Yoane 7

1Panuma pali fyefyo-fintu, ŵa Yesu ŵalukupitana mucalo caGalili, pakuti taŵafwaile-po ukulukwenda mucalo caludiya, pakuti aŵaJuda ŵalukufwayo' kuŵepaya. 2Lomba yalipalamine impindi yacitenje caŵaJuda icamitanda. 3Pakuti pali fyefyo aŵakwaŵo ŵalilaŵile kuli ŵo ati: Fumeni-ko kuno, muye kucalo ca ludiya, ati neŵasambile ŵenu naŵo ŵakaŵone imilimo yenu iyi mulukucita; 4pakuti papo'muntu ulukucite' fintu kumfiso, kani alukufwaya ukumfwaniko'mwine; kani mulukucite'fyofintu ŋgamulilanjisye kuŵantu ŵonse. 5Pakuti neŵakwaŵo ŵonse taŵalukuŵacetekela-po. 6Peŋka ŵa Yesu nekuŵaŵula ati: Impindi yanji taiŋgafika; sombi impindi yonse yelelwe mweŵo. 7Icalo taciisi ukumufitilweni; sombi neŵo cilukumfitilwa, pakuti ndukucisinina ati ifi cilukucita fiŵipile. 8Mweŵo kamuyeni kucitenje: neŵo teti nje-po ŵukumo kucitenje'ci, pakuti impindi yanji taiŋgakumana, 9Peŋka pakulaŵila amasiwi ayo kuli ŵo, lomba aciikele kucalo caGalili.

10Sombi ili ŵaile aŵakwaŵo kucitenje, lomba pantanjile naŵo aŵene ŵaliileko; apakuŵulo'kuŵoneka, sombi koti nikumfiso. 11Pakuti pali fyefyo aŵaJuda ŵalukuŵafwaya-fwaya kucitenje, ukwipusyansyanya ati, Ali kulipi? 12Kaŵili ekwali ukupicisya ukwakuti pamaŵumba aŵantu ukwakuli ŵo: ŵambi ŵalukuŵeŵa ati, Muntu uweme; sombi ŵambi nawo ati: Koku, pakuti alukupasusya amaŵumba aŵantu. 13Sombi tapali-po muntu uwakuŵalaŵilila apaswetele, pakuti ŵalukutina aŵaJuda.

14Sombi pakasuŵa akapakati kansiku syacitenje, ŵa Yesu ŵaliile kwitempuli nekulukusambisya. 15Pakuti pali fyefyo aŵaJuda ŵalikaŋkamene nekulaŵila ati: Mboyu-muntu aliisi syani amano amumabuku, utaasambile-po? 16Lomba ŵaYesu ŵaliŵaasucile ati: Ukusambisya kwanji takuli kwanji neŵo, sombi kwaŵaŵo aŵantumine. 17Aŵantu ŵonse, ulukufwayo'kucito'kufwaya kwaŵo, akwisiŵa ifyakusambisya uku, ati kani kwaŵaLesa, kani nineŵo nemwine ndukulaŵila lukoso neŋka, 18Uyo ulukulaŵila lukoso eŋka, eulukufwayo'mwine uŵuleme; sombi uyo ulukufwayo'kupela uŵuleme aŵo aŵamutumine, uyo wacine; kaŵili muli ye tamuli-po ifisendeme.

19Kansi teMose uwamupeleni amafunde? Sombi pali mweŵo tapali-po neli umo ucita koti mafunde. Peŋka mbanindo mulukufwailo'kunjipaya? 20Amaŵumba aŵantu aliasucile ati: Uli neciŵanda! Mbaaŵo niŵani aŵalukufwayo'kukwipaya? 21ŴaYesu ŵaliŵaasucile ati: Umulimo umo nacitile, lomba mwense mulukukaŋkamana! 22Pakuti pali fyefyo Mose ewamupeleni ukukopolwa; (nsilukweŵa ati kwakuli Mose, sombi kwakuli ŵawisinwe aŵakale); lomba mweŵo mulakopolo'muntu pakasuŵa kasabata. 23Kani umuntu akopolwa pakasuŵa kasabata ati ifunde lyakwe Mose tekusiluluka, mulukuŋkalipila, pakuti nalipupulwile umuntu umuŵili wonse pakasuŵa kasabata? 24Tekulukwesya lukoso koti nifyefyo ifiŵoneka kweŋka kumenso; sombi mulukwesya ukwesya ukuluŋgeme.

25Peŋka'po ŵambi aŵakuJelusalemi ŵalilaŵile ati: Uyu tewoyo uŵalukufwayo'kwipaya? 26Lomba ŵoneni-ko, alukulaŵilila apaswetele; sombi taŵalukulaŵila neli kantu kuli ye. Kani impemba silukwisiŵa icine ati uyu niKlistu? 27Sombi uyu tulimwisi ukwafumine; sombi pakwisa Klistu tapakaŵa-po neukesiŵa ukwafumine. 28Pakuti pali fyefyo ŵa Yesu ŵalilaŵilisye mwitempuli, ili ŵasambisya, nekulaŵila ati: Mulinjisi, neko mfumine mulikwisi; kaŵili nsiisile lukoso nemwine; sombi aŵo aŵantumine ŵacine, aŵa tamwisi mweŵo. 29Sombi neŵo ndiŵesi, pakuti ndifumine kuli ŵo, naŵo eŵantumine.

30Pakuti pali fyefyo aŵo ŵalukufwayo'kuŵekata; sombi tapali-po neli umo uwaŵakanticile-po neli minwe, pakuti impindi yaŵo lomba taiŋgafika. 31Sombi aŵenji peŵumba lyaŵantu ŵaliŵacetekele, nekulaŵila ati: Pakwisa ŵaKlistu, kani ŵo ŵakalukucito'twisiŵilo utwakucilo'bwinji napali tutu utwalukucita'ŵa? 32Lomba aŵaFalisi ŵaliumfwile iŵumba lyaŵantu lilukulinwinwisisye'fyofintu ifyakuli ŵo; naŵo aŵapapatilisi aŵakulu neŵaFalisi ŵalitumine ifilolo ati fiŵekate. 33Pakuti pali fyefyo ŵaYesu ŵalilaŵile ati: Yasyala-ko impindi ice inakulukwikala nenu; peŋka ŋkabwelela kuli ŵawo aŵantumine. 34Mukalukumfwaya-fwaya, sombi tamukambona-po; kaŵili mweŵo tamukesiŵa ukwisa uko uku ŋkekala.

35Pakuti pali fyefyo aŵaJuda nekuŵulansyanya ati: Mbaakaya-pi uyu-muntu, ati tesi tukamuŵone? Kani akaya kuli ŵaŵo awapalaŋganine pakati paŵaEla, nekuŵasambisya naŵo aŵaEla? 36Mbefyo ifi alaŵile findo, ati—Mukalukumfwaya-fwaya, sombi tamukambona-po; kaŵili mweŵo tamukesiŵa ukwiso'ko uku ŋkekala?

37Lomba pakasuŵa akakupela-ko, akasuŵa akakulu akacitenje, ŵaYesu ŵaliimakene, nekuŵilicisya ati: Kani pali umuntu uli necilaka, ŋgaese kuli neŵo, anwe! 38Uyo ulukupema-mo muli neŵo, munda yakwe mukalukukuŋka imiloŋga yamenda amweo, koti nifyopele'fyo ifyalaŵilwe mumalembo. 39Sombi ifyo ŵalilaŵilile Umupasi, uyo uyu ŵaŋgapoka aŵo aŵakupema-mo muli ŵo; pakuti ilyo tauŋgesa Umupasi; pakuti lomba ŵaYesu tawaŋgawa neŵuleme. 40Peŋka ŵambi aŵeŵumbe'lyo, pakumfwa amasiwi ayo, ŵalukweŵa ati: Cine uyu ewakusimika uyo! 41Ŵambi ati: Uyu niKlistu! Sombi ŵambi naŵo nekweŵa ati: Ala! kani Klistu akafume kucalo caGalili? 42Kansi amalembo taalilaŵile ati Klistu akafuma kuŵana ŵakwe Dafidi; kaŵili ati akafuma kuBetelemi, kumusi ukwali Dafidi?

43Peŋka paliŵele umupaka uwakupicisya peŵumba pakuti pali ye. 44A ŵo ŵambi ŵalukufwayo'kumwikata, sombi tapali-po neli umo uwamukanticile-po iminwe.

45Peŋka'po ifilolo fyalibwelele kuŵapapatilisi aŵakulu neŵaFalisi; naŵo nekufiipusya ati: Mbanindo tamumuletele? 46Ifilolo nafyo fyaliŵaasucile ati: Nekale konse tapali-po umuntu uwakulaŵila koti niwuyu. 47Lomba aŵaFalisi ŵalifyasucile ati: Kansi namweŵo mwatumpaikwa? 48Mbempemba neŵaFalisi ŵonse, kani aŵo ŵambi ŵalukumucetekela ye? 49Sombi aŵo-ŵantu iŵumbe'lyo, aŵataŵesi amafunde, ŵalifinjilwe. 50Lomba Nikodemo, umbi uwapeŵumba lyaŵaFalisi, wopele uyo uwaisile akale kuli ŵaYesu, alilaŵile kuli ŵo ati: 51Kani amafunde esu alasinina umuntu ili taaŋgamumfwa umwine nekwisiŵe'fyo ifi alukucita? 52Naŵo ŵalimwasucile ati: Kani naweŵo uli wakuGalili? Ufwaya-fwaye, wisiŵe ati kuGalili taatulila uwakusimika.

53Peŋka ŵonse walipalaŋgene, ukuya kumananda aŵo aŵo.

હાલમાં પસંદ કરેલ:

Yoane 7: AAL59

Highlight

શેર કરો

નકલ કરો