Jon 1
1
Jesus, onig laa Nai Kayak Ippunigtte, Nug danab beum
1Kayak Nug keeke oh digma heum, haen amu ii nak amu Kristus, Nug onig laa Nai Kayak Ippunigtte, Nug dayom. Nug Kayak noobppa dayom amge anamib iitta, Nug ele Kayak dayom. 2Digmak haenppa Kayak dayom, amu Nai Kayak Ippunigtte, Nug ele oh laippu daapiɗ, 3Kayak Nug keeke oh Nai Kayak Ippunigtte eppegppa me, Nug keeke oh haattom. Keeke laa ib laappa ii beum. 4Nai Kayak Ippunigtte Nug am bauklel diig; bauklel amuam danab oh dilag amahlak. 5Amahalak amu Nug gatatuppa amahaltte, amu gatatu nug amahlak amu eɗidkkunu elele iitta.
6-7Kayak Nug danab laa nug danab ah amelagppa amahlaknu nai mehuqkkunu epeɗie doum. Danab amu onig Jon. Nug amahlaknu nai mehuqkkunu diig am, nug mehuqebeb, danab ah oh ag nuhig mehuqak, amuppa oolagppa genab dooglagnu elele daaglag. 8Jon nug am amahlak amu iitta, amge nug amahlak amunu mehuqkkunu ahom. 9⌊Amahlak amuam Jesus Kristus,⌋ amu amahlak nuhig am amahlak genab. Nug wanppan danab ah oh amahlak madatte. 10Ao, Kristus, onig laa Nai Kayak Ippunigtte, Nug wanppa dayom; wan imu amu Nug he beum, amge wanppan danab ah ag Nug ii dooppig. 11Nug keeke heumppa na dayom, amge danab ag Nug ɗo ii mettan ii aoppig. 12Amge laala ag Kristus aoppig, ag nuhignu oolagppa genab dooppig amu, ag aakku Kayak bekkod daaglagnu ɠagattag mattom. 13Ag tiig makkulakppa o beɗunu kobolppa, o danabnu dabmakppa Kayak bekkod ii beppig. Iitta! Kayak Nug he, ag Nug bekkod beppig.
14Am Kristus, onig laa Nai Kayak Ippunigtte, Nug danab beɗu awa, ig oonigppa dayom. Ig oonigppa dayeye, ig nuhig binag amahlak oppiaawak ele anidmut. Binag amahlak oppiaawak ele amuam laa Nug Kayak Bekka laippunab daatte, Nug Kayak, nuhigppanu uɗiom amu, am nuhig aakku. Doyak diig genabib, amu ehanittak okkai hamu mettak kobol ele, amuam nuhigppa ambaknab ele daatte. 15Amu Jon nug nuhignu nai mehuqaqa ewa aum. “Da anukka nuhignu mattimi am Nug aakku. Da ami. ‘Nug da dimulppa uɗitte, Nug da eɗilak. Aɗinu? Nug anukkanab, da ii daami haenppa, Nug dayom,’ ” awa aum. 16Ehanittak okkai hamu mettaknu kobol nuhigppa ambak daatte amunu, ig nuhigppa itittak ena digdig aakku aomut. 17Yo, ɗo amu ig Moses nuhigppa aomut, amge ehanittak okkai hamu mettak kobol, amu doyak diig genabib ele amu, ig Jesus Kristus nuhigppa aomut. 18Danab laippu laa nug haen laa Kayak ii anttom. Iittanab. Kayak Bekka laippunab, Nug Kayak ele ouqak daattep amu, Nug aakkuib anitta doya, Kayak ippunikkom.
Jon uɗat digmeum
19Aria, deɗ laa Juda okkai ag Lewi buɗubppan mana mettak danab, Lewi buɗubppan mana mettak danab iitta ele Jerusalem appanu Jon nukka nuhignu oɗ mettaglagnu maatteg gona, “Na am aun?” ana oɗ mettaeg, Jon nug nai anana, 20nug ag amelagppa, “Da am Kristus iitta,” akkunu ii uuom. Iitta. Nug nai miag atiak nai mehuqaqa, “Da am Kristus iitta,” awa aum. 21Anam a amu, ag appig. “Anam daatte dayeb amu, na am aun? Na am Elaiyate?” aon appig. Aeg amu, nug aum. “Da am nug iitta.” Nug anam a amu, ag appig. “Ge, na nug iitta daattem dayeb amu, na am propet laa uɗikkunu, ig nug ameg mettem ele, amute?” aon appig. Ag anam aeg amu, nug, “Iitta,” awa aum. 22Anam a amu ag appig. “Ehe! Ig danab meikkeg uɗimut ele, ig ahilag oɗmak nob eɗugnignu am na nakka nahipnu am aɗinab attem?” aon appig. 23Ag anam aeg amu, Jon nug propet Aisaianu nai imu awa, nob ma amelagppa aum. “Da am baag laa atu taɗakppa ewawa, ‘Ag Naɗinu ib tutukku, tak nak iitta ele babaitteg!’ ” awa aum. 24-25Anam daye amu, maatteg uɗippig ele ag oolagppanu laala ag ɗo gumak danab-Parasia daappig amu, ag Jon oɗ mettan appig. “Na Kristus iitta, Elaiya iitta, amu propet uɗikkunu daatte ele iitta daattem dayeb amu, na aɗinu danab ah layadttem?” oɗ mettan appig. 26Ag anam aeg amu, Jon amelagppa aum. “Da amu, da ag leppa layadttem, amge ag oolagppa appa laa hibaittom daatte ele, ag Nug ii dootteb. 27Danab amu Nug da dimulppa uɗitte, amge Nug am danab okkainab, da am okkai iitta; dahil hak am nuhig bia iitta, dahil am elele iittanab iitta,” awa aum. 28Jon nug Jodan leppa danab layattette, keeke imu oh Betani appa beum. Betani amu Jodan le laih appa dayom.
Jon Kayaknu sipsip nag ippuanattom
29Wagɗe deɗ amuppa Jesus Nug Jon gumitta uɗieye, Jon Nug antta aum. “Antteg, Kayaknu Sipsip Nag, Nug wanppan danab ah dilag hipunin uhuqtte, Nug am uukku daatte. 30Am danab umu aakkuib, da nuhignu inam ami. ‘Danab Nug da dimulppa uɗitte ele, Nug da eɗilak. Aɗinu? Nug anukkanab, da ii daami haenppa, Nug dayom.’ 31Laa ele, da dakka da Nug am aun ii doomi, amge nug Israel danab ah, nug ahilagppa miag atiak bekkunu, da diig amunu uɗien danab ah leppa layadttem,” awa aum.
32Jon anam ana amu, nug nai tuɗitta aum. “Da Kayak Ouɗi Nug hab aabppanu, ai uppuɗil beɗulag nakok laabia na, Nug qaɗeppa dayeye anidmi. 33Da ele Nug ii doolom, amge laa Nug da danab ah leppa layadkkulnu meiɗe uɗimi ele amu, Nug a doomi. Nug aum. ‘Kayak Ouɗi Nug na, danab laa qaɗeppa daakku amu, danab amu aakkuib Nug geha Kayak Ouɗippa layadkku,’ awa aum. 34Da Jesusnu amu beum anidmi, amu da nuhignu da iikku attem, Nug am Kayak Bekka.” Jon anam aum.
Jesus ippunittak awak danab digma diiom
35Aria, wagkkaɗe deɗ amuppa Jon nug baula appa dayeye, nuhig ippunittak awak danab aɗit ele daappig. 36Ag anam daanna, Jon nug Jesus eɗitta ugekke antta, nug aum. “Antteɗ! Umu am Kayaknu Sipsip Nag,” awa aum. 37Nug anam a amu, ippunittak awak danab aɗit aa Jon nai aum, aa dooya, aa Jesus dim lamitteheh, 38Jesus Nug eɗua anata, Nug aum. “Aa aɗi madittep?” awa aum. Nug anam a amu, aa apiɗ. “Rabi, na adeppa daattem?” aoi apiɗ. Rabi eɗuak am ippunittak danab. 39Aeh amu Nug aum. “Aa doya, da daattem aben antteɗ!” awa aum. Nug anam a amu, aa Nug dim lamitteh gona, Nug daatte, aa aben amu anidpiɗ. Aa Nug ele oh goppig, amuam aam ameg waɗele tueb anam, amu deɗ amu, haen amu ukke, nakok tuebnab batak, aa Nug ele appa daappig. 40Aria, nid aɗit Jonnu nai dooya, Jesus dim lamidpiɗ ele, amunu oolahppa laippu laa nug onig Andru; nug Saimon Pita ele, aa am eamag. 41Amu nug paha ukka, Saimon antta, nug amegppa aum. “I Mesaia aakku anidmuɗ,” awa aum. Mesaia diig am, danab laa Kayak Nug Nug wan imu ohnu okkai daakkunu epeɗiom. Grik naippa Mesaia eɗuak amu Kristus. 42Anam ana amu Andru nug Saimon omala, Jesus toppa ukkom. Ukke Jesus antta, amegppa aum. “Saimon, Jon bekka, nahipnu ag geha Sipas akkulag,” awa aum. (Grik naippa Sipas eɗuak am Pita.)
Jesus Pilip Nataniel ele onilahppa eum
43-44Wagɗe deɗ amuppa Jesus Nug Galili gokkunu dabmaama, Nug Pilip, nug am Betsaida ted, nug Andru, Pita ele, ag oh appalag laippu amu, Jesus Nug nug mattia antta amu nug amegppa aum. “Na da dim lamiɗe!” awa aum. 45Anam a amu Pilip nug Nataniel mattia antta, amegppa aum. “Danab Moses nug anukka ɗo naippa nuhignu yom, propet ag ele nuhignu yaappig amu, ig aakku anidmut. Nug am Josep bekka Jesus, Nasaret ted,” awa aum. 46Nug anam a amu, Nataniel nug aum. “Nasaret uppanu amu keeke ena anam laa ii uɗima,” awa aum. A amu Pilip nug aum. “Dona antte!” awa aum. 47Pilip nug anam a, Nataniel nug Jesus anidkkunu uɗieye, Jesus Nug antta, Nug aum. “Antteg! Umu am Israel ted genab. Nug ooppa am hambuppuak laa iitta,” awa aum. 48Anam a amu, Nataniel Jesus oɗ mettom. “Attemun na da dooiɗme?” awa oɗ mettom. Nataniel anam a amu, Jesus oɗeppa awa aum. “Pilip nug na oninppa eum, haen amu ii nak da na ad fig waappa dayeye anidmi,” awa aum. 49Jesus anam a amu, Nataniel oɗeppa awa aum. “Ippunittak danab, na am Kayak Bekka, na Israel dilag king,” awa aum. 50Anam a amu, Jesus Nug Nataniel oɗeppa awa aum. “Da na ad fig waappa anidminu ami amu, na amunute ootppa genab doottem? Na keeke amu eɗittak, laa ele geha anidkkut,” awa aum. 51Jesus Nug anam ana, Nug nai baula ele tuɗitta aum. “Da genabnab genab ag amelagppa attem, geha hab aab obateb, Kayaknu engel ag Danab Bekkalag da, da gumiɗna nenan tebeppeg anadkkulag,” awa aum.
હાલમાં પસંદ કરેલ:
Jon 1: NB
Highlight
શેર કરો
નકલ કરો
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
