MATA 5

1Yɔ Yeesu gbɛn saal wɔ anbɔ kar ga̧a̧t ha, ɗɔɔtɔ, wɛɛ fɔkɔya wɔ hi zaa a ge. 2Yeesu barsihi hingok anyɔ lɛ

3a hat gi a dood wɔ hi mɛɛ a be gi doo ya̧a̧rya a Bɛt muut du hi. Yɔ anbɔ, Bɛt wáátɔ gi ya̧a̧nɛ. 4Hat gi a dood wɔ hi gi kaal du hi, yɔ anbɔ Bɛt gi rɔɔhi. 5Hat gi a dood zulhɔnikya wɔ hi, yɔ anbɔ hi dag hɛbt bɔ Bɛt raa a gi gaahi. 6Hat gi a dood wɔ hi kɛŋk waabil riit a̧a̧kil hi, gi wɛɛ gi gihi ha̧a̧sig an mɛmɛ, yɔ anbɔ Bɛt gi gaahi hinɔ buuya̧ gi hi̧i̧. 7Hat gi a dood wɔ hi gis dood zaadɛ ya̧a̧rmɛɛk hi, yɔ anbɔ Bɛt gi mɛɛsihi ya̧a̧r be. 8Hat gi a dood kpoosgaatya wɔ hi, yɔ anbɔ hi gbɛn Bɛto.

9Hat gi a dood wɔ hi gaak dood boolum hi, yɔ anbɔ Bɛt gi elihi a waat beenɛ. 10Hat gi a dood wɔ gɔ hi zɛksihi hi, a hinriit yɔ hi wook gi dɔŋgo. Yɔ anbɔ, Bɛt wáátɔ gi ya̧a̧nɛ. 11Dood hi niinɛ hi zɛksinɛ, hi wɛɛ hi ralsin ya̧a̧ha̧a̧l yɔ gi sɛw a be dɔŋgo, yɔ anbɔ hat gi a nɛɛge. 12Dagin hato, kpoos nɛ kpɛ̧ɛ̧ge, yɔ anbɔ dɔɔrɔɔs za gbɔɔl gin ook a bɛtha. Hi da hi gɔs nɛ Bɛtya̧a̧kɛŋkya wɔ hi dosin anbɔ be.

13Nɛɛ fɔkbeya wɛ, nɛɛ gi manda a waal du. Yɛrɛ à manda gbɛɛr gɛ, yɔ hi wɛɛnig gbɛrtilɔ ri nɔ? Wōō hinza ma gɛ, gi an hi bisig lakdi dood hi ɗa̧a̧kig dɔɔ du, daarɔ. 14Nɛɛ gi lɛlgaal a waal du. Waal gbɔɔl yɔ gi a ga̧a̧t ha ɗɛɛ an gi yaat gɛ. 15Gbunɔ, gɔ hí kpōō pitila hi mibt a dɔn du gɛ, gɔ hi wiig a wiikɔ bɔ gedu an gi gaas dood wɔ hi gi luk bɔ gedu sɛw.

16Lɛlgaal nɛ gaag a dood muutdu sɛw anbɔ an hi gbɛn hinrɔb yɔ nɛ wooko hi ɗɔbs Baa nɛ yɔ gi a bɛtha. 17Bɔnɛ mɔk a be zaa hɛbtdi an be pid Muusa maakdɔgl ɔ̧ɔ̧nɛ, zaabe Bɛtya̧a̧kɛŋkya wɔ hingokya̧ wɔ. Bé zāā an be pidihi gɛ. Be zaa an be woo dɔglya̧ be da̧a̧sɔ. 18Be gisin raak rɔbo, hi taa ha̧sig Bɛt maakdɔgl bɔ dɔglɔ za bi̧i̧sɔ za fɛŋ, zaabe, hinɔ fɛŋwaat wɔ zulha zaa gbunu, gi tuur a ɔ̧tyɔ hinwɔ sɛw gɔ hi wooy hi da̧a̧ gedu, wɛɛ bɛtha hi hɛbtdi hi da̧a̧ gedu sɛw.

19Yɔ anbɔ za̧a̧nyɔ ɓɛd maakdɔgl wɔ wansɔ zaa gbun hɛw gi wɛɛ gi goks dood an hi woo anbɔ be, hi elig a gi wans mɔɔti a Bɛt wáát du. Wɛɛ za̧a̧nyɔ fɔ maakdɔgl wɔ gi wɛɛ gi goks dood zaadɛ an hi woo anbɔ be, hi elig a gi gbɔɔl mɔɔti a Bɛt wáát du. 20Be gisin raako, gid nɛ́ wōō hinriit nɛ daar Bɛtmaakdɔkya wɔ hi Farisaya wɔ gɛ, nɛ taa gulk a Bɛt wáát du nɛ zaŋ.

21Nɛ da nɛ lag a hi dɔks ɗɛntɛ nɛ wɔ doosɛ a bɔmɔ gbɔm zulɛ, za̧a̧nyɔ gbɔm zulɛ hi gbaasig dɔglɛ. 22Yɛrɛ bee be gisin raako a za̧a̧nyɔ gin nɔɔtig a naaza zulha, woo hinha̧a̧l yɔ rii dɔgl-gbaaki. Za̧a̧nyɔ nii naaza a zul mɔ taaro! Woo hinha̧a̧l za yɔ rii an hi wa̧a̧ge hi kaŋg a dɔglyɛ̧ɛ̧kya wɔ hi muutdu hi gbaasig dɔglɛ; za̧a̧nyɔ nii naaza a yoo ha̧a̧lɛ! Woo hinha̧a̧l za gbɔɔl yɔ rii an hi wa̧a̧g hi yaag a laazɛŋk du.

23Yɔ anbɔ, mɔ́ zaa mɔ́ gaak Bɛt gaas a Bɛtmaaksɛŋko, mɔ́ mɔk mɔ́ mɛɛ a namɔza gig nɔɔk mɔ zulha, 24ɔɔm gaas mɔ bɔ a Bɛtmaak sɛŋk bɔ dɔŋgɔdi, mɔ rek mɔ bool hi gii kete, ɓɔr mɔ ɔɔ zaak Bɛtgaas bɔ gaako.

25Za̧a̧n za gi gɛ̧ɛ̧num hinɛ nɛ gi rek lɛlgbun a dɔgl-gbaak luk du, boolum nɔɔktɔnɔ hi giya a gbɔnɔdi an bɔgi gaamɔ a dɔgl-gbaakya bɔ gi naan du gi wa̧a̧mɔ gi wɛɛ gi gaamɔ laaya naan du gi re gi yaam a luknɔ du. 26Be gisum raak rɔbo, yɔ anbɔ mɔ́ tòò tus yɔ gim fɔk sɛw kete, ɓɔr mɔ ɔɔ tuuk a luknɔ bɔ gedu.

27Nɛ da nɛ lag a hi dɔgɔ a bɔmɔ naamansi. 28Yɛrɛ bee be gin raako a za̧a̧nyɔ see naaza nis gi wɛɛ gi ɗɔkinge, gɔ mans hi gii a gi kpoos du da̧a̧da̧ ma bɔ. 29Yɛrɛ yɔ̧l mɔ bɔ naanrɔb gi matum a hinha̧a̧l du, wigumɔge mɔ bisige, daar an mɔ waks hinza a mɔ muul gbunu yɔ riisumɔ, hi anyɔ gɔ mɔ ɔɔ muul mɔ sɛw gi yaay a laazɛŋk du.

30Naanrɔb mɔ gi yaam a hinha̧a̧l du, dɛ̧ɛ̧mɔge mɔ bisige, daar an mɔ waks hinza a mɔ muul gbunu, yɔ riisumɔ, hi anyɔ gɔ mɔ ɔɔ muul mɔ hi bisum a laazɛŋk du sɛw. 31Hi dɔg nɛ hɛw a za̧a̧nyɔ gi hɛɛtingo hi nistɔ gi gaag ɗɛɛrwol hɛɛtinsya gaatyɔ. 32Yɛrɛ bee be gisin raako a za̧a̧nyɔ nin nistɔ hinɔ gi taa an doo za kɛsig gɛ, wɛɛnig mansyayɔ. Za̧a̧nyɔ loo nis yɔ hi bisig be, gɔ mansyɔ.

33Nɛ da nɛ lag nɛ a hi dɔks nɛ ɗɛntɛ wɛ hii doosɛ a bɔmɔ dɛŋglhin hi ya̧a̧faanɛ, mɔ woo hinyɔ mɔ dɛŋgl rɔb a Waar Bɛt muut du gaattɔnɔ giya. 34Yɛrɛ bee be gin raako a bɔnɛ dɛŋgl nɛ hin zaŋ. Bɔnɛ dɛŋglhin hi fɛɛtiha nuŋgɔ, yɔ anbɔ gi Bɛt waar umsɔ ɗɔɔtillɛlɛ. 35Bɔnɛ dɛŋglhin hi hɛbt nuŋgɔ, anyɔ gi Bɛt dɔɔɔ ɗa̧a̧tillɛlɛ; bɔnɛ dɛŋglhin hi Urusalima nuŋgɔ, anyɔ gi Waar gbɔɔl bɔ waal gbɔɔl ɔ̧nɛ;

36bɔmɔ dɛŋglin zul mɔ hin hɛw anyɔ mɔ ɗɛɛ susug mɔ zaa gbun sɔɔs wɛɛnik gɛ, zaabe an mɔ wisig gɛ. 37Ta̧a̧n kpɔd a hɔɔ, zaabe a ɛ̧-ɛ̧; hinyɔ daar hin yɛrɛ ma gi fu̧u̧zig a loorɛha̧a̧l mɔkil du.

38Nɛ lag hi dɔg nɛko a lɔlɛ hi lɔlɛ, nuŋgo hi nuŋgo. 39Yɛrɛ bee be gin raako a bɔnɛ ɓaas zul nɛ a doo ha̧a̧l gbaŋgi. Za̧a̧nyɔ dɛ̧mɔ hi naanɔ rɔb kuu a wɛkt naanrɔbo, wɛɛm mɔ zɛmrsig bɔ naanyɛ̧l hɛw. 40Za̧a̧nza gi tɛb an gi ka̧mɔ a dɔgl-gbaak luk du gi loo hinhek mɔ, ɔɔmɔg gi loo gban mɔ gbɔɔl bɔ hɛw. 41Za̧a̧nyɔ fɛ̧ɛ̧mɔ an mɔ pɛɛsig wɔdɔ mɔ kamsig kilomɛɛtre gbunu, mɔɔ wɛɛm mɔ kamsig kilo-mɛɛtre eerɛ. 42Za̧a̧nyɔ zɔ̧m hinɛ, gaamɔge, za̧a̧nyɔ ha̧a̧g an gi loo wɔd mɔ belko, bɔmɔ ansige.

43Nɛ lag hi raako a yɛgi ha̧a̧mɔ a namɔza muulɛ, wɛɛ hɛ̧ɛ̧num za̧a̧nyɔ gim lɔlhɛ̧ɛ̧nik be. 44Yɛrɛ bee be raanɛ a yɛgi ha̧a̧nɛ a zɛnɛ wɔ hi gin lɔlhɛ̧ɛ̧nik hi muulɛ, wɛɛn nɛ zɔ̧bs wɔ hi gin gɔluko hi wɛɛ hi gin ya̧a̧kɛtingo Bɛto, 45an nɛ wɛɛs Baa nɛ yɔ gi a bɛtha wāātɔ. Yɔ anbɔ gi haasig ɔ̧t a dood ha̧a̧l wɔ hi rɔbɛ wɔ hi zulha hɛw; gi naŋsig bɛl a dood riitɛ wɔ hi ha̧a̧lwookya wɔ hi zulha.

46À ha̧a̧nɛ a dood wɔ ha̧a̧hi nɛ muul hi muul be, à lab ma nɛ ook nɔ dɔɔrɔɔsɔ a Bɛt ge ɓɛ? Tooszekya wɔ hi taa wook an gbun bɔ hɛw ya? 47Àn nɛ book yɛ̧ɛ̧dɛ nɛ hii kpɔd, gi an nɛ wook nɔ hinɔ gɛrsyaɔ nɔ? Dood wɔ hi mɛɛ Bɛt gɛ hi taa wook an gbun bɔ hɛw ya? 48Wɛɛn dood rɔbɛ tib an Baa nɛ Bɛt yɔ gi a bɛtha gi doo rɔb tib be.

હાલમાં પસંદ કરેલ:

MATA 5: NTD

Highlight

શેર કરો

નકલ કરો