MIMBOONE MINLÔMAN 5

Awu Ananias baa nga Safira

(Mm 4:35-37; 2 Bb 5:20-27; Dt 23:21-23; Lk 12:1-5)

1Môt, a too jôé na Ananias, a nga kuane biôme bié, baa minga wé tyiñ a to jôé na Safira. 2A feʼe meduʼan, baa minga wé be nga solé éfase tañ a zuu ji évok, a bôôé je e mebo minlôman. 3Ane Pierre a nga jô nye na: A Ananias, amu jé Satan a yene éto e nleme wôé? Wo te laa Mfufube Nsisim minsos, a solé éfase tañe moné ya si. 4Ye ô mbe te ngule ya jôʼé kuane je, nge na, ô kuan, womien ô belane moné ate ase? Feʼe nyô é nga zu wo nlem aya? O nji laa bôt minsos, ve Zambe. 5Eyoñ Ananias a nga wôʼô mejô mete, a nga ku si, ve wu. Beta woñ a nga bi bôte bese be nga wôʼô, ajô te. 6Bendômane be nga zu kôme mbim a beʼe, a ke wô soñ.

7Mvus éte, bebé mewolo mela, minga wé fe a nga zu nyiin, nye teke yem jam e nga bo. 8Pierre a nga kobô nye, a jô nye na: Kate ma, ye tañe nyô nje mi nga kuane si? A nga yalane na yaa, abimete le. 9Ane Pierre a nga jô nye na: Mi nga yeme kui tyiñ aya na, mi soñ ayaa Mfufube Nsisime Nti? O yeneya bibôʼa mebo ya bôte ba te ke jame nyo nnôm bi ne e mbé yôp; avale te fe ba ye kee wo. 10Eté été, a nga ku si mebo me Pierre, ve wu. Eyoñ bendômane be nga bulan, be nga koone nye a wuya, be nga ke fe jame nye soñ e fefele nnôm. 11Ane angôndô, woñ a nga bi keké ése a ba bese be nga wôʼô foé étua jame ji.

Abui bitua bi mam a nkôʼôlane bebuni

(Mm 19:11-20; Mt 5:6-7)

12Abui mendem a bitua bi mam bi nga bo ézezañe bôt a wo minlôman. Be nga tele mbé si Solômon bese tyiñe jia. 13Ve teke môt a nga jibi latane be. Jaʼa nalé, bôt be nga seʼe be. 14Bôt abui, befam a binga, be nga ke ngame jap, a zene ya buni Nti. 15Be nga soo minkôkon e minjoñe minjoñ. Be nga tooé mivok binoñ, mi mivok alañ, be sôñ na, éyoñ Pierre a lôt, jaʼane ve nsisiñe wé, ô nambe be. 16Jama bôt mbok a nga so mefôla ya Yérusalém, be beʼe minkôkon a ba mimbia minsisim mi nga ndumekan. A bese be nga yet.

Minlôman mia bili a suʼulane suuban

(Mm 12:3-11; 4:5-12,18-20; Eza 65:13)

17Amu mame ma, ntuni nnen a nsamba wé ôse, e ne na, ngame Besadusieñ, ayaa e nga jaé be minlem ne lut. 18Be nga bo na, be bi minlôman a futi mie mimbôk, e mise me bôte bese. 19Nde éngele Nti a nga zu yoé mimbé ya nda mimbôk a alu ese, a kuli be atan, a jô be na: 20Kelane tebane nda Zambe, e valé, katane bôte mejô ya ényiñ. 21Ane be nga wôʼô nye, tyé kpwaa, ane be nga ke nda Zambe été a yeʼele bôt.

Ntuni nnen a nga zu, émien, a nsamba wé ô nga bômane nye. Be nga sulane Sanédreñ, ékôane mvôʼô Israél, a lôme fe be ke loone minlômane nda mimbôk. 22Ve bebo bisaé, e ke kui nda mimbôk été, teke koé be. Eyoñ be nga bulan, be nga kate be foé avale di: 23bia te koé mimbé ya nda mimbôk mfetane mvoʼé mvoʼé. Bebaʼale be tele mimbé yôp. Vʼéyoñe bia te diine mimbé, bi nji yene môt e nda mimbôk été. 24Ve nné ane mefoé ma me nga kui be melo, njôô ya nda Zambe a betuni be nga bo ne botok a ajô minlôman, a sili na jé é nga lôt? 25Ane môt éziñ a nga zu a kate be na: Tame yene bôt mi nga futi nda mimbôk be nto nda Zambe a yeʼele bôt. 26Ane njôô ya nda Zambe a nga tek, baa be bebo bisaé, a ke nyoñe minlômane tee ntañete. Amu a nga mate na bôt be za lume be mekok .

27A nga soo be a telé be ôsu Sanédreñ. Ntuni nnen a nga sili be minsili a jô na: 28Bi nga telé mia atiñe na, mi bo te yeʼele bôt jôé te. Vʼéyoñe ji, mi jaléya Yérusalém ne lut a nyeʼelane wônan; ye mia yi na, metyi ya môt nyô me tabe bia minlô yôp? 29Ane Pierre a minlôman be nga yalan a jô na: Bia yiane dañe wôʼô Zambe a lôte bôt. 30Zambe ya bʼésaa bangan a nga wômôlô Yésus, nyô mi nga wôé ntyelan élé. 31Nye ate Zambe a nga bete yôp a mbo nnôme wé na a bo Ntômba wo Nyii bôt; ane a ye ve mvôʼô Israél nkôñelan a njamane mam abé . 32Bi ne bengaa ya mame me nga bobane mete. Bia, a Mfufube Nsisim, ñwô Zambe a nga ve ba ba bo nye mewôk. 33Njalan a ôlun, be nga tyiʼi na ba yiane wôé be, amu nkobô wu. 34Ve môte wua a nga tebe tetele e Sanédreñ été a to jôé na Gamaliél, mone Farizieñ, bôt be nga semé nye. A nga jô na; be tame kuli mimbôʼô atan nté éziñ. 35Mvus éte nye na: Mvôʼô Israél, tabaʼane ntyel a jam mia kômbô bo di ajô bôte ba. 36Melu me ndôme lôte va, môt a nga so, jôé na Tedas; môt ate a nga kômbô liti na a ne jôm éziñ; a dutu fe bôt bebé mintete minyin. Emien a nga wôéban beyéʼé bé fe be nga tyamelan. Ajô dé e bo na, ve momo. 37Mfe, be nga beta yen, Yudas ya Galilé, melu ya élañe bôt. A nga so foʼo, a dutu bôt be tôñe nye. Nye fe ve wu a bôte bese be nga tôñe nye, ve tyamelan. 38Nde ma jô mia na, te tamane beta kobô ajô bôte ba. Jôkaʼane be be ke. Nge foé jap, nge na asu ésaé dabe di da téé be bôt, ebien da ye bo momo. 39Nge da téé be Zambe, mi se ngule ya bo de momo. Tabaʼane ntyele ya wosane Zambe.

Ane be nga yebe tyiñ jé, 40a beta loone minlôman, a bo na, be bibi be minkasa. Be taté fe mane bendé be na, be bo te beta kañete jôé Yésus. Ane be nga suu be. 41Ane minlôman mi nga kôlô ézezañe Sanédreñ, njalan a mevak, amu be nga jibi ékpweʼele amu jôé Yésus. 42Môs ôse, ataté nda Zambe a kui bitabaʼa, be nji jôʼé kañete a yeʼele bôt Mbamba Foé Mesie.

હાલમાં પસંદ કરેલ:

MIMBOONE MINLÔMAN 5: BULU09

Highlight

શેર કરો

નકલ કરો