Mal 15

Yesu ha busu bwa Pilato

(Mat 27.1-2, 11-14; Luk 23.1-5; Yow 18.28-38)

1Mu minkya mya bwiisi, mfuundu ya bakuutu ba bangaanga-nzaambi, bakulu ba babakala, batini ba mangisi na kikuutu kyokinso badzakala. Bakaanga Yesu, bamunata na bamuyekele kuri Pilato. 2Pilato wafuula kuri Yesu ti: «Buri ye ngo mbyaasi bayudayo?» Yesu wabvutula kuri nde ti: «Ye, leeriri.» 3Bakuutu ba bangaanga-nzaambi bamufuunda mu myalaka. 4Pilato wabweese kumufuula ti: «Ye wahele na dya kubvutula? Yukeeti momanso ma bari mu kukufuundila.» 5Yesu kasii bvutula ntoono ti mosi, Pilato wamono dyo dyankimukunu.

Yesu bamukesele mukanu wa lufwa

(Mat 27.15-26; Luk 23.13-25; Yow 18.39–19.16)

6Mu mpisi munkeembu, Pilato waba palisaa boroko dimosi, bunu bwaba ndoombolo dza baatu. 7Kwaba muutu mosi nkuumbu Baraba, waba mu boroko kintwaari na bangaa-tungu, badzusiri muutu mu ntaangu ya tungu. 8Mpuumbu, bu yatoomboko, yafuula Pilato bunu bu kaba basiilaana. 9Pilato wabvutula kuri bo ti: «Beenu lutiiri ti nyilupatukila mbyaasi Bayudayo?» 10Nde waba yaari ti bakuutu ba bangaanga-nzaambi bayekiri Yesu mu musoki. 11Bakuutu ba bangaanga-nzaambi basinda mpuumbu mpisi heki babapatukila Baraba, ha kibeendu kya Yesu. 12Pilato wabweese kufuula waleele kuri bo: «Buri [lutiiri] me nsa [kuri wunde wu luri mu kuleele beenu] mbyaasi Bayudayo?» 13Bo babweese kubikisa ti: «Mukomono ha kuruwa.» 14Pilato wafuula kuri bo ti: «Nkya mamabi kari kayirika?» Bo bahamisa kubikisa ti: «Mukomono ha kuruwa.» 15Pilato bu katya kuha kiminu kuri mpuumbu, wabapatukila Baraba, na wayekele Yesu mpisi bamulata nkwaasulu, na bamukomono.

Bayongolo basiila Yesu munsiku

(Mat 27.27-31; Yow 19.2-3)

16Bayongolo banata Yesu kunsa mbasi ya mutsuundu yiri munsa nzo mbyaasi, na batumisa mpuumbu yoyinso. 17Balwiika Yesu kiyuunga kyabeenge, na bamuyirikila mpu ya manseende yi bamulwiika. 18Babaandika mu kumuha mboto: «Mboto, mbyaasi Bayudayo!» 19Bamulata dyaari mu mutu, bamufulula mante na bamutsukumina. 20Bu bamana kumusiila munsiku, bamuyusula kiyuunga kyabeenge na bamulwiika binkuta bya nde-meene. Bamunata mu kweemukono.

Yesu bamukomono ha yulu kuruwa

(Mat 27.32-44; Luk 23.26-43; Yow 19.17-27)

21Simoni wa ku Kirene, taayi dya Alekandere bo na Lufo, wafumuna ku manseke. Bu kari mu kuluta, bamubwiilila na kumukwiikisa mpisi kanata kuruwa dya Yesu. 22Bamunata ku kibeendu kya Ngolongota, mbangukulu «kibeendu kya kiteengi kya mutu.» 23Bamuha malu masaangu na mire, ngo Yesu wabisa. 24Bamukomono na bakaba binkuta bya nde mu nteelu wari, mu kuyaaba na wuholo nki. 25Kyaba kyeki kilookolo kyabitatu, kya nkati mwiini, bu baba mukomono. 26Kooti di bamukesiri mukanu wa lufwa dyaba dyatinu ti: «Mbyaasi Bayudayo.» 27Kintwaari na Yesu bakomini se bangaa-bumfuna boolo, mosi ku lubakala, mosi ku lumoso. [28] 29Baba lutaa mu nzila baba mutukaana, banyingisa mitu na baleele ti: «Ye mutsaamini nzo ya ngisi na mutuungi yo mu biluumbu bitatu, 30bvuuka ye-meene na sunduka ha kuruwa!» 31Bwobumosi se, bakuutu ba bangaanga-nzaambi na batini ba mangisi basa munsiku bo na bo, baleele ti: «Nde wabvuukisiri bakaka; ngo wahele kubangisina kubvuuka nde-meene. 32Hemese Kiristo, mbyaasi Isaheli kasunduka mu lumalu ha kurwa, mpisi heki beetu tumono na tusiila kanyi.» Baba komini ha kimosi na nde, baba mutukaana.

Mfwiilu Yesu

(Mat 27.45-56; Luk 23.44-49; Yow 19.28-30)

33Kilookolo kya bisaamunu bu kyatubuka, mampimbisi mabwa mu nsi yansiina natee kilookolo kyawa. 34Mu kilookolo kyawa, Yesu wafula mu mbeembu yamakwa ti: «Eloyi, Eloyi, lema sabakatani?» Mbangukulu ti: «Nzaambi yaami, Nzaambi yaami, buri ye yekiri me?» 35Babamosi baba haho bu bayuka baleele ti: «Yukee, weki teele Eliya!» 36Muutu mosi kadzumunaana, luulusiri musasaka mu bvinya dyansa, kaangiri nde mu dyaari, heeri kuri Yesu mpisi kanwa, na leeriri ti: «Hemese tumonee kari tumi Eliya kiisa mu kumusundula ha kurwa.» 37Yesu kafulaa musaakulu wamula, kiwuumunu kitabukiri. 38Nsaanda ya nzo yangisi yatyaabuka mu bibari byoolo, kuholosono ku yulu natee ku nsuku. 39Mukuutu nkama bayongolo, waba wateleme ha busu bwa Yesu, kamonaa bwaba tabukila muwuumunu, waleele ti: «Mu ngwanwa, wumawu beeri Mwaana Nzaambi!» 40Kwaba se bakyeetu baba la, baba talilaana. Mu bo kwaba Mariya Madelene, Mariya ma nguri Yakobo dyantele bo na Yose, Salome, 41baba kwenama na kwesalila Yesu ha kaba ku Ngalili, na bakyeetu bakimi balaka batoombikiri kintwaari na Yesu ku Yerusalemi.

Yesu bamudziika

(Mat 27.57-61; Luk 23.50-56; Yow 19.38-42)

42Yaba yeki nsinsika, na ntaangu yi bayirimaa tekesele bakoto mu kiluumbu kya mpuumunu. 43Yosefi, dya ku Arimatayi, muutu wa lukiinsu, mosi mu mfuundu ya bakuutu, wuri nde se waba kiingilaana Kimfumu kya Nzaambi, walwaata kibakala, wakoto mu nzo Pilato mu kumuloombo nyutu Yesu. 44Pilato wakimuka mu kumono ti Yesu weki wafwa. Nde wateele mukuutu nkama bayongolo mu kumufuula kari fwiiryee na kidzika. 45Pilato kamana kuyuka ma muyaabisiri mukuutu nkama bayongolo, ha kaheeri miswa kuri Yosefi mu kuholo nyutu. 46Yosefi wasuumba mutulu, wasundula nyutu, wayidziinga mutulu, wayende kweesuusa yo munsa bulu dyahaku mu tari, na wasindukila tari di kadukiri bulu. 47Mariya ma ku Mangadala na Mariya ma nguri Yose baba talilaana mu basuusiri nyutu Yesu.

હાલમાં પસંદ કરેલ:

Mal 15: MW2013

Highlight

શેર કરો

નકલ કરો