Matiu 8
8
Yesu sipi hepuhi lo'ehina bomofihi le'mo bati hu'ehina
Mk 1:40-45; Lk 5:12-16
1Yesu kosaguti limitogo babu boana'magi mege'i bi'ahana. 2To sipi hepuhi lo'ehina bo moneuba Yesutoga oto lahupa nohi fito lu'ehina: Sipi bomaka. Kai kegekesa kehelito nugufa'ni le'mo bati hilata'mu nohane. 3Ya ligo Yesu yatu su toto gufa'alo bako huto ma lu emi'ehina: Nani ya hilube'mu nohuto kugufaka gulu gulu hilinagi kehepuhaka asu ho'ehina, Yesu ya luto ligo ana'asilo hepuha'a asaga'na asu hoto fenene hu'ehina. 4Ya higo Yesu lu emi'ehina: Kehelibo. Fato fato bona'magi kaga lu meepibo. Mono bomofitoga buloto kugufaka lepibo. Ai bu go bati huto higo mone nona'a Mosehi koyapa'i kaga molo'ehinamo'mu mono bomofihi emibo. Ya huletogo asaga bona'i enubulo kugufaka gulu gulu'ehinana bu kagalabe, Yesu lu'ehina.
Sipi Lomu bomofihi koko pana'a besi'ehigo Yesu le'mo bati hu'ehina
Lk 7:1-10
5To Yesu kapo moloto mone hepato Kapaneami tito nohigo mone Lomu gimi bouba oto lu emi'ehina: 6Sipi bomaka nehe'mobo. Koko pana'ni moneuba hepa'nimogu sipi besito nebelusaga minoba minoba nohigo gabu sipi'a nogibe, luto ligo, 7Yesu lu emi'ehina: Hepakaloga buto le'mo bati hilube. 8Gimi bouba lu'ehina: Ya hilapi? O'e. Nani fa'mene bo nohunagi kai noha'nigu metilane luto nokehelube. Kai fa'mene lusa ka'ago litogo koko pana'ni gufa'aluga bati hilibe. 9To hena'mube? Nani ana huto napa li'ehina sipi bomofihi maha'aluga nohugo lili'na nonimina yabe. To nani'ni ana huto gimi bo'ni nehana nani namanuga ana hite nehabe. To nani mone kene'mofihi bubo luto nolugomo ai bulata nohibe. To mone fato'amofihi obo luto nolugomo a'olata nohibe. To koko pana'nimofihi ya lili'na libo luto nolu etogomo ana lili'na lilata nohibe.
10Ya luto ana bouba Yesuhi lu emilago Yesu ana ka'a keheliloto ekesa yigi babu lu emi'ehina. Ya huloto boana'i mege'i lefeli'ali hana kaga ma luto lu epi'ehina: Kehelilo. Nani lu nolepube. Isilaeli bo moneuba ya'ma bouba hina'a huto komopa'a li nimi'ehina bu megolata nohube. 11Lenekesu meheno. Asaga'i yege notinagati noliminagati fato fato hepatogati ete'ani Hu'mamofihi kapo'alo Abalahagi, Isakagi to Yakopugi li nupa hilete minete'ani nose'na nalabe. 12To Isilaeli bona'i mone'amagi ana kapo'alo tilune'mu nehago Hu'mau fegutoga sipi metepumogu he'mi epalalibe. Fegutoga sipi yibi hiba hiba hilete enabaga heni kofilabe. 13Yesu gimi bomofihi lu emi'ehina: Hepakaloga abubo. Keheli ule'ale huse'naka, to komopaka li nimi'ahatana ya'ma huto hilibe, Yesu luto lu'ehina. Ana kana'agu mele'isi ya'ma gimi bomofihi koko pana'a le'mo bati hu'ehina.
Yesu babu luto epesina bona'i li bati hu'ehina
Mk 1:29-34; Lk 4:38-41
14Yesu Pitahi noha'agu buloto bu ganamo Pitahi litayami'afipo gufa mukoho akohona besi'ehigo sipalo ko'ehigo bu go'ehina. 15Yesu ana a'mofihi yahi bako huto besinana'a mele'isi fa hu eto'ehina. Ana a'uba sipaloti ho tito nose'na laita hu epoloto gabu ito epi'ehina.
16Utepoya bona'magi babu bona'i epesina foipa felemo ti'ahana bona'i Yesutoga enele'mete e'ahana. Ya nehago Yesu ana foipa felemagi amuya kaga'asigo moneko'isi lu epigo bi fa hi'ahana. To fato epesina bona'i hiti enele'mo bati hu'ehina yabe. 17Ai ana huto hu'ehinagi koyapa'i Aisaiyau bu go'ohuto kaga molo'ehina: Ai lebesise'namo li he'mi leto'ehibe. Ai lugufati sibina hu'ehinanamo aigoko'i kofito bu'ehina.
Bona'i Yesuhi mege'i malalune lite hi'ahana
Lk 9:57-62
18Yesu babu boana'i li nupa hilete nehago bu goto koko pana'amagi lu epi'ehina: Muya hefutoga bilutagihe. 19Kaga lu noepinogo keya ka enelepise bo moneuba aitoga oto ma lu'ehina: Tisao, kai hiti hiya'aga bilapi bilatamoga bilube luto nele'moto bilu'ibe luto lu'ehina. 20To Yesu lu emi'ehina: Lopi kalamo kalina muli'i ni'ibe to namamo kalina nohi ni'inaya to Kokulumaguti limi'ehina Bouba koto basu bilina hepa'i meni'ibe luto lu emi'ehina. 21To bo mone Yesuhi mege'i molo'ehinanauba lu emi'ehina: Kibina bo'nio, yata'a hepa'niga buloto'ni afo'nifu fililenogo keli hoto i behe huto kai hiti nani hiti minalu'ibe luto ligo, 22Yesu lu emi'ehina: Kai nemege'i molobo. Fili'ahanana bona'i komopa'ani menimise'namagi fili'ehina bona'i keli halabe, Yesu ya lu'ehina.
Yesu sipi habafahi lu emigo felele hu'ehina
Mk 4:35-41; Lk 8:22-25
23Yesu hiti koko pana'amagi hiti botigu tilete hefuhu nagamilugu bi'ahana. 24To Yesu bu'i ko'ehina. Ya hu'ehigo mele'isi amuya habafahi hefupoguti liloto nagami'mouba bililoto sipinamo botigu folo'ehina. 25To koko pana'a Yesutoga le'mo ho tilete ma lite li'ahana: Sibi bo yale. Lali ma'asi afililuta'a nohinagi lehe'mobo. Mele'isi. 26Yesu lu epi'ehina: Koli gofana nehana henabe lutobe? Nani kumu kehelise'natini nesi'asi ni'igo ule'ale hitemo memine'ahabe. Ko'ehinati ho tiloto ana sipi amuya habapofihi hiti to nagami'i bilina hiti kaga lu etimigo analo mele'isi felele huto bu'ehina. 27Ya hu'ehigo asaga bona'i enelesa'ani li'ahana. Ma bose. Henana bo nohibe? Habapofihifi nagami'i bilinamofihifi kaga lu epigo enali ka'a keheli emina bo yabe, lite li'ahana yabe.
Bo loemale'i komopa'atitigu felemo nehago Yesu li he'mi'ehina
Mk 5:1-20; Lk 8:26-39
28Yesu kapo moloto'a hefupo muya beletoga heleko moloto Gatala bona'magihi kapo'anigu nehetigo bo loemale'i aitoga kene mala mala muliluguti e'aha'ibe. Ana bomale'i komopa'atitigu foipa felemagi ti'ahanagi luba hise nehite hagulu neta'ina bomale'i yabe. Yana hepa'mo mine'aha'igo fato bona'i koli nehite tilina mehi'ahana yabe. 29Yesu olenogo etali sipi kehe ilete: Hu'mamofihi pana'ise. Hena suhi hu le'etalube'mu nohane? Alihi asaga bona'i halata yupahi yatai aku le'ahalapiye? li'aha'ina yabe. 30Analo afehi yaga babu lite nose'na'ani line mane hite mine'ahana. 31Foipa felemagi Yesuhi loka he'ahana: He'mi lepelenogomo miya yagamagi enugufagu lele'mo molobo lago, 32Yesu: Abilo, luto enoho lifi'ehina. Ya higo enali ana foipa felemagi bomale'ititihi he'mite yagamagi enugufagu tite falago ana yaga enali asaga'i yabatoga limilete bite hefunugu nofu ti su he'ahana yabe.
33Ya hago yaga afo'agi analoti he'mite hololu lite bite tauniga nehetite asaga huto hinanamo hiti bomale'i foipa fele komopa'atitigu nemina kagamo hiti lu epi'ahana. 34Ya lu epilago tauniga neminana boana'i asaga'na Yesutoga bilune litemo bi'ahana. Yesu nohinalo nehetite loka heba heba hite: Lali metimoloti he'miloto bufa hubo, lite li'ahana yabe.
© 1982, Wycliffe Bible Translators, Inc. All rights reserved.
