Mat 10

Bantumu kuumi na boolo

(Mal 3.13-19; Luk 6.12-16)

1Yesu kateelaa bayiki baandi bo kuumi na boolo, wabaha lutumu lwa kubinga mampeeve mamabi, na kutsinikisa mabeeru momanso, na bipfuumi byobinso. 2Mankuumbu ma bantumu bo kuumi na boolo ngo mamama: watete Simoni, wu bakooteelaa ti Petelo, tumi Andere, mpaangi yaandi; Yakobo na Yowane mpaangi yaandi, bo boolo baala ba Dzebedayi, 3Filipo, Bartelemi, Toma na Matayi, mutori-mpaku; Yakobo dya Alafayi na Tade; 4Simoni wa ku Kana na Yuda Iskaryote, wunde waba yekele Yesu.

Budyeengi bwa bantumu kuumi na boolo

(Mal 6.7-13; Luk 9.1-6)

5Yesu wasindika bo kuumi na boolo, wabaleele ti: «Yaa lweende mu manzila ma bangooyi ko, na yaa lukoto ti mu bvula dimosi dya bari Samariya ko. 6Ngo bubvuriri bubwete yende kuri bimeeme byadziimbila bya mu nzo Isaheli. 7Bu lukweyende, lukwebikisa ti: "Kimfumu kya mayulu kikokisiri!" 8Tsinikisee babeeru, fulukisee bafwa, tsyemisee babeeru ba bwaasi, bingisee mampeeve mamabi; beenu lutaamburi kwamungengi, heenee se kwamungengi. 9Yaa luba ti na woolo, ti na mboongo dza nsoongo mu misweele myeenu ko, 10kuba pe na nkangala mu nzila, binkuta byoolo pe, masapaatu pe, luboto se pe, bukuri ngaamba wayelemene kutaambula byandya byaandi.»

11«Mu bvula bunu pe bula bu lukotiri, lo fuulee kari kuri muutu wayelemene mu kulutaambula. Dzakilee ha nzo nde natee ku luyisika haho. 12Bu lukotiri mu nzo, heenee mboto. 13Mbuti nzo yiyo yayelemene, lo hemese kiyeengi kyeenu kiba mu yo. Ngo mbuti yahele kuyelemene, lo hemese kiyeengi kyeenu kibvutuka kuri beenu-meene. 14Mpisi wunde wuhele kulutaambula, na wuhele kuyuka maampu ma beenu, habaanaa lupala mu nzo bunu pe mu bvula didyo, kubulee fufunda dya bitaambi byeenu. 15Ngwanwa me nyiluleele ti: Mu kiluumbu kya mutsuundu, sa babvula kuseembe bvula didyo ti na Sodoma na Ngomora.»

Nkwamusunu dza ntaangu yikwiisa

(Mal 13.9-13; Luk 21.12-17)

16«Mono, me nyiluheeke bunu bimeeme ha kakati dya bango-mbulu. Ngo beenee balubuka bunu banyoko, na badweeteme bunu mabeembe. 17Seenee madyeele mu baatu, bukuri sa baluyekele kuri kikuutu, na mu manzo mankutukunu ma bo, na sa balulata nkwaasulu; 18sa balunata kuri batumi na kuri bambyaasi, mu ntoono ya me, mu kuteele me kimbaangi kuri bo, na kuri bangooyi. 19Haba luyekele, lo yaa luba na boomo ko, ti buri ludzoonsolo, bunu pe, nki luleele; bukuri sa lwabaka ma luleele mu kilookolo kikyo. 20Mukwongo, kari beenu ludzoonso ko; ngo Mpeeve ya Taayi dyeenu yidzoonso mu beenu. 21Mpaangi sa yayekele mpaangi mu lufwa; taayi se mwaana waandi. Baala sa banwaanisa bataayi na banguri, na kubadzusa. 22Baatu bobanso sa balubele mu ntoono nkuumbu yaami. Ngo wunde wunamitini natee manunu sa kabvuuka. 23Mu ntaangu yibalukwaamisa mu bvula dimadi, yitikee mu dyakaka. Ngwanwa me nyiluleele, beenu lumana budyeengi mu mabvula momanso ma Isaheli ko, lo Mwaana muutu wiisiri.»

24«Muyiki wahele kubvula na muyikisi, kisari se wahele kubvula na mfumu yaandi. 25Bwayelemene mu muyiki kuri nde se kaba bunu muyikisi, na mu kisari nde se kaba bunu mfumu. Mbuti ngaa-nzo bamuleele ti Beledzebule, lo nkya myo bahele kuleele mu badzakala mu nzo nde?»

Wunde wu bayelemini kubata

(Luk 12.2-7)

26«Ngo yaa lubabata ko. Bukuri kuri kyasweeku ko, kihele kuba kyamonokono; na kuri nsweeki ko, yihele kuba yayabakina 27Mimyo mi nyiluleele me kunsa mampimbisi, leele myo kunsa buungi; na mimyo mi luyuka mu ma mamfuundu, bikisee myo ku yulu muluri. 28Yaa lubata baatu bari lo baludzusiri mu nyutu, ngo bahele kubangisina kudzusa muheebulu. Ngo kasi bateenu wunde wuri lo, bangusini kufuukisa muheebulu na nyutu ku lubila. 29Buri bakooyarikaa maseke moolo mu mupata mosi ko? Ngo kuri ti dimosi ko mu mo, diri lo disonikini ha nsi, kuri Taayi dyeenu wahele kuyaaba. 30Na mfu dza mutu dza beenu dzodzinso se dzataangu. 31Hango, yaa luba na boomo ko; beenu lubvuriri mufunu ti na banoni balaka!»

Kutaambula hoti kutuna Yesu Kiristo

(Luk 12.8-9)

32«Hango, mpisi wunde wutaambula ti nde wa me ha busu bwa baatu, lo me se sa nyataambula ti nde wa me ha busu bwa Taayi dyaami diri ku [ma] yulu; 33ngo kasi wunde wutuna me ha busu bwa baatu, lo me se sa nyamutuna ha busu bwa Taayi dyaami, diri ku [ma] yulu.»

Kari kiyeengi ko, ngo kikiindu

(Luk 12.51-53, 14.26-27)

34«Yaa lutsima kweenu ko ti me nyayisiri mu kutwaala kiyeengi ha butoto: pele, me nyahele kwiisa mu kutwaala kiyeengi ngo kikiindu. 35Mukwongo, me nyayisa mu kuhaambila muutu na taayi dyaandi, mwaana wa mukyeetu na nguri yaandi, mukasi mwaana na mukweesi wa mukyeetu. 36Bataatu ba muutu ngo baatu ba bari nzo mosi. 37Mpisi wunde wubvula kutya taayi, bunu pe nguri yaandi ti na me, lo wahele kuyelemene kuba wa me. Mpisi wubvula kutya mwaana waandi wa mubakala bunu pe wa mukyeetu ti na me, lo wahele kuyelemene kuba wa me. 38Mpisi wunde wuhele kunaanguna kuruwa dyaandi na kunama me ku mambisa, lo wahele kuyelemene kuba wa me. 39Wunde wukebe kidziingu kyaandi, lo sa kakidziimbisa; ngo wunde wudziimbisa kidziingu kyaandi mu ntoono ya me, sa kakikebe.»

Wunde wutaambula beenu lo me kataamburi

(Mal 9.41)

40«Mpisi wunde wutaambula beenu, lo me kataamburi; na wunde wutaambula me, lo wunde wampeeke kataamburi. 41Mpisi wunde wutaambula mubikiri, bukuri wu kataambula wunde mubikiri, lo sa kataambula museendu wa mubikiri; na mpisi wunde wutaambula muutu wasuunguma, bukuri wu kataamburi wunde wasuunguma, lo sa kataambula museendu wa muutu wasuunguma. 42Mbuti muutu heeri kwaandi, ti mbasa mosi kitsu, ya maampa makyoosi ma kunwa, kuri mosi mu bilesi bimabi, mu nkuumbu ya kuri ti wukaha maampa wunde muyiki, ngwanwa me nyiluleele ti, lo kadziimbisa museendu waandi ko.»

હાલમાં પસંદ કરેલ:

Mat 10: MW2013

Highlight

શેર કરો

નકલ કરો