Luk 3
3
Layattak Jon nai mehuqom
1Amu Sisar Taiberius nug Rom danab gumadkkunu digme ukke ukke, maɗ 14 uue, nuhig gumak maɗ 15 ooppa, Romnu wan okkai laa onig Palastin ooppa, Pontius Pailat nug wan obatak laa onig Judanu gawana daya, amu gume, Herot Antipas nug wan obatak laa onig Galili gume, amag Pilip nug wan obatak aɗit laa onilah Ituria amu Trakonitis ele gumate, Lisanias nug wan obatak laa onig Abilene gumom. 2Amu Anas, Kaiapas ele aa mana mettak ikki danab daaeheh, haen amuppa Sekaraia bekka Jon, nug atu taɗakppa dayeye, Kayak Nug nai laa ⌊nug uɗat nuhig digmekkunu⌋ nug amegppa aum. 3A amu Jon nug aha, Jodan atu ohppa ukka, nug danab amelagppa Kayak Nug ahilag hipunin uhuqa madakkunu, ag oolag eɗueb, layattak aoglagnu mehuqom. 4Jon nug propet Aisaia Kayak oɗe awa, bukppa yom bia heum. Nai amuam inam. “Nug am baag laa atu taɗakppa dayaya, nai inam ewa atte.
‘Ag Naɗi uɗikkunu ib babaitteg!
Ao, ag ib tutukku, tak nak iitta ele nuhignu babaitteg!
5Ag ib uɗem elele ukkak daakkunu, ag oolnu noak elele mettan, qauko nakok buun, elele mettan, ib kaliak amu tutukku mettan, amu ib qe ta qe nak am ele tutukku elelenab metteg! 6Ag anam heppeg, danab ah oh geha Kayak Nug ig eɗua awigkkunu uɗat heeb anidkkulag,’ ” awa aum.
7Aria Jon nug nai mehuqeqe, danab ah kuɗumnab ag layattak aoglagnu nug gumidna goppig. Ukkaeg nug ag amelagppa aum. “Ag am danab nau, mat nau bia. Aun nug nau aomnanu nai ag amelagppa mattie, ag Kayaknu oppoɗi bak uɗitte ele ii aqamanu uɗippig? 8Ag oolag eɗueb, kobol ena dim lamitteg! Amu ele ag oolagppa inam aib digmena appig. ‘Abraham nug ig mamenig, nug am genab tutukku hak danab, ig nug buɗub daattem amunu, nuhig hak enappa ig nob ii aomta.’ Da ag amelagppa attem, Kayak Nug men imu ag eɗun, Abraham bekkod daaglagnu hekkunu elele. 9Antteg! Epeɗiak haen am miag. Ad meu ii otte amu nug mameg o qiie, aab aɗuppa mawe te eotte,” awa aum.
10Jon nug ag amelagppa anam a amu danab ag nug oɗ medappig. “Ig amu attem hekkunig?” aon appig. 11Aon aeg amu nug eɗua ag amelagppa aum. “Danab aun laa nug lamen nakok elab aɗit ele daatte, nug lamen laa amu awa, danab lamen iitta ele medakku. Danab nug ee ele amu, nug ele anam hekku,” awa aum.
12Aria, gabman dilag takis awak danab laala ele ag layattak aoglagnu gumidna uɗin, ag oɗ medappig. “Ippunittak danab, ig attem hekkunig?” aon appig. 13Aon aeg amu Nug amelagppa aum. “Ag men doɗo, Rom danab okkai aum bia, eleleppa aweg! Aib tippalna laa ele aoppig,” awa aum.
14Anam a amu ban danab laala ele ag oɗ medappig. “Ig amu attem hekkunig?” aon appig. Aeg amu nug amelagppa aum. “Ag danab laa aib duttunattegeg, ag men doɗo madappig; amu laa ag hambuppuna, danab eheɗ laa ii heum ele, ag nug eheɗ heum aib appig. Ag ahilag uɗatnu nob tutukku aona, baubau awaknu aib dabmeppig. Ag aotteb ele amu, ag amunu elele doonna dayeg!” awa aum.
15Jon nug anam heehe, danab ah ag Kristus uɗikkunu dabmenan daanna, ag oolagppa, “Jon nug Kristustai,” aon appig. 16Anam aeg amu Jon nug amelagppa aum. “Da ag leppa layadttem, amge laa Nug da dimulppa uɗitte amu, nuhig ɠagattag am dahil eɗidtte. Nug am danab okkainab, da am okkai iitta; dahil hak am nuhig bia iitta, dahil am elele iittanab iitta. Nug Kayak Ouɗi, aab aɗu eleppa ag layadkku,” awa aum. 17Awa anan amu, nug nai baula tuɗitta aum. “Nug ee aeg mumuɗaknu abenppa ulah ee aeg dappunkkeg iwale ukkaknu uɗat hekkunu daatte. Nug uɗat amu ha, elelenab mewowa, Nug wit meu oh ee aeg mumuɗaknu abenppanu awa ukka, ee maknu lakka mekku. Mewowa, Nug ee aeg dappunkkeg aab aɗu ii qauhtte eleppa maneb eweb, ee aeg mumuɗaknu aben amuam keeke iitta, oppiaawak daakku,” awa aum. 18Jon nug ena hekkulagnu dabmak maɗettaknu nai kuɗum amubia mehuqaqa, nug nai ena danab ah amelagppa aum.
19Anam haaha amu nug Herot Antipas eheɗ ha, nug Pilip, aa eamag amu, nug Pilip wau Herodias aɗitta awa, kobol nau kuɗum laala ele heum doya, Jon nug amunu Herot daug batom. 20Daug bate amu Herot nug daug batak nai amu doya, nug kobol nau nuhig amu tuɗitta, Jon awa, maniguittakppa meum.
Jon Jesus laaittom
21Amge Jon maniguittakppa ii dayom haenppa danab oh ag layattak aoegeg, Jesus ele layattak awom. Nug layattak awa malowa, Nug unuqittette, hab obate, 22Kayak Ouɗi Nug uppuɗil beɗulag nakok laabia nug qaɗeppa ne, baag laa hab aabppanu Jesus amegppa aum. “Na am da Bekkal, da nahipnu ool mauhtte. Ele amu, da nahipnu oolppa enanag doottem,” awa aum.
Jesus memetappud onilag
23Jesus Nug layattak awom dimppa, Nug nuhig maɗ 30 anam dayaya, Nug uɗat digma heum. Nug am Kayak Bekka, amge danab ah ag nuhignu, “Nug Josep bekka,” aon appig. Josep mameg am Heli. 24Heli mameg am Matat. Matat mameg am Lewi. Lewi mameg am Melki, Melki mameg am Janai, Janai mameg am Josep. 25Josep mameg am Matatias, Matatias mameg am Amos, Amos mameg am Nahum, Nahum mameg am Esli, Esli mameg am Nagai. 26Nagai mameg am Mat, Mat mameg am Matatias, Matatias mameg am Semen, Semen mameg am Josek, Josek mameg am Joda. 27Joda mameg am Joanan, Joanan mameg am Resa, Resa mameg am Serubabel, Serubabel mameg am Sialtiel, Sialtiel mameg am Neri. 28Neri mameg am Melki, Melki mameg am Adi, Adi mameg am Kosam, Kosam mameg am Elmedam, Elmedam mameg am Er. 29Er mameg am Josua, Josua mameg am Elieser, Elieser mameg am Joram, Joram mameg am Matat, Matat mameg am Lewi. 30Lewi mameg am Simeon, Simeon mameg am Juda, Juda mameg am Josep, Josep mameg am Jonam, Jonam mameg am Eliakim. 31Eliakim mameg am Melea, Melea mameg am Mena, Mena mameg am Matata, Matata mameg am Natan, Natan mameg am Dawit. 32Dawit mameg am Jesi, Jesi mameg am Obet, Obet mameg am Boas, Boas mameg am Salmon, Salmon mameg am Nason. 33Nason mameg am Aminadap, Aminadap mameg am Atmin, Atmin mameg am Arni, Arni mameg am Hesron, Hesron mameg am Peres, Peres mameg am Juda. 34Juda mameg am Jakop, Jakop mameg am Aisak, Aisak mameg am Abraham, Abraham mameg am Tera, Tera mameg am Nahor. 35Nahor mameg am Seruk, Seruk mameg am Reu, Reu mameg am Pelek, Pelek mameg am Eber, Eber mameg am Sela. 36Sela mameg am Kanan, Kanan mameg am Arpaksat, Arpaksat mameg am Sem, Sem mameg am Noa, Noa mameg am Lamek. 37Lamek mameg am Metusela, Metusela mameg am Enok, Enok mameg am Jaret, Jaret mameg am Mahalalel, Mahalalel mameg am Kanan. 38Kanan mameg am Enos, Enos mameg am Set, Set mameg am Adam, Adam mameg am Kayak.
હાલમાં પસંદ કરેલ:
Luk 3: NB
Highlight
શેર કરો
નકલ કરો
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
