Matiu 7
7
Bona'i yasi legi enele'mo yegelo molose'mofihi ka hapa'a
Lk 6:37-38, 41-42
1Lenali bona'i enipakafa hete enele'mo yegelo memalalo. To Hu'mau alihi lenali'i lenele'mo yegelo ana huto memalalibe. 2To Hu'mau hu'ehilata bameto li moloto kele'mo yegelo malalina'mu yabe. To kaga luto bona'i ya amuya'niloti yabe lilata Hu'mau ana mone'ago kagaloti kele'mo yegelo malalina'mu yabe. 3Kai kogonakamofihi pehena bugu nina hena hibe luto gili gili nohu etane? Kai kubukagu kefa fulupa sipi'a ana huto ko'ehina bu goto li he'miloto hubo. 4Kefa fulupa fela'a kubukagu ni'ilina li mehe'mise hena hibe luto kogonakamofihi ma luto lu emilata ni'ibe: Nogonao, pehena kubugu ni'ina li he'mi ketaluna bati huto ni'ifihe? Ya luto lilapiye? 5Kai faga fagalo bo. Yata'a kai kubukagu kefa fulupa fela'a koyofo hu'ehina li he'miloto yalo bu go fana to'ohuto kogonakamofihi buguti pehena li he'mi etobo.
6Lenali hetofa nasana kalamagihi meepilo. Enali i behe hite heni lepele lalabe nolube. To lenali pesesutini hetofa hatofa'a yagamagihi meepilo. Enali pesesutini libe hepulu tibe hite lapasa i lalabe nolube.
Bo amuya moloto nunumu foya nolina
Lk 11:9-13
7Lenali Hu'mamofitoga nunumu hite kehe ilenogo lepilibe. Lenali sa sa hite lilabe. Lenali kasito inogo Hu'mau kafe sigi lepalalibe. 8Bona'i enali Hu'mamofitoga loka hete nunumu nehana. Ai epilata nohibe. Bona'i sa sa hilinauba li huto hulata nohibe. To kasito noina bona'mofihi kasihi hokolo hu etolata nohibe. 9To lenali afo'anigita panatinimagi nose'namu kehe neinogomo efa kosahi li epilana ni'ifihe? 10To faya kumu kehe neinogomo osifa'i li epilata nehafihe? O'e, ya menehabe. 11Ya hu'ehinagi lenali bati menehana bona'magita yagapanatinimagihi hetofana epilata nehinogomo yalo lali kehelilune, Hu'ma Afotinifu kokulumalugu nohinauba lenali nunumu hu emite ya hite hilana bona'i hetofana lepilina'mu yabe.
12Nanitoga ya suhi hu netalo luto kekesa noyigilata suhi enali fato bonatoga ana suhi hu epolobo. Ya'ma ai Mosehi keya ka'amofihi hapa'a koyapa'i ninamolo to lu yege hose bona'magihi kaga enelepise'na'ani hiti mana'a ni'ibe.
Hetofana huto minosemofihi lagaso kapo'a
Lk 13:24
13Lenali kitili kapoguti ti hokolo hilo. Fenene huse hepa'i logo kapolo bu'ehina kapoya ai sipi fela kapo hokolo huto bu'ehibe. Ya hu'ehigo yege yege boana'i ana kapogu bilata nehabe. 14To hetofa hepato buse kapoya ai kitili'i ni'igo ana kapomofihi lili'na'a ule'ale huto lise suhi huto ni'ibe. Ya hu'ehigo mone'isi mone'isi boana'magi ana kapolo sa hite bilata nehabe.
Lali fagalo lu yege hose bomagihi kaba hu bati hilune
Lk 6:43-44
15Lenali fagalo lu yege hose bomagihi kaba hu bati hilo. Enali sipisipi yagamofihi gufa'a gukete li hekelelete lenalitoga elata nehabe. Ya hi'ahana enali komopa'anigu lopi kala suhi hite nehanago lenali'iya lenehete salu kite nalana'mu yabe. 16Enali hilana hapa'aniya lenali enogo hokolo hite bu enagalana'mu yabe. Ufehe yafamagi nemuya legeya'a helata menehabe, to nemuya yafamagi ufehe yafamofihi legeya'a holata menehabe. 17To bati huto mesebe lele tele huto tilata nohina yafauba legeya'a bati huto sipina holata nohibe, to numutopa loloto sako bako logo huto lilata nohina yafauba legeya'a sibina huto lagaso'asi holata nohibe. 18Mesebe lele tele huto bati huto tilata nohina yafauba legeya'a mone sibina huto holata menohibe, to numutopa ito sako bako huto lilata nohina yafauba legeya'a bati huto sipina mone holata menohibe. 19To yafa luga'amagi enali nose'na legeya'a meholata nehanaya laga huto logogu gelata nehabe. 20Ya huto ni'inagi fagalo lu yege hose bomagi hilana hapa'aniya lenali enogo hokolo hite bu enagalana'mu yabe.
Lenali'i mekeheli'ohube Yesu foipa bona kumu lilibe
Lk 13:25-27
21Asaga bona'i nani kumu'i: Kibina bo'nio, Kibina bo'nio, lilata nehana enali kokulumamofihi kapo'alo mebilana'mu yabe. To bona'i luga'amagi nani Afo'nifu kokulumalugu nohinamofihi bita hina suhi hilata nehana bona'isi enele'malina'mu yabe. 22Ana kana'a huto hilina yupahi babu boana'magi ma lite lilana'mu yabe: Kibina bo'nio, Kibina bo'nio, kai kigilo Hu'mamofihi mono ka'a lu epi'ohuta yabe, to kai kigilo babeyafana sipi lili'na li huto huloto to foipa fele enoho lifi'ohuta yabe lite lilana'mu yabe. 23Ya lite nelinogo nani ma luto lu epiluna'mu yabe: Nani lenali'i mekeheli'ohube. Foipa faipa bona'i lenali mino koli hite abufa hilo.
Nohi gisemofihi hapa'a loemo
Lk 6:47-49
24Ya hu'ehinagi, bo moneuba kaga'ni kehelito liyafa huloto nemege'i malalinauba ai bo moneuba hetofa ekesa keheliloto efaha me'i ninalo nohi gilata nohina suhi hilibe. 25Ya hu'ehigo ko'i noito habafahi nolito huloto nagami'i bilito ya huto ana noto nohibe. To ana nohi li tele tulu menobibe. To hena'mugope efaha me'molo ana nohi gi'ehigo lapusa yafa'auba limito ema melugu sipi efato li tokolo hu'ehigo yabe.
26To asaga bona'i enali ka'ni kehelilete ana ka'nimofihi liyafa hite mege'i menemalana bona'iya enali negi bomagi nagami beleto kehelugu nohi gilata nehana suhi lite nehabe. 27Ya hi'ahago ko'i noito habafahi nolito huloto nagami'i ana nohi beleha'alo bilito ana nohi li kusago hekili higo limito kolata nohibe.
28Yesu ya'mana kaga alu su holago asaga li nupa hite minana boana'i Yesuhi kaga'a kehelilete keheli fato fato hite sipi enelesa'ani lu'ehina yabe. 29Yesu ai bona'magi keya ka enelepilata nehana'a huto melu'ehina yabe. Ai amuyana'ani nina bomagi kaga lilata nehana suhi huto kaga'a lu epina'mu enali boana'i keheli mehe'mi'ahana yabe.
© 1982, Wycliffe Bible Translators, Inc. All rights reserved.
