MIMBOONE MINLÔMAN 13

Barnabas ba Saül ba ke nlôman e Sipre

(Ga 2:7-9; 2 Tim 3:8-9)

1Bekulu mejô a beyeʼele bôt be nga too keké ya Antiôche. Barnabas, Siméoñ a mbe jôé afe na Niger, a Lusius môte ya Siréne, Manaén nye baa Hérôde Tétrak be nga yeñ aso bongô a Saül. 2Môs éziñ be nga bo ésulane ya kañe Nti a bômbô zaé asu meyeʼelan. Mfufube Nsisim a nga kobô be na: Jôkaʼane me Barnabas baa Saül be bo ésaé me tyiʼiya na be bo. 3Wôna éyoñe be maneya bômbô zaé a yeʼelan, a mane beté be mo, ane be nga suu be be ke.

4Eyoñe Mfufube Nsisim a maneya lôme be, ane Barnabas baa Saül be nga siliki a kui Sélesi. Nkôlane ya valé, be nga fubu miel été a ke mfaʼa ya Sipre. 5Eyoñe be nga kui Salamine, be nga kañete Ajô Zambe meba me Zambe Beyude été. Yôanes, mvolô wop a nga to fe nsamba wop. 6Eyoñe be maneya lôt ékôte mañ a kui Pafôs, ane be nga tôbane mvimviʼi, nkulu mejô me ne minsos, mone Beyude, a too jôé na, Bar-Yésus. 7A nga too bebé a njô bôte Sergius Paul, ntyetyeñe môt. A nga bañete Barnabas baa Saül, a liti be beta nkômbane wé ya wôʼô mejô me Zambe. 8Ve mvimviʼi, Elimas, avale jôé dé da tinan, a nga wosane be a jeñe zene ya dutu njô bôte Sergius Paul a bo te buni Mbamba Foé. 9Eyoñe te Saül nge na Paul, njalan a Mfufube Nsisim, a nga beme nye mis asu a jô nye na: 10Wo môt ô ne njalan a mefeʼe me mvô, mone Satan, nyô a wosane zôsôô ase a so be Zambe, ntéavé wo ye jôʼé vite mezene me Nti me ne zôsôô ? 11Tame yene wo Nti ô ne be wo. Wo ye bo ndim, te fe yen éfufube jôbe nté éziñ. Eté été, dibi e nga ku nye mis ne viu, a nga tyiñelane kotendoʼo a yi nliti zen . 12Eyoñe njô bôt a nga yene jame te, ane a nga buni, amu nyeʼelane mame ya e be Nti ô nga bi nye nlem .

Paul a kate Mbamba Foé Antiôche

(Mm 7:1-50; 10:36-43)

13Ane Paul baa be nsamba wé be nga kôlô Pafôs a ke Pergé afôla ya Pamfilie. Ane a nga kandane be a bulane Yérusalém. 14Ve nkôlane ya Pergé, be nga ke dulu ôsu akekui Antiôche ya Pisidie. E môse Sabat, be nga nyiine aba Zambe a tabe si. 15Mvuse ya nlañane kalate metiñ, a bekulu mejô, bivete ya aba Zambe bi nga jô be na: A bobejañ, nge mi bili bifia biziñe ya lebe bôt, kobaʼan. 16Eyoñe te Paul a nga tebe tetele a febe bôt a wo a jô na:

A mvôʼô Israél a mia bese mia ko Zambe woñ, vôʼôlane ma. 17Zambe ya ayoñ dangan Israél, a nga tobe betate bangan. Ane a nga fôlô bôt melu be nga too si ya Ejipte; wôna, a éwôlô ya wo wé, a nga vaa be wé; 18bebé mimbu mewôm menyin, a nga ve be bidi e nkôte si. 19Eyoñ a maneya jiane meyoñe zamgbwale ya Kanaan, a nga ve be si jap ane ngap. 20Jame te ese e nga bobane bebé tañe mimbu ntet a mewôm metan. Mvus éte, a nga telé be betyiʼi mejô a kui melu me Samuel nkulu mejô. 21Ane be nga kômbô a sili njô bôt. Nde ñhe Zambe a nga telé be njô bôt Saül mone kis, môte ya mvôʼô Bényamin, nye ate a nga jôô be mimbu mewôm menyin. 22Eyoñe be vaaya nye éto, ane Zambe a nga tobe David a bo njô bôte wop. Ajô dé nde a nga kobô avale dina na: Me yeneya môt a funane nleme wom, nyô a ye jalé minkômbane miame mise, a ne jôé na David, mone Yesé. 23Mvoñe bôte jé, nje ñhe Zambe, aval ane ngakaʼa jé é mbe, a nga bo na Yésus nyii bôt ya Israél a bialé. 24Eyoñe Yôanes a nga so, a nga taté mane yôtan ajô nduane ya nkôñelane minleme Israél a, 25éyoñ a sondôʼô ésaé jé, a nga jô na: Mia buni na me ne za? Sake ma me ne nye#13:25 Sake ma me ne Mesie., ve môt éziñ a zu me mvus, nye a dañe ma, me nji bi nkôñe ya kuli nye, jaʼane minkole ya besilefase bé. 26A bobejañ, mi kusa bo mvoñe bôt Abraham nge ki ba ba ko Zambe woñ, Mbamba Foé ya nyiane nyô, a nga lômbane be bia. 27Bôte ya Yérusalém a betebe ôsu bap, be nga bene Yésus, éyoñ be nga tyiʼi ajô dé a ve nye mekua. Be mbe te yeme na ba yemete mejô bekulu mejô ba lañe Sabat ase. 28Jaʼane be nji bi éfia a yiane wu je, ve be nga sili Pilate na a wôé nye. 29Eyoñ be nga jalé mam mese me mbe ntilan ajô dé, be nga vaa nye élé yôp a jame nye soñ. 30Ve Zambe a nga wômôlô nye miñwuan. 31Mvus éte a nga yené e be bôte ba be nye be nga bo be kôlôʼô Galilé a ke Yérusalém melu abui. Bôte bete be ne bengaa e mise me bôt.

32Bia fe bia kate mia Mbamba Foé ate. Ngakaʼa é nga kateban e be betate, 33Zambe a kômeya tôé je be bia, bone bap, e vôm a nga wômôlô Yésus, aval ane e ne ntilane same baa na:

Ô ne mone wom,

môse wu, me biaéya wo.

34E ne aval ane Zambe a nga jô na, a ye wômôlô nye miñwuan. Nde nyôle jé ja ye bo te boé soñ a zen éziñ, vôm a jô na:

Ma ye ve mia mimfufup

a benyaa bebela ya be David.

35Amu ajô te fe, a beta kobô afôla afe na:

Wo ye bo te jôʼé mfufub wôé

ô boé soñ.

36Ajô te David, éyoñ a maneya bo ésaé ya jalé nkômbane Zambe melu mé, a nga ke ôyo awu. Be nga bôôé nye fefele ya be ésaa bé, a a nga boé e soñ. 37Ve nyô Zambe a nga wômôlô ñwuan a nji boé soñ. 38Yemane de a bobejañe na, maʼa amu nye, nde bi bili Mbamba Foé ya njamane mam abé , a mekabe bi mbe te ngule ya bi me soʼo bia e metiñe me Môze. 39E be nye, mekabe mete ma vebane be môt ase a buni. 40Tabaʼane ntyele na ajô bekulu mejô be nga jô e bi mia na:

41fombaʼan, mia bôte mi ne mbia anyu,

woñ ô tame bi mia a jañane bôte mis!

Amu ma ye foʼo bo jam nté mi ngenane mi vee,

E jame mi nji ye buni

nge môt éziñ a too ye kate mia de.

42Eyoñ be nga kui atan, be nga yeʼelane Paul baa Barnabas na be beta baʼalane nkobô wop sondô mbok. 43Eyoñ ékoone bôt é nga tyamelan, beta ngabe ya Beyude a beyéʼé be nga ke litane be a, e minlañe miab été, Paul baa Barnabas be nga tindi be be kabetane mvame Zambe.

Paul ba Barnabas ba ke e be bikuu

(Eza 49:5-6; Rm 15:8-13; 1 Tes 2:14-16)

44E Sabate mbok a nga tôñ, bebé bôt bese ya tison be nga sulan a zu wôʼô Ajô Zambe. 45Eyoñ Beyude be nga yene ajô te, be nga bo zok a wosane mejô me Paul a Barnabas. 46Ane Paul baa Barnabas be nga bo ayoʼo ya kpwaane be na: E be mia nye ajô Zambe e nga yiane taté kateban, ve amu mia bene de, a yene miabebien ane ba be nji yiane nyoñe ngab ényiñe ya melu mese, nde bia ke e be meyoñe bikuu. 47Amu dina e ne abendé bi bili e be Nti na:

Me nga telé wo

ô bo éfufube ya meyoñ ,

nde wo ye kee nyian

e mekuʼu ya si.

48Eyoñe meyoñe bikuu me nga wôʼô mejô mete, be nga jaé ne lut a mevak a kañe ajô Nti, a ba bese be mbe ntiñetane ya nyoñ ényiñ be nga buni: 49ajô Nti e nga mialane afôla si te ese. 50Ve Beyude be nga sômôlô biwôlô bi binga bi nga kañe Zambe a benyaa bôtô ya tison. Ane be nga taté kpweʼele Paul baa Barnabas, a titane be afôla dap. 51Eyoñe be nga sase mbuluk mebo map, ane be nga ke Ikône. 52Ve mfaʼa beyéʼé, be nga liʼi, njalan a mevak a Mfufube Nsisim.

હાલમાં પસંદ કરેલ:

MIMBOONE MINLÔMAN 13: BULU09

Highlight

શેર કરો

નકલ કરો