GENESA 9
9
Ta Nowa ni vana va yena.
1Kutani Xikwembu xi katekisa Nowa ni vana va yena, xi ku eka vona: “Tswalanani, mi andza, mi tata misava. 2Swiharhi hinkwaswo swa misava, ni tinyanyana hinkwato ta tilo, swi ta tshuka swi mi chava, ni hinkwaswo leswi kokovaka emisaveni, ni tinhlampfi hinkwato ta lwandle, swi vekiwile emavokweni ya n'wina. 3Hinkwaswo leswi fambaka ni leswi hanyaka swi ta va swakudya swa n'wina, ndzi mi nyikile hinkwaswo kukotisa byanyi. 4Ntsena, mi nga ka mi nga dyi nyama yi ri ni vutomi bya yona, yi nga ngati ya yona. 5Kutani ndzi ta rihisela ngati ya n'wina, byi nga vutomi bya n'wina; ndzi ta yi rihisela eka swiharhi hinkwaswo, ni ka vanhu, ndzi ta rihisela vutomi bya munhu un'wana ni un'wana eka voko ra makwavo. 6Un'wana ni un'wana la nga ta halata ngati ya munhu, ngati ya yena yi ta halatiwa hi munhukulobye; hikuva Xikwembu xi endle munhu hi xifaniso xa xona. 7Kambe n'wina, tswalanani mi andza, mi tala ni ku engeteleka emisaveni.”
8Kutani Xikwembu xi vulavula na Nowa ni vana va yena, xi ku: 9“Na mina, ndzi ta tiyisa ntwanano wa mina na n'wina ni vatukulu va n'wina endzhaku ka n'wina, 10ni leswi hanyaka hinkwaswo leswi nga na n'wina, hambi ti ri tinyanyana hambi swi ri swifuwo, hambi swi ri swiharhi swa misava, leswi nga na n'wina, ku suka eka leswi nga huma engalaveni, ku fika eka swiharhi hinkwaswo swa misava. 11Ndzi ta tiyisa na n'wina ntwanano wa mina wa leswaku nyama yin'wana ni yin'wana yi nga ka yi nga ha lovisiwi hi mati ya ndhambi, ni leswaku ku nga ka ku nga ha vi na ndhambi yin'wana leyi nga ta lovisa misava.” 12Kutani Xikwembu xi ku: “Hi wona mfungho wa ntwanano lowu ndzi wu tiyisaka exikarhi ka mina na n'wina, ni nyama yin'wana ni yin'wana leyi hanyaka leyi nga na n'wina, eka mikarhi leyi nga heriki, 13ndzi ri ndzi ta tlhoma nkwangulatilo wa mina emapapeni, kutani xi ta va xikombiso xa ntwanano lowu nga exikarhi ka mina ni misava. 14Ndzi ta ku loko ndzi hlengeleta mapapa ehenhla ka misava, nkwangulatilo wu ta humelela epapeni; 15kutani ndzi ta tsundzuka ntwanano wa mina lowu nga exikarhi ka mina na n'wina, ni leswi hanyaka hinkwaswo swa nyama yin'wana ni yin'wana, leswaku mati ma nga ha engeti ma hundzuka ndhambi leyi lovisaka swivumbiwa swa tinxaka hinkwato. 16Nkwangulatilo wu ta va kona epapeni, kutani ndzi ta wu vona, ndzi tsundzuka ntwanano lowu nga riki na ku hela, lowu nga kona exikarhi ka Xikwembu ni leswi hanyaka hinkwaswo swa nyama yin'wana ni yin'wana leyi nga emisaveni.” 17Kutani Xikwembu xi ku eka Nowa: “Hi wona lowu, mfungho wa ntwanano, lowu ndzi wu tiyisaka exikarhi ka mina ni nyama yin'wana ni yin'wana leyi nga kona emisaveni.”
18Vana va Nowa lava humeke engalaveni a a ri Xeme, na Hamu, na Yafeta; yena Hamu i tata wa Kanana. 19Hi volavo vana lavanharhu va Nowa, kutani hi vona lava misava hinkwayo yi nga tala vanhu ha vona.
20Kavaloko Nowa a sungula ku rima misava, ni ku byala vhinya. 21Kutani a nwa vhinyo, a pyopya, a hluvula tinguvu entsongeni wa yena. 22Kutani Hamu, tata wa Kanana, a vona tata wa yena a nga ri na tinguvu, a ya ambela vamakwavo va yena lavambirhi, va ri handle. 23Kambe Xeme na Yafeta va teka nkumba, va kapeka emakatleni ya vona havambirhi, va famba hi xindzhakwandzahakwana, va ya funengeta tata wa vona; mombo wa vona wu n'wi fularhela, va nga vonanga vuhava bya tata wa vona. 24Kuteloko Nowa a xalamukile vhinyo, a tiva leswi n'wana wa yena lontsongo a nga n'wi endlisa swona. 25Kavaloko a ku: “A ku rhuketeriwe Kanana! Eka vamakwavo, u ta va nandza wa malandza ya vona!” 26A engeta a ku: “A ku khensiwe Yehovha, Xikwembu xa Xeme, na Kanana a a ve nandza wa yena! 27Xikwembu a xi kurise Yafeta, a tshama emitsongeni ya Xeme, na Kanana a a ve nandza wa yena!”
28Kutani Nowa a hanya malembe ya madzana manharhu na ntlhanu wa makume endzhaku ka ndhambi. 29Masiku hinkwawo ya Nowa a ma ri malembe ya 950, kutani a fa.
હાલમાં પસંદ કરેલ:
GENESA 9: TSO29
Highlight
શેર કરો
નકલ કરો
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.