛ̀gbɛ̀ yèé ó dzɛ nɔ́wɔ́-òŋu#ɛ́ kpó, tsí ń tɔrɛ fúu. Iŋɛ́ yèé tse#ɛ́, ó tsìkálɛ̀ fú òŋu. 33Tsí òŋu gbo kàkó nyáa rí ànyínɔ́ fú enìkéèdzì‐ɛ̀ ńǹrɔ́-kíbí òŋu ká-òŋu gbo, òŋu rí ànyínɔ́ fúu#ɛ́ɛ̀? 34Tsí ɔ̀gá#á bínɔ́, tsí mú òŋu gbo lɔ káà si nɛ́ɛ̀ŋà, tsí ká wà fɛtí fúu bɛ̀ rere títí fú ìwèrè yèé nákó sã ɛŋɛ̀#ɛ́ kpó fúu#ɛ́. 35Tsí Yèésù ní: Ó ɖi, bí ìwɔ-kã̀ afɔ̀-enìkéèdzì-ɛ̀ɛ kò tã́ ńnɔ́-ɛ̀ɛ, tsí o ń tɔrɛ fúu, bɛ́ɛ̀ ké ní Boba-òŋu nɔ́ɔ̀rɔ̃ gbo nákó wáa tse báɛ#ɛ́ ńnɛ̀ɛ́.
© (Active), Wycliffe Bible Translators, Inc. All rights reserved.
