Luk 10

Yesu wasindika bayiki makuumi nsaamu na boolo

1Ha mambisa haho, Mfumu wasoolo baatu bakimi, makuumi nsaamu [na boolo], na wabasindika boolo-[boolo] ku mankula ma nde, mu mpisi bvula na mpisi kibeendu, ku kaketi kweende nde-meene. 2Yesu waleele kuri bo ti: «Bya kutolo munsa nseke byalaka, ngo bangaamba bantele. Ngo loombee kuri ngaa-nseke, kaheeke bangaamba bakweetolo nseke yaandi.» 3Yendeenu! Mono, me nyiluheekiri bunu baala ba bimeeme ha kakati dya bango-mbulu. 4Yaa lunata kimpokoro kya mboongo ko, nkangala pe, masapaatu pe, na muutu mboto kuha pe mu nzila. 5Mu nzo ngo nzo yi lukotiri, lo leele mbeti ti: "Kiyeengi kiba mu nzo yi!" 6Na mbuti mu mwo muri mwaana wa kiyeengi, lo kiyeengi kya beenu sa kyaba ha yulu nde; mbuti pele, lo sa kyabvutuka kuri beenu. 7Dzakilee mu nzo yiyo, dyeenee na nweenee bya bo, bukuri kisari wuri na miswa mu kutaambula mufutu waandi. Yaa lupala mu nzo mosi, mu kweekoto mu yakaka. 8Mu bvula ngo bvula di lukotiri, bu balutaambiri, lo dyeenee byandya bi baluha, 9tsinikisee babeeru bari haho, na bayaabisee ti: «Kimfumu kya Nzaambi kikokisiri kuri beenu.» 10Mu bvula ngo bvula di lukoto, mbuti bahele kulutaambula, bu luri mu kupala mu manzila ma dyo, leele ti: 11«Na fuunda dya bvula diri mu bitaambi byeetu, tulukubukila. Ngo yaabeenu ti Kimfumu kya Nzaambi kikokisiri. 12Me nyileele kuri beenu ti, mu kiluumbu kikyo, sa babvula kuseembe bvula didyo ti na Sodoma.»

Mabvula mabisa kusiila kanyi mu Yesu

(Mat 11.20-24)

13«Kyaari kuri ye Koradzi! Kyaari kuri ye Betesayida! Bukuri mbuti bimaangu byayirimini kuri beenu, ngo byayirimini ku Tiro na Sidoni, nkani na kidzika bo balweeti matsaaka, na kuyoolo lufuta, nkani baketi yiinga madyeele. 14Mukwongo, mutsuundu wa beenu sa kabvula makwa, ti na wa Tiro na Sidoni. 15Heki ye Kafarnawumi, buri natee ku yulu, ye wuba wadzaangusu? Natee ku nsuku lubila, ye wusunduka.»

16«Wunde wuluywiila, lo me kaywiiriri; na wunde wulunyaafuna, lo me kanyaafuni; ngo wunde wunyaafuna me, lo waheeke me kanyaafuni.»

Mvutukulu ya makuumi nsaamu na boolo

17Makuumi nsaamu [na boolo] babvutuka mu kiminu na baleele ti: «Mfumu, na mampeeve mamabi matutumuminye mu nkuumbu yaaku!» 18Yesu waleele kuri bo ti: «Me mbee mono Satana bunu nseremi, yiyisikiri ku yulu na yibwiiri! 19Mono, me nyaluheeri lutumu mu kudyaata banyoko na bangeenge, na mpinu dzodzinso ha yulu mutaatu; kuri kitotolo ti kimosi ko, kilumonoso mpasi. 20Hango, yaa lumono kiminu, mu kuri ti mampeeve mamabi malutumumina; ngo kasi monee kiminu mbuti mankuumbu meenu matinima mu mayulu.»

Yesu wakeembe

(Mat 11.25-27, 13.16-17)

21Mu kilookolo kinikyo, Yesu wakeembe [mu] Mpeeve Yangisi na waleele ti: «Me nyikudumusa, Taata, Mfumu ya ku yulu na ya ha butoto, bukuri bangaa-madyeele na bangaa-nyaabulu, ye wabasweeke misamu mimyo, ngo wayaabisa myo kuri mwaa-baala bantele. Bunubwo Taata, ye bubwo watiiriri ti buba ha busu bwaaku. 22Me Taata wampa byobinso. Kuri muutu ti mosi wuyaari Mwaana, mbuti ka Taata ko. Kuri se muutu ti mosi wuyaari Taata, mbuti ka Mwaana ko, na kuri wunde wuri Mwaana tiiri kamuyaabisa.»

23Tumi bu kasyeeteke kuri bayiki baandi, wabaleele ha bo-bakaka ti: «Kiminu kuri miisu mimyo mikwemono ma lukwemono beenu.» 24Me nyileele kuri beenu ti: «Babikiri na bambyaasi balaka baba batya kumono, ma lukwemono beenu, ngo basii mono ko; na kuyuka ma lukweyuka beenu, ngo basii kuyuka ko.»

Nkuma ya Musamariya wamubwete

25Mono, muyikisi mangisi mosi wateleme mu kukotoso Yesu mu nsindukulu, waleele ti: «Muyikisi, me nki nyelemini kusa, mu kubaka kidziingu kyahele manunu?» 26Yesu wamufuula ti: «Nki byatinu mu mangisi? Buri ye wuri mu kutaanga?» 27Nde wabvutula, waleele ti: «"Tya Mfumu Nzaambi yaaku mu mutima waaku ndemunso, mu muheebulu waaku ndemunso, mu makwa maaku momanso, na mu dyeele dyaaku dyodinso." Na ti: "Tya mbaasi yaaku bunu ye-meene."» 28Yesu wamuleele ti: «Ye heeri mvutu yayibwete. Sa bubwo, na ye sa waba na kidziingu.» 29Ngo muyikisi mangisi mu kusaka buungu mu nde-meene, wabweese kufuula Yesu ti: «Heki mbaasi me ngo na?» 30Yesu wamubvutula ti: «Muutu mosi wanangukini ku Yerusalemi, mu kukulumuka ku Yeriko. Ha lukesu, nde wabwa ha myooko mya bangaa-bumfuna, bo bamuholo na byobinso bi kaba na byo, bamutuuta nkuba na basaa mutabula ngaambu. 31Mu kinkuma, ngaanga-nzaambi mosi, waba kulumuka mu nzila yiniyo. Bu kamumono, wakeenge nzila na waluta. 32Kisari kya Nzo-nzaambi kimosi se bunubwo, wayisa kutubuka ha kibeendu kinikyo, bu kamumono nde se wakeenge nzila. 33Ngo Musamariya mosi, waba mu budyeengi, watubuka hari muutu wunde. Bu kamumono, wamubakila ngebe. 34Bu kakokosolo, wayitila maasi na malu mu maboko maandi, na wakaanga mo. Ha kamuteeteke ha yulu mpuunda ya nde-meene, na wamunata ku nzo banzeense ya kufutila, ku kamubukisa. 35Bwiisi bu bwakya, Musamariya waholo bidenali byoolo, waha kuri wukoosalaa mu nzo banzeense, na wamuleele ti: "Bakisa muutu wu, tumi bweeri ha nyibvutuka, me nyikufuta mipata mi wubweese kusalila ha yulu mimyo."» 36Yesu wafuula: «Heki mu ye, mu bo batatu babo, lo na wuri mbaasi muutu wunde wabwiiri mu myooko mya bangaa-bumfuna?» 37Muyikisi mangisi wabvutula ti: «Wunde wamubakiri ngebe.» Yesu wamuleele ti: «Yende, ye se weyirika ma bubwo.»

Yesu ku nzo ba Malata bo na Mariya

38Bu baba mu nzila, Yesu wakoto mu bula bumosi, na mukyeetu mosi, nkuumbu Malata, wamutaambula. 39Nde waba na kibusi kimosi, kiri nkuumbu Mariya, [kiri] kaholaa dzakiri ha miilu mya Mfumu, mu kuyuka maampu maandi. 40Ngo kasi, Malata waba mutele-mutele mu ntoono bisalu byalaka. Bu kayisa, waleele ti: «Mfumu, ye wahele kunyoongo, mu kumono ti kibusi kya me wayekekele me bisalu? Muleele kabakisa me.» 41Mfumu wabvutula kuri nde ti: «Malata, Malata, ye wunyoongo na wukwekangara mu myalaka. 42Kitotolo kimosi kitsu kiri mufunu. Mariya sooriryee kikuuku kibvuriri bubwete, kiri lo bahele kumuyusula na kyo.»

હાલમાં પસંદ કરેલ:

Luk 10: MW2013

Highlight

શેર કરો

નકલ કરો