MIMBOONE MINLÔMAN 24

Ba somane Paul e be ngovina Félix

(Mm 6:11-12; 21:27-36; Mt 5:11-12)

1Mvuse melu metan, ntuni nnen, Ananias a bemvendé, a môte mfe, jôé na Tertulus, a mbe nkamane bôte mejô, be nga ke be njô bôt, a somane Paul be nye. 2Ane be nga loone Paul. Eyoñ a soya, Tertulus a nga taté nkate ya ésomane jap aval di: amu wo, a nkômane mam ôse ô maneya bo, mfaʼa ya volô ayoñe di, ajô te bia nyiñe ngumba nya mvoʼé . 3A mbamba njô bôte Félix, bia vaʼa wo biyoñ bise a vôm ase, amu mbamba be mam mese ô boya bia. 4Mfaʼa ya bo te ndeñele wo a abui nkobô, ma zu kobô étun. Nkobô te été, ma yeʼelane wo na, ô vôʼôlô wô, a mbamba nlem , ane bia zu bia yeme wo. 5Bi yeneya na, môte nyô a ne mbia jôm. A soñe ntañete ézezañe Beyude ya si nyô ése. A na, nye a ne évete beta ñyebe Benazarééñ. 6A nga jeñe fe zene na a ndamane étyi ya nda Zambe. Ane bi nga bi nye nde bi nga tyiʼi nye ajô ane metiñe mangan me né. 7Ve Lizias, évete bezimbi nnen a nga vaa nye e mo mangan a évô ése, 8a bendé beboʼolô bé na be zu tebe asu dôé. Eyoñe wo ye sili nye minsili, womien wo ye yebe na, mejô bia boʼolô nye me ne été. 9Beyude be nga kañese nkobô wé a jô na: A nji ke beté mam mefe yôp.

Paul a kat asu njôô bôt

(Lk 21:12-15; 1 Pi 3:15-16)

10Eyoñe njô bôt a looneya nye na a zu kat, ane a nga kobô a jô na: Ma yeme na, wo kamane zôsôô ntyiʼane mejô ayoñe dangan, aso mimbu abui. Amu ajô te, ma zu kobô ajô dam asu dôé a ndi nlem . 11O ne fase de. Melu me ngenane te lôt awôm, ane me ndôme ke Yérusalém, a ke kañe Zambe. 12Toʼo nda Zambe, toʼo aba Zambe ya Beyude, nge tison été, teke môt a nga yene me wômaʼane môt éziñ, nge ke soñelô bôt be bo ntañete. 13Bôte ba be se nguleya liti bengaa ya mejô ba boʼolô me ma! 14Jam ma yem e ne na, ma bo Zambe ya beésa bangan ésaé, avale zene ba buni na é ne ékotekot é né. Ma buni mam mese me ne ntilan a bekulu mejô. 15Me bili ndi nlem éte be Zambe. Bebien fe ba buni nalé na, mimbim mia ye wômô mesoñ, e bôt be ne zôsôô a ba be ne abé . 16Ajô te ma ve ngule ya baʼale mone môte wom ya nlem te bijô, e mise me Zambe a mise me bôt. 17Mimbu ya mvus, mamiene me nga beʼe bôte bame mimvolan a mimvean. 18Eyoñe te nje be nga yene me nda Zambe, a zu fe tuneban mamien. Eyoñe ma jô ji, teke ndula bôt nge éngôngôm éziñ. 19Vengevenge, ve Beyude bʼéziñe ya Azi mbe, nge ayian a yian, be mbe ngule ya zu somane ma be wo, nge be nga ye bi jam éziñe ya boʼolô ma. 20Nge na, éyoñe me nga kat asu Sanédreñ, Beyude ba, be nga yene na, me nga tyame zʼatiñi? 21Foʼo ve njôane me nga kobô tyiñe yôp, me tele zañe jap na: Ye étom ya na ma buni ñwômane miñwuan nje ba somane ma?

22Eyoñe njô bôt Félix a maneya tuʼa bi éfufube ya ajô zene éte, ane a nga buʼu ajô, a jô na: Ma ye tyiʼi ajô denan éyoñe évete bezimbi Lizias a ye so va. 23Ane a nga sili mone bezimbi na, a baʼale nye nda mimbôk. Ve da a to fili ya nyoñe mimvolane ya bôte bé.

Paul a tabe mimbu mibaé e nda mimbôk

(Mm 17:30-32; Eza 55:6-7; Sam 95:8)

24Eyoñ abe melu e nga lôt, Félix a nga zu ba minga wé Drusile, ngone Beyude. Ane a nga lôme bôt be loone Paul, a vôʼôlô nye ane a kobô ajô Krist Yésus. 25Ve mbôle nkobô Paul ô nga dañe vôôn ajô zôsôô ntaban, ajô njôane nlem , ajô ntyiʼane mejô wo ye zu, ane Félix a nga ko woñ. Ane a nga jô Paul na: Tame beta bulan, ma ye beta loone wo éyoñ éfe. 26Ndi nleme jé é mbe na, Paul a ye ve nye moné. Amu ajô te a nga bo a boʼo mbane ya loone nye na be laan. 27E mvuse mimbu mibaé Portius Festus, a nga tyendé Félix. A nye, amu a nga kômbô yené mvaé e mise Beyude, a nga baʼale Paul nda mimbôk.

હાલમાં પસંદ કરેલ:

MIMBOONE MINLÔMAN 24: BULU09

Highlight

શેર કરો

નકલ કરો