MIMBOONE MINLÔMAN 3

Pierre a saé ñyeyem

(Mm 4:9-22; 9:32-35; 14:8-10)

1Pierre ba Yôanes be nga bo be kele bo meyeʼelane ya mewolo melale mamengôʼé e nda Zambe. 2Be nga bo be kele tooé môt a mbe ñyeyem aso abialé, môs ôse, be nga tooé nye fefele mbé ya nda Zambe été, ñwô be nga loone na abeñe mbé , amu na, a jaʼé bôte be nga nyiine nda Zambe mimvolan. 3Eyoñ a nga yene Pierre ba Yôanes, be yeʼe ke nyiine nda Zambe, a nga simesan e nleme na, be fe ba ye ve nye mimvolan. 4Ane Pierre baa Yôanes be nga yene nye a jô nye na: Fombôʼô bia! 5Ane ñyeyem ô nga fombô be, a ndi nleme na, a ye nyoñe mvolane be be, or, nge argent. 6Ane Pierre a nga jô nye na: Me nji bi or nge argent, ve jôme me bili, nje ma ve wo, a jôé Yésus ya Nazarét, wuluʼu! 7Ane a nga bi nye wo ya mbo nnôm, a bete nye si. Awolo te ebien, nde mebo mé a mvoñelô bi nga bi ngul. 8Eté été, nye ve yôô, a tebe tetele, a nga wulu. A nga nyiine nda Zambe baa be be, a ke a tyele, a kañe Zambe. 9A bôte bese be nga yen a wuluʼu a kañe fe Zambe. 10Be nga yeme nye, a jô na: Teke selan, nye foʼo a nga to abeñe mbé ya nda Zambe a jakéʼé bôte mimvolan. Nde bôt be mbe ne vema, feʼe njañan a jam e nga kui be nye.

Pierre a nyoñ nkobô éyoñe baa

(Mm 4:5-12; 2:22-36; 5:30,32)

11Amu môte nyô a nji fe kandane Pierre baa Yôanes, nde bôt bese be nga ke mimbil a bômane be. Feʼe ne vema e mbé yôp, e wu be nga loone Mbé Solômon. 12Eyoñ Pierre a nga yene be nalé, a nga nyoñe nkobô a jô be na: A mvôʼô Israél, mia vembe étua jam ji amu jé? Nge na, mia fombô bia ne fonoo aya, aval ane nge bia te saé môte nyô a ngule jangane biabebien, nge amu bia bulu nyeʼe Zambe?

13Yemane na, e Zambe Abraham, Izak a Yakob, e Zambe bʼésa bangan, a maneya wumulu mbo ésaé wé Yésus, nye ate mi nga koñ a kate nye mis me Pilate. Mfaʼa wé, a nga kômbô suu nye. 14Mi nga bo Mfufup a zôsôa môte njet, a viane mvamane ñwôé bôt. 15Ntômba ô bili ényiñ, mi nga bo na ô wu. Zambe a nga wômôlô nye miñwuan. Bi ne bengaa. 16Amu mbunan e be jôé Yésus, jôé te e ndôme saé môte mi lôô nyô, a nye mia tuʼa yem. A e mbunane wo so be Yésus, ñwô wo te bo môte nyô nya mvoʼé ane mia bese mi lôô.

17Yaa, a bobejañ, ma yeme na, amu ndiman, mi nga bo jame te, jaʼane betebe ôsu benan. 18Zambe, nye a nga kobô ajô di anyu be bekulu mejô bese na, nyô a ne ñwoʼone mbon a ye wôʼô mintaé, nde a ndôme mane tôé di. 19Kôñelaʼane ñhe minlem, a bulane be Zambe, ndembene mam abé menan me vas; 20nde biyoñe ya évôvoé bia ye so, mbie Nti émien a ye ve, éyoñ a ye lôme Krist, nye ate a ne mia mveban. 21Yésus ate a yiane nyoñeban yôp, a kui biyoñe ya Zambe a nga jô bie anyu be mimfufube bekulu mejô ya kôa. 22Ôsusua, Môze a nga jô na:

Zambe a ye kuli zañe jenan,

ézezañ ya bobenyoñ, nkulu mejô,

a funaʼane ma;

mia ye vôʼôlô nye,

mfaʼa ya mam mese a ye jô mia.

23A môt ase a ye bo te vôʼôlô nkulu mejô ate,

a ye vas ayoñ été. 24A bekulu mejô bese, ataté e be Samuél, a ba be nga tôñe nye mvus, be fe, melu map, be nga kobô ajô ya melu bi too ma. 25Mia bete mi ne bone bekulu mejô, a élate Zambe a nga bo a beéso benan, éyoñ a nga jô Abraham na: E be mvoñe bôte jôé, menda me bôte mese ya si nyô ma ye nyoñ ébotan. 26Mia bete Zambe a nga taté kuli, a lôme mbo ésaé wé, a botane mia a na, a bo môt ase ya be mia a liʼi mbia mimboone mié.

હાલમાં પસંદ કરેલ:

MIMBOONE MINLÔMAN 3: BULU09

Highlight

શેર કરો

નકલ કરો