MIMBOONE MINLÔMAN 17

Minjuʼu ya Tésalônik a Béré

(1 Tes 1:4-7; 2:11-16; Fil 4:16; Yoa 15:19-21,25; 16:2-3; 1 Tes 5:21)

1Ntyiane be nga tyii Amfipôlis a Apôlône, be nga kui Tésalônik, e vôme Beyude be nga bili aba Zambe. 2Aval ane fulu Paul é mbe, a nga ke tôbane be a kobô be ajô Zambe besabat belaa, aval ane mintilan. 3A nga kôñelane be a tuʼa yemete na: Mesie a nga yiane tôbane mintaé ya awu, a wômô ñwuan. Mesie ate, nye a ne Yésus ma kañete mia. 4Beyude bevok be nga kpwéban a lat a Paul baa Silas, a bôt abui ya Begrék, be kañe Zambe a mimfañe mi binga.

5Ve Beyude be nga yaa amu mesengan. Be nga tôkane zezé bôte ya minjoñ a ndôñôlô bôt, a miase nzametaʼan e tison été. Ane be nga ke jeñe Paul baa Silas e nda Yason, be yi na be kee be ézezañe bôt. 6Ve be nji koone be wé. Ane be nga ke ba woʼotô Yasôn a bobenyañe bʼéziñ ôsu be bejôô, be yôtaʼane na: E bôt be nga fôʼô ngume si ôse be nto va, a Yason a nyoñeya be nda jé. 7E bôte ba bese, ba wosane metiñe me njô bôt, amu ba kate na, njô bôte mfe a ne, nye a ne Yésus. 8Nkobô te ô nga bi bôte minlem, jaʼane betebe ôsu, mbe bete 9be nga sili Yason a bobenyañ éban, ndemben be suu be.

10Ane bobenyañ be nga jiʼa bo na Paul ba Silas be ke Béré. Nkuane be nga kui wé, be nga ke nyiin aba Zambe Beyude. 11Nselaʼan mfaʼa ya mbamba minlem a bôte ya Tésalonik, be nga nyoñe Mbamba Foé a évévé ése. A, môs ôse, be nga fase mintilane na be tuʼa yem nge nkobô Paul a Silas ô ne bebela. 12Abui ya e be be e nga buni, jaʼane mimfañe mi binga ya Begrék a befam, abime ya semé.

13Ve nné ane Beyude ya Tésalônik be nga wôʼô na Paul a nga beta kañete Foé Zambe e Béré, ane be nga beta zu ndôñôlô bôt a zametane be valé. 14Teke yange, ane bobenyañ be nga jiʼa bo na Paul a kôlô a ke mañ. Ve Silas baa Timôté mbe be nga liʼi valé. 15E bôt be nga ke litane Paul be nga ke suʼu nye Aténe. Ane be nga bulan a mbañete Paul a nga bendé be ajô Silas baa Timôté na, be jiʼa tôñe nye.

Paul a beyeme mame ya Aténe

(Sam 69:10; Mm 14:14-17; 26:17-20; 1 Ko 1:18-25)

16Eyoñe Paul a nga bo a yangeʼe be Aténe, ajô nkañane bengunemelane ya tison éte e nga tyaʼa nye nlem . 17Ajô te a nga kobô Beyude a bekañe Zambe aba Zambe été, nalé fe e minseñ été. A nga kobô môt ase a nga lôt. 18A nga laane fe, jaʼane beyéʼé be Epikure a be stoyisieñ. Bôte bevok be sili na: Abui ayap ajô di da jô jô aya? Bevoʼo ke na: Ke a ne bo nkatefoé bezambe bikuu. Ve Paul a nga kañete foé Yésus a ñwômane ñwuan. 19Ane be nga nyoñe nye, a kee nye e be Ayérôpage. Ane be nga sili nye na: Ye ô ne kôñelane bia bi yeme mfefé nyeʼelan wo yeʼele wu. 20Amu wo dipe bia melo a bitua mejô. Nde, bia kômbô yem, mejô mete ma kôñelan aya? E ne bebela na, 21bôte bese ya Aténe a beyeñe bese be too été, be nga ve éyoñe jap mfaʼa ya kañete, nge vôʼôlô mimfefé mi mam.

22Ane Paul a nga nyoñe nkobô ayérôpage a jô na: A bôte ya Aténe, jam ôsu ma yene mfaʼa wôñan, mia bese e ne na, mia nyeʼe Ajô Zambe abui. 23Eyoñ ma wulu minjoñe ya tisone jenane nyô, ma yene biveʼela bi biôme ya nkañan a, me beteya fe some ataʼa metunaʼa, ntilan ô to été na: E zambe bôt be nji yem. E jôme mia kañ te yeme te, nje ñhe ma Paul, ma zu faé mia éfufup. 24E Zambe a nga té yôp a si, a mañ, a biôme bise bi ne été, nyô a ne Nti ya yôp a si, a ne te tabe menda me ne nlôñan a mo me bôt. 25Esaé jé é nji sili mo me bôt aval ane nge a yi jôm éziñ. Amu nye a ne mvee ényiñe ya bese, mvebe a jôm ése.

26A nga té meyoñe mese, ntene ya be môte wua, a tooé be e si nyô ése. Ane a nga telé biyoñ a tyiʼi minné ya vôme bôt ba ye tabe. 27Mboone te ôse, amu a nga yi na bôt be jeñe Zambe, ndôʼôtô be mbe ngule ya yene nye éyoñ ba ke ba bôp. Amu éyoñe bia tuʼa fas, a nji bo môt ase ya be bia ôyap. 28Amu ényiñe jangan, mfôʼôsan, jaʼane ngume ntabane wongan, bia so ve e be nye. A too foʼo ve aval a ne beyeme mam benane bʼéziñ be nga jô. Amu bi ne bone ya mvoñe jé. 29Nde, amu bi ne ayoñe Zambe, bi nji yiane simesane na Zambe a funane akok e ne édima, nge or nge argent, nge éveʼela é ne nkpwelan, ésaé ya atyeñ a befeʼe ya môt. 30Tame yene Zambe, nye teke nyoñe ngap a nté éyoñe ya bôt be nga to ndiman été, a kate bôte foé éyoñe ji na, bese, a vôm ase, ba yiane kôñelane minlem. 31A, a teléya môs , ñwô a ye tyiʼi si nyô mejô zôsôô , a zene ya môt a nga top. Aval ane a maneya liti bôte bese ndem a zene ya wômôlô nye miñwuan.

32Efia ñwômane miñwuane ji, bôte bevok be be nga bi je fianga. Ve bevok be nga kate nye na: Bia ye beta wôʼô ane wo kobô ajô te éyoñ éfe. 33Nalé nye Paul a nga liʼi be. 34Bôte bevok, be nga lat a nye a bo bebuni , aval ane Denis ya afôla ya Ayérôpage, a minga éziñ a mbe jôé na Damaris a befe.

હાલમાં પસંદ કરેલ:

MIMBOONE MINLÔMAN 17: BULU09

Highlight

શેર કરો

નકલ કરો