Matɨyu 1
1
Jisas Kɨlaisɨye hofiyakwosafe yofeso olenoho.
(Luk 3:23-28)
1Olo a'amu lohwa Jisas Kɨlaisɨye hofiyakwosafoho. Jisas kako hwe yofe engo'njo Ntefit sohwo'nji Apɨloham'njiye temtitofo mta'ango hweho.
2Apɨloham sohwo Aisakɨye kanɨngkwohweho.
Aisak sohwo Jekoupɨye kanɨngkwohweho.
Jekoup sohwo Juta'nji homnɨngkwa'wehwosanjiye kanɨngkwohweho.
3Juta sohwo kako Pelesɨ'nji Sela'njiye kanɨngkwohweho. Sikoe kona'wohisi Temafoho.
Peles sohwo Hesɨlounɨye kanɨngkwohweho.
Hesɨloun sohwo Lamɨye kanɨngkwohweho.
4Lam sohwo Aminotapɨye kanɨngkwohweho.
Aminotap sohwo Nasounɨye kanɨngkwohweho.
Nasoun sohwo Salɨmounɨye kanɨngkwohweho.
5Salɨmoun sohwo Mpouasɨye kanɨngkwohweho.
Mpouasɨye kona'wohisi Lehapɨyoho.
Mpouas sohwo Oupetɨye kanɨngkwohweho. Oupetɨye kona'wohisi Lutɨyoho.
Oupet sohwo Jesiye kanɨngkwohweho.
6Jesi sohwo hwe yofe engo'njo Ntefitɨye kanɨngkwohweho.
Ntefit sohwo Yulaiyafe ape nomanto Soulomoun tɨpema'mentisofoho.
7Soulomoun sohwo Leyapouamɨye kanɨngkwohweho.
Leyapouam sohwo Apiyafe kanɨngkwohweho.
Apiya sohwo Asafe kanɨngkwohweho.
8Asa sohwo Jehousofatɨye kanɨngkwohweho.
Jehousofat sohwo Joulamɨye kanɨngkwohweho.
Joulam sohwo Usiyafe kanɨngkwohweho.
9Usiya sohwo Joutamɨye kanɨngkwohweho.
Joutam sohwo Ehasɨye kanɨngkwohweho.
Ehas sohwo Hesekiyafe kanɨngkwohweho.
10Hesekiya sohwo Monaseye kanɨngkwohweho.
Monase sohwo Emounɨye kanɨngkwohweho.
Emoun sohwo Jousaiyafe kanɨngkwohweho.
11Jousaiya sohwo Jekounaiya'nji homnɨngkwa'wehwosanjiye kanɨngkwohweho. Hohosohonta a'amu Mpapilounnta'angoso a'amu Isɨlael somo impe intofontɨfi ango Mpapiloun ne'no motawo'mentohofofoho.
12Mpapiloun ne'no motawo'mentohofo sohonta Jekounaiya sohwo Siyalɨtiyelɨye kanɨngkwohwo imo'nɨmentisofoho.
Siyalɨtiyel sohwo Selopapelɨye kanɨngkwohweho.
13Selepapel sohwo Apiyoutɨfe kanɨngkwohweho.
Apiyout sohwo Elaiyakimɨye kanɨngkwohweho.
Elaiyakim sohwo Esoufe kanɨngkwohweho.
14Esou sohwo Satoukɨye kanɨngkwohweho.
Satouk sohwo Ekimɨye kanɨngkwohweho.
Ekim sohwo Elaiyatɨye kanɨngkwohweho.
15Elaiyat sohwo Eleyasafe kanɨngkwohweho.
Eleyasa sohwo Matanɨye kanɨngkwohweho.
Matan sohwo Jekoupɨye kanɨngkwohweho.
16Jekoup sohwo Jousepɨye kanɨngkwohweho.
Jousep sohwo Maliyafe hwe hweho.
Maliya Jisasɨmo ma'mentisofoho. Jisas huhwo sohwo hofɨko yofe Kɨlaisɨyoho mulɨmentohofofoho. Hwe huhwo sohumo Anɨtu uhwosopento nakwoe hwaho lopono uhwatɨmentisofoho.
17Apɨloham kakoe imuso hofɨko'montohwa aho hufa'u hopi'nono nom'ne sɨfe mta'ni osofosofahu'no mjimo'nɨmɨwahonɨngkofi Ntefit imo'nɨmentisofoho. Ntefitɨye imuso hofɨko'montohwa aho hufa'u hopi'nono nom'ne sɨfe mta'ni osofosofahu'no mjimo'nɨmɨwahonɨngkofi a'amu Isɨlael somo ango Mpapiloun ne'no motawo'mentohofofoho. Osohonta hofɨko'montohwa aho hufa'u hopi'nono nom'ne sɨfe mta'ni osofosofahu'no mjimo'nɨmɨwahonɨngkofi Jisas Kɨlais imo'nɨmentisofoho.
Maliya Jisas Kɨlaisɨmo aswo ma'mentisofoho.
(Luk 2:1-7)
18Olo hungkuno Jisas Kɨlais imo'nɨmentiso so'noyolohoso ole, Jousep Jisasɨye kona'wohi Maliya simo kako'ne ape nto ufohoto'mentohofofoho. I oso'no Jousep Maliyamo momaso sohonta Maliya sɨmeho Anɨtuye Towahuno mta'ango imo'nɨmentisofoho. 19Maliyafe hwehwo Jousep kako hwe wopɨngo'nohino hweho. Jousep ole syafɨhu'mento, Maliya wonɨmango unonoho. Ose syafɨsyonto olo hungkuno hiloso hiyaso waweno syafɨhu'mentisofoho. Oso'no ngko hungkuno ape mayo'ne wamtɨhupo'mo. 20Oso hiso'no ko syafɨsyonto wojo honɨngkanɨmentisoso a'amu Anɨtu mta'ango sohwo kakimo u'manto ulɨmento, Jousep, Ntefitɨye imu sohwosi, kɨko ape Maliya mayoso'no iyoho kinɨngkuhwoloho. Upa'nyo. Maliyafe sɨmehomo mehomi nto imo'nɨmaho. Oso hiso Anɨtuye Towahuno uyɨmaso hweho. 21Maliya hwomu nomahwoso'no kɨko yofe ole muso, Jisasɨyoho. Yofe hwapɨngoso ole, olo hwe lohwo kako a'amufe wonyoso wae yaofɨhwosi asomo utɨmayo'ne hweho. Ose ulɨmentisofoho.
22Hohonta Anɨtu hwe Aisaiya sohumo hungkuno uyahonɨngki kako a'amumo ulɨmojo sohwo kako hungkuno hiso mtɨ'mokumentisofoho. Olo hiloso ne imo'nyo so'no Maliya mehomi'nji imo'nɨmentisofoho. 23Ole mtɨ'mokumento,
Upa'nɨmno. Ape sijo wopɨngosi hwehwo momasosi kako sɨmeho imo'nɨngkuhwosi hwomu nomaniyoho.
Hwomu huhwo sohwo ole mulɨfitnnefo Imanɨwel.
Yofe hwapɨngoso ole, Mpohwo Anɨtu nakwo'nji humayo'nefoho.
24Jousep oso wojo hiso honɨngkanonto nolɨkafonto a'amu Anɨtu mta'ango sohwoe hungkunomo haloho pento kako Maliyamo ma'mentisofoho. 25I oso'no siko afapo ko humanji afa saho mofosyawosofoho. Ose humamojiyofoho. Oso'no ose humamojiye sohonta Maliya kako hwomu ma'mentisofoho. Nomahonɨngki Jousep hwomu huhwo sohumo yofe Jisasɨyoho mulɨmentisofoho.
હાલમાં પસંદ કરેલ:
Matɨyu 1: apzNT
Highlight
શેર કરો
નકલ કરો
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
