Mat 8

Yesu watsinikisa mubeeru bwaasi

(Mal 1.40-45; Luk 5.12-16)

1Yesu kamanaa kusunduka ku yulu mulaandu, mampuumbu malaka mamunama. 2Mubeeru bwaasi wayisa kuri nde, watsukuma ha busu bwa nde, na wamuleele ti: «Mfumu, mbuti ye tiiri, lo ye tsyemikisi me.» 3Yesu kalaambula kooko, wumubelemini na leeriri ti: «Me ntiiri, ba watsyeemeke.» Na hanaho, nde watsyeemeke mu bwaasi bwaandi. 4Yesu waleele kuri nde: «Wuyuka! Yaa leele kuri muutu ti mosi ko. Ngo yende wemonokono ye-meene kuri ngaanga-nzaambi, na nata kikabu kya tuma Moose, mpisi kiba kimbaangi kuri baatu.»

Yesu watsinikisa kisari kya mukuutu nkama bayongolo

(Luk 7.1-10; Yow 4.43-54)

5Bu kakoto ku Kafarnawumi, mukuutu nkama bayongolo mosi wayende kuri na wamuyingukila, 6na waleele ti: «Mfumu, kisari kya me waneŋene munsa nzo, wabwa mambwolokoto na wuri mu kubama nkati kwa makwa.» 7Yesu wabvutula kuri nde ti: «Me nyikweende, nyimutsinikisa.» 8Mukuutu nkama bayongolo wabvutula waleele ti: «Mfumu, me nyahele kuyelemene mu kuri ti ye koto mu nzo me. Ngo leele kwaandi ntoono mosi kitsu, lo kisari kya me bee kitsiinikini. 9Mukwongo, me muutu nyiri kunsa lutumu, ngo me-meene se nyiri na bayongolo kunsa lutumu lwa me. Me ndeelaana kuri wumawu ti: "Yende", lo nde weensi; na wakaka ti: "Wasa", lo wiisiri; na kuri kisari kyaami ti: "Yirika mamama", lo yirikiri.» 10Yesu kayukaa bubwo wakimuka, na waleele kuri baba kwemunamaana ti: «Ngwanwa me nyiluleele ti: Me nyamwiini mu Isaheli muutu wuri na kanyi dyadinene dya bumabu ko. 11Me nyileele kuri beenu ti, baatu balaka sa bafumuna ku este, na ku weste, sa biisa na sa badzakala mu kudya kintwaari na Abalaami, na Isaki na Yakobe, mu Kimfumu kya mayulu. 12Kasi baala ba Kimfumu sa babatuba ku mampimbisi ma ku mbasi; kukwo kuba bidilu na nkweetulu miinu.» 13Yesu waleele kuri mukuutu nkama bayongolo ti: «Yende, buba kuri ye, bunu busiiriri kanyi mu kilookolo kinikyo, kisari [kyaandi] kyatsiinika.»

Yesu watsinikisa babeeru balaka

(Mal 1.29-34; Luk 4.38-41)

14Yesu bu kayende ku nzo Petelo, wamono nguri mukasi Petelo waneŋene, wabeele baawu. 15Yesu wabelemene kooko kwa nde, na baawu dyawa. Nde wateleme, na wabeke mu kubasalila. 16Nsinsika bu yatubuka, batwaala kuri Yesu, baatu balaka baba na mampeeve mamabi; na nde mu kitoolo kimosi wabinga mampeeve, na watsinikisa babeeru, 17Mpisi heki ma leeriri mubikiri Esaya meende mu mana. Nde ti: «Nde waholo bipfuumi byeetu na wanata mabeeru meetu.»

Batiiri kunama Yesu

(Luk 9.57-62)

18Yesu kamonaa mpuumbu baatu mu teke nde, waha lutumu lwa kweende ku simu dya mubu dyakaka. 19Mutini mangisi mosi wayisa na wamuleele ti: «Muyikisi, me sa nyanama ye mpisi ku wukwe.» 20Yesu waleele kuri nde ti: "Mibaku miri na miduku, na banoni ba yulu bari na madzaansa; ngo kasi Mwaana muutu wahele na ha kusuusa mutu". 21Mosi mu bayiki [baandi] waleele kuri nde ti: «Mfumu, ha me miswa me tekeseleeti kweedziika taata.» 22Yesu wabvutula kuri nde ti: «Nama me. Hemese bafwa bedziika bafwa baaku bo-meene.»

Yesu wadzuunisa kiteembu

(Mal 4.35-41; Luk 8.22-25)

23Bu kanwaata mu bwaatu, bayiki baandi se bamunama. 24Butoto bwatembele mu makwa kunsa mubu, kuri bwaatu bweki dyaama mu mipaku, ngo kasi nde waba tolo. 25Bakokosolaa kuri nde, bamusiimbiri, na bamuleeriri ti: «Mfumu, bvuukisa beetu, beetu tufuukiri!» 26Nde waleele kuri bo ti: «Buri beenu luri na boomo, baatu ba kanyi dyantele?» Hanaho, bu kateleme, nde waŋaŋana kiteembu na mubu. Na kidzuunu kyakinene kyayisa. 27Baatu bakimuka baleele ti: «Nkya muutu wu, bukuri biteembu na mubu bitumuma kuri nde?»

Yesu watsinikisa baatu boolo ba na mampeeve mamabi

(Mal 5.1-20; Luk 8.26-39)

28Yesu ba katubuka ku simu dya mubu dyakaka, mu nsi ya Ngadareno, baatu boolo baba na mampeeve mamabi bapala kunsa mampeembe, bamubwaana. Baluula mu kibakala, kuri muutu ti mosi haba lo kubangisina pe kulutila mu nzila yiyo. 29Mono, bo babeke mu kufula misaakulu, baleele ti: «Nki ha kakati dya ye, Mwaana Nzaambi, na beetu? Buri ye wiisiri mu kukwaamisa beetu tekekesele ntaangu yitubuka?» 30La na bo, kwaba mpuumbu bangulu yayinene yaba mu kwedya. 31Mampeeve mamabi mayingukila Yesu maleele ti: «Mbuti ku mbasi ye wutubinga, lo tuheeke kweetu mu mpuumbu bangulu yi.» 32Yesu waleele kuri bo ti: «Yendee!» Mampeeve mamo mapala na makoto mu bangulu. Na mono, mpuumbu bangulu yoyinso yabununa ku nsuku mulaandu yabwa mu mubu, na yafwiila mu maampa. 33Baba kwekebe bangulu bayitika, babvutuka ku bvula, bayaabisa myominso mimyo, na mayirimini mu baatu baba na mampeeve mamabi. 34Na mono, bvula dyodinso dyapala mu kubwaana Yesu, na bu bamumono, bamuyingukila mpisi kapala mu nkoonsi bo.

હાલમાં પસંદ કરેલ:

Mat 8: MW2013

Highlight

શેર કરો

નકલ કરો