Luc 24

Jésu unde loo tee dann njé ke koo’t

(An-in Matt 28.1-10; Marc 16.1-8; Jean 20.1-10 tɔ)

1Ndɔ ke njè kutu go ndɔ taa kebe se ndɔgé ɓat, dinyege nè nga otoi wubuge ke ete sununn ji de’t awi dè ɓada. Wubuge nè nga d’uwe dè nja kété. 2Dé d’an titeke doo ndubri kuberi mbal ke d’utu’n tà be-ɓade nga ile rang. 3D’ur d’aw kêm be-ɓade’t nè d’inge ninn Kuwe-ɓee Jésu nga tutu lé. 4Dé tel dé nda giw ɓaa, an! ke loon’t nè kuwe doo ke danránge joo ke Nube ule de undei loo teei hɔi ra de’t se kubuge ke ndoin kein-kein. 5Ɓel unde dinyege nè ndàt gang de ade ulei dè de nang. Doo ke danránge joo ke Nube ule de nga deji de edi nè:

– I sangi njèndi kumgajer dann njé ke koo’t lé. 6E goto loo ke nè’t, nè è unde loo tee kɔke. Adi kêm si olé dè tà ke ndɔ ke ede sei kété loo ke è nain’n se si Galilée ɓai. 7Ndɔ ke è ede sei kété ede nè: «Man ke m’ee Ngonn doo nga d’a d’ule’m ji dooge’t. Njé ra majelége à ɓeri man kàde kage-ke-dese’t, nè ndɔ ke njèkon’t mute ɓaa m’a m’unde loo tee dann njé ke koo’t.»

8Ke loon’t nè kuwe kêm de olé dè tàge ke ndɔ ke Jésu ede de. 9Loo ke d’in dè ɓada dé ree ɓaa, d’ɔr ser nyange malang ke d’an d’ade njékuwe-gir-Jésuge ke dɔg-gidé-karé se gute dooge ke rang malang. 10Marie ke ɓee le’n è Magdala, se Jeanne se Marie kon Jacques, se dinyege ke rang ke awi se de ɔri ser nyange nè adi njékawkulege ooi. 11Nè tàge nè tooi asinan se tà ni bè tàkum njékawkulege’t ade umi kêm de dè’t lé. 12Nè Pierre ɔse nang in se ngɔde aw dè ɓada. E ɗuge nang ule kum’n nè an tà kubu dubu ninn á tò nang njɔk karè. E tel aw ɓee le’n. Kàde’n gete get-get dè nyan ke tee’t nè nga.

Jésu inge njékuwe-girnge joo ke ndii à awi ke Emmaus

(An-in Marc 16.12-13 tɔ)

13An! kêm ndɔn’t nè nga, njékuwe-gir-Jésuge joo dann madege’t in-in ɓee ke Jérusalem à awi ke ngonn ɓee karé ke tò ase kurloo dɔg-gidé-joo. Ngonn ɓee nè nga ri’n nè Emmaus. 14D’a d’ɔje nan tà dè nyange malang ke teei nè nga. 15Loo ke d’a d’ɔde nan kɔje nan tà se naje nan tà ɓai ɓaa, Jésu aw ngɔr ke ra de’t orè se de rebe nan’t. 16Dé tel dé ger’n lé tede nyan libe kum de. 17Jésu deje de ede nè:

– Ké tà ri á i njiyei ɔji nan dɔ-dɔ bè wa?

Dé tel dé nda nang se kumkil kororo. 18E ke karé ke ri’n nè Cléopas deje Jésu ede nè:

– Ké i kuwe se kari bere á i tite mba ke ndi kêm ɓee ke Jérusalem anje ger nyange ke teei kêm ndɔge’t nè nga wa?

19Jésu tel deje de ede nè:

– Ké nyan rige á teei wa?

Dé tel d’ile’n dè’t d’ede nè:

– E nyange ke ɔje dè Jésu ke Nazareth, ke è njèribe-dè-tà ke tà Nube’t. Nube se kosdooge malang geri titeke è ra nyange a, tam tàge se tɔgmong a tɔ. 20Nè maw njékuje nyan-mesege se njékɔr non jéige d’uwe’n d’ule’n ji Pilate’t ade gangtà yo dènn’t a, adi njérɔge ɓerii kàde kage-ke-dese’t a tɔ. 21Kété j’unde kêm jé tchên ke dènn’t titeke è kuwe à din kosdooge ke Israel. Nè ɓila è ndɔ ke njèkon’t mute ke nyange nè malang teei. 22Dinyege ke nange dann jé’t teei se ndɔgé ɓat awi dè ɓada. Nè ei ɔsi ninn Jésu ke Nazareth nga pat nali; dé tel dé ree se tàge ade tà ige jè sêl. 23Taɓai dinyege nè nga edi jè edi nè: n’ingei dooge ke danrán ke Nube ule de á edi de edi nè: Jésu ke Nazareth nga ndi kumgajer. 24Njé ke nange dann jé’t an-in hant awi dè ɓada ingei nyange malang tite kum ke dinyege tami kété nga. Nè Jésu ɓaa, d’an’n lé.

25E ede de ede nè:

– Sei njé kêm tɔ kuju tà lége tur se si ngain le ger gir tà ke njéribe-dè-tàge ke tà Nube’t tami kété mari nga. 26Krist ke Nube ule’n nga, gar-gar nyantosowur à ra’n ɓita à ɔte kur kák kaw dann ndubra’t le’n ɓai. Ké sei geri bè lé wa?

27Go’t gugu, Jésu ɔr gir nyange malang ke dé ndang d’ɔje’n dè’n kêm Magtub’t le Nube. E unn gir dè magtubge’t le Moise sár tee’n dè le njéribe-dè-tàge ke tà Nube’t. 28Loo ke nain ngɔr kade dé tee kêm ngonn ɓee’t ke d’a d’aw tutu nè nga ɓaa, Jésu ra titeke ayé tuge dɔ gang kaw. 29Nè dé nda se’n kekek d’ede nè:

– I ndi se jé tede ndɔ à il ngɔr ta.

E aw se de kêm kei le de ndi se de. 30Loo ke è ndi se de tà nyankuse’t ɓaa, è unn mapa karé ra Nube oiyo pa ɓita uwe tête danné ade de ɓai. 31Lotbè ɓita kum de gang dènn’t yerer ade dé tel ger’n njai ɓai. Nè ke loon’t kuwe è goto njêl ade d’an’n lé. 32Dé tel dé deje nan d’ede nè:

– Loo ke kété n’ɔje se jé tà a, n’ɔrgir tàge ke kêm Magtubge’t le Nube n’ade jè a tɔ nga, ké kêm jé agenan kɔt-kɔt lé wa?

33Ke loon’t nè kuwe d’ɔse nang d’in dé tel d’aw Jérusalem gugu. D’aw d’inge njékuwe-gir-Jésu ke dɔg-gidé-karé se njè ke rang ke kebi se de nan loo karé. 34Njékuwe-gir-Jésuge ke kebi nan loo karé nè nga edi njé ke joo nè edi nè:

– Kerɔte kuwe, loo naje’n goto, Kuwe-ɓee unde loo tee dann njé ke koo’t. E unde loo tee hɔi ade Simon an’n.

35Ei njékuwe-gir-Jésuge ke joo nè géa unni gir kɔri ser nyange ke teei dè de’t rebe a, kum de ke tel gang reng dè Jésu’t loo ke à tête’n mapa danné a tɔ.

Jésu tɔje ra’n ade njékuwe-girnge an-in nin

(An-in Matt 28.16-20; Marc 16.14-18; Jean 20.19-23; NRNK 1.6-8 tɔ)

36Loo ke dé nè nga dé ndi d’ɔr tà nè bè-bè ɓai ɓaa, Jésu tee hɔi ke kum de’t ede nè:

– Maje kade kêmlom nain se si.

37Ɓel unde de ndàt gang de ade ndil de tee an-in soin-soin tede dé gir titeke d’an ndil doo ke koo. 38Nè Jésu tel deje de ede nè:

– Ké bain á ɓel ra sei ade awi dè nan’t kutri bè wa? Ké bain á sei awi se tàgirge ke titeke bè dè ɓengre si’t wa? 39An-in! jimge se njamge ɓaa a i geri titeke è man kuwe. Ɔdi ra’m an-in. Tede ndil doo ke koo nga aw se danra’n se kinge ra’n tite le’m man bè lé.

40Loo ke è nda ede de tà nè nga bè ɓaa, è tɔje de ji’n se nja’n ade d’an. 41Ra de nel de ngain a, tà ige de sêl a tɔ ade d’unn mbi de dè tà ke Jésu ede de. Jésu deje de ede nè:

– Ké nyan ke kum kuse goto ji si’t wa?

42Dé d’unn ɗugur kanje karé ke tunge d’ade’n. 43E taa ji de’t use tàkum de’t malang. 44Go’t gugu, è ede de ede nè:

– An-in! è á è tà le’m ke ndɔ ke m’ede sei kété ke m’nain’n se si ɓai nga: nyange malang ke Moise se njéribe-dè-tàge ke tà Nube’t ndangi ɔji dè’m se tàge malang ke tò kêm Magtub pa’t nga, gar-gar à awi loon’t deĵ kuwe.

45E ade kum de uje kade dé ger’n gir Magtub le Nube njai. 46Gir’n ke nè á è ede de ede nè:

– An-in! dé ndang kêm magtub’t d’ede nè: Man Krist ke Nube ule’m nga, gar-gar d’a d’ade nyantosowur à ra’m kuwe. Nè d’a d’ade m’a m’unde loo tee dann njé ke koo’t ndɔ ke njèkon’t mute. 47Tà ke ɔje dè tur hal se tà ke ɔje dè kêm tin mbit dè kaiyage’t nga, gar-gar d’a d’ile’n mber se ri’m kade girkoje dooge gai-gai. Tà nè nga d’a d’unn gir kile’n mber kêm ɓee ke Jérusalem kété ɓita d’a kaw’n ke nata ɓai. 48Nyange ke sei an-in nga ɔri go tà’n gar-gar adi dooge ke rang ooi. 49Nyan ke Bɔ’m unn’n ndu’n ade sei nga, an-in! man kuwe m’a m’ule’n kade sei. Nè sei ɓaa, i ndii kêm ɓee-bò’t nè kuwe sár kade ingei tɔgmong ke à in ra Nube’t ɓita.

Jésu inye njékuwe-girnge tel aw danrán

(An-in Marc 16.19-20; NRNK 1.9-11 tɔ)

50Go’t gugu Jésu ɔr de aw se de kum’n ke ɓee ke Béthanie. Loon’t nè, è ɔi ji’n ke dɔ tɔr ndu’n dè de’t. 51Loo ke è nda à tɔr ndu’n dè de’t bè ɓai ɓaa, ke loon’t nè kuwe è ɔr ra’n ra de’t ade d’unn’n d’aw se’n danrán. 52Loo ke dé ɗɔi’n ɓá ɓaa, dé tel se ranel ke bò ke ɓéee Jérusalem gugu. 53Dé ndi kêm kei le Nube se ndɔ de-ndɔ de a, dé pite’n dɔ-dɔ a tɔ.

હાલમાં પસંદ કરેલ:

Luc 24: GUL04

Highlight

શેર કરો

નકલ કરો